1. Mupostolo Paulo uvua umona basadidi ba mudimu mushindu kayi?

 BASADIDI ba mudimu batu benza mudimu wa mushinga mukole mu tshisumbu. Mupostolo Paulo uvua wanyisha balume ba lulamatu aba bikole. Tshilejilu, pakafundilaye bena Kristo ba mu Filipoyi, wakatumina basadidi ba mudimu ne bakulu muoyo.—Filip. 1:1.

2. Mmunyi mudi muanetu Luis umvua bua mudiye mulue musadidi wa mudimu?

² Bana betu ba balume batu bumvua disanka dia bungi patubu balua basadidi ba mudimu, nansha bobu bansonga anyi bakulumpe. Tshilejilu, muanetu Devan wakalua musadidi wa mudimu pavuaye ne bidimu 18. Kadi muanetu Luis wakalua yeye musadidi wa mudimu pakavuaye ne bidimu bipite pa 50. Wakamba anu bu basadidi ba mudimu bakuabu bonso ne: “Ndi ngumvua disanka dia bungi dia kuenza mudimu wa busadidi eu, nangangana pandi ngela meji a mudi bana betu bannange bikole.”

3. Nnkonko kayi ituandamuna?

³ Biwikale muanetu wa balume mumane kubatijibua, kuenaku mua kudifundila tshipatshila tshia kulua musadidi wa mudimu anyi? Ntshinyi tshidi mua kukusaka bua kuenza nanku? Ngikadilu kayi idi Bible ukulomba bua kukumbaja? Mu tshiena-bualu etshi, netuandamune nkonko eyi. Kadi tuanjayi kumona mudimu udi nawu basadidi ba mudimu.

MUDIMU UDI NAWU BASADIDI BA MUDIMU

4. Basadidi ba mudimu batu ne mudimu kayi? (Tangila kabidi tshimfuanyi.)

⁴ Musadidi wa mudimu mmuanetu wa balume ukadi mubatijibue udi mutekibue ku diambuluisha dia nyuma muimpe bua kuambuluisha bakulu mu midimu ya bungi ya mushinga ya mu  tshisumbu. Bamue basadidi ba mudimu batu benza bua bamanyishi bikale ne teritware ne mikanda mikumbane bua mudimu wa buambi. Bakuabu batu benza mudimu wa dikolopa mu Nzubu wa Bukalenge ne dimulama. Batu kabidi bakidila bantu mu bisangilu bua kubapesha miaba ne benza mudimu ku bisanji bia mêyi ne bindidimbi. Midimu ya bungi itubu benza itu ya diambuluisha tshisumbu mu malu kampanda. Kadi basadidi ba mudimu batu nangananga bantu ba mu nyuma. Mbanange Yehowa ne batu batumikila mikenji yende miakane. Batu kabidi banange bena Kristo nabu bikole. (Mat. 22:​37-39) Ntshinyi tshidi muanetu wa balume mua kuenza bua kulua musadidi wa mudimu?

5. Ntshinyi tshidi muanetu wa balumue mua kuenza bua kulua musadidi wa mudimu?

⁵ Mu Bible mudi ngikadilu milomba idi bana betu ba balume mua kukumbaja bua kulua basadidi ba mudimu. (1 Tim. 3:​8-10, 12, 13) Wewe ukonkonona ngikadilu ayi ne udienzeja bua kuikala nayi, udi mua kulua musadidi wa mudimu. Kadi udi ne bua kuanji kuela meji a tshidi tshikusaka bua kulua musadidi wa mudimu.

TSHIDI TSHIKUSAKA NTSHINYI?

6. Ntshinyi tshidi mua kukusaka bua kuenzela bena Kristo nebe mudimu kayi wonso? (Matayi 20:28; tangila kabidi tshimfuanyi tshia pa.)

