TSHIENA-BUALU TSHIA KULONGA 8
MUSAMBU WA 130 Tuikale tubuikidilangana
Mmunyi mutudi mua kufuilangana luse anu bu Yehowa?
“Anu bu muvua Yehowa munufuile luse ne muoyo mujima, nuenu penu nudi ne bua kuenza nanku.”—KOLOS. 3:13.
LUNGENYI LUNENE
Mu tshiena-bualu etshi, netumone malu atudi mua kuenza bua kufuila muntu udi mutuenzele bibi luse.
1-2. a) Ndîba kayi didibi nangananga mua kutukolela bua kufuila muntu luse? b) Ntshinyi tshivua Denise muenze bua kuleja ne: mmufuilangane luse?
BITU bikukolela bua kufuila bakuabu luse anyi? Bitu bikolela ba bungi, nangananga muntu yeye mutuambe dîyi dibi anyi mutuenzele bualu budi butunyingalaje bikole. Kadi kudi malu atudi mua kuenza adi mua kutuambuluisha bua kujikija tshiji ne kufuilangana luse. Tshilejilu, tuakulayi bua muanetu wa bakaji Denise. a Uvua mufuilangane luse mu mushindu wa pa buawu. Mu 2017, yeye ne bena mu dîku diende bavua baye kuendakana ku biro bietu binene bia pa buloba bujima, muaba ukadibi mpindieu. Pakavuabu bapingana kuabu, muendeshi wa mashinyi mukuabu wakapambuka ne mashinyi ende, kudikumaye ku abu. Lungenyi luakajimina Denise. Pakapetululaye lungenyi, bakamuambila ne: bana bende bavua batapike bibi menemene, bayende Brian mmufue. Denise udi uvuluka tshivua tshibafikile atshi, wamba ne: “Ngakumvua kanyinganyinga kakole, tshiyi ndiumvua bu meme to.” Bakalua kumuambila kabidi ne: muendeshi wa mashinyi au kavua mubuele mu ditanaji dia bualu nansha bumue to, bivua bienzeke ku mpukapuka. Ke Denise kulomba Yehowa bua amupeshe ditalala.
2 Bakakuata muendeshi wa mashinyi au, kuyabu nende ku tshilumbuluidi bua muvuaye mushipeshe bayende wa Denise. Pavuaye upila, bavua ne bua kumuela mu buloko. Bena ku kabadi bakambila Denise bua alue kufila bujadiki bua bamanye ni bavua mua kumukosela tshibawu. Denise udi wamba ne: “Bu mumvua ne bua kulonda malu a njiwu ivua mitufikile ayi, ngakumvua anu bu ne: mbankangule tukanu tua mputa, belamu mukele wa bungi.” Mbingu mikese pashishe, Denise wakaya ku tshilumbuluidi bua kufila bujadiki mu tshilumbu tshia muntu uvua mukengeshe dîku diende bikole au. b Ntshinyi tshiakambaye? Wakalomba ndumbulula bua bamufuile luse. Pakajikijaye kuakula, ndumbulula au wakapuekesha binsonji, wamba ne: “Bidimu bionso 25 bindi muenze mu mudimu eu, katshia tshitu muanji kumvua bualu bua mushindu eu pantu ndumbuluisha to. Tshitu muanji kumvua bena mu dîku badibu benzele bibi balombela udi mubenzele bibi luse to. Tshitu muanji kumvua mêyi mimpe a difuilangana luse a nunku to.”
3. Ntshinyi tshivua tshisake Denise bua kufuilangana luse?
3 Ntshinyi tshivua tshisake Denise bua kufuilangana luse? Uvua muelangane meji a mutu Yehowa ufuilangana luse. (Mika 7:18) Tuetu ne dianyisha dia bungi bua mudi Yehowa utufuila luse, nebitusake bua kulufuilangana petu.
4. Yehowa mmusue bua tuenze tshinyi? (Efeso 4:32)
4 Anu bu mudi Yehowa mutufuile luse, mmusue bua tufuile petu bakuabu luse ne muoyo mujima. (Bala Efeso 4:32.) Mmusue bua tuikale badiakaje bua kufuila bantu badi batuenzela bibi luse. (Mis. 86:5; Luka 17:4) Mu tshiena-bualu etshi, netulonge malu asatu atuambuluisha bua kutamba kufuilangana luse.
