KAKUYI mpata, udi usanka bua mapa mashilashilangane adi Yehowa mutupeshe; nansha dia kudisunguila tshiudi mua kuenza nawu. Bualu bua mushinga budi ne: Bible udi ubikila mvinyo ne: ndipa dia kudi Nzambi; udi mene wamba ne: “Diampa ndienza bua tuseku, ne mvinyo udi wenza bua muoyo wikale usankisha.” (Muam. 10:​19; Mis. 104:​15) Pamuapa ukadi mumone mudi bamue bantu bapete ntatu bua kunua kua maluvu. Bualu bukuabu, pa buloba bujima bantu badi ne mmuenenu ne mikenji mishilashilangane bua dinua dia maluvu. Kadi tshidi mua kuambuluisha bena Kristo bua kuangata mapangadika mimpe bua dinua dia maluvu ntshinyi?

Nansha tuetu basombele muaba kayi anyi bakole ne bilele kayi, tuetu balekele mmuenenu wa Nzambi ulombola meji etu, utuambuluisha kabidi bua kuangata mapangadika, nebituambuluishe bikole ne netupete disanka dia kashidi.

Anu munukadi bamone, bantu ba bungi batu banua maluvu pa tshibidilu anyi baanua bibi. Bamue batu baanua bualu atu abasanguluja. Bakuabu batu baanua bua kupua malu adi mabatonde muoyo. Miaba mikuabu batu bamona batu banua maluvu a bungi bu bantu bakanguke lungenyi ne bena dikima.

Bena Kristo bobu kabatu bela meji nanku to. Kadi, badi balonda buludiki bua kudi Mufuki wabu wa dinanga. Tshilejilu, udi utumanyisha malu mabi atufikila tuetu tunua maluvu tukuatshika. Pamuapa tukadi babale Nsumuinu 23:​29-35 udi wakula bua amue malu mabi adi afikila muntu udi ukuatshika maluvu. a Daniel udi musombele ku Mputu udi uvuluka nsombelu uvuaye nende kumpala kua kulua Ntemu wamba ne: “Kunua maluvu a bungi kuakamfikisha ku diangata mapangadika avua kaayi ne mutu, akanshiya ne buôwa.”

Mmunyi mudi muena Kristo mua kuenza malu bimpe ne dipa dia kudisunguila malu, ne kuepuka ntatu itu muntu upeta yeye unua maluvu a bungi? Mpadiye ulekela mmuenenu wa Nzambi bua maluvu ulombola meji ne bienzedi biende.

Tumonayi tshidi Bible wamba bua maluvu ne amue malu atu asaka bantu bua kunua maluvu.

Dîyi dia Nzambi kadiena dikandika kunua maluvu pa nnuinu to. Kadi, didi dileja mudi kunua mvinyo kusankisha muntu diamba ne: “Udie biakudia biebe ne disanka, ne unue mvinyo webe ne muoyo wa disanka.” (Muam. 9:7) Yezu wakanua mvinyo musangu mukuabu, nansha batendeledi ba Yehowa ba lulamatu bakuabu bakamunua pabu.​—Mat. 26:​27-29; Luka 7:​34; 1 Tim. 5:23.

Kadi, nansha mudi Bible kayi ukandika dinua maluvu, udi ukandika diakuatshika. Udi wamba ushindika ne: “Kanukuatshiki mvinyo to.” (Ef. 5:​18) Udi mene uleja ne: “Bakuatshiki ba maluvu, . . . kabakupiana Bukalenge bua Nzambi to.” (1 Kol. 6:​10) Yehowa udi ukandika ukandikilamu bunuavi ne dikuatshika dia maluvu. Tutu tulonda mmuenenu wa Nzambi bua maluvu pamutu pa kulonda wa bantu ba muaba utudi.

Bamue batu bela meji ne: badi mua kunua maluvu a bungi kabayi bakuatshika to. Kadi mu bulelela kuenza nanku kudi ne njiwu minene. Bible udi uleja patoke ne: Kuikala “bapika ba mvinyo wa bungi” kudi kufikisha muntu ku dinyanga bikadilu biende anyi malanda ende ne Yehowa. (Tito 2:3; Nsu. 20:1) Yezu uvua mene muambe ne: “Bunuavi” budi mua kupangisha muntu bua kubuela mu Bulongolodi bupiabupia. (Luka 21:​34-36) Kadi  ntshinyi tshidi mua kuambuluisha muena Kristo bua kapetshi njiwu yonso idi ifumina ku dinua maluvu?

