1. Mmunyi muvua bantu bamona diampa kale?

 MAMPA avua tshiakudia tshinene bua bantu ba bungi kale. (Gen. 14:18; Luka 4:4) Ke bualu kayi misangu mikuabu padi Bible wakula bua tshiakudia, utu utela “diampa.” (Mat. 6:11) Yezu wakenza bishima bibidi ne mampa; mbishima bidi bimanyike bikole. (Mat. 16:9, 10) Tshimue tshia ku bishima abi tshidi mu Yone nshapita 6. Patudi tuenda tutshikonkonona, tukebe malongesha atudi mua kutumikila lelu.

2. Ndîba kayi divua bantu binunu bia bungi dijinga ne biakudia?

² Musangu mukuabu bayidi ba Yezu bamane kujikija kuyisha, Yezu wakabuela nabu mu buatu, kusabukabu Mbuu wa Galela bua baye kuikisha. (Mâko 6:7, 30-32; Luka 9:10) Bavua baye muaba mutalale, uvua kawuyi mitoyi uvua pabuipi ne Betesaida. Katupa aka, bantu binunu bia bungi kubunguila. Yezu kakabalengulula to. Wakatuadija kubalongesha malu a Bukalenge, kuondopaye bavua basama. Bu mukavua kuîsu kufiika, bayidi bende bakadiebeja muvua bantu bonso abu mua kupeta tshiakudia. Bamue ba kudibu bavua ne biakudia bikese, kadi ba bungi bavua ne bua kuya mu misoko mikuabu bua kubisumba. (Mat. 14:15; Yone 6:4, 5) Ntshinyi tshivua Yezu mua kuenza?

TSHISHIMA TSHIA DIVUDIJA MAMPA

3. Ntshinyi tshivua Yezu muambile bayidi bende bua kuenza bua kudiisha musumba wa bantu? (Tangila kabidi tshimfuanyi tshia pa.)

³ Yezu wakambila bayidi bende ne: “Kabena ne bua kuya to; nuenu bapeshayi tshia kudia.” (Mat. 14:16) Kabivua mua kukumbana  to, bualu kuvua bantu balume batue ku 5 000 ne bantu bakaji ne bana. Pamuapa bantu bonso bavua bakengela kudiisha bavua mua kuikala 15 000. (Mat. 14:21) Muyidi Andele wakamba ne: “Muana wa balume udi muaba eu ne mampa atanu a orje ne mishipa ya mikese ibidi. Kadi bintu ebi bidi mua kuenzela bantu bungi nunku tshinyi?” (Yone 6:9) Bapele ne bantu bakuabu ba tshianana bavua batamba kudia mampa a orje. Pamuapa mishipa ayi ivua mua kuikala mishipa ya mukele miumisha. Kadi mampa ne mishipa bivua nabi muana wa balume au, kabivua mua kukumbana bua kudiisha bantu bungi nanku to.

4. Yone 6:11-13 udi utulongesha tshinyi? (Tangila kabidi bimfuanyi.)

⁴ Bu muvua Yezu musue kudiisha musumba wa bantu abu, wakabambila bua basombe mu mashinde mu bisumbu. (Mâko 6:39, 40; bala Yone 6:11-13.) Pashishe wakasakidila Tatuende bua mampa ne mishipa ayi. Bivua bikumbane menemene bua kusakidilaye Nzambi nanku bualu yeye ke mufidi wa biakudia. Mbimpe tulonde tshilejilu tshia Yezu tshia kusambila kumpala kua kudia, nansha tudia nkayetu anyi ne bantu. Yezu wakambila bayidi bende bua kuabanyina bantu biakudia. Bantu bonso bakadia, bobu kukuta. Yezu wakambila bayidi bende bua kabimanshi biakudia bivua bishale to. Bakabisangisha bua kulua kubidia pamuapa pashishe. Mmutushile tshilejilu tshimpe be! Biwikale muledi, udi mua kulongesha bana bebe ne tshilejilu tshia Yezu etshi mudibi ne mushinga bua kusambila kumpala kua kudia ne bua kupesha bakuabu bimpe ne kubenzela malu mimpe.

