BANTU ba bungi lelu batu basue bua bikale babangata ne mushinga wa bungi ne batu basue anu kuikala ku mutu kua bakuabu. Nansha bobu babenzela malu bungi kayi, mbasue bobu anu babenzele bapitshisha ne pa mukenji. Kuela meji nanku kudi kubafikisha ku dilua bena budinangi, kabatshiyi ne dianyisha to. Ke tshikavua Bible muleje bua bantu ba mu matuku a ku nshikidilu.​—2 Tim. 3:2.

Mu bulelela, lungenyi lua budinangi ki ndutuadije lelu to. Adama ne Eva bakapangadija bua kudisunguila tshidi tshimpe ne tshidi tshibi, kulelabi ntatu yonso idiku lelu eu. Bidimu bia bungi pashishe, Uziya mukalenge wa Yuda wakela meji ne: uvua mukumbane bua kuosha musenga wa manananshi mu ntempelo, kadi pende kavua ne bukenji abu to. (2 Kul. 26:18, 19) Bafalese ne Basadoke bavua bela pabu meji ne: Nzambi uvua ne bua kubanyisha bikole kupita bantu bakuabu anu bualu bavua ba mu ndelenganyi ya Abalahama.​—Mat. 3:9.

Lelu bantu bena budinangi badi miaba yonso ne lungenyi luabu alu ludi mua kutuambulukila. (Gal. 5:26) Tudi mua kutuadija kuela meji ne: tuetu ke badi bakumbane bua kuikala ne mudimu kampanda anyi kansanga, peshi ne: mbimpe bantu bikale batuangata ne mushinga wa bungi. Ntshinyi tshitudi mua kuenza bua kuepuka lungenyi elu? Mbimpe tuanji kumanya mudi Yehowa wela meji bua bualu ebu. Mêyi manene abidi a mu Bible aa adi mua kutuambuluisha.

 Yehowa ke udi usungula tshidi tshitukumbanyine. Tuakulayi bua bimue bilejilu.

• Mu dîku, Yehowa mmulongolole bua mukaji ikale unemeka bayende ne bua bayende pende amunange. (Ef. 5:33) Mmusue kabidi bua bena dibaka bikale benzelangana malu a mananga anu bobu babidi. (1 Kol. 7:3) Mmusue bua bana bikale batumikila baledi, ne baledi pabu babanange ne bikale babatabalela.​—2 Kol. 12:14; Ef. 6:2.

• Mu tshisumbu, Yehowa mmulongolole bua bikale banemeka bakulu badi benza mudimu mukole. (1 Tes. 5:12) Kadi kabena ne bukenji bua kukokesha bena Kristo nabu to.​—1 Pet. 5:2, 3.

• Nzambi mmupeshe mbulamatadi ya bantu bukenji bua kufutshisha bitadi ne mmusue bua bantu badiyi ilombola bikale bayikokela.​—Lomo 13:1, 6, 7.

Yehowa udi utupesha bia bungi kupita ne bitudi bakumbanyine bualu mmutunange. Bu mutudi benji ba mpekatu, lufu ke lutudi bakumbayine. (Lomo 6:23) Kadi Yehowa udi utupesha mabenesha a bungi bualu udi ne dinanga dia lulamatu. (Mis. 103:10, 11) Tudi tupeta mabenesha onso au ne midimu mikuabu anu bua ngasa wende.​—Lomo 12:6-8; Ef. 2:8.

Ikala mudimuke bua kutuadiji kuela meji bu bena panu. Tudi mua kutuadija kuela meji ne: tudi bakumbane bua kupeta bia bungi kupita bakuabu katuyi nansha bamanye to. Yezu wakafila tshilejilu tshia bena mudimu bavuabu bafute ndenaliyo umue bua kuleja mudibi bipepele bua kutuadija kuela meji nanku. Bamue ba kudibu bavua batuadije kuenza mudimu pa dinda, kuwenzabu dituku dijima pa munya mukole. Bakuabu bobu bavua bawenze mu dîba dimue patupu. Bantu bavua batuadije mudimu kumpala bakela meji ne: bavua bakumbane bua kupeta makuta a bungi bua mudimu uvuabu benze. (Mat. 20:1-16) Yezu wakafila tshilejilu etshi bua kuleja ne: mbimpe bayidi bende bikale basanka ne bintu bidi Nzambi ubapesha.

Ikala ne dianyisha, kuikadi ukeba anu bua bakupeshe bia bungi to. (1 Tes. 5:18) Nansha muvua mupostolo Paulo ne bukenji bua kulomba bena Kristo ba mu Kolinto bintu bia kudiambuluisha nabi, kakenza nanku to; mbimpe tumuidikije. (1 Kol. 9:11-14) Mbimpe tuikale ne dianyisha bua bionso bidi bantu batupesha, kadi katuikadi tujinga anu bua batupesha bia bungi to.

 Ikala ne budipuekeshi. Padi muntu udiangata ne mushinga wa bungi, udi mua kutuadija kuela meji misangu yonso ne: mbimpe ikale ne bintu bia bungi kupita bidiye nabi. Budipuekeshi ke budi mua kutuambuluisha bua kuepuka meji mabi a nunku.

Muprofete Danyele mmutushile tshilejilu tshimpe tshia mua kuikala ne budipuekeshi. Uvua wa mu dîku dia bantu banene, muimpe kumona, ne uvua ne meji ne mamanya a bungi. Bionso ebi bivua mua kumufikisha ku diela meji ne: uvua mukumbane bua bamuangate ne mushinga wa bungi ne bua kuikala ku mutu kua bakuabu. (Dan. 1:3, 4, 19, 20) Kadi Danyele wakashala ne budipuekeshi, kuluaye ne mushinga wa bungi kudi Yehowa bua ngikadilu au.​—Dan. 2:30; 10:11, 12.

Tuepukayi ngikadilu wa budinangi udi utua upela pa buloba lelu eu. Kadi mbimpe tuikale tusanka ne bintu bidi Yehowa utupesha bua ngasa wende.