1. Bua tshinyi Abalahama uvua ne bua kutungunuka ne kutekemena muana uvuabu bamulaye?

 YEHOWA wakalaya mulunda wende Abalahama ne: bisamba bionso bia pa buloba nebipete dibenesha ku diambuluisha dia muanende. (Gen. 15:5; 22:​18) Bu muvua Abalahama ne ditabuja dikole kudi Nzambi, uvua mutuishibue ne: mulayi au neukumbane. Nansha nanku, pakavua Abalahama ne bidimu 100 ne mukajende bidimu 90, mulayi au kauvua muanji anu kukumbana to. (Gen. 21:​1-7) Kadi Bible udi wamba ne: “Bua ditekemena, [Abalahama] uvua ne ditabuja dia ne: uvua ne bua kulua tatu wa bisamba bia bungi bilondeshile tshikavuabu bambe.” (Lomo 4:​18) Kakuyi mpata, udi mumanye ne: mulayi au wakakumbana. Wakalua tatuende wa Izaka muana uvuaye mutekemene munkatshi mua bidimu bia bungi. Bua tshinyi Abalahama uvua mutuishibue ne: Yehowa neakumbaje mulayi wende?

2. Bua tshinyi Abalahama uvua mutuishibue ne: mulayi wa Yehowa neukumbane?

² Bua bulunda bukole buvua Abalahama mudie ne Yehowa, uvua “mutuishibue bikole ne: malu avua [Nzambi] mulaye” neakumbane. (Lomo 4:​21) Yehowa wakanyisha Abalahama kumubikilaye ne: muakane bualu uvua ne ditabuja. (Yak. 2:​23) Anu mudi Lomo 4:18 uleja, Abalahama uvua ne ditabuja ne ditekemena. Tumonayi mpindieu tshivua Paulo muambe bua ditekemena mu Lomo nshapita 5.

3. Ntshinyi tshidi Paulo wamba bua ditekemena?

³ Paulo udi umvuija tshidi ne bua kutusaka bua kuikala batuishibue ne: “ditekemena kadiena dielangana mâyi ku makasa” to. (Lomo 5:5) Udi utuambuluisha kabidi bua kumanya  mudi ditekemena dietu mua kukola. Patudi tuenda tukonkonona malu adi maleja mu Lomo 5:​1-5, ikala ne nsombelu webe mu lungenyi. Patudi tuenda tuenza nunku, netufike pamuapa ku dimona mu kupita kua matuku ne: ditekemena dietu ndilue dikole. Dikonkonona tshiena-bualu etshi nedileje kabidi mutudi mua kukolesha ditekemena dietu bikole kupita mudidi mpindieu. Tuanji tuakulayi mpindieu bua ditekemena dia butumbi divua Paulo muakuile didi kadiyi dielangana mâyi ku makasa.

4. Mmalu kayi adibu bakuile mu Lomo 5:​1, 2?

⁴ Bala Lomo 5:​1, 2. Paulo uvua mufundile bena mu tshisumbu tshia mu Lomo mêyi aa. Bana betu ba mu tshisumbu atshi bakavua bamanye malu a Yehowa ne a Yezu, baleje ditabuja ne balue bena Kristo. Ke Nzambi “kubabala bakane bua ditabuja,” kubelaye ne manyi a nyuma, bobu kupeta ditekemena dilenga dia dikema!

5. Bena Kristo bela manyi badi ne ditekemena kayi?

⁵ Paulo wakafundila bena Kristo bela manyi ba mu Efeso bua ditekemena divuabu bababikidile. Ditekemena adi divua dia kupeta “bumpianyi bua bansantu.” (Ef. 1:​18) Paulo wakaleja kabidi bena mu Kolosayi muaba uvuabu ne bua kupetela difutu diabu. Wakabikila difutu adi ne: “Ditekemena didibu banulamine mu diulu.” (Kolos. 1:​4, 5) Ditekemena dia bena Kristo bela manyi ndia ne: nebabishibue bua kupeta muoyo wa tshiendelele mu diulu muakokeshabu ne Kristo.​—1 Tes. 4:​13-17; Buak. 20:6.

