TSHIENA-BUALU TSHIA KULONGA 43
MUSAMBU WA 90 Tukoleshangane
Mua kulekela dielakana
“Nukonkonone malu onso.”—1 TES. 5:21.
LUNGENYI LUNENE
Mua kulekela dielakana didi ditulubakaja, didi difuane kutupangisha bua kuenzela Yehowa mudimu.
1-2. a) Bamue batendeledi ba Yehowa badi mua kuikala belakana bua malu kayi? b) Ntshinyi tshituamona mu tshiena-bualu etshi?
KUDI misangu itutu tuetu bonso, bakole ne bana tupeta dielakana. a Tshilejilu, elabi meji bua Ntemu wa Yehowa utshidi nsonga udi udiebeja bikala Yehowa umutabalela bushuwa. Bua bualu abu, udi mua kuelakana bua kubatijibua. Ela kabidi meji bua muanetu wa balume uvua muteke Yehowa pa muaba wa kumpala patshivuaye nsonga pamutu pa kudina ne kasuki mu dikeba dia makuta. Mpindieu ukadiye mukulaje, udi udimona ne tumakuta tukese, tukumbana anu bua kukumbaja majinga a bena mu dîku diende. Bidi bimusaka bua kudiebeja ni uvua muangate mapangadika mimpe patshivuaye nsonga. Difuanyikijila kabidi muanetu wa bakaji ukadi mukulakaje, katshiyi ne makanda a bungi. Udi mua kudiumvua mutekishibue mu mikolo bua mudiye katshiyi wenza malu avuaye wenza konso eku. Pamuapa ukadi mudiele nkonko eyi: ‘Yehowa utu untabalela menemene anyi? Bivua ne mushinga bua kudipangisha malu bua kumuenzela mudimu anyi? Ntshidi ne mushinga kudi Yehowa anyi?’
2 Tuetu katuyi bakebe mandamuna a nkonko eyi, bidi mua kutekesha mu mikolo bua kutungunuka ne kumuenzela mudimu. Mu tshiena-bualu etshi, netumone mudi kukonkonona mêyi manene a mu Bible mua kutuambuluisha bituikala ne dielakana, tuamba ne: 1) Yehowa kena ututabalela, 2) katuvua bangate mapangadika mimpe kale, ne 3) katutshiena ne mushinga kudi Yehowa.
TSHIDI TSHITUAMBULUISHA BUA KULEKELA DIELAKANA
3. Mmushindu kayi utudi mua kulekela dielakana?
3 Kulonga Dîyi dia Nzambi kudi mua kutuambuluisha bua kulekela dielakana. Dîba adi, tudi tupeta bukole, tushindama mu nyuma, ne tukumbana bimpe menemene bua ‘kushala bashindame mu ditabuja.’—1 Kol. 16:13.
4. Mmunyi mutudi mua ‘kukonkonona malu onso’? (1 Tesalonike 5:21)
4 Bala 1 Tesalonike 5:21. Mona ne: Bible udi utulomba bua ‘kukonkonona malu onso.’ Mmunyi mutudi mua kuakonkonona? Tudi mua kufuanyikija malu atudi tuitaba ne tshidi Bible wamba bua tutuishibue ne: mmalelela. Tuangatabi tshilejilu tshia nsonga udi udiebeja ni udi ne mushinga ku mêsu kua Nzambi. Mbimpe ambe anu mudiye kayi nawu ku mêsu kua Nzambi anyi? Tòo, udi ne bua ‘kukonkonona malu onso’ bua amanye mudi Yehowa umumona menemene.
5. Ntshinyi tshitudi mua kuenza bua kupeta mandamuna adi Yehowa utupesha?
5 Patudi tubala Bible, mbienze anu bu tudi “tumvua” Yehowa uyukila netu. Kadi kudi malu atudi ne bua kuenza bua kupeta mandamuna adi Yehowa utupesha. Tudi ne bua kukonkonona mvese idi itangila bualu butudi nabu. Mbimpe tubuenzele makebulula mu mikanda yetu. (Nsu. 2:3-6) Mbimpe tulombe Yehowa bua atuambuluishe mu makebulula etu au ne atufikishe ku dimanya ditshiye wamba bua bualu butudi nabu. Pashishe, tukebe mêyi manene a mu Bible ne mibelu mikuabu ya mushinga idi mua kutuambuluisha mu bualu butudi nabu abu. Mbimpe tubale kabidi malu a batendeledi ba Yehowa badibu batele mu Bible bavua pabu ne nsombelu wa buena utudi nende.