Muntu yeye mulekele bilele bia muaba udiye mukolele bilombola meji ende bua dinua maluvu, nnjiwu minene. Mu tshilumbu tshia didia ne dinua, bena Kristo batu badienzeja bua kusankisha anu Yehowa. Bible udi wamba ne: “Nansha nuenu nudia anyi nunua, anyi nuenza bualu bukuabu kayi buonso, nuenze malu onso bua butumbi bua Nzambi.” (1 Kol. 10:​31) Mona nkonko itudi mua kudiela ne mêyi manene atuakonkonona:

Ntu nnua maluvu makole bua bakuabu kabanseki anyi? Ekesode 23:2 udi wamba ne: ‘Kuena ne bua kulonda tshisumbu tshia bantu to.’ Mu mvese eu Yehowa uvua udimuija bena Isalele bua kablondi bantu bavua kabayi bamusankisha to. Mubelu eu udi kabidi ne mushinga bua bena Kristo lelu. Tuetu balekele bantu bakuabu balombola meji etu bua dinua maluvu, netusemene kule ne Yehowa ku kakese ku kakese ne katuakuikala tutumikila mikenji yende to.​—Lomo 12:2.

Ntu nnua maluvu makole bua kuleja mundi ne bukole anyi? Mu imue miaba, mbanyishile bantu bua kunua maluvu pa tshibidilu ne kuanua a bungi. (1 Pet. 4:3) Kadi mona mubelu wa meji udi mu 1 Kolinto 16:13: “Nushale batabale, nushindame mu ditabuja, nuenze malu bu bana balume, nulue ne bukole.” Maluvu adi bushuwa mua kupetesha muntu bukole anyi? Kabiena nanku to. Maluvu adi atekesha bukokeshi bua kunana lungenyi, bua muntu kikadi wangata mapangadika mimpe to. Bia dibungama, kuanua kudi kuleja butekete pamutu pa kuleja mutudi ne bukole. Yeshaya 28:7 udi ubikila muntu udi upambuka bua maluvu makole ne: muntu udi utetuka ne udi ulenduka.

Bukole butudi nabu dijinga bua kuenza tshidi tshiakane budi bufumina anu kudi Yehowa. Budi butuambuluisha bua kushala batabale ne kushindama mu ditabuja. (Mis. 18:​32) Muena Kristo mulelela udi wenza malu ne budimu, wangata mapangadika a meji bua malanda ende ne Yehowa kaanyanguki to. Yezu uvua muleje muvuaye ne bukole abu pavuaye pa buloba, ne bantu ba bungi bavua bamuneka bu muntu wa bukole, uvua ne dikima.

 Ntu nnua maluvu bua kubenga kusamisha mutu bua ntatu yanyi anyi? Nyuma muimpe wakasaka mufundi wa misambu mukuabu bua kuamba ne: “Pavua tunyinganyinga tumpite bukole, wewe [Yehowa] wakansamba, wewe kumpesha ditalala.” (Mis. 94:19) Wewe ne kanyinganyinga ka bualu kampanda, eyemena Yehowa, kadi kunu maluvu to. Mushindu muimpe wa kuenza nanku, nkuleja Yehowa bualu abu mu disambila misangu ya bungi. Bualu bukuabu, bantu ba bungi mbafike ku dimona ne: kukeba mibelu ya meji kudi bena Kristo bashindame mu nyuma mu tshisumbu kutu kuambuluisha. Mu bulelela, kunua maluvu makole bua kubenga kusamisha mutu bua ntatu itudi nayi, kudi kufikisha muntu ku dibenga kutumikila mikenji ne ku dipanga dienza tshidi tshiakane. (Hosh. 4:​11) Daniel utukadi batele kuulu eku udi wamba ne: “Mvua ntata ne tunyinganyinga, ndiumvua mupile. Mvua nnua maluvu bua kupita bimpe ne tunyinganyinga, kadi ntatu ivua anu yenda imvudila, meme kujimija balunda bamvua nabu ne tshivua kabidi ndimona ne mushinga to.” Ntshinyi tshiakamuambuluisha? Wakamba ne: “Ngakajingulula ne: mbimpe Yehowa ikale ku luseke luanyi, kadi ki mmaluvu to. Yehowa wakangambuluisha, meme kupita bimpe ne ntatu yanyi.” Bualu bua mushinga budi ne: Yehowa utu anu mudiakaje bua kutuambuluisha nansha padi nsombelu wetu umueneka bu ne: kakuena tshikuabu tshia kuenza to.​—Filip. 4:​6, 7; 1 Pet. 5:7.

