1-2. Mmunyi mudi nsombelu wa bantu ufuanangana ne wa nsongalume udibu bakuile mu tshikoso tshia kumpala?

 TUANGATE tshilejilu tshia nsongalume udi baledi bende babanji. Dimue edi udi upeta lumu lubi lua ne: baledi bende mbafue ku njiwu ivua mienzeke. Lumu alu ludi lumunyingalaja bikole. Badi balua kumuambila kabidi lumu lubi lua ne: baledi bende bavua batulakaje makuta abu onso basombe ne makuabu. Udi udimona mushale ne mabanza a bungi a kufuta. Anji elabi meji, pamutu pa yeye kupiana bubanji, udi upiana yeye mabanza. Bena mabanza pabu eku ne: tufuta makuta etu. Udi wimana mukolo mule ne muîpi, kayi mua kuafuta.

² Nsombelu wetu mmufuanangane ne wa nsongalume eu mu mushindu kampanda. Adama ne Eva, baledi betu ba kumpala, bavua bapuangane ne bavua basombele mu mparadizu mulenga. (Gen. 1:27; 2:7-9) Bavua ne bua kusombamu bua kashidi. Kadi malu akashintuluka, bakajimija diakalenga dia kusomba mu mparadizu ne dia kuikala ne muoyo wa tshiendelele. Ntshinyi tshivuabu mua kushila bana babu bavua balua kuledibua? Bible udi wamba ne: ‘Mpekatu mmubuele mu ba pa buloba kupitshila kudi muntu umue [Adama] ne lufu ndubuele bua mpekatu, ne mushindu eu lufu ndutampakane kudi bantu bonso bua muvuabu bonso benze mpekatu.’ (Lomo 5:12) Mpekatu ke bumpianyi budi Adama mutushile tuetu bana bende. Tudi tufua  bua mpekatu au. Ndibanza dinene didi muntu nansha umue wa kutudi kayi mua kufuta to.​—Mis. 49:8.

3. Bua tshinyi tudi tufuanyikija mpekatu ne “mabanza”?

³ Yezu wakafuanyikija mpekatu ne “mabanza.” (Mat. 6:12; Luka 11:4) Patudi tuenza mpekatu, bidi anu bu ne: tudi tubuela dibanza kudi Yehowa. Nanku Yehowa udi ne bua kutunanadi bua tufute tshibawu tshia mpekatu au. Bu Yehowa kayi mulongolole bua kutubuikidila mpekatu, dibanza adi divua dijika anu patuvua tufua, ne katuvua mua kufua ne ditekemena dia kupetulula muoyo to.​—Lomo 6:7, 23.

4. a) Bu Yehowa kayi mulongolole bua kutubuikidila mpekatu, ntshinyi tshivua mua kutufikila tuetu bena mpekatu? (Misambu 49:7-9) b) Muaku “mpekatu” udi mu Bible udi uleja tshinyi? (Tangila kazubu ka “ Mpekatu.”)

⁴ Kudiku mushindu wa tuetu kupetulula bionso bivua Adama ne Eva bajimije anyi? Eyowa, kadi ki nku bukole buetu to. (Bala Misambu 49:7-9.) Bu Yehowa kayi mutuambuluishe, katuvua mua kutekemena muoyo wa tshiendelele anyi dibishibua ku lufu to. Tuvua tufua anu bu nyama, katuyi mua kupetulula kabidi muoyo to.​—Muam. 3:19; 2 Pet. 2:12.

5. Mmunyi mudi Tatu wetu wa dinanga utuambuluisha bua kufuta dibanza dia mpekatu utudi bapiane? (Tangila tshimfuanyi .)

⁵ Tuakulayi bua nsongalume utukavua batele au. Mubanji kampanda yeye mumuambile bua kumufutshila mabanza au, ntshinyi tshienzaye? Kakuyi mpata neitabe ne disanka dionso. Bia muomumue, Yehowa Tatu wetu wa dinanga mmutupeshe dipa didi ditufutshila dibanza dia mpekatu utudi bapiane kudi Adama. Yezu wakumvuija bualu abu, wamba ne: “Nzambi uvua munange ba pa buloba bikole menemene, kufikaye ne ku difila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.” (Yone 3:16) Dipa adi didi dituambuluisha kabidi bua kudia bulunda bukole ne Yehowa.

6. Mmiaku kayi ya mu Bible ituakonkonona mu tshiena-bualu etshi? Bua tshinyi?

⁶ Mmunyi mudi dipa dia dikema edi didi dienza bua batubuikidile mpekatu anyi “mabanza” etu mua kutuambuluisha? Bua kuandamuna lukonko elu, tuakulayi bua miaku mishilashilangane ya mu Bible eyi: dilengejangana ne Nzambi, dibuikila mpekatu, tshia kupikulangana natshi, dikuudibua, ne dibadibua bakane. Mu tshiena-bualu etshi, netumvuije muaku ne muaku wonso. Patudi tuelangana meji a tshidi Yehowa muenze bua kutufuila luse, netumuleje dianyisha dia bungi.

