TSHIENA-BUALU TSHIA KULONGA 49
MUSAMBU WA 147 Mbatulaye muoyo wa tshiendelele
Tshia kuenza bua kupeta muoyo wa tshiendelele?
“Muntu yonso udi ujingulula Muana ne uleja ditabuja kudiye, ikale ne muoyo wa tshiendelele.”—YONE 6:40.
LUNGENYI LUNENE
Tshidi mulambu wa Yezu Kristo upetesha bela manyi ne mikoko mikuabu.
1. Bua tshinyi bantu ba bungi badi bela meji ne: kabena mua kushala ne muoyo kashidi?
BANTU ba bungi batu batabalela bidibu badia ne batu bibidija mubidi pa tshibidilu bua bikale ne makanda a mubidi mimpe. Kadi kabatu bela meji ne: biobi abi nebibambuluishe bua kushala ne muoyo kashidi to. Nunku badi pamuapa bela meji ne: bu mudi bukulakaje bubatuadila ntatu, kakuena mushindu wa kushala ne muoyo kashidi to; kadi ki ntshidi Yezu muambe to. Tshilejilu, mmuleje mu Yone 3:16; 5:24 ne: bantu badi mua kupeta “muoyo wa tshiendelele.”
2. Ntshinyi tshidi Yone nshapita 6 wamba bua muoyo wa tshiendelele? (Yone 6:39, 40)
2 Dimue dituku, Yezu wakenza tshishima, kudiishaye musumba wa bantu binunu bia bungi mampa ne mishipa. a Tshishima atshi tshiakakemesha bantu bikole. Dituku diakalonda, pavua musumba wa bantu au muye kumukeba mu Kapênuma pabuipi ne ku muelelu wa Mbuu wa Galela, wakabambila bualu buakabapitshila, bua ne: bantu bavua mua kubishibua ku lufu ne kupeta muoyo wa tshiendelele. (Bala Yone 6:39, 40.) Abi bidi bikuvuluija balunda bebe ne bena mu dîku dienu baukadi mufuishe. Mêyi a Yezu au adi aleja ne: bantu ba bungi bakadi bafue badi mua kubishibua ku lufu. Adi aleja kabidi ne: wewe ne balela bebe nudi mua kupeta muoyo wa tshiendelele. Kadi biakakolela bantu ba bungi bua kumvua tshivua Yezu mulue kuamba mu Yone nshapita 6. Ntshinyi tshivuaye muambe?
3. Bilondeshile Yone 6:51, ntshinyi tshivua Yezu muambe bua bualu buende?
3 Pakavua Yezu muenze tshishima tshia kudiisha bantu mampa mu Kapênuma, bakavuluka mana avua Yehowa mulokeshile bankambua babu mu tshipela. Bible udi ubikila mana au ne: “mampa a mu diulu.” (Mis. 105:40; Yone 6:31) Yezu wakalua kutela mana au bua kubalongesha bualu bua mushinga. Nansha muvuabu badie mana avua afumina kudi Nzambi, kabakashala ne muoyo kashidi to. (Yone 6:49) Kadi Yezu wakamba muvuaye “diampa dilelela dia mu diulu,” “diampa dia Nzambi,” ne “diampa dia muoyo.” (Yone 6:32, 33, 35) Wakaleja muvuaye mushilangane ne mana au bikole, wamba ne: “Ndi diampa didi ne muoyo divua difume mu diulu. Muntu yeye mudie diampa edi, neikale ne muoyo bua kashidi.” (Bala Yone 6:51.) Bena Yuda abu bakapeta tshibuejakaji. Kabavua bumvue tshivua Yezu muambidile ne: uvua “diampa” dia mu diulu divua dipite mana avua Yehowa mulokeshile bankambua babu kule ne kule to. Pashishe wakabambila ne: “diampa dingafila mmubidi wanyi.” Uvua usua kuamba tshinyi? Mbimpe tumanye diandamuna dia lukonko elu bualu nedileje ne: kudi mushindu wa tuetu ne balela betu kupeta muoyo wa tshiendelele. Tumonayi tshivua Yezu usua kuamba.
DIAMPA DIA MUOYO NE MUBIDI WENDE
4. Bua tshinyi tshivua Yezu muambe tshivua tshioshe bamue bantu?
4 Biakosha bantu bavua bateleja Yezu bua muvuaye muambe ne: udi ufila ‘mubidi wende bua muoyo wa ba pa buloba.’ Pamuapa bavua bela meji ne: uvua musue bua badie mubidi wende wa mashi ne mâyi, bifuane kumueneka ne: mbadi ba bantu. (Yone 6:52) Yezu wakalua kubambila kabidi bualu buakabasamisha mutu ebu: “Nuenu kanuyi badie mubidi wa Muana wa muntu ne banue mashi ende, kanuena ne muoyo munda muenu to.”—Yone 6:53.
