Baledi banyi bavua bena Katolike ba mu mashi. Kadi pakalongabu Bible, kumanyabu ne: dîna dia Nzambi n’Yehowa, bakalua Bantemu ba tshisumi. Tatu wakalekela kuenza mpingu ya Yezu. Bu mutuvua ne nzubu wa tshisasa tshimue, dimanya dia mabaya divuaye nadi diakamuambuluisha bua kuvuija nzubu wetu wa panshi Nzubu wa Bukalenge wa kumpala mu komine wa San Juan del udi mu Manila, tshimenga tshikulu tshia ditunga dia Philippines.

Mvua muledibue mu 1952. Baledi banyi bakandongesha malu a Yehowa anu muvuabu benze ne bakulu banyi bakuabu ba balume banayi ne ba bakaji basatu. Pamvua ngenda nkola, tatu uvua unkankamija bua mbala nshapita umue wa mu Bible dituku dionso ne uvua mundongeshe mikanda yetu ya bungi. Misangu mikuabu, baledi banyi bavua balomba batangidi ba bijengu ne baleji mpala ba betele bua balue kutudila kuetu. Malu avua bana betu abu batulondela, avua asankisha bena mu dîku dietu bonso ne avua atukankamija. Biobi kutusaka tuetu bonso bua kuteka mudimu wa diyisha muaba wa kumpala.

Baledi banyi bavua ne ditabuja dikole kudi Yehowa, nunku mbanshile tshilejilu tshimpe. Mamu wakasama, kufuaye. Meme ne tatu tuakalua bampanda-njila mu 1971. Kadi tatu wakafua pende mu 1973, pankavua ne bidimu 20. Pangakafuisha baledi banyi bonso babidi, nkavua ndiumvua nkaya, tshiyi ne muntu. Kadi ditekemena ‘dikole ne dishindame’ dia mu Bible diakangambuluisha bua kushala pabuipi ne Yehowa ne kutuma meji anu ku malu mimpe pamutu pa kusamisha mutu bikole. (Eb. 6:19) Matuku makese tatu mumane kufua, ngakashala mpanda-njila wa pa buende, kuntumabu mu katshidiila ka Coron kavua pa nkayaku, mu provense wa Palawan.

Ngakafika mu Coron pamvua ne bidimu 21. Bu mumvua mukolele mu tshimenga, ngakakema bua kumona ne: mu katshidiila amu kamuvua nzubu ya bungi ivua ne nzembu ne mâyi a ku milonda to. Kamuvua nansha mashinyi ne mioto bia bungi to. Bu muvuamu bena Kristo netu bakese, tshivua ne mpanda-njila wa kuikala kuyisha nende to. Nunku kuvua  misangu imvua nyisha nkayanyi. Mu ngondo umue patupu, bena mu dîku dietu ne balunda banyi bakansamina muoyo bikole. Butuku mvua ntangila muulu, mpuekesha binsonji. Mvua ngumvua anu bua kulekela mudimu au, kupingana kuetu.

Tshikondo tshionso tshimvua ndiumvua nkaya atshi, mvua nsambila Yehowa ne muoyo mujima. Ndi mvuluka malu akankolesha amvua mubale mu Bible ne mu mikanda yetu. Misambu 19:14 uvua anu unduila mu lungenyi. Ngakamona ne: meme ngelangana meji a malu adi asankisha Yehowa, bu mudi adi atangila midimu yende ne ngikadilu yende, nealue “Dibue dianyi ne Mupikudi wanyi.” Tshiena-bualu tshia mu Tshibumba tshia Nsentedi tshia ne: “Kuena nkayebe nansha” a (mu mfualanse), tshiakangambuluisha bikole. Ngakatshibala misangu ne misangu. Meme kumona ne: Yehowa uvua nanyi tshikondo atshi. Ke kunsakabi bua kuikala kusambila, kulonga ne kuelangana meji.

Matuku makese meme mumane kufika mu Coron, bakanteka mukulu. Bu mumvua anu nkayanyi mukulu, lumingu luonso meme ke uvua ulombola Kalasa ka Mudimu wa Nzambi, Tshisangilu tshia Mudimu, Dilonga dia Bible dia tshisumbu, ne Dilonga dia Tshibumba tshia Nsentedi. Mvua ngenza kabidi muyuki wa patoke lumingu luonso. Mu bulelela, tshivua kabidi ne dîba dia kudiumvua nkaya to!

