1.Ntshinyi tshiudi ne bua kuenza bua kushindama mu nyuma?

 MUSHINDU utu muana ukola lukasa utu utukemesha. Muana katu udienzeja bua kukola to. Kadi bua kulua muena Kristo mushidame, bidi bilomba kudienzeja. b (1 Kol. 13:​11; Eb. 6:1) Bua bualu abu, tudi ne bua kudia malanda makole ne Yehowa. Tudi kabidi ne bua kumulomba nyuma muimpe bua atupeteshe ngikadilu idi imusankisha, bua tulonge malu adi mua kutuambuluisha ne tulongolole tshituikale.​—Nsu. 1:5.

2 Genese 1:27 udi utulongesha tshinyi? Ntshinyi tshituamona mu tshiena-bualu etshi?

² Yehowa wakafuka bantu balume ne bantu bakaji. (Bala Genese 1:27.) Mbashilangane ku mubudi ne ku malu makuabu. Mmubafuke, mubapeshe midimu ya bobu kuenza. Nanku badi dijinga ne ngikadilu ne mamanya bua bamone mua kuyikumbaja bimpe. (Gen. 2:​18) Mu tshiena-bualu etshi, netumone tshidi nsongakaji mua kuenza bua kulua muena Kristo mushindame mu nyuma. Mu tshialonda, netumone tshidi bansongalume pabu mua kuenza.

3-4 Mmuaba kayi udi bansongakaji mua kupetela bantu bimpe badibu mua kuidikija? (Tangila kabidi tshimfuanyi.)

³ Bible udi utela bakaji ba tshitembu ba bungi bavua bananga Yehowa ne bamuenzela mudimu. (Tangila tshiena-bualu tshia  “Bakaji badi Bible utela badi batulongesha tshinyi?” tshidi mu jw.org.) Anu mudi mvese wetu wa tshiena-bualu uleja, “bavua ne nkantshinkatshi mu bienzedi biabu” ne “bena lulamatu mu malu onso.” Kupita apu, bansonkaji badi mua kupeta bamamu badi banange Yehowa mu bisumbu biabu badibu mua kuidikija.

⁴ Nuenu bansonkaji nudiku bamanye bana betu ba bakaji banudi mua kuidikija anyi? Mmanyayi ngikadilu yabu mimpe. Nukebe munudi penu mua kuikala nayi. Mu bikoso bidi bilonda, netukonkonone ngikadilu isatu idi bana betu ba bakaji ne bua kuikala nayi.

5 Bua tshinyi udi ne bua kuikala ne budipuekeshi biwikala musue kulua mukaji mushindame mu nyuma?

⁵ Bua kulua muena Kristo mushindame, mbimpe kuikala ne budipuekeshi. Muntu mukaji yeye ne budipuekeshi, neadie bulunda ne Yehowa ne bantu bakuabu. (Yak. 4:6) Tshilejilu, muntu mukaji udi munange Yehowa udi udipuekesha ulonda buludiki bua bantu badi Yehowa muteke ku mutu kuetu. (1 Kol. 11:3) Bantu abu mbadi balombola mu bisumbu ne mbamfumu ba mêku. c

6 Mmunyi mudi bansongakaji mua kuikala ne budipuekeshi anu bu Lebeka?

⁶ Tuakule bua Lebeka. Uvua nsongakaji wa meji uvua wangata mapangadika mimpe, uvua kabidi mumanye mua kuenza malu, ne dîba dia kuenza. (Gen. 24:​58; 27:​5-17) Nansha nanku uvua mukaji wa kanemu, uvua utumikilangana. (Gen. 24:​17, 18, 65) Wewe ne budipuekeshi, utumikila buludiki bua Yehowa anu bu Lebeka, newikale tshilejilu tshimpe kudi bena mu dîku dienu ne kudi bena mu tshisumbu tshienu.

7 Mmunyi mudi bansongakaji mua kulua bena bupuekele anu bu Esetê?

⁷ Bua kulua muena Kristo mushindame, mbimpe kulua kabidi muena ne bupuekele. Bible udi wamba ne: “Meji adi kudi bapuekele.”  (Nsu. 11:2) Esetê uvua mukaji muena bupuekele, uvua utshina Nzambi. Bua bualu abu, pakaluaye mukaji wa mukalenge, kavua uditambisha to. Wakatumikila mubelu uvua Môdekai mulela wende mumupeshe. (Esetê 2:​10, 20, 22) Wewe ulomba mibelu ne uyitumikila neuleje muudi pebe muena bupuekele.​—Tito 2:​3-5.