5. Ntshinyi tshivua bantu benze pavua Yezu muenze bualu buimpe buvua bubakemeshe? Ntshiakenza Yezu ntshinyi?

 ⁵ Bantu bavua bakema bikole bua mushindu uvua Yezu ulongesha ne bua bishima bivuaye wenza. Bu muvuabu bamanye tshivua Mose mubambile tshia ne: Nzambi neajule muprofete munene, bakatuadija pamuapa kudiebeja bikala Yezu ni uvua muprofete au. (Dut. 18:15-18) Biobi nanku, bavua mua kuikala pamuapa bela meji ne: Yezu uvua mukokeshi munene uvua ukumbana bua kupesha bantu bonso biakudia. Ke bualu kayi musumba wa bantu au uvua ukeba ‘kukuata [Yezu] bua kumuteka mukalenge.’ (Yone 6:14, 15) Bu Yezu mubalekele bamuteka mukokeshi, uvua ubuelakana mu malu a tshididi a bena Yuda bavua ku bukokeshi bua bena Lomo. Wakitaba anyi? Tòo. Bible udi wamba ne: ‘wakaya ku mukuna yeye nkayende.’ Nansha muvua bantu bakeba kumuteka mukalenge, Yezu kakabuelakana mu malu a tshididi to. Bualu ebu budi dilongesha dinene kutudi.

6. Mmunyi mutudi mua kuleja ne: tudi basue kuidikija Yezu? (Tangila kabidi tshimfuanyi.)

⁶ Mu bulelela, bantu kabakutulomba bua kuenza tshishima tshia kubavudijila biakudia anyi tshia kubondapa peshi kabakukeba bua kututeka bakalenge to. Kadi badi mua kutulomba bua kuelela muntu kakanda ku masungula anyi kumutua mpanda bualu badi bela meji ne: nealengeje malu. Au ke mushindu  udibu mua kutubueja mu malu a tshididi. Yezu mmutushile tshilejilu tshimpe. Wakabenga bua kubuelakana mu malu a tshididi. Yeye muine wakalua kuamba ne: “Bukalenge buanyi ki mbua pa buloba ebu to.” (Yone 17:14; 18:36) Mbimpe bena Kristo bidikije Yezu, bikale bela meji anu bu yeye. Anu bu Yezu, tudi tutua Bukalenge bua Nzambi mpanda, tubumanyisha bantu ne tusambila bua bulue. (Mat. 6:10) Tuakulayi kabidi bua tshishima tshia mampa tshivua Yezu muenze bua tumone malu makuabu aditshi tshitulongesha.

“DIUMVUIJA DIA MAMPA”

7. Ntshinyi tshivua Yezu muenze? Ntshinyi tshiakenza bapostolo bende bua bualu abu? (Yone 6:16-20)

⁷ Yezu mumane kudiisha musumba wa bantu au, wakambila bapostolo bende bua bumbuke muaba au, babuele mu buatu bua kuya ku Kapênuma; pashishe yeye kuya ku mukuna bua kuepuka mitoyi ivua musumba wa bantu umuela bua kumuvuija mukalenge. (Bala Yone 6:16-20.) Pavua bapostolo pa mâyi, tshipepele tshikole tshiakatuta, kujudishatshi mavuala mabi. Pashishe Yezu wakaya mutangile kuvuabu, wendela pa mâyi. Wakambila mupostolo Petelo bua endele pende pa mâyi apu. (Mat. 14:22-31) Pakabuela Yezu mu buatu, tshipepele tshiakabatama, ke bayidi kuamba ne: “Wewe udi bushuwa Muana wa Nzambi.” a (Mat. 14:33) Kadi pavua Yezu muenze tshishima tshia mampa, kabavua bakeme mushindu au to. Bua tshinyi? Mâko udi umvuija, wamba ne: “[Bapostolo] bakakema bikole bua bualu ebu, bualu kabavua bajingulule diumvuija dia mampa, kadi mioyo yabu ivua anu ne lujoko bua kumvua.” (Mâko 6:50-52) Bushuwa, kabavua bajingulule ne: Yehowa uvua mupeshe Yezu bukole bua kuenza bishima bikuabu to. Matuku makese pashishe, Yezu wakakula bua tshishima tshia mampa atshi. Tshishima atshi tshidi tshitulongesha bualu bukuabu.

8-9. Bua tshinyi musumba wa bantu uvua wenda anu ukeba Yezu? (Yone 6:26, 27)

⁸ Bantu bavua Yezu mudiishe bavua basue anu kudia. Dituku diakalonda, pakamonabu ne: Yezu ne bayidi bende bavua bumbuke, bakabuela mu matu avua afumina mu Tibelia, kuyabu batangile ku Kapênuma bua kutuilangana ne Yezu. (Yone 6:22-24) Dijinga diabu divua nangananga dia kuteleja malu makuabu a Bukalenge anyi? Tòo. Meji abu avua anu matuma ku mampa a kudia. Bua tshinyi tudi tuamba nanku?