6. Mmunyi mudi bisangilu bituambuluisha bua kulekela dielakana?
6 Yehowa utu wakula kabidi netu mu bisangilu. Tuetu ne tshibidilu tshia kubibuela, tudi mua kupeta bualu mu muyuki anyi mu diandamuna didi muanetu kampanda ufila budi mua kujikija dielakana ditudi nadi. (Nsu. 27:17) Tumonayi tshitudi mua kuenza bua kulekela dielakana mu malu kampanda.
PAUDI UMONA BU NE: YEHOWA KENA UKUTABALELA
7. Nkonko kayi idi bamue mua kudiela?
7 Ukadiku mudiebeje ne: ‘Yehowa utu untabalela menemene anyi?’ Wewe udimona kuyi ne mushinga, udi mua kuela meji ne: kabiena mua kukumbana bua wewe kulua mulunda wa Mufuki wa diulu ne buloba to. Pamuapa ke muvua mukalenge Davidi muele pende meji. Wakakema bua muvua Yehowa mumanye too ne bantu betu ba tshianana aba. Ke yeye kuebeja ne: “Yehowa wanyi, muntu nnganyi bua wewe kumutangila, muana wa muntu ufuafua nnganyi bua wewe kutuma ntema yebe kudiye?” (Mis. 144:3) Nkuepi kuudi mua kupetela diandamuna dia lukonko elu?
8. Bilondeshile 1 Samuele 16:6, 7, 10-12, ntshinyi tshitu Yehowa umona kudi bantu?
8 Bible utu ulongesha ne: Yehowa utu utabalela bantu batubu bapepeja. Tshilejilu, wakatuma Samuele kua Yishai bua kuela umue wa ku bana bende ba balume manyi bua alue mukalenge wa Isalele. Yishai wakalua ne bana bende ba balume muanda mutekete kudi Samuele, kushiyaye Davidi, muanende wa mukala. b Pabi Davidi ke uvua Yehowa musungule. (Bala 1 Samuele 16:6, 7, 10-12.) Yehowa uvua mumanye tshivua Davidi menemene, uvua nsonga uvua wangata malu a mu nyuma ne mushinga wa bungi.
9. Ntshinyi tshidi tshikujadikila ne: Yehowa udi ukutabalela? (Tangila kabidi tshimfuanyi.)
9 Ela meji a mukadi Yehowa muleje ne: utu ukutabalela? Utu ukupesha mibelu mitambe buimpe bua nsombelu uudi nende. (Mis. 32:8) Yeye kayi ukutabalela, udi mua kukupesha mibelu mimpe ayi anyi? (Mis. 139:1) Wewe utumikila mibelu ya Yehowa ne umona mudiye yikuambuluisha, nebikujadikile ne: udi ukutabalela. (1 Kul. 28:9; Bien. 17:26, 27) Mmumanye muudi udienzeja bua kumuenzela mudimu. Mmumanye ngikadilu iudi nayi ne mmusue kuikala mulunda wende. (Yel. 17:10) Mmusue bua wewe pebe witabe bua kulua mulunda wende.—1 Yone 4:19.
‘Wewe mukebe Yehowa, neenze bua umupete.’ —1 Kul. 28:9. (Tangila tshikoso 9) c
PAUDI UMONA BU NE: MAPANGADIKA AUVUA MUANGAETE KALE AVUA MABI
10. Patudi tuvuluka mapangadika atuvua bangate kale, bidi mua kutusaka bua kudiela nkonko kayi?
10 Imue misangu patu bamue bantu bavuluka mapangadika avuabu bangate kale, batu badiebeja ni avua mimpe. Pamuapa bavua balekele kuenza mudimu wa makuta a bungi anyi babenge kuenza mudimu mukuabu muimpe bua badifile mu mudimu wa Yehowa. Pamuapa panyima pa bidimu bia bungi, badi mua kutuilangana ne bantu bavuabu bamanyangane nabu bavua bobu baditue mu dikeba makuta a bungi, mpindieu bamueneka ne: badi nawu a bungi. Abi bidi mua kubasaka bua kudiebeja ne: ‘Bionso bituvua badipangishe bua kuenzela Yehowa mudimu abi bivua tshianana anyi? Ndi mudipangishe mpunga wa kupeta makuta a bungi anyi?’
