TSHIENA-BUALU TSHIA KULONGA 7
MUSAMBU WA 15 Tutumbishayi Muanabute wa Yehowa!
Mudi luse lua Yehowa lukuambuluisha
“Kuudi wewe kudi difuilangana dia luse dilelela.”—MIS. 130:4.
LUNGENYI LUNENE
Kukonkonona bilejilu kampanda bia mu Bible nekuvudije dianyisha ditudi nadi bua luse lulelela ludi Yehowa ufuila yonso wa kutudi.
1. Bua tshinyi bitu bikole bua kumanya bikale muntu mutufuile luse?
MUNTU yeye mutuambile ne: “Mmutufuile luse”, bua tshinyi mbikole bua kumanya ni mmutufuilalu? Wewe muambe muntu dîyi dibi anyi mumuenzele bualu budi bumunyingalaje, kadi udi ulua kukuambila ne: mmukufuile luse, neumvue bishi? Neumvue ditalala mu muoyo. Tshiambilu tshia ne: “Ndi mukufuile luse” tshidi tshiumvuija tshinyi menemene? Tshidi tshiumvuija ne: bulunda buenu nende mbupingane muabu ne kale anyi? Peshi mmusue kukuambila anu ne: ki mmusue kuakula kabidi bua tshilumbu atshi? Muntu yeye mukuambile ne: mmukufuile luse, mbikole bua kumanya ni mmukufuilalu.
2. Mmushindu kayi udibu bumvuije luse lua Yehowa mu Bible? (Tangila kabidi dimanyisha dia kuinshi kua dibeji.)
2 Mushindu udi Yehowa utufuila tuetu bantu bapange bupuangane luse, mmushilangane bikole ne mututu tuetu tulufuilengana. Kakuena muntu udi mua kufuilangana luse bu Yehowa to. Mufundi wa misambu wakamba bua Yehowa ne: “Kuudi wewe kudi difuilangana dia luse dilelela, bua bikale bakunemeka.” a (Mis. 130:4) Bushuwa, kudi Yehowa ke kudi “difuilangana dia luse dilelela.” Yeye ke udi utuleja tshidi difuilangana luse diumvuija menemene. Muaku wa mu tshiena Ebelu udi bafundi ba Bible bafunde mu imue mvese bua kuakula bua luse lutu Yehowa ufuilangana, kabena mua kuwutela nansha kakese bua kumvuija luse ludi bantu bafuilangana to.
3. Bua tshinyi mushindu utu Yehowa ufuilangana luse mmushilangane ne ututu tulufuilangana? (Yeshaya 55:6, 7)
3 Padi Yehowa yeye ubuikidila muntu tshilema, kena umubadilatshi kabidi to. Udi udia kabidi nende malanda mashême. Yehowa utu utufuila luse ne muoyo mujima. Tudi ne dianyisha bua bualu abu.—Bala Yeshaya 55:6, 7.
4. Mmushindu kayi udi Yehowa utuambuluisha bua kumanya tshidi kufuilangana luse kumvuija menemene?
4 Kadi mmunyi mudi bantu bena mapanga mua kufika ku dimanya tshidi difuilangana dia luse dilelela? Yehowa mmutuambuluishe ne bilejilu bimpe bua kumanya mudiye utufuila luse. Mu tshiena-bualu etshi, netumone bimue bia ku bilejilu abi. Nebituleje mushindu udi Yehowa utubuikidila mpekatu ne utuambuluisha bua kudia kabidi nende malanda mashême avua manyanguke bua mpekatu au. Bilejilu abi nebituambuluishe kabidi bua kunanga Tatu wetu bikole bua mudiye utufuila luse mu mishindu ya bungi.
