TSHIENA-BUALU TSHIA KULONGA 44
MUSAMBU WA 33 Upuila Yehowa bujitu buebe
Mua kupita ne malu mabi
“Kulekedi malu mabi akutshimuna, kadi tungunuka ne kutshimuna malu mabi ku malu mimpe.”—LOMO 12:21.
LUNGENYI LUNENE
Mua kupita ne malu mabi katuyi tunyanga malu.
1-2. Mmalu mabi kayi atudi mua kutuilangana nawu lelu?
YEZU wakafila tshilejilu tshia mukaji mukamba uvua anu ulomba mulumbuluishi bua akose tshilumbu tshiende biakane. Kakuyi mpata, bayidi ba Yezu bavua mua kumvua bimpe tshivua mamu au umvua bualu tshikondo atshi bavua benzela bantu malu mabi. (Luka 18:1-5) Tshilejilu atshi tshidi ne mushinga kutudi lelu bualu batu batuenzela petu malu mabi.
2 Lelu eu, kansungansunga, didimona bapite bakuabu, ne dikengeshangana mbitue ntanga tshibue; nunku kabiena bitukemesha padibu batuenzela malu mabi to. (Muam. 5:8) Kadi katutu ne meji a ne: bena Kristo netu badi mua kutuenzela malu mabi to. Nansha nanku bidi anu mua kuenzeka. Kabena bu baluishi betu to. Tshibi mbantu bapange bupuangane. Kadi mushindu uvua Yezu mupite ne malu mabi avuabu bamuenzele udi mua kutulongesha malu a bungi. Bituikala lutulu ne baluishi betu badi batuenzela malu mabi, katuena mua kutamba kuikala nalu kudi bena Kristo netu anyi? Yehowa utu umvua bishi padi bena Kristo netu ne bantu bakuabu bakuenzela malu mabi? Bidi bimutonda anyi?
3. Bitu bitonda Yehowa padibu batuenzela malu mabi anyi? Bua tshinyi?
3 Bitu bitonda Yehowa bikole badibu batuenzela malu mabi. “Yehowa mmunange kulumbuluisha kuakane.” (Mis. 37:28) Yezu udi utujadikila ne: Yehowa “neakose nsambu . . . lukasa amu pa yoyi” mu tshikondo tshiakane. (Luka 18:7, 8, MMV) Mu matuku makese emu, neajikije makenga onso ne malu mabi a mishindu yonso.—Mis. 72:1, 2.
4. Mmushindu kayi udi Yehowa utuambuluisha lelu eu?
4 Tudi bindile tshikondo tshikala malu makane atua apela. Kadi bua mpindieu, Yehowa udi utuambuluisha bua kumanya mua kupita ne malu mabi adibu batuenzela. (2 Pet. 3:13) Udi utulongesha mua kupita ne malu mabi katuyi tunyanga malu. Mmutuleje ku diambuluisha dia Muanende mutudi mua kuenza nanku. Udi utupesha mibelu itudi mua kutumikila padibu batuenzela malu mabi.
MANYA MUA KUPITA NE MALU MABI
5. Bua tshinyi mbimpe tutabalele mutudi mua kuya ne malu padibu batuenzela malu mabi?
5 Malu mabi adibu batuenzela adi mua kututapa ku muoyo ne kutubungamija. (Muam. 7:7) Ke muvua batendeledi ba Nzambi ba lulamatu bu mudi Yobo ne Habakuka bumvue. (Yobo 6:2, 3; Hab. 1:1-3) Bidi anu mua kuenzeka bua tumvue petu nanku, kadi mbimpe tumanye mua kuya ne malu bua katulu kuenza bualu bubi.
6. Tshilejilu tshia Abashaloma tshidi tshitulongesha tshinyi? (Tangila kabidi tshimfuanyi.)
6 Padi muntu utuenzela bualu bubi, tudi bafuane kudiumvua basakibue bua kumupingajila bubi ku bubi. Kuenza nanku kudi mua kunyanga kabdi malu bikole. Tuangatayi tshilejilu tshia muana wa mukalenge Davidi. Wakumvua tshiji tshikole pavua Amenona mulale ne muanabu wa bakaji Tamâ ku bukole. Bilondeshile Mikenji ya Mose, Amenona uvua wa lufu bua tshivuaye muenze atshi. (Lew. 20:17) Nansha muvua Abashaloma anu ne bua kumvua tshiji, kadi kavua ne bukokeshi bua kumushipa to.—2 Sam. 13:20-23, 28, 29.