Mvua munange kuyisha mu Coron bualu mvua mpatula bipeta bimpe. Bamue balongi banyi ba Bible bakabatijibua. Kadi kuvua ntatu mikuabu. Imue misangu, mvua ne bua kuenda kua dinda too ne munda munya bua kufika muaba umvua nya kuyisha, tshiyi nansha mumanye kungalala pamvua mfika to. Mu teritware wa tshisumbu tshietu muvua kabidi tubidiila tukuabu tukese tua bungi. Mvua nyamu ne kabuatu ka motere, mpitshila mu mbuu muvua mavuala makole panyi tshiyi nansha mumanye kuowela to! Yehowa wakankuba mu ntatu yonso ayi ne wakankolesha. Pashishe ngakajingulula ne: Yehowa uvua wenda undongolola bua ntatu mikole menemene ivua mua kunkuata mu mudimu uvua mungindile.

Mu 1978, bakantuma mu Papouasie-Nouvelle-Guinée, ku nord kua Australie. Mu ditunga edi mudi mikuna ya bungi. Biakankemesha bua kumona ne: muvua bantu bu miliyo isatu bavua bakula miakulu mipite pa 800. Diakalenga, bantu ba bungi menemene bavua bakula muakulu wa pidgin wa mu Mélanésie utubu babikila ne: Tok Pisin.

Bakanji kuntuma mu tshisumbu tshia muakulu wa Anglais tshivua mu tshimenga tshikulu tshia Port Moresby. Kadi pashishe bakalua kuntuma mu tshisumbu tshia muakulu wa Tok Pisin, meme kubuela mu kalasa bua kulonga muakulu au. Malu amvua ndonga mu kalasa avua angambuluisha bua kuyisha. Ke tshia kenza bua mmanye muakula au ne lukasa. Matuku makese patupu, nkamvua nkokesha bua kuenza muyuki wa patoke mu muakulu wa Tok Pisin. Tshidimu tshijima katshiyi tshianji kukumbana, bakanteka mutangidi wa tshijengu bua ngikala kukumbula bisumbu bia muakulu wa Tok Pisin mu provence minene ya bungi. Biakankemesha bikole.

Bu muvua bisumbu bishilangane ntanta mile, mvua ne bua kuenzeja mpungilu ya bijengu ya bungi ne kuenza ngendu bikole. Kumpala mvua ndiumvua nkaya, ndimona mu ditunga dikuabu muvua bantu bakula muakulu mukuabu, bikale ne bilele bishilangana ne bia kuetu. Tshivua mua kumbuka mu tshisumbu kuya mu tshikuabu lua panshi to, bualu kuvua mikuna ya bungi ne binina. Ke bualu kayi mvua  ngenza luendu ku ndeke lumingu lonso. Imue misangu, mvua anu kayanyi muena luendu mu ndeke amu. Kavua kadeke kakese, kakayi nansha kimpe munda to. Pamvua ngenze ngendu yonso ayi, mvua anu ne buôwa bua buena bumvua ngumvua pamvua ngenza ngendu pa mâyi!

Bu muvua bantu bakese ke bavua ne telefone, nunku tuvua tufundilangana mikanda ne bisumbu. Pa tshibidilu, mvua mfike mu bisumbu kumpala kua mikanda imvua mutume kufikayi, bindomba bua kutuadija kuebeja bantu ba muaba au bua bandeje muaba uvua bamanyishi. Dîba dionso dimvua mpeta bena Kristo netu, bavua bangakidila ne disanka, bingambuluisha bua kuvuluka bua tshinyi bivua ne mushinga bua kudienzeja nanku. Yehowa uvua mungambuluishe mu mishindu ya bungi ne bulunda bumvua mudie nende buakakola bikole.

Musangu wa kumpala umvua mubuele mu bisangilu mu tshidiila tshia Bougainville, muanetu mukuabu ne mukajende bakalua bende bafukisha mimuemue, kungebejabu ne: “Utshidi mutumanye anyi?” Meme kuvuluka ne: mvua mubayishe pamvua mufike mu Port Moresby. Meme ke uvua mutuadije kulonga nabu Bible, pashishe meme kubashile muanetu mukuabu wa muaba au. Bobu bonso babidi bakavua babatijibue! Edi ke dimue dia ku mabenesha a kudi Yehowa amvua mupete mu bidimu bionso bisatu bimvua muenze mu Papouasie-Nouvelle-Guinée.