⁹ Mona tshiakenzeka pavua bantu abu bapete Yezu pabuipi ne Kapênuma. Yezu wakabambila ne: bavua balue kudiye anu bualu bavua basue kudia. Nansha muvuabu “badie mampa, bukute,” Yezu wakabambila ne: ‘mbiakudia bidi binyanguka.’ Kadi wakabalomba bua kuenza mudimu bua kupeta “biakudia bidi bishala bua muoyo wa tshiendelele.” (Bala Yone 6:26, 27.) Yezu wakabambila ne: Tatu wende uvua mua kubapesha biakudia abi. Pavuaye mubambile ne: biakudia abi bivua mua kubapetesha muoyo wa tshiendelele, biakabapitshila bikole! Mbiakudia kayi abi? Ntshinyi tshivuabu mua kuenza bua kubipeta?

10. “Mudimu wa Nzambi” uvua bantu ne bua kuenza mmudimu kayi?

¹⁰ Bena Yuda abu bavua pamuapa bela meji ne: bivua bikengela benze midimu kampanda bua babapeshe biakudia abi. Bavua mua kuikala batume meji ku “midimu” ivua mikenji ya Mose ilomba bua kuenza. Kadi Yezu wakabambila ne: “Mudimu wa Nzambi udi nunku: nuleje ditabuja mu muntu udiye mutume.” (Yone 6:28, 29) Yezu ukavua muleje ne:  bua bantu ‘kupeta muoyo wa tshiendelele,’ bavua ne bua kuleja ditabuja kudi muleji mpala wa Nzambi. (Yone 3:16-18, 36) Wakalua kabidi kuakula bua tshivua tshikengela kuenza bua kupeta muoyo wa tshindelele.​—Yone 17:3.

11. Mmunyi muvua bena Yuda baleje ne: muoyo wabu uvua anu ku biakudia? (Misambu 78:24, 25)

¹¹ Bena Yuda abu kabavua bitaba tshivua Yezu mubalongeshe tshia kuenza “mudimu wa Nzambi” mupiamupia to. Bakamuebeja ne: “Ntshimanyinu kayi tshiudi wenza bua tuetu tutshimone ne tukuitabuje?” (Yone 6:30) Bakaleja ne: bantu ba mu tshikondo tshia Mose bavua bapete mana a kudia avua tshiakudia tshiabu tshia ku dituku. (Neh. 9:15; bala Misambu 78:24, 25.) Mbimueneke bimpe ne: meji abu avua anu ku biakudia. Bualu pakalua Yezu kuakula bua “diampa dilelela dia mu diulu” divua anu bu mana a mu diulu avua apetesha bantu muoyo, bakapanga too ne bua kumuebeja tshivuadi diumvuija. (Yone 6:32) Bu muvua muoyo wabu muikale anu ku biakudia, kabavua batuma ntema ku malu avua Yezu ubalongesha to. Ndilongesha kayi ditudi tupeta?

TSHIDI NE MUSHINGA WA BUNGI KUTUDI

12. Mmunyi muvua Yezu muleje tshidi ne mushinga wa bungi?

¹² Dilongesha dinene didi mu Yone nshapita 6 didi ne: majinga etu a mu nyuma ke adi ne bua kuikala ne mushinga wa bungi. Vuluka ne: ke tshivua Yezu muleje pavuaye mukandamene diteta dia Satana. (Mat. 4:3, 4) Nansha mu Muyuki wende wa pa mukuna, uvua mutambe kuakula bua mudibi bikengela kuikala dijinga ne malu a mu nyuma. (Mat. 5:3) Ke bualu kayi tudi mua kudiebeja ne: ‘Nsombelu wanyi udi uleja ne: ntu ntamba kudifila bua kukumbaja majinga anyi a mu nyuma pamutu pa a ku mubidi anyi?’

