Yehowa mmutekemene bua tumuindile ne lutulu dîba dienzaye malu mu tshikondo tshidiye musungule. Bua tshinyi Yehowa mmutekemene ne: tumuindile ne lutulu? Tshidi mua kutuambuluisha bua kuikala ne disanka patudi bamuindile ntshinyi?

BUA TSHINYI YEHOWA UDI UTEKEMENA BUA TUMUINDILE?

Bible udi wamba ne: “Yehowa mmuindile ne lutulu luonso bua kunuleja bulenga, ne yeye neajuke bua kunuleja luse. Bualu Yehowa udi Nzambi wa kulumbuluisha kuakane. Ba diakalenga mbonso badi batungunuka ne kumutekemena.” (Yesh. 30:18) Mêyi a Yeshaya aa bavua baambile bena Yuda bavua ne mutu mukole buludiludi. (Yesh. 30:1) Kadi kuvua bena Yuda bakuabu munkatshi muabu bavua ne lulamatu; ne mêyi aa akabapetesha ditekemena. Mêyi amue amue aa adi apetesha batendeledi ba Yehowa ba lulamatu ditekemena lelu.

Nunku tudi ne bua kuindila ne lutulu bualu Yehowa udi windila ne lutulu luonso. Udi ne dituku didiye muteke bua kubutula ndongoluelu mubi wa malu eu, ne muindile pakumbana dituku adi ne dîba adi. (Mat. 24:36) Dîba adi nebimueneke patoke ne: malu onso adi Satana muambe Yehowa ne batendeledi bende nga dishima. Neabutule Satana ne muntu yonso udi uya ku luseke luende, ‘neatuleje tuetu luse.’

Mu dindila tshikondo atshi, Yehowa kena mua kutujikijila ntatu itudi nayi to; kadi udi utujadikila ne: tudi mua kuikala ne disanka patudi bamuindile. Anu mudi Yeshaya muleje, tudi mua kuikala ne disanka patudi batekemene bua bualu kampanda buimpe buenzeke. (Yesh. 30:18) a Mmunyi mutudi mua kupeta disanka adi? Kudi malu anayi atuambuluisha.

MUA KUPETA DISANKA PATUDI BINDILE

Tuma meji ku malu mimpe. Mukalenge Davidi uvua mumone malu mabi a bungi mu nsombelu wende. (Mis. 37:35) Nunku wakafunda ne: “Shala mupuwe kumpala kua Yehowa, umuindile ne muoyo kuulu kuulu. Kufiiki munda bua muntu udi ufika ku dikumbaja ngenyi idiye uluka.” (Mis. 37:7)  Davidi muine wakatumikila mubelu wa kutuma meji ku ditekemena diende dia lupandu. Uvua ubala mabenesha onso avua Yehowa umupesha. (Mis. 40:5) Tuetu tutuma petu meji ku malu mimpe a mu nsombelu wetu, katuyi tuatuma ku malu mabi adi enzeka muaba utudi basombele, kabiakutukolela bua kuindila Yehowa to.

Ikala utumbisha Yehowa bikole. Mufundi wa Musambu wa 71 (uvua pamuapa Davidi) wakambila Yehowa ne: “Nentungunuke ne kuindila; nemvudije butumbi buebe.” (Mis. 71:14) Mmunyi muakatumbishaye Yehowa? Uvua wambila bakuabu malu ende ne wimba misambu ya kumutumbisha nayi. (Mis. 71:16, 23) Anu bu Davidi, tudi mua kuikala ne disanka patudi bindile Yehowa. Tutu tumutumbisha patudi tuyisha, patudi tuyukila ne bakuabu dituku dionso, ne patudi tumuimbila misambu. Musangu uwimba misambu ya Bukalenge, utabalele bimpe malu adimu.

Itaba bua bena Kristo nebe bakukankamije. Pavua Davidi mutuilangane ne ntatu, wakambila Yehowa ne: “Kumpala kua bena lulamatu bebe, nentekemene dîna diebe.” (Mis. 52:9) Tuetu petu tudi mua kuitaba bua bena Kristo netu batukankamije patudi mu bisangilu, mu buambi, nansha patudi tusomba nabu.—Lomo 1:11, 12.

Kolesha ditekemena diebe. Misambu 62:5 udi wamba ne: “Ndi muindile Nzambi mupuwe talalaa, bualu ditekemena dianyi didi difumina kudiye.” Bidi ne mushinga bua tuetu kuikala ne ditekemena dikole, nangananga padi nshikidilu wa ndongoluelu wa malu eu kayi muanji kulua mutuvua belele meji. Tudi ne bua kuikala batuishibue ne: milayi yonso ya Yehowa neyikumbane nansha tuetu ne bua kuindila mutantshi bule kayi. Tudi mua kukolesha ditekemena dietu tuetu tudilongela Dîyi dia Nzambi; tshilejilu, mêyi a buprofete, mudi mêyi a mu Bible apetangana, ne malu adi atangila Yehowa adiye utuleja. (Mis. 1:2, 3) Tudi kabidi ne bua kutungunuka ne ‘kusambila ne nyuma muimpe,’ bua kulama bulunda buimpe butudi badie ne Yehowa patudi bindile dikumbana dia mulayi wende wa kupesha bantu muoyo wa tshiendelele.—Yuda 20, 21.

Ikala mutuishibue anu bu Davidi ne: Yehowa udi umona bonso badi bamuindile ne lutulu ne udi ubaleja dinanga diende dia lulamatu. (Mis. 33:18, 22) Tungunuka ne kuindila Yehowa ne lutulu, utuma meji ebe anu ku malu mimpe, umutumbisha, witaba dikankamija dia kudi bena Kristo nebe, ne ulama ditekemena diebe anu dikole.