TSHIENA-BUALU TSHIA KULONGA 7
MUSAMBU WA 51 Tudi badilambule kudi Nzambi
Tshidi Banazi batulongesha
“Ngua tshijila kudi Yehowa matuku onso a Bunazi buende.”—NOM. 6:8.
TSHIPATSHILA
Mudi tshilejilu tshia Banazi tshituambuluisha bua kuenzela Yehowa mudimu ne dikima ne lungenyi lua kudipangisha amue malu.
1. Ndungenyi kayi luimpe ludi batendeledi ba Yehowa baleje mukantshi mua bidimu?
UTU WANGATA bulunda buebe ne Yehowa ne mushinga wa bungi anyi? Tudi batuishibue ne: bidi nanku. Kuena nkayebe to. Katshia ku kale, bantu ba bungi bavua pabu babuangate ne mushinga. (Mis. 104:33, 34) Bantu ba bungi mbadipangishe amue malu bua kutendelela Yehowa, ke tshivua Banazi ba mu Isalele benze. Banazi bavua banganyi? Tshilejilu tshiabu tshidi tshitulongesha tshinyi?
2. a) Banazi bavua banganyi? (Nomba 6:1, 2) b) Ntshinyi tshivua tshisaka bamue bena Isalele bua kushala Banazi?
2 Muaku “Munazi” udi ufumina ku muaku wa mu tshiena Ebelu udi umvuija “musungula,” “mulambula,” anyi “muteka ku leseke.” Muaku eu uvua uleja bena Isalele bavua ne tshisumi, bavua badipangisha malu bua kuenzela Yehowa mudimu wa pa buawu. Mikenji ya Mose ivua yanyishila muntu mulume anyi muntu mukaji bua kuenza mutshipu wa pa buawu kudi Yehowa bua kushala Munazi bua tshikondo kampanda. a (Bala Nomba 6:1, 2.) Mutshipu anyi dilaya adi divua dilomba kutumikila amue malu avua bena Isalele bakuabu kabayi ne bua kutumikila to. Ntshinyi tshivua tshisaka muena Isalele bua kushala Munazi? Mmushindu uvuaye munange Yehowa bikole ne dianyisha divuaye nadi bua bintu bia bungi bivua Yehowa mumupeshe.—Dut. 6:5; 16:17.
3. Mmunyi mudi bantu ba Nzambi lelu bafuanangane ne Banazi?
3 Mutshipu wa Bunazi wakafua pavua “mukenji wa Kristo” mupingane pa Mikenji ya Mose. (Gal. 6:2; Lomo 10:4) Nansha nanku, lelu eu bantu ba Yehowa badi batungunuka ne kuleja mudibu ne dijinga dikole dia kumuenzela mudimu ne muoyo wabu wonso ne anyima wabu yonso ne lungenyi luabu luonso ne bukole buabu buonso anu bu Banazi. (Mâko 12:30) Tudi tuenza petu mutshipu eu ku budisuile patudi tudilambula kudi Yehowa. Bua kuwukumbaja, bidi bikengela kuenza disua dia Yehowa ne kudipangisha amue malu bua kumona mua kumuenzela mudimu. Patudi tuenda tukonkonona muvua Banazi bakumbaje mutshipu wabu, netupete malongesha a mushinga a mutudi mua kukumbaja petu wetu mutshipu. b—Mat. 16:24
DIPANGISHA AMUE MALU
4. Bilondeshile Nomba 6:3, 4, mmalu kayi avua Banazi badipangisha?
4 Bala Nomba 6:3, 4. Banazi kabavua ne bua kunua maluvu, anyi kudia tumuma tua mvinyo, peshi tshintu tshionso tshienza ne tumuma atu to. Bantu bakuabu bavuabu nabu bavua mua kutshionkomoka bobu ne biakudia abi, bualu kubidia kakuvua kubi to. Bible udi wamba ne: “Mvinyo udi usankisha muoyo wa muntu” ndipa dia kudi Nzambi. (Mis. 104:14, 15) Nunku Banazi bavua bitabe ku budisuile bua kubenga kudia bintu abi. c
Udi mudiakaje bua kudipangisha amue malu bu muvua Banazi benza anyi? (Tangila tshikoso 4-6)