6. Ntshinyi tshivua Frederick Franz muambe bua ditekemena diende?

⁶ Bena Kristo bela manyi badi banyisha ditekemena edi bikole. Frederick Franz, umue wa ku bela manyi wakamba ne muoyo mujima ne: “Ditekemena dietu ndilelela, nedikumbane mu mushindu wa dikema, dikumbena yonso wa mu bantu 144 000 ba mu kasumbu kakese ka mikoko.” Yeye mumane kuenzela Nzambi mudimu ne lulamatu munkatshi mua  bidimu bia bungi, wakalua kuamba mu 1991 ne: “[Tutshidi] anu tuangata ditekemena edi ne mushinga. . . . Tudi ne dianyisha bua ditekemena edi nansha biobi bitulomba kuindila tshikondo bule kayi. Ntshintu tshia mushinga mukole tshitudi batekemene, nansha biobi bitulomba kuindila bidimu muliyo mujima. Ndi ngangata ditekemena edi ne mushinga wa bungi kupita kumpala.”

7-8. Nditekemena kayi didi ba bungi nadi? (Lomo 8:​20, 21)

⁷ Batendeledi ba Yehowa ba bungi lelu badi ne ditekemena dia mushindu mukuabu. Ndia kupeta muoyo wa tshiendelele pa buloba mu Bukalenge bua Nzambi. (Eb. 11:​8-​10, 13) Paulo wakafunda bua masanka apeta bantu badi ne ditekemena adi. (Bala Lomo 8:​20, 21.) Musangu wa kumpala uwakamanya bualu bua mulayi muimpe eu, ntshinyi tshivua tshitambe kukusankisha? Nkumanya ne: dimue edi newikale mupuangane, kutshiyi kabidi wenza mpekatu anyi? Peshi wakasanka pawakamanya ne: bafue bebe nebajuke bua kushala ne muoyo mu Mparadizu pa buloba? Bualu ebu buakakupetesha dijinga dia kutekemena malu au ne muoyo kuulu kuulu.

⁸ Nansha tuetu ne ditekemena dia kupeta muoyo wa tshiendelele mu diulu anyi pa buloba, nditekemena dia butumbi didi ditusankisha. Tukoleshayi ditekemena dietu edi bikole. Tshivua Paulo mulue kufunda pashishe tshidi tshileja mutudi mua kudikolesha. Tukonkononayi tshivuaye mufunde bua ditekemena dietu. Kukonkonona mêyi ende nekutuambuluishe bua kuikala batuishibue ne: ditekemena dietu nedikole ne kadiakupanga mua kukumbana nansha.

9-10. Ntshinyi tshidi bena Kristo ne bua kutekemena anu Paulo? (Lomo 5:3) (Tangila kabidi bimfuanyi.)

⁹ Bala Lomo 5:3. Manya ne: dikenga didi mua kukolesha ditekemena dietu. Pamuapa bualu abu budi mua kukukemesha. Bulelela budi ne: bayidi ba Kristo bonso nebapete makenga. Tuakulabi bua tshilejilu tshia Paulo.  Wakambila bena mu Tesalonike ne: “Patuvua nenu, tuvua tudianjila kunuambila ne: netupete makenga, ne ke tshidi tshienzeke.” (1 Tes. 3:4) Wakafundila bena Kolinto ne: ‘Bana betu, katuena basue nupange kumanya bua makenga atuvua bapete. . . . Katuvua kabidi nansha ne ditekemena dia kushala ne muoyo to.’​—2 Kol. 1:8; 11:​23-27.

¹⁰ Bena Kristo lelu badi mua kutekemena pabu bua kutuilangana ne amue makenga. (2 Tim. 3:​12) Kadi wewe? Paudi muitabuje Yezu ne mutuadije kumulonda, udi mupete makenga kampanda anyi? Pamuapa balela ne balunda bebe mbakuseke; anyi pamuapa mbakuenzele malu ne tshikisu. Dipangadika diebe dia kuikala muena bululame mu malu onso, ndikukebele lutatu ku mudimu anyi? (Eb. 13:​18) Udi mupete buluishi bua kudi mbulamatadi bualu udi muambile bantu bakuabu malu audi mutekemene anyi? Nansha tuetu batuilangane ne dikenga dia mushindu kayi, Paulo mmuambe ne: tudi ne bua kusanka. Bua tshinyi?