YEHOWA UDI UMBUSHA MPEKATU YETU
5. Ntshinyi tshitu tshienzeka patu Yehowa utubuikidila mpekatu?
5 Bible utu ufuanyikija mpekatu ne bujitu bunene. Mukalenge Davidi wakakula bua mpekatu yende, wamba ne: “Bilema bianyi mbindiundile pa mutu wanyi; bu bujitu bunene, bidi bipite bungi bundi mua kuambula.” (Mis. 38:4) Yehowa utu ufuila bantu batu banyingalala luse. (Mis. 25:18; 32:5) Muaku wa mu tshiena Ebelu udibu bakudimune ne: “kufuilangana luse,” udi nangananga umvuija “kumbusha” anyi “kuambula.” Bidi bituambuluisha bua kumona Yehowa bu muntu wa makanda a bungi udi utumbusha bujitu bua mpekatu pa makaya etu, ubuambula.
‘Difuilangana luse’ (Mis. 32:5)
6. Nkuepi kudi Yehowa usemeja mpekatu yetu?
6 Mona tshilejilu tshikuabu tshidi tshileja mudi Yehowa usemeja mpekatu yetu kule netu. Misambu 103:12 udi wamba ne: “Anu bu mudi kudi dîba dipatukila kuikale kule menemene ne kudi dîba dibuelela ke mudiye musemeje dishipa dietu dia mikenji kule menemene netu.” Luseke lua est ludi kule menemene ne lua ouest. Nseke ibidi eyi kayena mua kutuilangana kaba kamue to. Mu mêyi makuabu, Yehowa udi umbusha mpekatu yetu, uyisemeja kule menemene netu mu mushindu utudi katuyi mua kudifuanyikijila to. Mêyi aa adi atujadikila ne: Yehowa udi utufuila luse ne muoyo mujima!
“Anu bu mudi kudi dîba dipatukila kuikale kule menemene ne kudi dîba dibuelela” (Mis. 103:12)
7. Mmunyi mudi Bible umvuija tshidi Yehowa wenza ne mpekatu yetu? (Mika 7:18, 19)
7 Nansha mutu Yehowa wangata mpekatu yetu uyisemeja kule menemene netu, udi ushala muyilame anyi? Tòo. Mukalenge Hezikiya wakafunda bua Yehowa ne: “Udi mukupe mpekatu yanyi yonso panyima pebe.” Nansha mu dimanyisha dia kuinshi kua dibeji badi bambamu ne: udi “mumbushe mpekatu yanyi yonso ku mêsu kuebe.” (Yesh. 38:9, 17; dim.) Tshilejilu etshi tshidi tshileja ne: Yehowa udi umbusha mpekatu ya bantu badi banyingalala, uyikupa panyima pende. Badi mua kukudimuna kabidi mêyi a mu mvese eu ne: “Udi mumbushe [mpekatu yanyi] bienze anu bu ne: tshivua muyenze to.” Mu Bible mudi kabidi tshilejilu tshikuabu tshidi tshiumvuija bualu ebu. Tshidi mu Mika 7:18, 19. (Bala.) Mbalejamu ne: Yehowa udi ukupa mpekatu yetu mu ndondo ya mbuu. Ku kale, bobu bakupe tshintu mu ndondo wa mbuu, muntu kavua mua kutshipetulula to.
“Udi mukupe mpekatu yanyi yonso panyima pebe” (Yesh. 38:17)
“Wewe neukupe mpekatu yabu yonso mu ndondo ya mbuu” (Mika 7:19)
8. Ntshinyi tshitudi balonge?
8 Ku diambuluisha dia bilejilu bitudi bafume ku dimona ebi, tudi balonge ne: padi Yehowa utubuikidila, udi utupetesha disulakana ku bujitu bua mpekatu yetu. Bidi nanku bualu Paulo wakamba anu bu Davidi ne: “Ba diakalenga mbadibu bafuile luse bua bienzedi biabu bibi ne badibu babuikidile mpekatu yabu; wa diakalenga mmuntu wikala Yehowa kayi mua kubadila mpekatu wende.” (Lomo 4:7, 8) Ke difuilangana dia luse dilelela adi!
