Uvua mubale bibejibeji bia Tshibumba tshia Nsentedi bia tshidimu etshi bimpe bimpe anyi? Tangilaku ni udi mua kuandamuna nkonko eyi:

Ntshilejilu kayi tshidi Yehowa mukushile bua mushindu wa kuenzela bantu bakaji malu?

Kena ne kansungansunga, wenzela bantu balume malu mimpe, kayi uenzela bantu bakaji to. Nzambi utu uteleja bantu bakaji, utu uditatshisha bua bualu buabu ne bua malu adi mabatonde. Mmutuishibue ne: nebenze mudimu wende.​—w24.01, dib. 15-16.

Efeso 5:7 udi wamba ne: “Kanubuelakanyanganyi nabu to.” Mmunyi mutudi mua kutumikila mvese eu?

Mupostolo Paulo uvua utudimuija bua katusombi ne bantu badi mua kutupangisha bua kutumikila mikenji ya Nzambi to. Bantu abu badi mua kuikala batudi tusomba nabu anyi batudi tuyukila nabu miaba ya dipetelangana ku Enternete.​—w24.03, dib. 22-23.

Tudi ne bua kubenga kuteleja malu a dishima a mishindu yonso anyi?

Padi bantu badi bamueneka bikale ne meji mimpe balonda malu adi kaayi ne bijadiki anyi padi bantu batudi katuyi bamanye batutumina mesaje peshi padi batontolodi baleja bu ne: badi ne dijinga dia kumanya bulelela, bidi bikengela tuikale ne budimu.​—w24.04, dib. 12.

Ntshinyi tshitudi bamanye bua mushindu wikala Yehowa mua kulumbuluisha mukalenge Solomo ne bantu bavua bafue mu Sodoma ne Amola ne ku Mvula wa kabutu? Kadi ntshinyi tshitudi katuyi bamanye?

Katuena ne bijadiki bia ne: bantu bonso abu mbafue bua kashidi to. Kadi tudi bamanye bimpe ne: Yehowa mmumanye malu onso mudiwu ne nNzambi wa luse lua bungi.​—w24.05, dib. 3-4.

Bu mudi Nzambi muikale “dibue,” bidi bitujadikila tshinyi? (Dut. 32:4)

Kudi Yehowa nkutudi mua kunyemena. Udi Nzambi wa kueyemena, utua anu ukumbaja milayi yende. Ngikadilu yende ne malu adiye mupangadije bua kuenza kabiena mua kushintuluka to.​—w24.06, dib. 26-28.

Ntshinyi tshidi mua kukuambuluisha bua kuibidilangana ne tshisumbu tshipiatshipia?

Eyemena Yehowa. Neakuambuluishe anu muvuaye muambuluishe batendeledi bende ba kale. Kuikadi ufuanyikija tshisumbu tshiuvua ne tshiudi mpindieu to. Dibuinka mu tshisumbu tshipiatshipia. Diaku bulunda ne benamu.​—w24.07, dib. 26-28.

Bilejilu bisatu bidi mu Matayi nshapita wa 25 bidi bitulongesha malu kayi?

Tshilejilu tshia mikoko ne mbuji bidi bitamba kuakula bua dishala ne lulamatu. Tshia nsongakaji midimuke ne mitshimbakane itshivua tumama tshidi tshitamba kuakula bua kuikala badilongolole ne kushala badimuke. Tshia ntalanta tshidi tshitamba kuleja mushinga wa kuikala benji ba mudimu.​—w24.09, dib. 20-24.

Lutanda lua ntempelo wa Solomo luvua bule kayi?

Amue maniskri a kale adi amba mu 2 Kulondolola 3:4 ne: lutanda alu luvua bule bua “nkubita 120,” tuambe ne: bule bua metre 53! Kadi mifundu mikuabu ya kueyemena idi yamba yoyi ne: luvua bule bua “nkubita 20,” tuambe ne: bule bua metre 9. Bidi bimueneka ne: tshia “nkubita 20” ntshiotshi bualu bimanu bia ntempelo bivua ne mupimbu mukese.​—w24.10, dib. 31.

Padi Bible muambe ne: musadidi wa mudimu ‘ikale ne mukaji umue,’ bidi biumvuija tshinyi? (1 Tim. 3:12)

Bidi biumvuija ne: udi ne mukaji anu umue udiye musele, kena ne bua kuenda masandi to. Kena ne bua kuambila anyi kuenzela bantu bakaji bakuabu malu a mananga to.​—w24.11, dib. 19.

Bua tshinyi tudi tuamba ne: Yone 6:53 kavua wakula bua tshivua ne bua kuenzeka mu Didia dia dilolo dia Mukalenge?

Yone 6:53 udi wakula bua mudibi bikengela kudia mubidi wa Yezu ne kunua mashi ende. Yezu uvua muambe mêyi au mu 32 pavuaye mu Galela. Uvua wakula ne bena Yuda batshivua ne dijinga dia kumuitabuja. Kadi Yezu wakalua kuenza Didia dia dilolo dia Mukalenge tshidimu tshijima pashishe mu Yelushalema. Bantu bavuaye ne bua kukokesha nabu mu diulu ke bavuaye muambile mêyi au dîba adi.​—w24.12, dib. 10-11