Abashaloma wakumvua tshiji tshikole pavuabu benzele muanabu Tamâ bualu bubi (Tangila tshikoso 6)
7. Ntshinyi tshivua mufundi wa Misambu muanji kumvua bua malu mabi avuaye umona?
7 Patubi bimueneka bu ne: kabena banyoka bantu badi benza malu mabi, tudi mua kutuadija kumona ne: kabiena ne mushinga bua kuenza malu mimpe to. Tuakulayi bua mufundi wa Misambu uvua umona ne: nsombelu wa bantu babi bavua bakengesha bantu bimpe uvua umueneka bu muimpe. Wakamba ne: “Aba mbantu babi badi nsombelu muteketele misangu yonso.” (Mis. 73:12) Wakumvua kabidi bibi bua malu mabi avua enzeka, kumonaye ne: kuenzela Yehowa mudimu kakuvua ne mushinga to; ke yeye kuamba ne: “Pangakateta bua kumvua bualu ebu, bivua bintatshisha.” (Mis. 73:14, 16) Bushuwa, wakaleja ne: “Kadi meme, makasa anyi akavua mambe kupambuka, bidia bia makasa anyi bikavua bisue kuselemuka.” (Mis. 73:2) Bualu bua muomumue ebu buvua bufikile muanetu wa balume utudi mua kubikila ne: Alberto.
8. Mmunyi muvua Alberto mumvue bua bualu bubi buvuabu bamuenzele? Ntshinyi tshiakenzaye?
8 Bakashiminyina Alberto ne: uvua muibe makuta a tshisumbu. Ke kumutulabu majitu a bukulu. Bena mu tshisumbu ba bungi bakumvua bualu abu kabatshivua kabidi bamunemeka to. Udi wamba ne: “Ngakumvua tshiji tshikole, kumbungamijabi kabidi bikole.” Bua bualu abu, Alberto wakalekela kubuela mu bisangilu, kushalaye bidimu 5 kayi uyisha. Bualu ebu budi buleja tshidi mua kutufikila tuetu bakuate tshiji tshikole bua malu mabi adibu batuenzele.
IDIKIJA YEZU
9. Mmalu kayi mabi avuabu benzele Yezu? (Tangila kabidi tshimfuanyi.)
9 Yezu mmutushile tshilejilu tshitambe buimpe tshia mua kupita bimpe ne malu mabi. Tuakulayi bua malu mabi avua bena mu dîku diabu ne bantu bakuabu bamuenzele. Bana babu bakamuamba muvuaye ujimija lungenyi. Bamfumu ba bitendelelu bakamuamba pabu muvuaye wenza mudimu ne bademon. Basalayi bena Lomo bakamuseka, kumukumabu, ne ndekelu wa bionso kumushipabu. (Mâko 3:21, 22; 14:55; 15:16-20, 35-37) Kadi Yezu wakatantamena bionso abi, kakapingaja bubi ku bubi to. Tshilejilu tshiende tshidi tshitulongesha tshinyi?
Yezu mmutushile tshilejilu tshimpe tshia mutudi mua kupita ne malu mabi (Tangila tshikoso 9, 10)
10. Ntshinyi tshivua Yezu muenze pavuabu bamuenzele malu mabi? (1 Petelo 2:21-23)
10 Bala 1 Petelo 2:21-23. a Yezu mmutushile tshilejilu tshitambe buimpe tshia kulonda padibu batuenzela malu mabi. Uvua mumanye dîba dia kupuwa ne dia kuakula. (Mat. 26:62-64) Imue misangu pavuabu bamushiminyina malu, uvua ushala anu mupuwe. (Mat. 11:19) Pavuaye wakula, kavua upenda bantu bavua bamukengesha anyi ubafunyina bua kubenzela bibi to. Uvua udikanda bualu uvua “muditeke yeye muine mu bianza bia Eu udi ulumbuluisha ne buakane.” Yezu uvua mutuishibue ne: Yehowa uvua mumanye muvuabu bamukengesha kayi ne bualu bubi buvuaye muenze. Uvua mushindike ne: Yehowa neajikije malu mabi onso mu tshikondo tshiakanyine.