LEJA MUUDI UMVUA
5. Bilondeshile Nsumuinu 12:18, mmunyi mutudi mua kumvua padi muntu utuenzela bualu bubi?
5 Muntu yeye mutuenzele bibi bidi bitunyingalaja bikole, nangananga yeye muikale mulunda wetu anyi muena mu dîku dietu. (Mis. 55:12-14) Imue misangu patubu batuenzela bibi, tutu tumvua anu bu ne: mbatutue kele. (Bala Nsumuinu 12:18.) Tudi mua kuleja ku mêsu bu ne: katuena ne kanyinganyinga to. Tuetu benze nanku nebilue anu bu ne: mbatutue kele kadi katuyi tukapatula to, bashale bakalekele anu mu mputa. Bia muomumue, tuetu katuyi baleje kanyinganyinga katudi tumvua, katuakuikala ne ditalala mu muoyo to.
6. Tshia kuenza ntshinyi padi muntu utuenzela bibi?
6 Patu muntu utuenzela bualu bubi, tshia kumpala tshitutu tuenza nkufiika munda. Bushuwa, Bible udi uleja ne: bidi mua kuenzeka bua tufiike munda. Kadi udi utudimuija bua katulekedi tshiji tshitupita bukole to. (Mis. 4:4; Ef. 4:26) Bua tshinyi? Bualu tshiji tshia mushindu au tshitu tshifikisha muntu kubi. Kadi tuetu katuyi tutamba kufiika munda, bidi bitufikisha ku malu mimpe. (Yak. 1:20) Tumanyayi ne: kufiika munda mbualu butu butufikila tuetu buonso, kadi kushala ne tshiji ndisua dia muntu.
Kufiika munda mbualu butu butufikila tuetu bonso, kadi kushala ne tshiji ndisua dia muntu
7. Leja mutudi mua kumvua kabidi muntu yeye mutuenzele bibi.
7 Muntu yeye mutuenzele malu mabi, tudi mua kumvua kabidi bibi menemene. Tshilejilu, muanetu wa bakaji kampanda diende Ann udi wamba ne: “Pantshivua muana, tatu wakabenga mamu, kuselaye ndeji wanyi. Nkavua ndiumvua bu mulekelela. Pakalelabu bana, nkavua mmona kuetu bu kua bende. Tshivua ndiumvua munangibue mu dikola dianyi to.” Muanetu wa bakaji mukuabu, diende Georgette, wakumvuija muvuaye umvua pavua bayende muende masandi, wamba ne: “Mmulunda wanyi wa katshia ku buana, tuvua benze nende mudimu wa bumpanda-njila pamue. Muoyo wanyi wakamata mashi bua tshivuaye muenze.” Muanetu wa bakaji mukuabu, diende Naomi, udi wamba pende ne: “Tshivua ngela meji ne: bayanyi uvua mua kunyingalaja muoyo wanyi to, kadi pakatondaye ne: uvua utangila malu a bantu butaka mu musokoko, ngakadimone anu bu muntu uvuaye ukutakaja, meme kudiumvua muedibue mâyi ku makasa.”
8. a) Ngamue malu kayi adi ne bua kutusaka bua kufuila bakuabu luse? b) Mmalu mimpe kayi atudi tupeta patudi tufuilangana luse? (Tangila kazubu ka “ Tshia kuenza padi muntu utuenzela bualu bubi menemene.”)
8 Katuena mua kupangisha bakuabu bua kutuamba dîyi dibi anyi kutuenzela bualu bubi to, kadi tudi mua kudikanda bua kubenga kupatula dîyi dibi anyi kuenza bualu bubi. Misangu ya bungi, bualu butambe buimpe bua kuenza nkufuilangana luse. Bua tshinyi? Bualu Yehowa mmutunange ne mmusue tuikale tufuilangana luse. Tuetu balame anu tshiji katuyi tufuilangana luse, tudi mua kulua kuenza bualu bubi budi mua kutukebela ntatu. (Nsu. 14:17, 29, 30) Tuakulayi bua muanetu wa bakaji Christine. Udi wamba ne: “Pantu ne tshiji, tshitu ntamba kufukisha mimuemue to. Ntu mbanga kudia biakudia bitu nangananga kabiyi bidiisha mubidi ne mpangila tulu. Ntu panga mua kudikanda, binyanga malanda anyi ne bayanyi ne bantu bakuabu.”
9. Bua tshinyi katuena ne bua kulaminangana munda?
9 Nansha muntu udi mutuenzele bibi kayi mutulombe luse, tuetu tudi mua kukepesha kanyinganyinga kadiye mutukebele. Mushindu kayi? Georgette utukadi batele udi wamba ne: “Ngakalekela tshiji tshimvua mukuatshile mulume uvua dibaka dietu nende dimane kufua, tshibi bivua bianji kuangata matuku bua meme kutshilekela. Ngakumvua ditalala dia bungi bua mumvua mumufuile luse.” Patudi tulekela kulaminangana munda, katuakuikala ne tshiji tshiatusaka bua kuenzela bakuabu malu mabi to. Tudi tudienzela petu bimpe, nsombelu wetu utuadija kabidi kutusankisha. (Nsu. 11:17) Kadi newenze tshinyi wewe udimona kuyi anu pabuipi bua kufuila bakuabu luse?