11. Bua tshinyi mbimpe kudisuika bua kunanukila mu lutatu kayi luonso?

¹¹ Tudi mua kusanka tuetu mu dikenga bualu tudi bamanye tshididi dilela. Anu mudi Lomo 5:3 uleja, “dikenga didi dilela dinanukila.” Bena Kristo bonso nebapete makenga, nunku bonso buabu badi ne bua kunanukila. Mbimpe tudisuike bua kunanukila nansha ntatu ya mushindu kayi mua kutufikila. Netupete difutu ditudi batekemene anu tuetu bananukile ne batungunuke ne kuenzela Yehowa mudimu. Katuena basue kuikala bu bantu bavua Yezu nabu mu meji pavuaye wakula bua ntete ivua mimatshile pa buloba bua mabue to. Kumpala, bakitaba dîyi ne disanka kadi “pakajuka dikenga anyi buluishi” bakalenduka. (Mat. 13:​5, 6, 20, 21) Bushuwa kutuilangana ne buluishi anyi ntatu kakutu kutusankisha to, kadi kuyinanukila kutu kupetesha mabenesha a tshiendelele. Mmushindu kayi?

12. Ntshinyi tshitudi tupeta patudi tunanukila mu ntatu?

¹² Muyidi Yakobo wakaleja masanka atudi tupeta patudi tunanukila mu ntatu. Wakafunda ne: “Dinanukila dikumbaje mudimu wadi, bua nuenu nuikale bakumbane kanuyi kalema mu malu onso, kanuyi nupangila mu bualu nansha bumue.” (Yak. 1:​2-4) Yakobo udi umvuija dinanukila ne: didi ne mudimu wa kuenza. Mmudimu kayi udi dinanukila ne bua kukumbaja? Didi mua kukupetasha tshipidi tshibande tshia ngikadilu bu mudi lutulu, ditabuja ne dieyemena Nzambi. Nansha nanku, didi ditupetesha kabidi tshintu tshikuabu tshia mushinga.

13-14. Dinanukila didi dilela tshinyi? Mmunyi mudi bualu ebu butangila ditekemena dietu? (Lomo 5:4)

¹³ Bala Lomo 5:4. Paulo udi uleja kabidi ne: Dinanukila didi dipetesha “dianyishibua kudi Nzambi.” Wewe unanukila Yehowa neakuanyishe. Bualu ebu kabuena bumvuija ne: Yehowa kena usanka bua ntatu anyi makenga audi utuilangana nawu to. Kadi Nzambi udi ukuanyisha wewe. Dinanukila diebe didi dilela dianyishibua kudi Nzambi. Edi si ndibenesha dimpe dia dikema!​—Mis. 5:12.

¹⁴ Vuluka ne: Abalahama wakananukila mu mateta, Nzambi kumuanyishaye. Yehowa uvua umumona bu mulunda wende; kumubalaye bu muntu muakane. (Gen. 15:6; Lomo 4:​13, 22) Bidi mua kutuenzekela petu nanku. Nzambi kena utuanyisha bua mudimu wa bungi utudi tumuenzela anyi bua midimu itudi nayi mu bulongolodi buende to. Kadi udi utuanyisha bualu tudi tunanukila mu ntatu ne muoyo mujima. Nansha tuetu ne bidimu bungi kayi anyi ne nsombelu kayi, peshi bipedi kayi, yonso wa kutudi udi ne bua kunanukila.  Udiku unanukila mu lutatu kampanda patudi tuambangana apa anyi? Biobi nanku, kola ku muoyo bualu Nzambi udi ukuanyisha. Kumanya ne: Nzambi udi utuanyisha kudi kukolesha ditekemena dietu bikole.

15. Mbualu kayi bua mushinga budi Paulo muleje? Bua tshinyi bualu ebu budi mua kupitshila bamue?

¹⁵ Paulo wakumvuija ne: Yehowa udi utuanyisha tuetu tunanukila mu ntatu ne muoyo mujima. Paulo wakalua kuamba ne: “Dianyishibua kudi Nzambi, didi dilela [anyi difikisha] ku ditekemena, ne ditekemena kadiena dielangana mâyi ku makasa.” (Lomo 5:​4, 5) Bualu ebu budi mua kuikala bupitshila bakuabu. Bua tshinyi? Bualu anu mutukavua bamone kuulu eku mu Lomo 5:2 Paulo uvua muleje ne: bena Kristo bakavua ne “ditekemena dia butumbi bua Nzambi.” Ke bualu kayi bamue badi mua kudiebeja ne: ‘Bikalabi ne: bena Kristo abu bakavua ne ditekemena, bua tshinyi Paulo wakakula kabidi bua ditekemena?’