YEHOWA UDI UKUPULA MPEKATU YETU
9. Mbilejilu kayi bidi Yehowa ufila bua kuleja mudiye utufuila luse ne muoyo mujima?
9 Yehowa udi ufila bilejilu bikuabu, utuambuluisha bua tumone mudiye ukupula mpekatu ya bantu badi banyingalala ku diambuluisha dia mulambu wa tshia kupikulangana natshi. Mbienze anu bu ne: Yehowa udi ubasukula, ubasampulula bua kumbusha mpekatu yabu. Bidi bibambuluisha bua kushala bakezuke. (Mis. 51:7; Yesh. 4:4; Yel. 33:8) Yehowa nkayende udi umvuija tshidiye wenza atshi mushindu eu: “Nansha mudi mpekatu yenu mikunze kunzuu, neyivuijibue mitoke anu bu neje; nansha mudiyi mikunze tshididii bu tshilamba tshikunze, neyilue mitoke bu miosa ya mikoko.” (Yesh. 1:18) Kabitu bipepele bua kumbusha dikeji dikunze kunzuu ku tshilamba to. Ku diambuluisha dia tshilejilu etshi, Yehowa udi utujadikila ne: udi mua kutusukula, utumbusha mpekatu yetu yonso, ijimina.
“Nansha mudi mpekatu yenu mikunze kunzuu, neyivuijibue mitoke anu bu neje” (Yesh. 1:18)
10. Ntshilejilu kayi tshikuabu tshidi Yehowa ufila tshidi tshituleja mudiye utufuila luse ne muoyo mujima?
10 Anu mutuvua balonge mu tshiena-bualu tshishale, mbafuanyikije kabidi mpekatu yetu ne “mabanza.” (Mat. 6:12; Luka 11:4) Dîba dionso ditudi tuenzela Yehowa mpekatu, bidi anu bu ne: tudi tuenda tudivudijila mabanza, tumusomba makuta a bungi atudi katuyi mua kufuta! Kadi padi Yehowa utufuila luse, bidi anu bu ne: udi utulekeela dibanza dituvua babuele adi. Yeye mumane kutubuikidila, katu utunana dibanza dia mpekatu dituvua babuele adi to. Padiye wenza nanku, tudi tuvua disulakana dia buena ditu muntu umvua padibu bamulekeela mabanza avuaye nawu.
“Utulekeele mabanza etu” (Mat. 6:12)
11. Padi Bible wamba ne: ‘mpekatu yetu mmijimijibue,’ bidi bimvuija tshinyi? (Bienzedi 3:19)
11 Yehowa udi utulekeela mabanza etu anyi mpekatu yetu, uyijimija kabidi. (Bala Bienzedi 3:19.) Bua kumvua bualu ebu bimpe, ela meji ne: muntu uuvua musombe makuta udi ukulekeela dibanza, wela kashonyi pa bungi bua makuta auvua ne bua kumufuta. Nansha nanku bungi bua makuta au budi bushala anu bumueneka. Kukupula tshintu nkushilangane ne kutshiela kashonyi. Bua kumvua bualu ebu, mbimpe tuvuluke ne: bikondo bia kale bavua bafunda ne mâyi a mukanda avuabu mua kukupula bipepele ne tshintu tshitue mu mâyi. Nunku muntu uvua mua kutua tshivuare mu mâyi bua kukupula natshi mifundu, kakutshiyi mushindu wa kumona ne: muaba eu bavua bafundapu tshintu to. Ke mudibi kabidi bua dibanza. Bobu ‘badijimije’ anyi badikupule, ndijike dionso; bishale anu bu ne: kuvua mudibuele to. Bidi bitutua ku muoyo bikole patudi tumona ne: Yehowa udi utubuikidila mibi yetu, bienza anu bu ne: katuvua bayenze to.—Mis. 51:9.