⁶ Yezu Kristo ke tshilejilu tshietu tshinene. Uvua wambuluisha bantu bualu uvua mubanange, munange kabidi Tatu wende. Dinanga adi ke divua dimusake bua kuenza mudimu bikole ne kuenzela bantu malu avua bamue bamona bu ne: kaavua ne mushinga to. (Bala Matayi 20:28; Yone 13:​5, 14, 15) Biobi ne: dinanga ke didi dikusaka bua kulua musadidi wa mudimu, Yehowa neakubeneshe ne neakuambuluishe bua kukumbaja ngikadilu milomba.—1 Kol. 16:14; 1 Pet. 5:5.

7. Bua tshinyi ki mbimpe muanetu wa balume udi ukeba kulua musadidi wa mudimu ikale ne lungenyi lua ne: neikale ku mutu kua bakuabu?

⁷ Bantu batu batamba kuanyisha bantu batu badiangata ne mushinga wa bungi. Kadi kabitu nanku mu bulongolodi bua Yehowa to. Muanetu wa balume udi munange bakuabu anu bu Yezu, kena mua kujinga bua kuikala ne bukokeshi ku mutu kua bakuabu anyi kuenza bua bamone ne: udi ne mushinga to. Bobu bateke muntu udi ujinga malu a mushindu au musadidi wa mudimu, pamuapa neikale ubenga bua kuenza imue midimu mipuekele bua  kutabalela mikoko ya Yehowa ya mushinga mukole. Udi mua kumona ne: midimu ayi ki mmimukumbanyine to. (Yone 10:12) Yehowa kakubenesha nansha bionso bidiye wenza to, bualu udi udibandisha.—1 Kol. 10:​24, 33; 13:​4, 5.

8. Mmubelu kayi uvua Yezu mupeshe bapostolo bende?

⁸ Kuvua misangu ivua too ne balunda ba Yezu ba pa muoyo bajinge kupeta imue midimu, tshibi bikale ne meji mabi. Tuakulayi bua Yakobo ne Yone. Bakalomba Yezu bua abapeshe muanzu munene mu Bukalenge buende. Yezu kakabela diboko muulu bua bualu abu to. Kadi wakumvuija bapostolo bonso 12 ne: “Muntu yonso udi musue kulua munene munkatshi muenu, udi ne bua kuikala muena mudimu wenu, ne muntu yonso udi musue kuikala wa kumpala munkatshi muenu, udi ne bua kuikala mupika wa bonso.” (Mâko 10:​35-37, 43, 44) Bana betu ba balume badi basue kulua basadidi ba mudimu ne lungenyi lua kuenzela bena Kristo nabu mudimu, nebikale dibenesha kudi tshisumbu.—1 Tes. 2:8.

TSHIDI MUA KUKUPETESHA DIJINGA DIA KULUA MUSADIDI WA MUDIMU

9. Ntshinyi tshidi mua kukupetesha dijinga dia kulua musadidi wa mudimu?

⁹ Bulelela, udi munange Yehowa ne udi musue kuenzela bakuabu mudimu. Nansha nanku, udi mua kudimona kuyi ne dijinga dia kuenza midimu ya basadidi ba mudimu to. Ntshinyi tshidi mua kukupetesha dijinga dia kulua musadidi wa mudimu? Ela meji a disanka diudi mua kupeta paudi wenzela bena Kristo nebe mudimu. Yezu wakamba ne: “Disanka dia kufila ndipite dia kuangata.” (Bien. 20:35) Ke tshivuaye wenza. Uvua umvua disanka dia bungi bua muvuaye wambuluisha bakuabu. Wewe pebe udi mua kudipeta.