5. Ntshinyi tshidi tshitujadikila ne: Yezu kavua ulomba bantu bua kunua mashi ende a mu mijilu?
5 Tshikondo tshia Noa, Nzambi uvua mukandike bantu bua kudia mashi. (Gen. 9:3, 4) Wakalua kabidi kuakandika mu mikenji ivuaye muelele bena Isalele. Muntu uvua uadia bavua ne bua “kumushipa.” (Lew. 7:27, dim.) Yezu wakambila bena Yuda bua kutumikila mikenji yonso ya Mose. (Mat. 5:17-19) Nunku katuena mua kuela meji ne: uvua wambila bena Yuda bua kudia mubidi wende wa mashi ne mâyi anyi kunua mashi ende a mu mijilu to. Kadi Yezu uvua muambe mêyi au bua kulongesha bantu tshia kuenza bua kupeta “muoyo wa tshiendelele.”—Yone 6:54.
6. Bua tshinyi tudi tuamba ne: tshivua Yezu muambe tshia kudia mubidi ne kunua mashi ende, uvua mutshiambe mu ngakuilu wa mu tshimfuanyi?
6 Ntshinyi tshivua Yezu usua kuamba? Mbiumvuike ne: Yezu uvua wakula mu ngakuilu wa mu tshimfuanyi anu muvuaye muakule ne mukaji muena Samalea. Uvua mumuambile ne: “Muntu yonso udi unua mâyi angamupesha kakumvua kabidi nyota nansha kakese, kadi mâyi angamupesha nealue munda muende mushimi wa mâyi adi afukuka bua kufila muoyo wa tshiendelele.” (Yone 4:7, 14) b Yezu kavua usua kuamba ne: mukaji au uvua ne bua kunua mâyi etu malelela aa bua kupeta muoyo wa tshiendelele to. Bia muomumue, kavua wambila bantu bavuaye uyukila nabu mu Kapênuma ne: bobu badie mubidi wende muena dîna ne banue mashi ende a mu mijilu, bavua bashala ne muoyo kashidi to.
BUALU BUVUA YEZU MUAMBE MU BIKONDO BIBIDI BISHILANGANE
7. Ntshinyi tshidi bamue bamba bua mêyi a Yezu adi mu Yone 6:53?
7 Bamue bantu ba mu bitendelelu badi bamba ne: mêyi a Yezu adi mu Yone 6:53 a kudia mubidi wende ne kunua mashi ende, avua aleja tshivua ne bua kuenzeka mu Didia dia dilolo dia Mukalenge bualu dîba divuaye muenze Didia dia dilolo adi, wakamba bualu bua muomumue. (Mat. 26:26-28) Badi bamba kabidi ne: muntu yonso udi ubuela mu Didia dia dilolo dia Mukalenge, udi ne bua kudia diampa ne kunua mvinyo bidibu bafilamu. Tshidibu bamba etshi ntshilelela anyi? Mbimpe tumanye diandamuna dia lukonko elu bualu tshidimu tshionso etshi, bantu miliyo ya bungi pa buloba bujima batu badisangisha netu bua kuenza tshibilu etshi. Netumone dishilangana didi pankatshi pa tshivua Yezu muambe mu Yone 6:53 ne tshivuaye muambe mu Didia dia dilolo dia Mukalenge.
8. Leja mudi mêyi a Yezu adi mu Yone nshapita 6:53 kaayi aleja tshivua ne bua kuenzeka mu Didia dia dilolo dia Mukalenge. (Tangila kabidi tshimfuanyi.)
8 Tumonayi bualu buvua Yezu muambe mu bikondo bibidi bishilangane. Tshia kumpala, mmuaba kayi uvua Yezu muambidile mêyi adi mu Yone 6:53-56? Bivua mu tshidimu kayi? Uvua muambile musumba wa bena Yuda mu 32 pavuaye mu Galela, tuambe ne: tshidimu bu tshijima kumpala kua kubanjijaye Didia dia dilolo dia Mukalenge mu Yelushalema. Tshibidi, uvua muambile bantu ba mushindu kayi? Bantu ba bungi bavua bamuteleja mu Galela bavua banange anu biakudia pamutu pa malu a mu nyuma. (Yone 6:26) Ke bualu kayi, pavua Yezu muambe bualu buvuabu kabayi bumvue bimpe, bakalekela kumuteleja; too ne bamue ba ku bayidi bende bakalekela kumulonda. (Yone 6:14, 36, 42, 60, 64, 66) Kadi malu kaakenzeka nanku mu 33 pavua Yezu mubanjije Didia dia dilolo dia Mukalenge to, bualu nansha muvua bapostolo bende ba lulamatu 11 kabayi bumvue malu avuaye ubalongesha dilolo adi, kabakamulekela to. Bu muvuabu bobu batuishibue ne: Yezu uvua Muana wa Nzambi uvua mufume mu diulu, bavua bashilangane ne bantu ba bungi bavua bateleja Yezu mu Galela. (Mat. 16:16) Yezu wakabambila ne: “Nuenu ke badi bashale nanyi mu makenga anyi.” (Luka 22:28) Dishilangana dia malu edi didi dileja ne: mêyi a Yezu adi mu Yone nshapita 6:53 kaena aleja tshivuabu ne bua kuenza mu Didia dia dilolo dia Mukalenge to. Kudi malu makuabu adi ajadika bualu ebu.