“Bua mpekatu yenu ijimijibue” (Bien. 3:19)
12. Tshilejilu tshia ditutu difiike tshidi tshitulongesha tshinyi?
12 Yehowa udi ufila tshilejilu tshikuabu bua kutumvuija mudiye ujimija mibi yetu. Udi wamba ne: “Nembuikile matomboka ebe bu ne ditutu ne mpekatu yebe bu ne ditutu difiike.” (Yesh. 44:22) Patu Yehowa utubuikidila mibi bitu anu bu ne: udi uyibuikila ne ditutu difiike bua katuyimonyi kabidi to.
“Nembuikile matomboka ebe bu ne ditutu” (Yesh. 44:22)
13. Padi Yehowa utubuikidila mibi yetu tudi tumvua bishi?
13 Bilejilu bitudi bafume ku dimona ebi bidi bitulongesha tshinyi? Padi Yehowa utubuikidila mibi, katushadi tudiumvua ne bujitu buayi mu nsombelu wetu mujima to. Mibi yetu ayi bakadi bayijimije yonso ku diambuluisha dia mashi a Yezu Kristo, bienze anu bu ne: katuvua bayenze to. Eu ke mushindu udi Yehowa utufuila luse patudi tunyingalala bua mpekatu yetu.
YEHOWA UDI UDIA KABIDI NETU BULUNDA BUSHÊME
Padi Yehowa utufuila luse, bidi bituambuluisha bua kudia kabidi nende malanda mashême (Tangila tshikoso tshia 14)
14. Bua tshinyi mbimpe tuikale bashindike ne: padi Yehowa mutufuile luse, mmutufuilalu ne muoyo mujima? (Tangila kabidi bimfuanyi.)
14 Ditufuila luse dilelela dia Yehowa didi dituambuluisha bua kudia kabidi nende bulunda bushême. Didi dituambuluisha bua kubenga kudipisha. Katuikadi ne buôwa bua ne: Yehowa mmushale mutulamine munda wenda ukeba bua kutunyoka to. Kakuenza nanku nansha kakese! Padi Yehowa utuambila ne: mmutufuile luse, bua tshinyi katuena ne bua kuelakana? Yehowa wakasaka muprofete Yelemiya bua kuamba ne: “Nembabuikidile tshilema tshiabu, ne tshiakuvuluka kabidi mpekatu wabu to.” (Yel. 31:34) Mupostolo Paulo wakatela pende mêyi aa pakambaye ne: “Tshiakuvuluka kabidi mpekatu yabu nansha.” (Eb. 8:12) Kadi mêyi aa adi umvuija tshinyi menemene?
“Tshiakuvuluka kabidi mpekatu wabu to” (Yel. 31:34)
15. Mmu ngumvuilu kayi mudi Yehowa kayi uvuluka kabidi mpekatu yetu?
15 Mu Bible, muaku “kuvuluka” kawena anu umvuija kupingaja meji ku bualu butukavua bamanye to, kadi udi mua kuikala kabidi ne lungenyi lua ne: muntu enze bualu kampanda. Muenzavi uvuabu bapopele ku mutshi pamue ne Yezu wakamulomba ne: “Yezu, umvuluke pawabuela mu Bukalenge buebe.” (Luka 23:42, 43) Kavua umulomba bua avuluke bualu buende patupu dîba adi to. Diandamuna dia Yezu diakaleja ne: uvua ne bua kuenza bualu kampanda, tuambe ne: kumubisha ku lufu. Nunku padi Yehowa wamba ne: kakuvuluka kabidi mibi yetu, udi usua kuamba ne: kakutunyoka to. Kakutunyoka bua mpekatu ikadiye mutubuikidile to.