8 Bilondeshile 1 Timote 2:​9, 10, mmunyi mudi bupuekele buambuluisha muanetu wa bakaji bua kumanya kuluata ne kudilengeja bimpe?

⁸ Monayi mushindu mukuabu uvua Esetê muleje ngikadilu eu. Nansha muvuaye nsongakaji wa “mubidi muimpe ne tshimuenekelu tshimpe,” kavua udileja bua buimpe buende to. (Esetê 2:​7, 15) Mmunyi mudi mukaji muena Kristo mua kumuidikija? Mushindu wa kumuidikija mmuleja mu 1 Timote 2:​9, 10. (Bala.) Mupostolo Paulo mulombamu bakaji bena Kristo bua mvuadilu wabu aleje ne: badi banemeka Nzambi. Miaku ya mu tshiena Greke idi Paulo mutele muaba eu idi ileja ne: mukaji udi ne bua kuvuala mu mushindu muimpe udi uleja ne: udi unemeka bakuabu. Tudi tudiumvua bua bualu buenu nuenu bana betu ba bakaji badi batumikila mubelu eu!

9 Tshilejilu tshia Abigayila tshidi tshitulongesha tshinyi?

⁹ Bua bana betu ba bakaji kushindama mu nyuma, bidi bikengela bikale ne: busunguluji. Busunguluji budi bumvuija kumanya tshidi tshimpe ne tshidi tshibi, ne kusungula bua kuenza tshidi tshimpe. Tuakulabi bua Abigayila. Bayende uvua muenze tshilema tshivua mua kukebela bena mu dîku diabu bonso lutatu. Busunguluji buakasaka Abigayila bua kuenza malu ne lukasa, kusungilaye ba mu nzubu muende. (1 Sam. 25:​14-​23, 32-35) Tuetu ne busunguluji netumanye dîba dia kuakula ne dia kushala bapuwe. Netumanye kabidi mua kuambuluisha bakuabu katuyi tubuelakana mu malu abu.​—1 Tes. 4:11.

10-11 Mmunyi mudi kumanya kubala ne kufunda mua kukuambuluisha wewe ne bantu bakuabu? (Tangila kabidi tshimfuanyi.)

¹⁰ Mbimpe mukaji muena Kristo amanye malu adi mua kumuambuluisha. Malu adi muntu mukaji ulonga patshidiye muana neamuambuluishe mu nsombelu wende mujima. Mona amue a kudiwu.

¹¹ Longa mua kubala ne kufunda. Mu imue miaba bantu kabatu bamona ne: mbia mushinga bua bantu bakaji kumanya kufunda ne kubala to. Kadi mu bulelela, mbualu bua mushinga kudi muena Kristo yonso. d (1 Tim. 4:​13) Nanku kulekedi tshintu nansha tshimue tshikupangisha bua kulonga mua kubala ne kufunda to. Mmunyi muakuambuluisha malu aa? Neakuambuluishe bua kupeta mudimu ne kuwulama.  Neulue mulongi muimpe ne mulongeshi muimpe wa Dîyi dia Nzambi. Kupita apu, neusemene pabuipi menemene ne Yehowa wewe ubala Dîyi diende ne welangana meji a biudi ubalamu.​—Yosh. 1:8; 1 Tim. 4:15.

12 Nsumuinu 31:26 udi ukulongesha tshinyi bua kuikala kuyukila bimpe ne bakuabu?

¹² Mmanya mua kuyukila ne bakuabu. Bikengela bena Kristo bikale bayukila ne bakuabu bimpe. Bua bualu abu, muyidi Yakobo wakafila mubelu muimpe wa ne: “Muntu yonso udi ne bua kuikala ne lukasa ku diteleja, ne lujoko ku diakula.” (Yak. 1:​19) Wewe uteleja bakuabu padibu bakula, udi uleja muudi umbuvuila anyi ‘uditeka pa muaba wabu.’ (1 Pet. 3:8) Wewe kuyi mumanye mudi muntu udiumvua anyi tshidiye wamba, muebeja mu mushindu muimpe akuambilatshi. Anji ela meji kumpala kua kuakula. (Nsu. 15:​28, dim.) Diebeja ne: ‘Bualu bundi nkeba kumuambila ebu, mbulelela ne nebumukankamije anyi? Budiku buleja ne: ndi mmuenzela malu mimpe ne ndi mmunemeka anyi? Idikija bana betu ba bakaji batu bamanye kuyukila bimpe ne bakuabu. (Bala Nsumuinu 31:​26.) Ikala utangila mushindu udibu bayukila ne bakuabu. Wewe mumanye mua kuyukila ne bakuabu bimpe, bulunda buebe nabu nebukole.