16. Mmunyi mudi ditekemena dia muntu dituadija kukola? (Tangila kabidi bimfuanyi.)

¹⁶ Tudi mua kumvua bimpe tshivua Paulo usua kuamba tuetu tumona ditekemena bu tshintu tshidi tshikola. Tshilejilu, udi uvuluka musangu wa kumpala uwakumvua bua ditekemena dilenga didi mu Dîyi dia Nzambi anyi? Uvua mua kuikala muele meji ne: lungenyi lua kushala ne muoyo kashidi mu Mparadizu ke bualu bua nsongo, kadi kuvua mutuishibue to. Nansha nanku, pawakatuadija kumanya malu a Yehowa a bungi ne adi Bible ulaya, wakafika kudituishibua ne: malu adiye mulaye neakumbane bushuwa.

17. Mmunyi mudi ditekemena diebe ditungunuka ne kukola panyima pa didilambula diebe ne batismo?

¹⁷ Nansha muukavua mudilambule ne mubatijibue, ditekemena diebe divua anu dienda dikola pauvua utungunuka ne kulonga malu a bungi ne kukola mu nyuma. (Eb. 5:13–6:1) Pamuapa udi mudimuene mudi mêyi adi mu Lomo 5:​2-4 makukumbene. Uvua mupete buluishi bua mushindu ne mushindu,  kadi bu muuvua mubunanukile Nzambi mukuanyishe. Bu muudi mumanye ne: Yehowa mmukunange ne udi ukuanyisha udi mpindieu mutuishibue bikole ne: malu adiye mulaye neakumbane. Ditekemena diebe ndilue dikole kupita ne kumpala. Ndilue bualu bulelela kuudi. Udi udiangata ne mushinga wa bungi menemene. Didi dikuambuluisha mu malu onso a mu nsombelu webe, dishintulula mushindu uudi wenzela bena mu dîku diebe malu, muudi wangata mapangadika, ne muudi wenza malu ne dîba diebe.

18. Ntshinyi tshidi Yehowa utujadikila bua malu atudi batekemene?

¹⁸ Mupostolo Paulo udi usakidila bualu bukuabu bua mushinga budi butangila ditekemena diudi nadi panyima pa Nzambi mumane kukuanyisha. Udi utujadikila ne: malu atudi batekemene neakumbane. Bua tshinyi mbimpe tuetu kuitaba bualu ebu? Nyuma wa Nzambi wakasaka Paulo bua kupesha bena Kristo tshijadiki etshi: “Ditekemena kadiena dielangana mâyi ku makasa; bualu mbapongolole dinanga dia Nzambi mu mioyo yetu ku diambuluisha dia nyuma muimpe uvuabu batupeshe.” (Lomo 5:5) Udi ne malu onso adi akujadikila ne: ditekemena diebe nedikumbane.

19. Tudi ne bua kutuishibua bua bualu kayi bua ditekemena dietu?

¹⁹ Ela meji a tshivua Yehowa mulaye Abalahama, a muvuaye mumuanyishe ne mulue kumubikila ne: mulunda wende. Abalahama kavua muladile mayi mabole to. Bible udi wamba ne: “Abalahama mumane kuleja lutulu, wakapeta mulayi eu.” (Eb. 6:​15; 11:​9, 18; Lomo 4:​20-22) Kavua muedibue mâyi ku makasa to. Mbimpe utuishibue ne: wewe mushale ne lulamatu nebakufute bua ditekemena diebe. (Lomo 12:​12) Paulo wakafunda ne: ditekemena diebe dilelela diudi ne bua kusankila kadiakukuela mâyi ku makasa to. “Nzambi udi ufila ditekemena anuwuje tente ne disanka dionso ne ditalala dionso bualu nudi numueyemena, bua ditekemena dienu divule ku bukole bua nyuma muimpe.”​—Lomo 15:13.