Ku dia bakaji: Yezu wambila musumba wa bantu mu Galela bualu budi mu Yone nshapita 6. Ku dia balume: Yezu uyukila ne kasumbu kakese ka bapostolo ba lulamatu mu Yelushalema panyima pa tshidimu bu tshijima (Tangila tshikoso 8)
MÊYI A YEZU ADI NE MUSHINGA KUUDI
9. Mêyi avua Yezu muambe mu Didia dia dilolo dia Mukalenge avua atangila banganyi?
9 Pavua Yezu wenza Didia dia dilolo dia Mukalenge, wakapesha bapostolo bende diampa kadiyi diela luevene, kubambilaye ne: didi dileja mubidi wende. Pashishe wakabapesha mvinyo, kuambaye ne: uvua uleja ‘mashi a tshipungidi.’ (Mâko 14:22-25; Luka 22:20; 1 Kol. 11:24) Tshivuaye muambe tshivua ne mushinga wa bungi. Uvua mudie tshipungidi tshipiatshipia ne ‘nzubu wa Isalele wa mu nyuma’ wikala “mu Bukalenge bua Nzambi,” kadi kavua mutshidie ne bantu bonso to. (Eb. 8:6, 10; 9:15) Bapostolo kabavua bumvue tshivuaye muambe to, kadi bakavua pa kuedibua manyi a nyuma muimpe ne kubuela mu tshipungidi tshipiatshipia bua kuikalabu ne Yezu mu diulu.—Yone 14:2, 3.
10. Mbualu kayi bukuabu budi buleja ne: tshivua Yezu muambe mu Galela ntshishilangane ne tshivuaye muambe mu Didia dia dilolo dia Mukalenge? (Tangila kabidi tshimfuanyi.)
10 Manya ne: Didia dia dilolo dia Mukalenge divua ditangila anu “kasumbu kakese ka mikoko.” Kasumbu aku kakatuadija ne bapostolo ba lulamatu bavua ne Yezu pavuaye wenza Didia dia dilolo dia Mukalenge adi. (Luka 12:32) Bobu ke bavua ne bua kudia diampa adi ne kunua mvinyo au. Bantu bakuabu badi balua bena mu kasumbu aku badi pabu ne bua kudia diampa ne kunua mvinyo padi Didia dia dilolo dia Mukalenge dienzeka. Bobu ke bikala ne Yezu mu diulu. Tshivuaye muambile bapostolo bende dilolo adi ntshishilangane ne tshivuaye muambile musumba wa bantu mu Galela. Tshivuaye muambe mu Galela tshivua tshiotshi tshitangila bantu ba bungi.
Bantu badi badia diampa ne banua mvinyo mbakese, kadi muntu yonso udi mua kuleja ditabuja kudi Yezu ne kupeta muoyo wa tshiendelele (Tangila tshikoso 10)
11. Ntshinyi tshivua Yezu muambe mu Galela tshivua tshileja ne: kavua wakula bua kasumbu kakese ka bantu to?
11 Bantu ba bungi bavua Yezu muyukile nabu mu Galela, bavua bakeba anu ne: abapeshe biakudia. Kadi Yezu wakatuma ntema yabu ku bualu buvua ne mushinga wa bungi kupita biakudia. Wakabambila bualu buvua mua kubapetesha muoyo wa tshiendelele. Wakabambila ne: bantu bavua bafue bavua mua kubishibua ku lufu mu dituku dia ku nshikidilu ne kushala ne muoyo kashidi. Kavua wakula bua kasumbu ka kakese ka basungula dîba adi to, uvua mulue kuakula bua bualu buaku mu Didia dia dilolo dia Mukalenge. Kadi pavuaye mu Galela, uvua wakula bua mabenesha avua bantu bonso mua kupeta. Ke bualu kayi wakabambila ne: “Muntu yeye mudie diampa edi, neikale ne muoyo bua kashidi; bushuwa, diampa dingafila mmubidi wanyi bua muoyo wa ba pa buloba.”—Yone 6:51. c