13 Mmunyi muudi mua kumanya mua kuenza midimu ya kumbelu?

¹³ Manya mua kuenza midimu ya kumbelu. Miaba ya bungi bantu bakaji ke bantu benza midimu ya kumbelu bikole. Maman webe anyi muanetu wa bakaji mukuabu udi mumanye kuenza midimu eyi udi mua kukulongesha bua umanye mua kuyenza bimpe. Muanetu Cindy udi wamba ne: “Bumue bua ku malu a mushinga avua mamu mundongeshe buvua ne: kuenza mudimu bikole kutu kupetesha disanka. Bu mumvua mulonge mua kulamba, kukolopa, kutela bilamba ne mua kutula makuta, mvua ndikumbajila majinga anyi bipepele, ndifila bikole mu mudimu wa Yehowa. Mamu uvua mundongeshe kabidi bua kuikala muakididi wa benyi, bualu ebu mbuenza bua mpetangane ne bena Kristo bimpe bandi mua kuidikija.” (Nsu. 31:​15, 21, 22) Mukaji muenji wa mudimu utu wakidila benyi udi mulonge mua kuenza midimu ya kumbelu, udi dibenesha dia dikema kudi bena mu dîku diende ne kudi bena mu tshisumbu.​—Nsu. 31:​13, 17, 27; Bien. 16:15.

14 Malu adi Crystal mulonde adi akulongesha tshinyi? Ntshinyi tshiudi ne bua kuikala natshi mu lungenyi?

¹⁴ Manya mua kudiambuila bujitu. Ebu mbualu bua mushinga budi bena Kristo bonso ne bua kumanya. (Filip. 4:​11) Crystal udi wamba ne: “Baledi banyi bakankankamija bua kubuela mu tulasa tua bikadilu tua midimu ya bianza. Tatu wakantuma mu kalasa ka malu a mishinga (commercial).” Kulonga mua kupeta makuta nkayaku ki nkukumbane to. Dienzeja kabidi bua kumanya mua kuatula bimpe. (Nsu. 31:​16, 18) Wewe usanka bua  bintu bikese biudi nabi, kuyi ujinga kubuela mabanza neupete dîba dia kuenzela Yehowa mudimu wa bungi.​—1 Tim. 6:8.

15-16 Bana betu ba bakaji bajike badi ne mushinga wa bungi bua tshinyi? (Mâko 10:​29, 30)

¹⁵ Wewe ne ngikadilu idi isankisha Yehowa ne mamanya adi akengela nebikuambuluishe. Mona malu audi mua kuenza.

¹⁶ Udi mua kuanji kushala mujike. Anu muvua Yezu muambe, bamue bantu bakaji badi babenga kusedibua, nansha mudi bantu ba muaba udibu bikale bapetula bujike. (Mat. 19:​10-12) Bakuabu badi ne malu adi abasaka bua kushala bajike. Manya ne: Yehowa ne Yezu kabena bapetula bena Kristo bajike to. Pa buloba bujima, bana betu ba bakaji bajike batu bambuluisha mu tshisumbu bikole. Bu mudibu banange bena Kristo nabu ne babatabalela, mbalue bana babu ba bakaji anyi bamamu kudi ba bungi ba kudibu.​—Bala Mâko 10:​29, 30; 1 Tim. 5:2.