5. Mmunyi muvua Madián ne Marcela bashintulule nsombelu wabu? Bua tshinyi?
5 Tudi mua kudipangisha petu amue malu bua kuenzela Yehowa mudimu bikole anu bu Banazi. Tuakulabi bua Madián ne mukajende Marcela. d Bavua ne nsombelu muimpe. Bua mudimu muimpe uvua Madián wenza, bavua basombele mu nzubu muimpe. Nansha nanku bavua basue kuenzela Yehowa mudimu wa bungi. Ke bualu, bakashintulula nsombelu wabu. Badi bamba ne: “Tuakatuadija kukepesha bungi bua makuta atuvua tutula. Tuetu kuya kusombela mu kazubu ka kakese, kupana ne mashinyi etu.” Madián ne Marcela kabavua benzejibue bua kuenza malu aa to, kadi bakaenza bualu avua abambuluisha bua kuvudija mudimu wabu wa diyisha. Badi bimpe ne badi ne disanka dia bungi bua tshivuabu benze atshi.
6. Bua tshinyi bena Kristo badi badipangisha amue malu? (Tangila kabidi tshimfuanyi.)
6 Lelu, bena Kristo batu bapeta pabu disanka padibu badipangisha malu bua kupeta dîba dia bungi dia kuenzela Yehowa mudimu. (1 Kol. 9:3-6) Yehowa katu utulomba bua kudipangisha amue malu to; ne malu mine atudi tudipangisha au kaatu anu mabi to. Tshilejilu, bamue mbalekele mudimu muimpe uvuabu nawu, bumbuke mu nzubu muimpe uvuabu, anyi bashiye bimuna biabu. Ba bungi badi banji babenga bua kubuela mu dibaka anyi kulela bana. Banga mbaye kuenza mudimu muaba udibu dijinga ne bamanyishi ba bungi nansha mudibu bashiyangane ne balela ne balunda babu. Ba bungi ba kutudi batu badipangisha malu mushindu eu bualu mbasue kupesha Yehowa tshidi tshitambe buimpe. Ikala mutuishibue ne: bualu buonso buudi wenza bua kuvudija mudimu uudi wenzela Yehowa nansha bobu bunene anyi bukese, udi ubuangata ne mushinga wa bungi.—Eb. 6:10.
IKALA MUDIAKAJE BUA KUSHILANGANA NE BAKUABU
7. Ndutatu kayi luvua Munazi pamuapa utuilangana nalu pavuaye ushala mulamate mutshipu wende? (Nomba 6:5) (Tangila kabidi tshimfuanyi.)
7 Bala Nomba 6:5. Banazi kabavua ne bua kukosesha nsuki to. Kuenza nanku kuvua kuleja muvuabu batumikila Yehowa ne muoyo mujima. Tshikondo tshionso tshivua muena Isalele ushala mu Bunazi, nsuki yende ivua ilepa, bantu batuadija kumona ne: uvua Munazi. Bu bantu ba muaba udiye banemeka mutshipu wende wa Bunazi, kabivua mua kuikala lutatu kudiye to. Bia dibungama, kuvua misangu ivua bantu kabayi banyisha anyi banemeka mutshipu wa Bunazi mu Isalele to. Tshikondo tshia muprofete Amosa, bena Isalele batontolodi bavua ‘batungunuka ne kupesha Banazi mvinyo bua kunua,’ pamuapa bua kubafikisha ku dishipa mutshipu wabu wa dibenga kunua mvinyo. (Amo. 2:12) Kuvua misangu ivuabi bilomba Munazi bua kuikala ne dikima bua kushala mulamate ku mutshipu wende ne kuikala mushilangane ne bakuabu.