10. Mmunyi muvua Yezu muleje ne: uvua ne disanka dia kuenzela bakuabu mudimu? (Mâko 6:​31-34)

¹⁰ Tuangate tshilejilu tshia muvua Yezu muleje ne: uvua ne disanka dia kuenzela bakuabu mudimu. (Bala Mâko 6:​31-34.) Umue musangu, yeye ne bapostolo bende bavua batshioke. Bakasa luendu batangile muaba wa nkayabu bua kuikisha. Kadi bantu ba bungi bakafika muaba au kumpala kuabu. Yezu uvua anu mua kubenga bua kubalongesha, bualu yeye ne bayidi bende “kabavua bapete nansha dîba dia kudia biakudia to.” Uvua mua kubalongesha nansha bualu bumue anyi abidi, pashishe kubambila bua bapingane. Kadi bu muvuaye mubanange, “wakatuadija kubalongesha malu a bungi.” Wakatungunuka ne kubalongesha too ne pavua ‘dîba dimane kuya.’ (Mâko 6:35) Uvua mubalongeshe nanku bualu uvua ‘ubumvuila luse,’ ki mbualu uvua udimona muenzejibue to. Uvua musue kubalongesha bualu uvua mubanange. Kuenzela bakuabu mudimu kuvua kumupetesha disanka.

11. Mmunyi muvua Yezu muambuluishe bantu bavua bamuteleja? (Tangila kabidi tshimfuanyi.)

¹¹ Yezu kavua mulongeshe musumba wa bantu au patupu to, wakenza tshishima, kuvudijaye biakudia, pashishe kuambilaye bayidi bende bua kubabanyinabi. (Mâko 6:41) Pavuaye muenze nanku, uvua mulongeshe bayidi mua kuambuluisha bakuabu. Wakabaleja kabidi ne: midimu ya diambuluishangana eyi itu ne mushinga wa bungi. Mmidimu ya buena itu basadidi ba mudimu benza. Elabi meji disanka divua nadi bapostolo pavuabu babanyina bantu biakudia too ne pavuabu ‘bonso badie, bukute.’ (Mâko 6:42) Eu ki mmusangu wa kumpala uvua Yezu muteke majinga a bakuabu kumpala kua ende to. Wakenzela bakuabu mudimu mu nsombelu wende mujima pavuaye pa buloba. (Mat. 4:23; 8:16) Yezu uvua musue kulongesha bakuabu ne kutabalela majinga abu. Kakuyi mpata, neumvue disanka wewe ne dijinga dia kulua musadidi bua kuambuluisha bakuabu.

12. Bua tshinyi yonso wa kutudi kena ne bua kuela meji ne: kena ne tshia nsongo tshidiye wenza mu tshisumbu?

 ¹² Wewe umona ne: kuena ne dimanya dia pa buadi mu bualu kampanda, kuteketshi mu mikolo to. Kakuyi mpata, udi mua kuikala ne ngikadilu idi ikuvuija muntu wa mushinga mukole mu tshisumbu tshienu. Wewe ukonkonona mêyi a Paulo adi mu 1 Kolinto 12:​12-30 ne pashishe musambile, nebikuambuluishe. Mêyi ende au adi aleja patoke ne: anu bu batendeledi bakuabu ba Yehowa, wewe pebe udi ne mushinga wa bungi ne tshisumbu tshidi nebe dijinga. Wewe kuyi muanji kukumbaja ngikadilu milomba bua kulua musadidi wa mudimu, kupuekeshi maboko to. Kadi enza anu tshionso tshidi tshikengela bua kuenzela Yehowa mudimu bua kuambuluisha bena Kristo nebe. Ikala mutuishibue ne: bakulu nebakupeshe midimu iudi mua kukokesha bua kuenza.—Lomo 12:​4-8.

13. Ntshinyi tshitudi mua kuamba bua ngikadilu ya bungi idibu balombe basadidi bua kukumbaja?

¹³ Bualu bukuabu budi ne bua kukusaka bua kulua musadidi wa mudimu budi ne: ngikadilu ya bungi idibu balombe basadidi bua kukumbaja ngidi bena Kristo bonso ne bua kuikala nayi. Mu bulelela, bena Kristo bonso badi ne bua kusemena pabuipi ne Yehowa, kupeta disanka dia kufila, ne kuikala tshilejilu tshimpe. Ntshinyi tshidi muanetu wa balume mua kuenza menemene bua kulua musadidi wa mudimu?