11. Ndîba kayi ditudi mua kuakula anyi kubenga kuakula? (Tangila kabidi tshimfuanyi.)
11 Tumanyayi tshia kuamba padibu batuenzela malu mabi, dîba adi nebileje ne: tudi tuidikija Yezu. Tudi mua kulengulula tumalu tukese tudibu batuenzela anyi kushala bapuwe bua katulu kuamba dîyi didi mua kunyanga malu. (Muam. 3:7; Yak. 1:19, 20) Kudi misangu idibi mua kutulomba bua kuakuila bantu badibu bakengesha anyi bua kuakuila bulelela. (Bien. 6:1, 2) Tudienzejayi ne muetu muonso bua kuikala batukije, bikale kabidi ne kanemu patudi tuakula.—1 Pet. 3:15. b
Padibu batuenzela malu mabi, mbimpe tuidikije Yezu, tusungula tshikondo tshimpe tshia kuakula ne mushindu wa kuakula anu muvuaye muenze (Tangila tshikoso 11, 12)
12. Leja mutudi mua kuditeka tuetu bine mu bianza bia “Eu udi ulumbuluisha ne buakane.”
12 Tuditekayi tuetu bine mu bianza bia “Eu udi ulumbuluisha ne buakane” bua kuleja kabidi mutudi tuidikija Yezu. Padi bakuabu batuamba anyi batuenzela malu mabi, tuikale batuishibue ne: Yehowa mmumanye. Dîba adi nebituambuluishe bua kutantamena malu mabi au bualu tudi bamanye ne: ndekelu wa bionso, Yehowa neakaje malu. Tuetu balekeele Yehowa malu mu bianza, katuakuikala anu ne tshiji anyi kushala balaminangane munda to. Tshiji tshidi mua kutufikisha ku dienza bualu bubi, kutujimijila disanka, ne kunyanga malanda etu ne Yehowa.—Mis. 37:8.
13. Ntshinyi tshidi mua kutuambuluisha bua kutungunuka ne kunanukila, bikale ne lutulu padibu batuenzela malu mabi?
13 Mu bulelela, katuena mua kuidikija Yezu ne mu katoba to. Kudi misangu itudi mua kuenza tshintu anyi kuamba bualu budi mua kulua kutunyingalaja. (Yak. 3:2) Amue malu mabi adibu batuenzele adi mua kutushiya ne tunyinganyinga matuku etu onso a muoyo. Wewe ne tunyinganyinga tua nanku, ikala mutuishibue ne: Yehowa mmumanye muudi umvua. Nansha Yezu mmumanye muudi umvua bualu bavua bamuenzele pende malu mabi. (Eb. 4:15, 16) Pa kumbusha tshilejilu tshia Yezu tshidi Yehowa mutupeshe, udi utupesha kabidi mibelu idi mua kutuambuluisha bua kumanya tshia kuenza padibu batuenzela malu mabi. Tukonkononayi mvese ibidi ya mu mukanda wa Lomo idi mua kutuambuluisha.
“NUSHILE TSHIJI MUABA”
14. ‘Kushila tshiji tshia Nzambi muaba’ kudi kumvuija tshinyi? (Lomo 12:19)
14 Bala Lomo 12:19. Mupostolo Paulo wakalomba bena Kristo bua ‘kushila tshiji tshia Nzambi muaba.’ Tudi tushila tshiji tshia Yehowa muaba patudi tumulekela yeye nkayende ujikija malu mabi dîba didiye musue ne mu mushindu udiye musue. Pavuabu benzela muanetu John malu mabi, wakamba ne: “Ngakakanda tshiji tshianyi bua tshilu kuenza bualu bubi to. Kadi kabivua bipepele to. Lomo 12:19 wakangambuluisha bua kuikala ne lutulu ne kueyemena Yehowa.”