11. Ntshinyi tshivua tshitekeshe mufundi wa Musambu wa 73 mu mikolo?
11 Wewe muikale pebe ne nkonko idi ikusamisha muntu, ela meji a muvua mufundi wa Musambu wa 73 mumvue. Uvua umona bakuabu bamueneka bikale ne makanda a mubidi mimpe, baya kumpala mu malu abu, ne kabayi ne tunyinganyinga mu nsombelu wabu. (Mis. 73:3-5, 12) Uvua umona nsombelu wabu bu muimpe menemene, ke yeye kuela meji ne: bionso bivuaye wenza bua kuenzela Yehowa mudimu bivua tshianana. Pavuaye utuma meji ku malu au, uvua ‘ukenga dituku dijima.’ (Mis. 73:13, 14) Ntshinyi tshivuaye muenze bua dikenga adi?
12. Bilondeshile Misambu 73:16-18, ntshinyi tshivua mufundi wa Misambu muenze bua dikenga divuaye nadi adi?
12 Bala Misambu 73:16-18. Mufundi wa Misambu wakabuela muaba munsantu wa Yehowa. Uvua muaba wa ditalala uvua umuambuluisha bua kuelangana meji bimpe. Nansha muvua nsombelu wa bantu abu umueneka wa mafuta, kabavua ne ditekemena dia nsongo matuku atshivua alua to. Nunku biakamuambuluisha bua kupeta ditalala mu muoyo, mutuishibue ne: dipangadika diende dia kuenzela Yehowa mudimu divua ditambe buimpe. Ke yeye kudisuika bua kutungunuka anu ne kumuenzelawu.—Mis. 73:23-28.
13. Ntshinyi tshiudi mua kuenza wewe udiela meji bua amue mapangadika auvua muangate kale? (Tangila kabidi tshimfuanyi.)
13 Dîyi dia Nzambi didi mua kukupetesha pebe ditalala. Mushindu kayi? Ela meji a malu mimpe audi nawu, bu mudi dianyishibua kudi Yehowa ne uafuanyikije ne tshidi tshifikila bantu badi bapeta diabu difutu anu mu buloba ebu. Muoyo wabu wonso udi anu ku bidibu benza lelu bualu kabena ne ditekemena bua matuku atshilualua to. Kadi Yehowa mmukulaye wewe malu mimpe a bungi kumpala eku auvua kuyi mua kuelela meji to. (Mis. 145:16) Anji elabi meji, bu wewe kuyi muangate dipangadika dia kuenzela Yehowa mudimu, nsombelu webe uvua mua kuikala mushindu kayi? Tuikale bashindike ne: bantu badi bangata mapangadika bualu mbanange Nzambi, kabakupangila tshintu tshimpe nansha tshimue to.
Tuma meji ku malu mimpe adi Yehowa mulaye (Tangila tshikoso 13) d
PAUDI UMONA BU NE: KUENA NE MUSHINGA KUDI YEHOWA
14. Bua tshinyi bamue bantu batu bela meji ne: kabena ne mushinga? Ndukonko kayi ludibu mua kudiela?
14 Bukulakaja, masama, anyi diteketa dia mubidi bidi mua kutatshisha bamue batendeledi ba Yehowa. Badi mua kufika ku diela meji ne: kabena ne mushinga kudiye to. Badi pamuapa mua kudiebeja ne: ‘Yehowa utshitu anu ungangata ne mushinga anyi?’
15. Mufundi wa Musambu wa 71 uvua ne dishindika kayi?
15 Mufundi wa Musambu wa 71 wakaleja muvuaye mupangile pende bukole. Wakasambila, wamba ne: “Kundekedi padi bukole buanyi bushikila.” (Mis. 71:9, 18) Nansha nanku, uvua ne dishindika dia ne: yeye muenzele Yehowa mudimu ne lulamatu, neamulombole ne neamukuatshishe. Wakalonga ne: Yehowa udi usanka padi bantu benza muabu muonso bua kumuenzela mudimu nansha kabatshiyi bakumbana bua kumuenzelawu bu konso eku.—Mis. 37:23-25.