Munazi uvua mulamate ku mutshipu wende, uvua udienzeja bua kuikala mushilangane ne bantu bakuabu (Tangila tshikoso tshia 7)
8. Bualu buvua bufikile Benjamin budi bukukankamija mushindu kayi?
8 Yehowa yeye mutuambuluishe, tudi petu mua kupeta dikima dia kushilangana ne bakuabu, nansha tuetu bikale bena bundu anyi bena lumamamama. Tuangate tshilejilu tshia Benjamin wa mu Norvège udi ne bidimu 10. Bena mu tshilongelu tshiabu bavua balongolole tshibilu bua kutua bena mu Ukraine mpanda bua mvita ivua yenzekamu. Bu muvuaye kayi musue kubuela mu tshibilu atshi, wakimanyina pa bule. Nansha nanku, mulongeshi wabu wakamumona, kumuelaye dîyi dikole ne: “Udi ne bua kulua kudisangisha netu lukasa. Tuetu bonso tudi bakuindile!” Benjamin wakasemena kudiye, kumuambilaye ne dikima ne: “Tshitu mbuela mu bibilu bia malu a tshididi to. Mbele Bantemu ba Yehowa ba bungi mu buloko bualu mbabenge bua kuya ku mvita.” Mulongeshi wakamumvuila, yeye kumulekela. Nansha nanku, balongi babu bakatuadija kumuebeja bua tshinyi kavua mulue kudisangisha nabu. Benjamin wakumvua bibi, kutuadijaye kudila; wakabambila tshikavuaye muambile mulongeshi wabu. Pashishe, Benjamin wakalua kuambila baledi bende muvua Yehowa mumuambuluishe bua kuakuila ditabuja diende.
9. Mmushindu kayi utudi mua kusankisha muoyo wa Yehowa?
9 Bu mutudi tuenza disua dia Yehowa, tudi bashilangane ne bantu ba muaba utudi. Bidi bikengela tuikale ne dikima bua kudimanyisha mutudi Bantemu ba Yehowa ku mudimu anyi mu tulasa. Bu mudi bikadilu bia bena mu bulongolodi ebu bienda anu binyanguka, pamuapa nebitukolele bua kutumikila mêyi manene a mu Bible anyi kuambila bakuabu lumu luimpe. (2 Tim. 1:8; 3:13) Ikala anu mumanye ne: tudi ‘tusankisha muoyo wa [Yehowa],’ tuetu benze malu ne dikima bua kuikala bashilangane ne bantu badi kabayi bamuenzela mudimu to.—Nsu. 27:11; Mal. 3:18.
TEKA YEHOWA PA MUABA WA KUMPALA MU NSOMBELU WEBE
10. Kutumikila mukenji udi mu Nomba 6:6, 7 kuvua pamuapa kukebele Banazi lutatu kayi?
10 Bala Nomba 6:6, 7. Banazi kabavua mua kusemena pabuipi ne tshitalu to. Kutumikila mukenji au kuvua lutatu lunene kudi Munazi nangananga pavuaye ufuisha mulela. Bivua lutatu nanku bualu bilele bia kujiikangana bivua bilomba bantu bua kuikala pabuipi ne muntu uvua mufue. (Yone 19:39, 40; Bien. 9:36-40) Mutshipu wa kuikala Munazi uvua upangisha muntu bua kulonda bilele abi. Nansha pavua bena mu dîku diende batuilangana ne nsombelu mikole, uvua uleja ditabuja dikole dia kushala mulamate ku mutshipu wende. Yehowa uvua ukolesha batendeledi bende aba bua bamone mua kutantamena ntatu ivuabu mua kutuilangana nayi.
11. Ntshinyi tshidi muena Kristo ne bua kudisuika bua kuenza padiye wangata mapangadika adi atangila malu a mu dîku? (Tangila kabidi tshimfuanyi.)