MUA KUJIKIJA TSHIJI
10. Bua tshinyi tudi ne bua kudipesha tshipolu bua tshiji tshietu kujikatshi? (Tangila kabidi bimfuanyi.)
10 Ntshinyi tshiudi mua kuenza bua kujikija tshiji? Bumue bualu butudi mua kuenza nkudipesha tshipolu bua kutshijikija. Bobu buondopa muntu mputa munene, bitu bikengela tshipolu tshipite bua kushishayi kuma. Bia muomumue, bidi mua kutulomba matuku bua kushisha kufuila muntu luse ne muoyo mujima.—Muam. 3:3; 1 Pet. 1:22.
Anu mutu mputa ulomba kumuondapa bimpe, ne ulomba tshipolu bua kuma, ke mudibi kabidi bua kanyinganyinga katutu tumvua padi muntu utuenzela bibi (Tangila tshikoso tshia 10)
11. Mmushindu kayi udi disambila dituambuluisha bua kufuilangana luse?
11 Sambila Yehowa, umulomba bua akuambuluishe wikale ufuilangana luse. c Ann utukadi batele udi umvuija muvua disambila dimuambuluishe. Udi wamba ne: “Ngakalomba Yehowa bua afuile muena mu dîku dietu yonso luse bua malu mabi atuvua bambangane anyi benzelangane. Pashishe ngakafundila tatuanyi ne mukajende au mukanda, kubambila ne: mvua mubafuile luse.” Udi uleja muvuabi kabiyi bipepele bua kubafuilalu. Kadi udi wamba kabidi ne: “Ndi mumone ne: meme ndienzeja bua kuidikija mutu Yehowa ufuilangana luse, nebibasake bua kumanya malu a bungi a Yehowa.”
12. Bua tshinyi tudi ne bua kueyemena Yehowa pamutu pa kuimanyina pa mushindu utudi tumvua? (Nsumuinu 3:5, 6)
12 Eyemena Yehowa, kuimanyinyi anu pa mushindu uudi umvua to. (Bala Nsumuinu 3:5, 6.) Yehowa utu mumanye tshitu tshitambe buimpe buetu tuetu. (Yesh. 55:8, 9) Kakutulomba musangu nansha umue bua kuenza bualu budi mua kutukebela lutatu to. Nunku padiye utulomba bua kufuilangana luse, mbua diakalenga dietu. (Mis. 40:4; Yesh. 48:17, 18) Kadi tuetu bimanyine pa mushindu utudi tumvua, katuakufika anu ku difuilangana luse to. (Nsu. 14:12; Yel. 17:9) Naomi utukadi batele udi wamba ne: “Kumpala, pamutu pa kufuila bayanyi luse bua muvuaye utangila malu a bantu butaka, mvua meme ndibingisha. Mvua ne buôwa bua ne: kalu kunnyingalaja kabidi, anyi ne: kalu kupua muoyo muvua muoyo wanyi mumate mashi bua bualu buvuaye muenze abu. Mvua ndiambila ne: Yehowa si mmumanye kanyinganyinga kandi naku. Kadi ngakalua kumona ne: nansha muvuaye mumanye mumvua ngumvua, kabiena bileja ne: mmusue bua ngikale anu naku to. Mmumanye kanyinganyinga kandi naku, mmumanye kabidi ne: bidi bikengela matuku bua koku kujika; kadi mmusue bua ngikale mfuilangana luse.” d
MONA MALU MU MUSHINDU MUIMPE
13. Bilondeshile Lomo 12:18-21, ntshinyi tshitudi ne bua kuenza?
13 Patudi tufuila muntu udi mutunyingalaje bikole luse, mbimpe tukebe tshikuabu tshia kuenza pamutu pa kuamba ne: katuena kabidi basue kuakula malu au to. Biobi ne: udi mutunyingalaje au mmuena Kristo netu, bualu butudi ne bua kuenza nkukeba ditalala. (Mat. 5:23, 24) Pamutu pa kumukuatshila tshiji anyi kumulamina munda, mbimpe tumufuile luse. (Bala Lomo 12:18-21; 1 Pet. 3:9) Ntshinyi tshidi mua kutuambuluisha bua kuenza nanku?