15. Bua tshinyi mbimpe kuindila bua Yehowa akaje malu?
15 Wewe windila bua Yehowa nkayende akaje malu, kuakusamisha mutu anyi kuakuikala ne tunyinganyinga tutu muntu umvua padiye ukeba kudijikijila tshilumbu to. Yehowa mmusue kukuambuluisha. Mbienze anu bu udi ukuambila ne: ‘Ndekeele malu mabi au, nenjikijangane nawu.’ Tuetu tuitaba tshidi Yehowa mutulaye tshia ne: ‘Meme nennufute,’ netulengulule malu mabi adibu batuenzele, batuishibue ne: neaajikije mu mushindu mutambe buimpe. Ke tshivua tshiambuluishe John utukadi batele. Wakamba bua bualu buvuabu bamuenzele ne: “Meme muindile bua Yehowa akaje malu, neaakaje bimpe menemene kumpita meme.”
“TUNGUNUKA NE KUTSHIMUNA MALU MABI KU MALU MIMPE”
16-17. Mmunyi mudi disambila mua kutuambuluisha bua ‘kutungunuka ne kutshimuna malu mabi ku malu mimpe.’ (Lomo 12:21)
16 Bala Lomo 12:21. Paulo wakalomba bena Kristo bua ‘kungunuka ne kutshimuna malu mabi ku malu mimpe.’ Yezu wakamba mu Muyuki wende wa pa mukuna ne: “Tungunukayi ne kunanga bena lukuna benu, ne kusambila bua badi banukengesha.” (Mat. 5:44) Ke tshiakenzaye menemene. Pamuapa tudi tuvuluka muvuaye ukenga ku mutshi kuvuabu bamupopele kudi basalayi bena Lomo. Bavua bamukengeshe ne tshikisu tshia bungi ne dimupopela adi divua dimusamisha mubidi bikole menemene.
17 Malu mabi kaakatshimuna Yezu to. Pamutu pa kubelaye mulawu, wakasambila, wamba ne: “Tatu, bafuila luse, bualu ki mbamanye tshidibu benza to.” (Luka 23:34) Tuetu tusambila bua bantu badi batuenzela malu mabi, katuakushala nangananga babakuatshile tshiji anyi babalamine munda to. Katuakuikala tubamona mu mushindu mubi to.
18. Mmunyi muvua disambila diambuluishe Alberto ne John bua kupita ne malu mabi?
18 Disambila divua diambuluishe bana betu babidi batukadi batele mu tshiena-bualu etshi bua kupita ne malu mabi avuabu babenzele. Alberto udi wamba ne: “Ngakasambidila bana betu bua malu mabi avuabu bangenzele. Ngakalomba Yehowa misangu ne misangu bua kungambuluisha bua mpue malu au muoyo.” Bualu buimpe budi ne: Alberto ukadi mpindieu wenzela Yehowa mudimu ne lulamatu. John udi wamba ne: “Ngakasambidila muanetu wa balume uvua muntape ku muoyo. Ngakasambila nanku misangu ya bungi. Biakangambuluisha bua kumufuila luse ne bua kubenga kumuangata bu muntu mubi. Ngakapeta ditalala mu muoyo.”
19. Bu mututshidi mu buloba bubi ebu, ntshinyi tshitudi ne bua kuenza? (1 Petelo 3:8, 9)
19 Kumpala kua kubutulabu ndongoluelu wa malu eu, bantu nebatuenzele anu malu mabi. Nansha nanku, tutungunuke anu ne kulomba Yehowa diambuluisha. Tuidikijayi kabidi mushindu uvua Yezu uya ne malu pavuabu bamuenzela malu mabi ne tutungunukayi ne kutumikila mêyi manene a mu Bible. Dîba adi, netuikale ne dishindika dia ne: Yehowa neatubeneshe bikole.—Bala 1 Petelo 3:8, 9.
MUSAMBU WA 38 Neakukoleshe
a Mu 1 Petelo nshapita 2 ne 3, mupostolo Petelo mmuakulamu bua muvuabu benzela bena Kristo ba bungi ba mu bidimu lukama bia kumpala malu mabi kudi bamfumu babi anyi bua muvuabu benzela bakaji bena Kristo malu mabi kudi babayabu bavua kabayi bena Kristo.—1 Pet. 2:18-20; 3:1-6, 8, 9.
b Tangila filme wa Mudi dinanga ditufikisha ku ditalala dia bushuwa mu jw.org.