TSHIA KUENZA BUA KULUA MUSADIDI WA MUDIMU

14. ‘Kuikala muntu wa kunemekibua’ kudi kumvuija tshinyi? (1 Timote 3:​8-10, 12)

¹⁴ Tumonayi imue ngikadilu idi mu 1 Timote 3:​8-10, 12. (Bala.) Musadidi wa mudimu udi ne bua ‘kuikala muntu wa kunemekibua.’ Badi mua kukudimuna kabidi tshiambilu etshi ne: “muntu udi mukumbanyine kanemu,” “muntu wa kueyemena,” anyi “muntu udi wenza malu adi asaka bakuabu bua kumunemeka.” Abi kabiena biumvuija ne: musadidi wa mudimu kena mua kuseka ne bantu anyi kubelesha bilele to. (Muam. 3:​1, 4) Kadi udi ne bua kuenza midimu yonso idiye nayi ne muoyo mujima. Yeye wenza bimpe midimu idibu bamupesha mu tshisumbu ne uyikija, bena Kristo nende nebamone ne: mmuntu wa kueyemena ne nebamunemeke.

15. Padibu bambe ne: “kabayi bena mêyi abidi” ne “kabayi ne lukuka lua bintu bipetela mu njila mubi,” bidi biumvuija tshinyi?

¹⁵ Padibu bambe ne: “kabayi bena mêyi  abidi,” bidi biumvuija ne: musadidi wa mudimu udi ne bua kuikala muntu udi wamba bulelela, muena bululame ne muntu wa kueyemena. Udi ne bua kukumbaja malu adiye ulaya bakuabu, kayi ubadinga to. (Nsu. 3:32) Padibu bambe ne: “kabayi ne lukuka lua bintu bipetela mu njila mubi,” bidi biumvuija ne: udi ne bua kuikala ne bululame mu midimu idiye wenza ne mu malu a makuta. Kena ne bua kudiila bena Kristo nende pambidi to.

16. a) Padibu bambe ne: “kabayi badifila ku mvinyo wa bungi,” bidi biumvuija tshinyi? b) Kuikala ne “kondo ka muoyo katoke” kudi kumvuija tshinyi?

¹⁶ Padibu bambe ne: “kabayi badifila ku mvinyo wa bungi,” bidi biumvuija ne: musadidi wa mudimu kena mua kuditua mu dinua dia maluvu makole anyi kumanyika bu kanuayi munene to. Kuikala ne “kondo ka muoyo katoke” kudi kumvuija ne: udi wenza malu bilondeshile mikenji ya Yehowa. Nansha mudiye mupange bupuangane, udi ne ditalala dia mu muoyo bualu udi mu malanda mimpe ne Yehowa.

17. ‘Kuteta muntu bua kujadika bikalaye mukumbane,’ nkuenza tshinyi? (1 Timote 3:10; tangila kabidi tshimfuanyi.)

¹⁷ Padibu bambe ne: “banji kuteta bantu aba bua kujadika bikalabu bakumbane,” bidi biumvuija ne: muanetu wa balume ukadi muleje mudiye muntu wa kueyemena mu midimu ivua bakulu bamupeshe. Nunku padi bakulu bakupesha mudimu wa kuenza, londa bimpe bimpe mibelu ne buludiki budi bulongolodi buetu bufile. Dienzeja bua kumanya tshiudi ne bua kuenza menemene, kumanya kabidi ne dîba didi dikengela kuwujikija. Paudi wenza mudimu au bimpe, bena Kristo nebe bakuabu nebamone ne nebakuanyishe bua muudi uya kumpala. Nuenu bakulu, dienzejayi bua kulongesha bana betu ba balume bakadi babatijibue. (Bala 1 Timote 3:10.) Mu tshisumbu tshienu muomu bana betu ba balume bakadi babatijibue ba bidimu 10 too ne 14 anyi kupita apu badi ne tshibidilu tshia kudilongela Bible ne kulongolola bisangilu, kufilamu mandamuna ne kuyisha, nudi mua kubapesha midimu idibu mua kukokesha bua kuenza. Au ke mushindu unudi ‘nubateta bua kujadika bikalabu bakumbane.’ Nunku nansha pakumbajabu bidimu kutuadijila ku 17 too ne ku 19, badi pamuapa mua kukumbana bua kulua basadidi ba mudimu.