12. Ntshinyi tshidi muntu ne bua kuenza bua kupeta muoyo wa tshiendelele?
12 Yezu kavua usua kuambila bena Yuda bavua mu Galela ne: muntu yonso uvua ne bua kupeta muoyo wa tshiendelele to, kadi anu eu udi ‘udia diampa,’ tuambe ne: udi uleja ditabuja kudiye. Bena Kristo ba bungi ba ku dîna batu bela meji ne: bobu anu ‘bitabuje Yezu’ bu musungidi wabu, nebasungidibue. (Yone 6:29, Mukanda wa Nzambi) Kadi bamue bantu bavua bateleja Yezu kumpala bakamuela nyima. Bua tshinyi?
13. Bua kulua muyidi mulelela wa Yezu, bidi bikengela kuenza tshinyi?
13 Bantu ba bungi bavua Yezu mudiishe, bavua basue kumulonda anu bua biakudia. Bavua bakeba ne: Yezu abondope, abapeshe biakudia, anyi abalongeshe malu avua abafunya ku matshi. Kadi Yezu wakaleja ne: kavua mulue pa buloba bua kupesha bantu bintu to, uvua mulue bua kubalongesha tshia kuenza bua kuluabu bayidi balelela. Bivua bikengela bitabe dibikila diende dia ‘kuya kudiye.’ Badi baditaba padibu batumikila malu onso adiye ubalongesha.—Yone 5:40; 6:44.
14. Bu muvua Yezu mufile mubidi ne mashi ende bua kuilale mushindu wa kupeta muoyo wa tshiendelele, ntshinyi tudi ne bua kuenza bua kuwupeta?
14 Yezu wakalongesha musumba wa bantu au ne: uvua ne bua kufila mubidi wende ne mashi ende bua kuikale mushindu wa bantu kupeta muoyo wa tshiendelele. Bivua bikengela bitabe bualu abu. Nansha lelu, bidi bikengela tubuitabe petu. (Yone 6:40) Nunku, bua tuetu kupeta muoyo wa tshiendelele udibu baleje mu Yone 6:53, mbimpe tuitabuje mulambu wa tshia kupikulangana natshi. Bantu ba bungi badi ne mushindu wa kuwupeta.—Ef. 1:7.
15-16. Mmalu kayi a mushinga atudi balonge mu Yone nshapita 6?
15 Mêyi adi mu Yone nshapita 6 adi ne mushinga wa bungi kutudi tuetu bonso. Adi aleja ne: Yezu udi utabalela bantu bikole menemene. Pavuaye mu Galela, wakondopa bantu, kuyisha malu a Bukalenge, ne kupesha bantu biakudia bivuabu bakengela. (Luka 9:11; Yone 6:2, 11, 12) Bualu bua mushinga mukole mbuobu ebu: uvua mubalongeshe ne: udi “diampa dia muoyo.”—Yone 6:35, 48.
16 Bantu bavuaye mubikile ne: “mikoko mikuabu” kabena ne bua kudia diampa ne kunua mvinyo mu Didia dia dilolo dia Mukalenge ditu dienzeka tshidimu tshionso to. (Yone 10:16) Nansha nanku, badi badia “diampa dia muoyo,” tuambe ne: badi baleja ditabuja mu mulambu wa Yezu wa tshia kupikulangana natshi ne bitabuja malu a dikema adiwu upetesha bantu. (Yone 6:53) Kadi bantu badi badia diampa ne banua mvinyo badi baleja ne: mbabuele mu tshipungidi tshipiatshipia ne badi ne ditekemena dia kuya kukokesha mu Bukalenge bua Nzambi. Nansha tuetu bela manyi anyi bena mu mikoko mikuabu, tumanye ne: malu adi mu Yone nshapita 6 adi ne mushinga wa bungi kutudi. Adi aleja ne: bidi bikengela kuleja ditabuja bua kupeta muoyo wa tshiendelele.
MUSAMBU WA 150 Kebayi Nzambi bua anusungile
a Mbumvuije malu adi Yone 6:5-35 mu tshiena-bualu tshishale.
b Mâyi avua Yezu mutele adi aleja malu adi Yehowa wenza bua bantu bapete muoyo wa tshiendelele.
c Mu Yone nshapita 6 mudi muaku udibu mua kukudimuna ne: “muntu yonso” bua kuleja ne: bantu bonso badi mua kushala ne muoyo kashidi.—Yone 6:35, 40, 47, 54, 56-58.