11 Tuetu bena Kristo, tutu tuangata mutshipu wetu wa kudilambula kudi Yehowa ne mushinga wa bungi. Mutshipu au udi utangila mushindu utudi ne bua kukumbaja midimu yetu ya mu dîku. Tutu tudienzeja bikole bua kukumbaja majinga a bena mu dîku dietu. Kadi katuena tuteka majinga au kumpala kua malu adi Yehowa utulomba to. (Mat. 10:35-37; 1 Tim. 5:8) Imue misangu, bidi mua kutulomba bua kuenza malu adi kaayi asankisha balela betu to, kadi tuenza bua kusankisha Yehowa.
Udi mudiakaje bua kuteka malu a Yehowa pa muaba wa kumpala nansha mu nsombelu mikole anyi? (Tangila tshikoso tshia 11) e
12. Ntshinyi tshivua Alexandru muenze pavuaye mupete lutatu mu dîku? Ntshinyi tshivuaye kayi muenze?
12 Tuangate tshilejilu tshia Alexandru ne mukajende Dorina. Bobu bamane kulonga Bible munkatshi mua tshidimu tshijima, Dorina wakalekela kumulonga, kuenzejaye bayende bua alekele pende. Kadi wakamuambila ne budimu ne lutulu ne: yeye uvua ne bua kutungunuka. Bualu abu kabuakasankisha Dorina to, uvua wenzeja bayende anu bua alekele kulonga Bible. Alexandru udi uleja ne: wakadienzeja bua kumanya bua tshinyi mukajende kavua kabidi musue bua balonge Bible to, kadi kabivua anu bipepele to. Bu muvua Dorina umuamba mêyi mabi ne umuandamuna bibi, Alexandru wakajinga kulekela kulonga Bible. Kadi wakatungunuka ne kuteka Yehowa pa muaba wa kumpala eku munange anu mukajende bikole ne umunemeka. Ndekelu wa bionso, tshilejilu tshiende tshimpe tshiakasaka mukajende bua kutuadijilula kulonga Bible, ne kuluaye kubatijibua.—Tangila filme wa Alexandru Văcar ne Dorina: “Dinanga didi ne lutulu ne bulenga” mu tshitupa tshia biena-bualu binene tshia “Bulelela butu bukudimuna bantu,” mu jw.org.
13. Mmunyi mutudi mua kuleja ne: tudi banange Yehowa ne banange bena mu dîku dietu?
13 Yehowa ke muenji wa dîku. Mmusue bua bena mu dîku bikale ne disanka. (Ef. 3:14, 15) Tuetu basue bua kuikala ne disanka dilelela, mbimpe tuenze malu mudi Yehowa musue. Kuedi mpata nansha kakese ne: Yehowa udi wanyisha muudi umutendelela paudi eku utabalela bena mu dîku dienu, ubananga, ne ubanemeka to.—Lomo 12:10.
TUKANKAMIJANGANAYI BUA KUIKALA NE LUNGENYI LUA BUENA LUA BANAZI
14. Tudi ne bua kudienzeja bua kukankamija nangananga banganyi ne mêyi a mukana muetu?
14 Bantu bonso badi basue kutendelela Yehowa lelu, badi ne bua kuikala badiakaje bua kudipangisha amue malu bualu mbamunange. Imue misangu kabiakuikala bipepele bua kuenza nanku to. Mmunyi mutudi mua kusakangana ku lungenyi lua nanku? Mpatudi tukankamijangana ne mêyi a mukana muetu. (Yobo 16:5) Kudi bantu mu tshisumbu tshienu badi badienzeja bua kushintulula nsombelu wabu bua kuvudija mudimu udibu benzela Yehowa anyi? Udiku mumanye bansonga badi badienzeja bua kuikala bashilangane ne bantu bakuabu mu kalasa, nansha mudi kuenza nanku kubakebela lutatu anyi? Kudiku balongi ba Bible anyi bena Kristo nebe badi badienzeja bua kushala ne lulamatu bualu bena mu dîku diabu badi babaluisha anyi? Tukebayi mpunga ya kukankamija bena Kristo netu aba, tubaleja dianyisha bua mudibu ne dikima ne bua bidibu benza bua Yehowa.—Filem. 4, 5, 7.