18. Padibu bambe ne: “kabayi ne bualu budibu bababanda nabu,” bidi biumvuija tshinyi?

¹⁸ Padibu bambe ne: “kabayi ne bualu budibu bababanda nabu,” bidi biumvuija ne: musadidi wa mudimu kena ne bua kuikala muntu udibu  babanda ne bualu bubi to. Tudi bamanye ne: badi mua kushiminyina muena Kristo malu anu muvuabu bashiminyine Yezu. Wakambila bayidi bende ne: nebabashiminyine pabu malu. (Yone 15:20) Kadi wewe muikale ne bikadilu bimpe anu bu Yezu, bantu nebakule bimpe bua bualu buebe mu tshisumbu.—Mat. 11:19.

19. Padibu bambe ne: “bikale ne mukaji umue,” bidi biumvuija tshinyi?

¹⁹ Padibu bambe ne: “bikale ne mukaji umue,” bidi biumvuija ne: musadidi wa mudimu udi ne bua kutumikila mukenji wa Yehowa wa ne: dibaka didi ne bua kuenzeka pankatshi pa mulume umue ne mukaji umue. Mmukenji udi bena Kristo bonso ne bua kutumikila. (Mat. 19:​3-9) Mulume muena Kristo kena ne bua kuenda masandi nansha kakese. (Eb. 13:4) Udi kabidi ne bua kuikala ne lulamatu kudi mukajende. Kena ne bua kuenzela bantu bakaji bakuabu malu a mananga to.—Yobo 31:1.

20. Mmunyi mudi muanetu wa balume mua kutabalela bena mu dîku diende “bimpe”?

²⁰ Padibu bambe ne: “balombola bana babu ne ba mu nzubu muabu bimpe,” bidi biumvuija ne: muanetu wa balume yeye muikale mfumu wa dîku, udi ne bua kulombola ba mu nzubu muende mudibi bikengela. Udi ne bua kuikala ne tshibidilu tshia kuenza ntendelelu wa mu dîku ne tshia kuyisha ne muena mu dîku diende yonso, kuoku mushindu. Mbimpe ambuluishe bana bende bua kudia malanda ne Yehowa. (Ef. 6:4) Tatu udi utabalela dîku diende udi mua kukumbana bua kutabalela tshisumbu.—Fuanyikija ne 1 Timote 3:5.

21. Wewe kuyi muanji kulua musadidi wa mudimu, ntshinyi tshiudi ne bua kuenza?

²¹ Wewe muanetu wa balume, biwikala kuyi muanji kulua musadidi wa mudimu, suaku ubale malu adi mu tshiena-bualu etshi ne usambile bua bualu abu. Konkonona ngikadilu idibu balombe basadidi ba mudimu bua kukumbaja ne dienzeja bua kuyipeta. Nanga Yehowa ne bena Kristo nebe bikole. Ela meji a tshidi tshikusaka bua kuikala ne dijinga dia kubenzela mudimu. (1 Pet. 4:​8, 10) Wewe mulue musadidi wa mudimu bua kuenzela bena Kristo nebe mudimu, neupete disanka dia bungi. Yehowa atambe kubenesha bionso biudi wenza bua kulua musadidi wa mudimu!—Filip. 2:13.