13. a) Bua tshinyi kuikala ne biakudia ki nkubi to? b) Ndidimuija kayi ditudi katuyi ne bua kulengulula? (1 Kolinto 10:6, 7, 11)

¹³ Ki mbibi bua kusambila bua kupeta bintu bitudi nabi dijinga to. (Luka 11:3) Bible udi wamba ne: mbimpe bua muntu ‘adie, anue ne apetele disanka mu mudimu wende mukole;’ wamba kabidi ne: mbualu budi “bufuma ku tshianza tshia Nzambi mulelela.” (Muam. 2:24; 8:15; Yak. 1:17) Nansha nanku, tudi ne bua kuteka bintu bia ku mubidi pa muaba wabi. Ke bualu buvua mupostolo Paulo mufundile bena Kristo ba ku nshikidilu wa ndongoluelu wa malu wa bena Yuda. Wakabavuluija malu avua menzekele bena Isalele pavuabu mu tshipele ne pavuabu pabuipi ne mukuna wa Sinai. Wakabadimuija bua ‘kabajingi malu mabi bu muvua [bena Isalele] baajinge.’ (Bala 1 Kolinto 10:6, 7, 11.) Yehowa wakabenzela tshishima bua kubapesha biakudia, kadi bu muvuabu ne lukuka, biakudia abi biakalua ‘bibi’ kudibu. (Nom. 11:4-6, 31-34) Pakatendelelabu kana ka ngombe ka or, bakadia, bakanua, bobu kusanka. (Ekes. 32:4-6) Paulo wakavuluija bena Kristo kumpala kua nshikidilu wa ndongoluelu wa malu wa bena Yuda wakalua mu 70 P.Y. bualu bua bena Isalele abu bua kubadimuija. Bu mutukadi petu basemene bikole ne tshikondo tshikale Yehowa ne bua kubutula buloba ebu, katulenguludi didimuija dia Paulo adi to.

14. Bible udi wamba tshinyi bua biakudia mu bulongolodi bupiabupia?

¹⁴ Pavua Yezu wakula bua “tshiakudia tshietu tshia dituku edi,” uvua wakula bua tshikondo tshienzeka disua dia Nzambi “kabidi pa buloba muomumue ne mu diulu.” (Mat. 6:9-11) Nsombelu neikale mushindu kayi tshikondo atshi? Bible udi uleja ne: Nzambi mmusue kabidi bua kuikale biakudia bimpe pa buloba. Bilondeshile Yeshaya 25:6-8, nekuikale  biakudia bimpe bitule bipuwe mu Bukalenge bua Yehowa. Misambu 72:16 ukavua muambe ne: “Nekuikale ntete ya bungi pa buloba; neyivulangane bikole pa nsongo ya mikuna.” Udi muindile ne muoyo kuulu kuulu bua kulamba tshiakudia tshiutu munange anyi tshiutu kuyi muanji kulabula anyi? Pamuapa udi kabidi muindile ne muoyo kuulu kuulu bua kudia tumuma tua mvinyo tuwakuna. (Yesh. 65:21, 22) Muntu yonso neikale utshionkomoka ne bintu biende bimpe bidiye ukuna.

15. Mmalu kayi alongeshabu bantu pabishibuabu ku lufu? (Yone 6:35)

¹⁵ Bala Yone 6:35. Ntshinyi tshidi tshindile bantu bavua badie mampa ne mishipa bivua Yezu mubapeshe? Pabishibua bantu ku lufu, pamuapa netutuilangane ne bamue ba kudibu. Nansha muvuabu bakayi bitabuje Yezu kumpala, pamuapa nebabishibue ku lufu. (Yone 5:28, 29) Nebabalongeshe tshidi mêyi a Yezu aa umvuija: “Ndi diampa dia muoyo. Muntu yonso udi ulua kundi kakumvua kabidi nzala nansha kakese.” Nebikengele bitabuje ne: Yezu uvua mufile mulambu wa tshia kupikulangana natshi bua bualu buabu. Tshikondo atshi, nekuikale programe wa dilongesha bantu babishibua ku lufu ne bana bonso baledibua. Netuikale ne disanka dia bungi dia kulongesha bantu malu a dikema! Kuenza mudimu wa kulongeshangana au nekukusankishe bikole kupita biakudia bikalamu.

16. Ntshinyi tshituakonkonona mu tshiena-bualu tshialonda?

¹⁶ Tudi bakonkonone malu makese a mu Yone nshapita 6, Yezu uvua ne malu makuabu a kulongesha bantu bua “muoyo wa tshiendelele.” Bivua bikengela ne: bena Yuda abu baateleje, nansha tuetu petu lelu tudi ne bua kuateleja. Mu tshiena-bualu tshialonda, netukonkonone malu makuabu adi mu Yone nshapita 6.