MU DISATU dia matuku 18/1/2023, bakela dimanyisha dia pa buadi mu site wa jw.org dia ne: muanetu Gage Fleegle ne Jeffrey Winder mbalue bena mu Kasumbu kaludiki ka Bantemu ba Yehowa. Bana betu ba balume babidi aba mbenzele Yehowa mudimu ne lulamatu munkatshi mua bidimu bia bungi.

Muanetu Fleegle mmukolele ku ouest kua tshimenga tshia Pennsylvanie, mu États-Unis. Mbamulongeshe Bible kudi baledi bende. Patshivuaye tshitende, dîku diabu diakumbuka kuya kusombela mu katshimenga kakese muvuabu dijinga ne bamanyishi ba bungi. Matuku makese pashishe, yeye kubatijibua mu dia 20/11/1988.

Baledi ba muanetu Fleegle bavua anu bamukankamija bua kubuela mu mudimu wa ku dîba ne ku dîba. Bavua ne tshibidilu tshia kubikila batangidi ba bijengu ne bena ku Betele kuabu. Dîba adi, muanetu Fleegle uvua umona disanka divua nadi bena Kristo nende abu. Matuku makese panyima pa batismo wende, wakalua mpanda-njila wa pa tshibidilu mu dia 1/9/1989. Bidimu bibidi pashishe, wakakumbaja tshipatshila tshiende tshivuaye mudifundile pavuaye ne bidimu 12 tshia kuya ku Betele. Bakamubikila ku Betele wa mu Brooklyn mu ngondo wa 10/1991.

Pavua muanetu Fleegle mufike ku Betele, wakenza mudimu wa dilamakaja mikanda munkatshi mua bidimu 8. Pashishe, bakamutuma mu Tshibambalu tshia mudimu. Tshikondo atshi, uvua muenze bidimu ndambu mu tshisumbu tshia muakulu wa tshiena Russie. Mu 2006, wakasela muanetu Nadia wakalua kubuela pende ku Betele. Bakaya kuenza mudimu mu teritware uvuabu bakula tshimputulukeshi, pashishe kuenzabu bidimu bipite pa 10 mu teritware uvuabu bakula tshiena Espagne. Muanetu Fleegle mumane kuenza bidimu bia bungi mu Tshibambalu tshia mudimu, bakamutuma mu Komite wa dilongesha, pashishe kuluabu kumutuma mu Komite  wa mudimu. Mu ngondo 3/2022, bakamuteka muambuluishi mu Komite wa mudimu wa Kasumbu kaludiki.

Muanetu Winder uvua mukolele mu Murrieta mu tshimenga tshia Californie mu États-Unis. Baledi bende ke bavua bamulongeshe bulelela, ne wakabatijibua mu dia 29/3/1986. Wakangata bumpanda-njila buambuluishi mu ngondo mikese yakalonda. Wakatungunuka ne mudimu au bualu uvua muwunange bikole. Kadi pakapita ngondo ndambu, wakalua mpanda-njila wa pa tshibidilu mu 1/10/1986.

Pakavuaye tshitende, wakaya kumona batutuende babidi bavua benza mudimu ku Betele. Diya kubamona adi, diakamupetesha dijinga dia kulua kuwuja dilomba dia kuya ku Betele pavuaye ukola. Bakamubikila ku Betele wa Wallkill mu ngondo 5/1990.

Muanetu Winder mmuenze mudimu mu bibambalu bishilashilangane ku Betele. Tshibambalu tshia disukula dia nzubu, Tshibambalu tshidi tshitangila malu a bia pa madimi, ne mu Biro bia Betele. Wakasela muanetu Angela mu 1997. Katshia anu ku dituku adi too ne lelu, badi benzela Yehowa mudimu ku Betele. Mu 2014, bakabatuma ku Warwick kuvuaye muambuluishe mu luibaku lua nzubu ya ku Biro bietu binene bia buloba bujima. Mu 2016 bakabatuma ku Patterson kuvua muanetu Winder muambuluishe mu tshibambalu tshia mêyi ne bidindimbi. Bidimu binayi pashishe, bakabapingaja ku Warwick kuvuabu batume muanetu Winder mu Komite udi utangila bena ku Betele. Mu ngondo 3/2022, bakamuteka mu Komite udi utangila bena ku Betele wa Kasumbu kaludiki.

Tudi tusambila bua Yehowa abeneshe bana betu badi “mapa mikale bantu” aba padibu batungunuka ne kuenza mudimu mukole bua kutua malu a Bukalenge mpanda.—Ef. 4:8.