Biobi bikufikila imue misangu bua kunua maluvu, teta kutangila bungi bua misangu iudi uanua ne bungi buudi uanua. Udiebeje ne: ‘Mulela wanyi anyi mulunda wanyi ukadiku mungambile mudibi bimutonda pantu nnua maluvu anyi?’ Biobi nanku, bidi bileja ne: ukadi wenda upeta tshikadilu tshiudi wewe kuyi mumanye to. ‘Nkadi nnua maluvu bikole kupita mumvua nganua kumpala anyi?’ Nsombelu au ke uvua mua kuikala mufikishe muntu uvua kayi unua maluvu bikole ku dilua mupika wawu. ‘Bituku binkolela bua kupitshisha matuku ndamu anyi a bungi tshiyi nnua maluvu anyi?’ Biobi nanku, maluvu adi mua kukukuata kubupika. Pamuapa ne bikulombe mibelu  ya kudi bamanyi bapiluke bua wewe kutantamena lutatu alu.

Bamue bena Kristo mbasungule bua kubenga kunua maluvu makole a mishindu yonso bua ntatu anyi malu mabi adiwu akebesha. Bakuabu ki mbasue kuanua to, bualu ki mbasue anu kualabula to. Umue wa ku balunda bebe yeye muangate mapangadika a nunku, enza malu ne bulenga, unemeke dipangadika diende, kuyi umubipisha to.

Udi mua kuleja muudi ne meji paudi udielela mikalu. Mbimpe muena Kristo adielele mikalu ya bungi bua maluvu adiye ne bua kunua. Udi pamuapa mua kudielela mikenji ya bungi bua misangu yanuaye, pamuapa musangu umue ku lumingu anyi kuanua pa nnuinu padiye udia. Bakuabu mbasungule mishindu ya maluvu a kunua bu mudi mvinyo anyi maluvu, baanua ne nkatshinkatshi, kadi ki mmaluvu makole anyi masambakajangana to. Muntu yeye mudielele mikalu ya mushindu wa kunua maluvu, nebikale bipepele bua kuyinemeka. Muena Kristo mushindame mu nyuma kakusamisha mutu bua tshiamuambabu bua mapangadika adiye muangate bua dinua maluvu to.

Kunemeka mmuenenu wa bakuabu mbualu bua mushinga butudi ne bua kuikala nabu mu lungenyi. Lomo 14:21 udi wamba ne: “Mbitambe buimpe bua kubenga kudia munyinyi anyi kunua mvinyo anyi kuenza bualu buonso bukuabu budi bulenduisha muanenu.” Mmunyi muudi mua kutumikila mubelu eu? Ikala ne dinanga dia buwetu. Wewe mumone ne: kunua maluvu makole kudi kulenduisha muntu mukuabu, dinanga nedikusake bua kubenga kuanua dîba adi. Udi uleja muudi utabalela bakuabu ne ubanemeka paudi kuyi ukeba anu diakalenga diebe nkayebe to, kadi ne diabu pabu.​—1 Kol. 10:24.

Bualu bukuabu, mbulamatadi udi mua kuela mikenji idi ifikisha bena Kristo ku diangata mapangadika. Mikenji idi mua kuleja bidimu bidi muntu mua kutuadija kunua maluvu anyi kukandika kuanua, peshi kubenga kuendesha tumue tudiendelandela padi muntu munue maluvu.​—Lomo 13:​1-5.

Yehowa mmututua mushinga padiye mutupeshe budikadidi bua kusanka bua mapa adiye mutupeshe. Mmutupeshe kabidi dipa dia kudisunguila tshituadia ne tshituanua. Mapangadika etu alejaku mutudi tuanyisha budikadidi budi Tatu wetu wa mu diulu mutupeshe ebu patudi tuenza nabu mudimu bua kumusankisha.