14. Tudi ne bua kudienzeja bua kuenza tshinyi? Bua tshinyi?
14 Tudi ne bua kumona muntu udi mutuenzele bualu bubi anu mudi Yehowa umumona. Yehowa utu wimanyina pa ngikadilu mimpe itudi nayi. (2 Kul. 16:9; Mis. 130:3) Pa tshibidilu, tutu tukeba bua kumanya ngikadilu mimpe anyi mibi idi nayi bantu. Tuetu tuimanyina pa ngikadilu mimpe idibu nayi, nebikale bipepele bua kubafuila luse. Tshilejilu, muanetu wa balume mukuabu, diende Jarrod, udi wamba ne: “Pantu mfuanyikija bualu bubi budi muena Kristo nanyi mungenzele ne malu mimpe a bungi atuye wenza, bitu bipepele bua meme kumufuila luse.”
15. Bua tshinyi mbimpe kuambila muntu ne: tudi bamufuile luse?
15 Bualu bukuabu bua mushinga nkuambila muntu ne: tudi bamufuile luse. Bua tshinyi? Mona tshivua Naomi utukadi batele muambe: “Bayanyi wakangebeja ne: ‘Udi mumfuile luse anyi?’ Bua meme kupatula anu dîyi dia ne: ‘Ndi mukufuile luse,’ biakankolela. Dîba adi ngakajingulula ne: tshivua mumufuilalu menemene to. Pakapita matuku, ngakakokesha bua kumuambila miaku isatu ya bujitu eyi: ‘Ndi mukufuile luse.’ Pakumvuaye mêyi au, wakapeta disulakana, kupuekeshaye binsonji; kumpeteshabi panyi ditalala. Kutuadijila anu dîba adi, ngakatuadija kabidi kumueyemena, tuetu kulua balunda ba dikema.”
16. Ntshinyi tshitudi balonge bua difuilangana luse?
16 Yehowa mmusue bua tuikale tufuilangana luse. (Kolos. 3:13) Nansha nanku, bidi mua kutukolela bua kulufuilangana. Kadi bua tuetu kufika ku dilufuilangana, mbimpe tuleje mutudi tumvua ne tudienzeje bua kulekela tshiji. Dîba adi nebituambuluishe bua kufuilangana luse ne kubenga kulaminangana munda.—Tangila kazubu ka “ Malu asatu a kuenza bua kufuilangana luse.”
ELA MEJI A MASANKA AUDI UPETA
17. Mmasanka kayi atudi tupeta patudi tufuilangana luse?
17 Kudi malu a bungi adi atusaka bua kufuilangana luse. Tumonayi amue a kudiwu. Bua kumpala, tudi tuidikija Yehowa Tatu wetu mufuidianganyi wa luse ne tumusankisha kabidi. (Luka 6:36) Buibidi, tudi tuleja mutudi ne dianyisha dia bungi kudi Yehowa bua mudiye mutufuile luse. (Mat. 6:12) Buisatu, tudi tushala ne makanda a mubidi mimpe ne tudi tukolesha bulunda buetu ne bakuabu.
18-19. Tuetu tufuilangana luse, ntshinyi tshitudi mua kupeta?
18 Patudi tufuila bakuabu luse, tudi mua kupeta masanka atuvua katuyi belele meji. Tshilejilu, mona tshivua tshienzekele Denise utukadi batele. Kavua mumanye ne: muendeshi wa mashinyi au uvua mulongolole bua kudishipa pavuabu bamuela mu buloko to. Kadi pakumvua muendeshi wa mashinyi au ne: Denise uvua mumufuile luse, biakamukemesha, kutuadijaye kulonga Bible ne Bantemu ba Yehowa.
19 Tudi mua kumona ne: kufuilangana luse mbumue bua ku malu adi mua kutukolela bua kuenza, kadi kudi mua kutupetesha masanka a bungi. (Mat. 5:7) Nanku, tuenzayiku muetu muonso bua kufuilangana luse anu bu Yehowa.
MUSAMBU WA 125 ‘Badi ne luse mba disanka!’
a Tudi bashintulule amue mêna.
b Mu nsombelu wa buena eu, muena Kristo udi ne bua kudiangatshila dipangadika dia tshia kuenza.
c Tangila filme ya misambu ya pa buayi idi mu jw.org eyi: “Fuilangana luse ne muoyo mujima” (Mu Mfual.), “Mmubuikidile,” ne wa “Tulue balunda tshiakabidi.”
d Muntu ukadi mu dibaka yeye utangila malu a bantu butaka udi wenza mpekatu ne udi unyingalaja muena dibaka nende. Kadi bilondeshile Bible, ki mbualu bua muena dibaka udibu banyingalaje kushipela dibaka to.
