Uvua mubale bibejibeji bia Tshibumba tshia Nsentedi bia tshidimu etshi bimpe anyi? Anji tangilabi ni udi mua kuandamuna nkonko idi ilonda eyi:

“Kukudimuna meji enu” kudi kumvuija tshinyi? (Lomo 12:2)

Kakuena kumvuija anu kuenza malu mimpe to. Kadi kudi kumvuija kabidi kukonkonona tshitudi munda muetu menemene ne kuakaja malu adi akengedibua bua tumone mua kutumikila mikenji ya Nzambi mudibi bikengela.​—w23.01, dib. 8-9.

Mmunyi mutudi mua kuikala ne: nkatshinkatshi patudi tumona malu adi enzeka panu?

Tudi tuteya ntema ku malu adi enzeka panu bua kumona mudiwu akumbaja mêyi a buprofete a mu Bible. Pamutu pa kumuangalaja malu adi mua kunyanga buobumue buetu, mbimpe tuambe anu malu adi bulongolodi bua Yehowa buambe. (1 Kol. 1:10)​—w23.02, dib. 16.

Batismo wa Yezu mmushilangane ne wa bayidi bende ku tshinyi?

Bu muvua Yezu muledibue mu tshisamba tshidilambule kudi Nzambi, kabivua bikengela adilambule kabidi kudi Yehowa to. Uvua muntu mupuangane, kayi bubi. Kabivua bimulomba bua anyingalale bua mpekatu yende to.​—w23.03, dib. 5.

Mmunyi mutudi mua kuambuluisha bantu bakuabu bua kuandamuna mu bisangilu?

Tuetu tufila mandamuna mîpi netushile bakuabu dîba dia kuandamuna pabu. Tuepuke kabidi kuamba malu a bungi. Dîba adi, bakuabu nebikale ne tshia kuandamuna.​—w23.04, dib. 23.

“Njila wa Bunsantu” udibu batele mu Yeshaya 35:8 udi umvuija tshinyi?

Njila au udi tshia kumpala wa mu tshimfuanyi, uvua umbukila ku Babilona mutangile ku Isalele. Kadi netuambe tshinyi bua bidimu bishale ebi? Katshia ku bidimu bia 1919, mbenze mudimu wa dilongolola “Njila wa Bunsantu.” Dikudimuna dia Bible ne bintu bikuabu ne dibipatula pa mabeji. Bantu ba Nzambi badi bendela mu “Njila wa bunsantu” batangile mu Mparadizu wa mu nyuma udi ufikisha ku mabenesha a Bukalenge bua Nzambi.​—w23.05, dib. 15-​19.

Nsumuinu nshapita wa 9 udi ufila mubelu udi utangila bakaji babidi kayi ba mu tshimfuanyi?

Nsumuinu utu wakula bua mudi dibikila dia “mukaji mutshimbakane” difikisha mu “Lukita,” ne mudibu bafuanyikije “meji malelela” ne mukaji udi dibikila diende difikisha ku “njila wa dijingulula dia malu” ne ku muoyo. (Nsu. 9:​1, 6, 13, 18)​—w23.06, dib. 22-24.

Mmunyi mudi mushindu uvua Yehowa muenzele Lota malu uleja ne: udi ne budipuekeshi ne ki mmuena malu makole to?

Yehowa wakambila Lota bua umbuke mu Sodoma, anyemene mu buloba bua ku mikuna. Pavua Lota musengelele Nzambi bua asokomene mu Soâ, wakamumvuila.​—w23.07, dib. 21.

Ntshinyi tshidi mukaji mua kuenza bayende yeye umona bintu bia bantu butaka?

Udi ne bua kuvuluka ne: ki nyeye udi ne bualu to. Udi ne bua kutuma meji ende ku bulunda budiye mudie ne Yehowa, welangana meji a malu adi mu Bible a bakaji bavua ne kanyinganyinga bavua bapetele busambi kudi Yehowa. Udi mua kuambuluisha bayende bua epuke nsombelu yamufikisha ku njiwu.​— w23.08, dib. 14-​17.

Bobu basendeka malongesha etu, mmunyi muatuambuluisha busunguluji bua kuandamuna ne bupole?

Mbimpe tumone lukonko anyi bualu budi muntu utuebeja bu mpunga wa kumulongesha bulelela budi bututangila. Tuikalayi badilongolole bua kuandamuna ne bupole.​— w23.09, dib. 17.

Tshilejilu tshia muvua Mariya mupete bukole tshidi tshitulongesha tshinyi?

Pakamanya Mariya ne: neikale mamuende wa Masiya, wakapetela bukole kudi bantu bakuabu. Gabaliele ne Elizabeta bakamukankamija ne mibelu ya mu Bible. Bena Kristo netu badi mua kutupetesha petu bukole.​—w23.10, p. 15.

Yehowa udi mua kuandamuna masambila etu mushindu kayi?

Mmulaye bua kuteleja masambila etu, utangila bikala bitudi tumulomba ni bidi bipetangana ne disua diende. (Yel. 29:​12) Udi mua kuandamuna masambila adi mafuanangane mu mishindu mishilangane; kadi tumanye ne: neikale anu utuambuluisha.​—w23.11, dib. 21, 22.

Lomo 5:2 udi utela “ditekemena,” bua tshinyi mbaditele kabidi mu mvese 4?

Padi muntu uteleja ngumu mimpe, udi mua kupeta ditekemena dia kuikala mu Mparadizu. Kadi padiye utuilangana ne makenga, uananukila, Nzambi umuanyisha, ditekemena diende didi dilua dikole menemene.​—w23.12, dib. 12-​13