Kumpala kua meme kumbuka mu Coron mu 1978, ngakadia bulunda ne Adel, muanetu wa bakaji muimpe kumone uvua munange kuambuluisha bakuabu. Uvua udikoleshila bana babidi, Samuel ne Shirley, eku muikale mpanda-njila wa pa tshibidilu. Tshikondo atshi uvua utabalela kabidi mamuende ukavua mukulakaje. Mu ngondo 5/1978, ngakapingana mu Philippines bua kusela Adel. Tuetu bamane kuselangana, tuakatungunuka ne bumpanda-njila ne kutabalela bena mu dîku dietu.

Nansha munkavua ne dîku, bakalua kunteke kabidi mpanda-njila wa pa buende mu 1983, kuntumabu mu tshidiila tshia Linapacan, mu provense wa Palawan. Tuetu bonso tuakaya mu tshidiila atshi muvua kamuyi Bantemu. Mamuende wa Adel wakafua bu panyima pa tshidimu tshijima. Nansha nanku, tuakashala anu ne tshisumi mu mudimu wa buambi, biobi kutuambuluisha bua kunanukila mu lutatu alu. Mu Linapacan, tuakapeta balongi ba Bible ba bungi bavua basue kubuela mu bisangilu. Nunku, bivua bikengela tuikale ne Nzubu wa Bukalenge nansha wa mukese. Ke tuetu kudibakilayi. Tuetu bamane kuenza bidimu bisatu muntu amu, biakatusankisha bikole bua kumona bantu 110 babuele mu Tshivulukilu. Ba bungi bakudibu bakashala kubatijibua patuakumbuka.

Mu 1986, bakantuma mu tshidiila tshia Culion muvua bantu ne disama dia nsudi. Pashishe, bakateka pende Adel mpanda-njila wa pa buende. Tuakanji kumvua buowa bua kuya kuyisha bantu bavua ne disama dia nsudi. Kadi bamanyishi ba muaba au bakatujadikila ne: bakavua bapeshe bantu bavua ne disama adi buanga ne bivua bikole bua bobu kutushiladi. Bamue bantu bavua ne disama adi bavua babuela mu bisangilu kua muanetu mukuabu wa bakaji. Panyima pa matuku tuakibidilangana ne bantu ba muaba au ne tuvua ne disanka dia kuyisha bantu bavua bela meji ne: Nzambi ne bantu bakuabu bavua babadiombole. Pavua bantu bavua basama bikole abu balonga ne:  dimue dituku nebalue ne makanda a mubidi mapuangane, bavua basanka bikole. Patuvua tubamona nanku, bivua bitusankisha bikole.​—Luka 5:12, 13.

Monayi tshituvua benze bua bana betu kuibidilangane ne nsombelu wa mu Culion. Meme ne Adel tuakalomba bena Kristo netu babidi ba bakaji ba mu Coron batshivua bansonga bua balue kusomba netu; dîba adi bana betu bavua mua kupeta balunda bimpe. Samuel ne Shirley ne bena Kristo netu babidi ba bakaji abu bavua banange kuyisha bantu bulelela. Bavua ne bana ba bungi bavuabu balongesha Bible. Meme ne Adel tuvua tulongesha baledi ba bana abu. Musangu mukuabu tukavua tulonga Bible ne mêku 11. Matuku makese patupu, tukavua tulombola malonga a Bible a bungi avua aya kumpala. Bivua bikumbana bua tuetu kuenza tshisumbu tshipiatshipia!

Kumpala anu meme ke uvua mukulu mu tshijengu atshi. Ke bualu kayi betele wakandomba bua kulombola bisangilu bia ku lumingu mu Culion muvua bamanyisha 8, pashishe kuya kulombola kabidi mu musoko mukuabu udibu babikila ne Marily muvua bamanyishi 9. Bua kufika mu musoko au bivua bilomba kuenza luendu lua mêba asatu ku buatu. Pavua bisangilu bijika, meme ne bena mu dîku dianyi tuvua tuenda mêba a bungi tupitshila mu buloba bua mikuna bua kuya kuyisha mu musoko mukuabu uvuabu babikila ne: Halsey.

Bantu ba bungi ba mu Marily ne Halsey bakalua Bantemu. Ke tuetu kuibaka Nzubu wa Bukalenge mu Marily ne mukuabu mu Halsey. Mu Linapacan, bena Kristo netu ne bantu bakuabu bakavua babuela mu bisangilu ke bakafila bintu bia bungi bia kuibaka nabi ne bobu bine ke bakenza mudimu wa bungi. Nzubu wa Bukalenge wa mu Marily uvua mua kubuela bantu 200. Bu muvuaye muenza mu mushindu wa kuikala kumudiundisha, ke bualu kayi tuvua tuenzelamu mpuilu.