15. Mmunyi mudi bamue bana betu bambuluishe bantu badi mu mudimu wa ku dîba ne ku dîba?
15 Imue misangu, tudi mua kuambuluisha bena Kristo badi mu mudimu wa ku dîba ne ku dîba ne bintu. (Nsu. 19:17; Eb. 13:16) Ke dijinga divua nadi muanetu wa bakaji mukuabu mukulakaje wa mu ditunga dia Sri Lanka. Wakapeta makuta a pansio, kujingaye bua kuambuluisha bana betu ba bakaji babidi batshivua bansonga bua bamone mua kutungunuka ne mudimu wabu wa bumpanda-njila bualu bavua ne lutatu lua malu a makuta. Nanku wakatuadija kubapesha makuta bungi bukosa ngondo yonso bua bamone mua kubikilangana ku telefone. Muanetu wa bakaji eu uvua ne lungenyi luimpe lutambe.
16. Tshilejilu tshia Banazi tshidi tshitulongesha tshinyi?
16 Kakuyi mpata, tshilejilu tshimpe tshia Banazi tshidi mua kutulongesha malu a bungi. Kadi mutshipu wa Bunazi udi utulongesha bualu bukuabu budi butangila Yehowa tatuetu wa mu diulu. Mmumanye bimpe ne: tudi basue kumusankisha ne kudipangisha amue malu bua kuenza malu adi apetangana ne mutshipu wetu wa kudilambula kudiye. Udi ututua mushinga padiye utulekela tuetu nkayetu tumuleja mutudi bamunange. (Nsu. 23:15, 16; Mâko 10:28-30; 1 Yone 4:19) Tshilejilu tshia Banazi tshidi tshileja ne: Yehowa udi umona malu onso atudi tudipangisha bua kumuenzela mudimu, ne mutunange bualu tudi tuenza nanku. Nunku tudisuikayi bua kutungunuka ne kumuenzela mudimu, tumupesha tshidi tshitambe buimpe ne muoyo mujima.
NEWANDAMUNE MUNYI?
-
Mmushindu kayi uvua Banazi baleja ne: bavua ne dikima ne lungenyi lua kudipangisha amue malu?
-
Mmunyi mutudi mua kukankamijangana bua kuikala ne lungenyi lua buena lua Banazi matuku etu aa?
-
Mutshipu wa Bunazi udi uleja ne: Yehowa mmumanye tshinyi bua batendeledi bende?
MUSAMBU WA 124 Bikale anu ne lulamatu
a Nansha muvua Yehowa usungula bamue bantu bua kuikala Banazi, bena Isalele ba bungi bavua pamuapa badifile ku budisuile bua kuenza mudimu au.—Tangila kazubu ka “ Banazi basungula kudi Yehowa.”
b Imue misangu mu mikanda yetu batu bafuanyikija Banazi ne bantu badi mu mudimu wa ku dîba ne ku dîba. Kadi mu tshiena-bualu etshi, netutambe kuakula bua mudi batendeledi bonso ba Yehowa badi badilambule kudiye mua kuikala ne lungenyi lua buena lua Banazi.
c Bidi bimueneka ne: Banazi kabavua benzejibue bua kuikala ne midimu mikuabu ivua mua kubambuluisha bua kukumbaja mudimu wabu wa Bunazi to.
d Tangila tshiena-bualu tshia “Nous avons décidé de simplifier notre vie” mu tshitupa tshia “Témoignages et anecdotes de Témoins de Jéhovah,” mu site wa jw.org.
e DIUMVUIJA DIA TSHIMFUANYI: Munazi kuulu kua nzubu, mutangile mudibu baya kujiika ne mulela wende bua kumujiika. Mutshipu wende udi umupangisha bua kuya pabuipi ne tshitalu
