BENA Isalele bavua basue mijiki bikole. Bible udi uleja ne: misangu ya bungi bantu bavua bimba misambu ne biombelu anyi bayimba mukana patupu. Tshitupa tshinene tshia Bible ntshienza ne misambu. Tshilejilu, tudi mua kutela mukanda wa Misambu, wa Musambu wa Solomo, ne wa Muadi. Mukanda kampanda udi wakula bua nsombelu wa tshikondo tshia kale udi wamba ne: Bible udi uleja bimpe muvua bena Isalele bela mijiki pavuabu benza midimu yabu ya bungi.

Dimba misambu dituku dionso. Bena Isalele bavua bimba misambu bua kuleja bivua mu muoyo wabu. (Yesh. 30:29) Bantu bakaji bavua bimba ngoma, bimba misambu ne disanka, ne baja maja pavuabu basa mukalenge mupiamupia tshifulu tshia butumbi, pavua basalayi batshimuna mvita, ne pavuabu benza bibilu kampanda bua kutendelela Yehowa. (Bal. 11:34; 1 Sam. 18:​6, 7; 1 Bak. 1:​39, 40) Bena Isalele bavua bayimba kabidi pavuabu badila muntu uvua mufue. (2 Kul. 35:25). Mukanda wa Cyclopedia mufunda kudi McClintock ne Strong udi wamba bimpe ne: “Bena Ebelu bavua bimbi ba misambu banene.”

Dimba misambu mu lubanza lua mukalenge. Bakalenge ba Isalele bavua basue kuteleja mijiki bikole. Mukalenge Shaula wakabikila Davidi mu lubanza luende lua bukalenge bua ikale umuimbila lunzenze. (1 Sam. 16:​18, 23) Pavua Davidi mulue pende mukalenge, wakenza biombelu bia mijiki, kuenzaye ne misambu mimpe, pashishe kuenzaye kasumbu ka bimbi ba misambu bavua bayimba ku ntempelo wa Yehowa. (2 Kul. 7:6; Amo. 6:5) Mukalenge Solomo uvua ne balume ne bakaji bavua bimba misambu mu lubanza luende.—Muam. 2:8.

Dimba misambu bua kutendelela. Bualu bua mushinga mukole budi ne: bena Isalele bavua bimba misambu bua kutendelela Yehowa. Bidi nanku bualu bantu balume 4 000 bavua batumbisha Nzambi ne biombelu ku ntempelo. (1 Kul. 23:5) Bavua ne bintu bia kukumakaja, biombelu bia nshinga, nzenze ne mpungi. (2 Kul. 5:12) Kadi ki nganu bobu bavua batendelela Yehowa ne misambu to, bena Isalele ba bungi bavua pabu bimba misambu pavuabu benza luendu batangile ku Yelushalema bua kuenza bibilu bia ku tshidimu. (Mis. 120-134) Bilondeshile mifundu kampanda ya bena Yuda, bena Isalele bavua bimba Misambu ya Hallel a mu difesto dia Pasaka.

Mijiki itshidi ne mushinga wa bungi bua batendeledi ba Nzambi lelu. (Yak. 5:13) Kuimba misambu mmushindu mukuabu wa kutendelela Yehowa. (Ef. 5:19) Patudi tuimbila Yehowa misambu pamue, tudi tudiumva mu buobumue. (Kolos. 3:16) Patudi ne ntatu, kuimba misambu anyi kuyiteleja kudi kutupetesha bukole bua kunanukila. (Bien. 16:25) Kuimba misambu ke mushindu mutambe buimpe utudi tuleja mutudi ne ditabuja kudi Yehowa ne mutudi bamunange.