Mu 1993 pakavua bana balue bantu bakole, meme ne Adel tuakaya mu mudimu wa butangidi bua tshijengu mu Philippines. Pashishe mu 2000, ngakabuela mu Kalasa ka dilongesha mudimu bua kulua mulongeshi wa kalasa aku. Tshivua ndiumvua mukumbana bua kuikala mulongeshi to, kadi Adel uvua unkankamija. Uvua umvuluija ne: Yehowa neampeshe bukole bua kuenza mudimu au. (Filip. 4:13) Adel uvua muambe nanku bualu Yehowa uvua mumuambuluishe  bua kukumbaja mudimu uvuaye nawu tshikondo tshivuaye usama.

Mu 2006 pantshivua mulongeshi, bakakuata Adel disama dia ditu dinyanga buongo dia Parkinson. Biakatusama ku muoyo bikole be! Pangakamuambila ne: mvua ne bua kuimanyika mudimu wanyi bua kumutabalela, wakangambila ne: “Keba koku munganga udi mua kungondopa. Ndi mumanye ne: Yehowa neatuambuluishe bua kutungunuka ne mudimu wetu.” Adel wakatungunuka anu ne mudimu uvuaye wenzela Yehowa kayi udiabakena mu bidimu bisambombo biakalonda. Pakavuaye mutshibukila panshi, ukavua uyisha bantu musombele mu kakalu ka balema. Pakavuaye wakula ne lutatu, ukavua ufila mandamuna mu tshikoso mu bisangilu. Bana betu ba bungi bavua bafundila Adel mesaje pa tshibidilu, bamuela tuasakidila bua tshilejilu tshiende tshimpe. Bakamufundila nanku too ne mu 2013, tshidimu tshiakafuaye. Mvua muenze bidimu bipite pa 30 ne mukajanyi wa lulamatu ne uvua munange bantu au. Pakafuaye, ngakumvua kabidi kanyinganyinga kakole, meme kudiumvua nkaya.

Adel uvua musue bua ntungunuke ne mudimu. Ke tshindi muenze. Mvua anu ne bia bungi bia kuenza, ke tshidi tshingambuluishaku ndambu bua kubenga kudiumvua nkaya. Kutuadijila mu 2014 too ne mu 2017, bakanteka bua kukumbula bisumbu bia muakulu wa Tagalog mu matunga avuabu bakandike midimu yetu. Pashishe, ngakaya kukubumbula bisumbu bia muakulu wa Tagalog mu Taiwan, mu États-Unis ne mu Canada. Mu 2019, ngakalongesha mu tulasa tua bamanyisha ba Bukalenge mu Inde ne mu Thaïlande mu muakulu wa Anglais. Mvua ne disanka dia bungi pamvua ngenze midimu ayi. Disanka dimvua ngumvua adi divua diyila ne panshi pamvua ndifila bikole mu dienzela Yehowa mudimu.

Muaba onso umvua nya bua kuenza mudimu, mvua nanga bana betu ba muaba au bikole. Nunku kabivua bipepele bua kushiyangana nabu to. Bikondo abi ke bingakamanya mua kueyemena Yehowa bikole menemene. Uvua unkuatshisha misangu yonso ne mbingambuluishe bua kuitaba ku budisuile nsombelu yonso imvua mua kutuilangana nayi. Lelu eu, ndi mpanda-njila wa pa buende mu Philippines. Ndi ndiumvua bimpe mu tshisumbu tshipiatshipia tshindi, mudibu bankankamija ne bantabalela. Pandi mmona Samuel ne Shirley bidikija ditabuja dia mamuabu, bidi bingenza disanka.​—3 Yone 4.

Bushuwa, ndi mutuilangane ne ntatu ya bungi mu nsombelu wanyi. Mu yoyi ayi muvua lua kumona mukajanyi munanga ukenga ne disama dibi ne muakafuaye. Mvua kabidi ne bua kuibidilangana ne nsombelu mipiamipia ya bungi. Mu bulelela, ngakamona muvua Yehowa “kayi kule ne yonso wa kutudi.” (Bien. 17:27) Tshianza tshia Yehowa “ki ntshîpi menemene” bua kukuatshisha batendeledi bende ne kubakolesha, nansha bobu miaba ya kule menemene. (Yesh. 59:1) Yehowa Dibue dianyi uvua anu nanyi mu nsombelu yonso ayi ne ndi ne dianyisha dia bungi kudiye. Tshivua nkaya nansha.