16. Bua tshinyi bakulakaje badi ne mushinga kudi Yehowa? (Misambu 92:12-15)
16 Nuenu bana betu bakulakaje, dimonayi mudi Yehowa unumona. Nansha munukadi batshioke bua bukulakaje, Yehowa udi mua kunuambuluisha bua kumuenzela mudimu ne lulamatu. (Bala Misambu 92:12-15.) Enzayi malu anudi nukokesha bua kuenza pamutu pa kusamisha meji bua anudi kanuyi mua kuenza. Tangilayi tshinudi mua kuenza: ikalayi tshilejilu tshimpe kudi bakuabu ne nubatabalele bua kubakolesha. Bambilayi mudi Yehowa munuambuluishe mu kupita kua bidimu ne munudi batekemene ne muoyo mujima ne: milayi yende neyikumbane. Ikalayi kabidi bavuluke ne: masambila anudi nuenza bua bakuabu adi mua kubambuluisha bikole. (1 Pet. 3:12) Nansha tuetu ne nsombelu wa mushindu kayi, tuetu bonso tudi ne tshitudi mua kuenzela Yehowa ne bantu bakuabu.
17. Bua tshinyi katuena ne bua kudifuanyikija ne bakuabu?
17 Wewe umvua bibi bua muudi kutshiyi wenza bia bungi mu mudimu wa Yehowa, manya ne: tshionso tshiudi umuenzela tshidi ne mushinga wa bungi kudiye. Lungenyi lua kudifuanyikija ne bakuabu luolu lukuluile, ulumbushe. Bualu Yehowa katu ufuanyikijangana nanku to. (Gal. 6:4) Mariya wakapesha Yezu mafuta a mupuya muimpe a mushinga mukole. (Yone 12:3-5) Kadi mukaji mukamba uvua mukengi wakafila tukuta tubidi tua mushinga mukese ku ntempelo. (Luka 21:1-4) Yezu kakafuanyikija Mariya ne mukaji mukamba au to. Buende yeye, bonso babidi bavua baleje muvuabu ne ditabuja. Ikala mutuishibue ne: Yehowa udi umona bionso biudi wenza bua muudi ne ditabuja kudiye ne muudi mumunange. Manya kabidi ne: nansha kakese kaudi ufila aku, Yehowa udi ukangata ne mushinga wa bungi.
18. Ntshinyi tshidi mua kutuambuluisha bua kulekela dielakana? (Tangila kabidi kazubu ka “ Dîyi dia Nzambi didi mua kukuambuluisha bua kulekela dielakana.”)
18 Kudi misangu itutu tuetu bonso tupeta dielakana. Kadi anu bu mutudi bamone, Bible udi mua kutuambuluisha bua kudilekela. Nunku luangana bua kujikija dielakana diudi nadi. Nebikuambuluishe bua kudimona ne mushinga pamutu pa kutekeshibua mu mikolo. Yehowa mmukumanye bimpe menemene. Udi wanyisha bionso biudi wenza bua muudi uteka malu ende pa muaba wa kumpala mu nsombelu webe, ne neakubeneshe anu mudiye mulaye. Ikala mutuishibue ne: Yehowa mmunange batendeledi bende bonso ba lulamatu ne udi ubatabalela.
MUSAMBU WA 111 Malu atudi ne bua kusankila
a DIUMVUIJA DIA TSHIMFUANYI: Mu tshiena-bualu etshi, tudi tuakula bua dielakana didi mua kutufikisha ku dimona bu ne: katuena ne mushinga kudi Yehowa anyi ne: tuvua bangate mapangadika mabi. Katuena tuakula bua dielakana didibu bakuile mu Bible didi dileja mudi muntu kayi ne ditabuja kudi Yehowa ne kayi witabuja milayi yende to.
b Nansha mudi Bible kayi utuambila bidimu bivua nabi Davidi pavua Yehowa mumusungule, bidi bimueneka ne: utshivua tshitende. Tangila Tshibumba tshia Nsentedi tshia dia 1/9/2011, dib. 29, tshik. 2.