17 Mmunyi mudi nsongakaji mua kudilongolola ku mpindieu bua kuenza mudimu wa ku dîba ne ku dîba?

¹⁷ Udi mua kuenza mudimu wa ku dîba ne ku dîba. Bana betu ba bakaji batu bayisha bikole pa buloba bujima. (Mis. 68:​11) Kuenaku mua kudifundila tshipala tshia kutuadija mudimu wa ku dîba ne ku dîba anyi? Udi mua kulua mpanda-njila, kuya ku Betele anyi kuambuluisha mu luibaku. Sambila bua tshipatshila atshi. Yukila ne bantu bakuabu bakadi benza midimu eyi, nebakuleje tshidi tshikengela bua wewe kuyenza. Difundila malu mapepele a kuenza akuambuluisha bua kukumbaja tshipatshila atshi. Wewe muenze mudimu wa ku dîba ne ku dîba neupete mpunga ya kuenza malu makuabu a bungi mu mudimu wa Yehowa.

18 Bua tshinyi nsongakaji udi ne bua kumanya muntu udi ukeba kumusela bimpe? (Tangila kabidi tshimfuanyi.)

¹⁸ Udi mua kuitaba bua bakusele. Malu atudi bakuile mu tshiena-bualu etshi neakumbuluishe bua kuikala mukaji muimpe. Wewe musue bua bakusele, manya muntu udi ukeba kukusela bimpe. Kusedibua ki ndipangadika dia bilele to. Vuluka ne: bayebe ke wikala ku mutu kuebe. (Lomo 7:2; Ef. 5:​23, 33) Nanku diebeja ne: ‘Utu udienzeja bua kuidikija Yezu anyi? Utu uteka malu a Yehowa pa muaba wa kumpala anyi? Utu wangata mapangadika mimpe anyi? Utu witaba bilema biende anyi? Utu unemeka bantu bakaji anyi? Neakumbane  bua kundiisha, ne kuikala mulunda wanyi muimpe anyi? Neangambuluishe bua bulunda buanyi ne Yehowa buikale anu bukole anyi? Utu ukumbaja midimu ya mu tshisumbu bimpe anyi? Tshilejilu, midimu kayi ituye nayi mu tshisumbu, utu uyenza mushindu kayi?’ (Luka 16:​10; 1 Tim. 5:8) Manya ne: wewe musue kupeta mulume muimpe udi ne bua kuikala pebe mukaji muimpe.

19 Bua tshinyi kuikala “muambuluishi” wa bayebe mmudimu wa mushinga wa bungi?

¹⁹ Bible udi wamba ne: mukaji muimpe ‘mmuambuluishi’ wa bayende ne ‘mumukumbaji.’ (Gen. 2:​18, Mu kanda wa Mvidi Mukulu wa bena Katolike.) Bualu ebu budi buleja ne: mukaji kena ne mushinga anyi? Too! Mudimu wa mukaji wa kuikala muambuluishi wa bayende mmudimu wa mushinga mukole. Bible si utu ubikila Yehowa ne: “muambuluishi.” (Mis. 54:4; Eb. 13:6) Mukaji udi ulua muambuluishi muimpe wa bayende padiye umukuatshisha mu mapangadika adi atangila dîku dijima. Bu mudiye munange Yehowa, udi udienzeja bua bakuabu bamone ngikadilu mimpe ya bayende. (Nsu. 31:​11, 12; 1 Tim. 3:​11) Wewe mudienzeje bua kunanga Yehowa bikole mpindieu, wambuluisha bena mu dîku dienu ne bena mu tshisumbu, newikale mukaji muimpe.

20 Mmalu kayi mimpe adi mamu mua kuenzela bena mu dîku diende?

²⁰ Udi mua kulela bana. Wewe ne bayebe nudi mua kulela bana. (Mis. 127:3) Dianjila kumanya tshia kuenza bua kuikala mamu muimpe. Malu atudi bakuile mu tshiena-bualu etshi, neakuambuluishe bua kuikala mukaji muimpe anyi mamu muimpe. Wewe ne dinanga, lutulu ne bulenga bena mu dîku diebe nebikale ne disanka ne bana bebe nebamdiumvue mu bukubi ne banangibue.​—Nsu. 24:3.

21 Tudi banange bana betu ba bakaji bua tshinyi? (Tangila tshimfuanyi tshia pa tshizubu.)

²¹ Tudi banunange bikole nuenu bana betu ba bakaji bua bionso binudi nuenzela Yehowa ne bantu bende. (Eb. 6:​10) Nudi nudienzeja bua kuikala ne ngikadilu idi isankisha Yehowa, kulonga malu anuambuluisha nuenu ne bantu bakuabu ne kulongolola tshinuikala. Nudi ne mushinga wa bungi mu bulongolodi bua Yehowa!