16. Mmunyi mudi Bible umvuija budikadidi butudi tupeta padi Yehowa utufuila luse lulelela?
16 Bible udi wakula kabidi bua tshilejilu tshikuabu tshidi tshituambuluisha bua kumanya budikadidi butudi tupeta padi Yehowa utufuila luse lulelela. Bu mutudi bantu bapange bupuangane, Bible udi utubikila ne: “bapika ba mpekatu.” Bu mudi Yehowa utufuila luse, tudi anu bu bapika badibu bapikule ku mpekatu. (Lomo 6:17, 18; Buak. 1:5) Bushuwa, bidi bitupetesha disanka dia bungi menemene.
‘Bavua banupikule ku mpekatu’ (Lomo 6:18)
17. Mmushindu kayi udi ditufuila luse dituondopa? (Yeshaya 53:5)
17 Bala Yeshaya 53:5. Mu tshilejilu tshia ndekelu tshituakuila badi batufuanyikija ne bantu badi ne disama dia lufu. Padi Yehowa mufile mulambu wa Muanende bua kutupikula, mmutuondope mu ngumvuilu wa mu tshimfuanyi. (1 Pet. 2:24) Tshia kupikulangana natshi tshidi tshituambuluisha bua kuakajilula malanda etu ne Yehowa avua manyanguke bua mpekatu ituvua benze. Muntu yeye ne disama dinene, buobu bamuondope utu umvua disanka dia bungi. Ke mudibi kabidi buetu tuetu. Padi Yehowa utufuila luse, udi utuanyisha ne tudi tuondopibua mu nyuma; bitupetesha disanka dia bungi.
“Bua mputa yende tuetu tuakuondopibua” (Yesh. 53:5)
MUDI DITUFUILA LUSE DIA YEHOWA DITUAMBULUISHA
18. Ntshinyi tshitudi balonge patudi bakonkonone bilejilu bishilashilangane bia mu Bible bia mudi Yehowa utufuila luse? (Tangila kabidi kazubu ka “Mudi Yehowa utufuila luse.”)
18 Patudi bakonkonone bilejilu bishilashilangane bia mu Bible, tudi bamona ne: padi Yehowa utufuila luse, udi utufuilalu ne muoyo mujima. Dîba adi bidi bituambuluisha bua kudia bulunda buimpe ne Tatu wetu wa diulu. Tudi kabidi tuvuluka ne: ditufuila luse dilelela dia Yehowa ndipa didiye utupesha bualu mmupeshanganyi wa bintu ne mmutunange. Katu utupeshadi bualu tudi badikumbanyine to.—Lomo 3:24.
19. a) Tudi ne bua kuikala ne dianyisha bua bualu kayi? (Lomo 4:8) b) Ntshinyi tshituamona mu tshiena-bualu tshialonda?
19 Bala Lomo 4:8. Tuetu bonso tudi ne dianyisha dia bungi bua mudi Yehowa muikale Nzambi wa “difuilangana dia luse dilelela”! (Mis. 130:4) Kadi bua yeye kutufuila luse, tudi ne bua kuenza bualu bua mushinga. Yezu wakamba ne: “Nuenu kanuyi babuikidile bantu bilema biabu, tatu wenu kakunubuikidila penu bienu bilema to.” (Mat. 6:14, 15) Mbimpe tufuilangane luse bua kuidikija Yehowa. Mu tshiena-bualu tshialonda netumone mutudi mua kumuidikija.
MUSAMBU WA 46 Tuasakidila, Yehowa!
a Mu mifundu ya tshiena Ebelu tshia ntuadijilu mudi tshiambilu tshia “difuilangana luse” tshidi ne lungenyi lua ne: anu edi ke difuilangana luse dilelela, nansha mudiku difuilangana luse dikuabu. Mu nkudimuinu ya bungi ya Bible kamuena dishilangana dinene edi to. Kadi didi mu Bible wa Nkudimuinu wa bulongolodi bupiabupia. Bienza bua ne: alue Bible wa pa buende bua mushindu udibu bakudimune Misambu 130:4.