DILENGEJANGANA NE NZAMBI

7. a) Ntshinyi tshikuabu tshivua Adama ne Eva bajimije? b) Bu mutudi bana ba Adama ne Eva, ntshinyi tshitudi tujinga ne muoyo mujima? (Lomo 5:10, 11)

⁷ Pa kumbusha muoyo wa tshiendelele uvua  Adama ne Eva bajimije, bavua banyange kabidi bulunda buabu ne Yehowa Tatu wabu. Adama ne Eva bavua ba mu dîku dia Nzambi kumpala kua kuenzabu mpekatu. (Luka 3:38) Kadi pakatombokelabu Yehowa, wakabipatamu. Kabavua banji kulela dîba adi to. (Gen. 3:23, 24; 4:1) Bu mutudi ndelanganyi yabu, katuena baledibue mu dîku dia Yehowa to, ke bualu kayi bivua bikengela tulengejangana nende. (Bala Lomo 5:10, 11.) Bivua bikengela tulua balunda ba Nzambi, pamutu pa kuikala baluishi bende. Bualu budi bukemesha budi ne: Yehowa ke uvua muele tshidia tshia kumpala bua kuenza bualu ebu. Mmushindu kayi uvuaye muenze nanku?

DIBUIKILA MPEKATU

8. a) Ntshinyi tshivua Yehowa mufile? b) Tshidi tshituambuluisha mushindu kayi?

⁸ Dibuikila mpekatu mmushindu udi Yehowa mulongolole malu bua bantu bena mibi kudiabu kabidi nende bulunda bushême. Wakafila tshintu tshia mushinga wa muomumue ne tshivua Adama ne Eve bajimije bua kuikala mushindu wa kupetulula tshivuabu bajimije atshi. Mu mifundu ya mu tshiena Greke ya buena Kristo mudi tshiambilu tshia dijimija dia mibi, tshidi ne diumvuija dia muomumue ne ‘dibuikila dia mpekatu.’ (Lomo 3:25; dim.) Dijimija dia mibi ntshienzedi tshidi tshiambuluisha muntu bua kuikala mu ditalala ne Nzambi ne kuikala nende mu malanda mimpe.

9. Ntshinyi tshivua Yehowa mulongolole bua kubuikidila bena Isalele mibi yabu?

⁹ Yehowa wakalongolola malu bua kubuikidila bena Isalele mibi yabu bua bapete mushindu wa kudia nende malanda mimpe. Mu Isalele, bavua benza tshibilu tshia dibuikila mpekatu dituku dimue ku tshidimu. Dituku adi muakuidi munene uvua ulambula milambu ya nyama bua bantu ba Nzambi. Bushuwa milambu ya nyama nkayayi kayivua mua kujimija mpekatu yabu yonso to, bualu nyama ivua mishadile kudi bantu. Kadi pavua bena Isalele bavua banyingalala balambula milambu ivua Nzambi ubalomba, uvua ubabuikidila mibi yabu. (Eb. 10:1-4) Milambu ivuabu balambula dituku dia kubuikila mpekatu ne bikondo bikuabu ivua yambuluisha bena Isalele bua kumona ne: bavua bena mpekatu ne bavua dijinga ne tshintu tshivua mua kubambuluisha bua bababuikidile mpekatu yabu yonso.

10. Ntshinyi tshivua Yehowa mulongolole bua kubuikidila bantu mpekatu yabu yonso?

¹⁰ Yehowa mmulongolole bua kubuikidila bukua bantu mpekatu yabu bua kashidi. Wakalongolola bua Muanende munanga ‘afidibue musangu umue bua kashidi bua kuambula mpekatu ya bantu ba bungi.’ (Eb. 9:28) Yezu wakafila “muoyo wende bu tshia kupikulangana natshi pa muaba wa bantu ba bungi.” (Mat. 20:28) Tshia kupikulangana natshi ntshinyi?

TSHIA KUPIKULANGANA NATSHI

11. a) Bilondeshile Bible, tshia kupikulangana natshi ntshinyi? b) Nnganyi uvua mua kukumbana bua kuikala tshia kupikulangana natshi?

¹¹ Bilondeshile Bible, tshia kupikulangana natshi mmushinga udibu bafuta bua kubuikila mpekatu ne bua kulengejangana ne Nzambi. a Ku mêsu kua Yehowa, tshia kupikulangana natshi ke tshidi tshiambuluisha bua kupetulula tshintu tshikavua tshijimine. Tshivua tshijimine ntshinyi? Mmuoyo mupuangane uvua Adama ne Eva nawu ne ditekemena divuabu nadi dia kushala ne muoyo kashidi. Ke bualu kayi tshia kupikulangana natshi tshivua ne bua kuikala ne mushinga wa muomumue ne tshivua tshijimine. (1 Tim. 2:6) Bavua ne bua kutshifuta anu kudi muntu mukole. Muntu au uvua ne bua kuikala muntu mulume 1) mupuangane,  2) muikale ne mushindu wa kusomba ne muoyo pa buloba, ne 3) mudiakaje bua kufila muoyo wende bua bualu buetu. Dîba adi muoyo wa muntu au udi mua kuambuluisha bua kubuikila mibi ne kupetulula muoyo ukavua mujimine.

12. Bua tshinyi Yezu ke uvua mukumbane bua kuikala tshia kupikulangana natshi?

¹² Tumonayi malu asatu adi enza bua Yezu ikale mukumbane bua kuikala tshia kupikulangana natshi. 1) Uvua mupuangane, mmumue ne: “kavua muenze mpekatu to.” (1 Pet. 2:22) 2) Bu muvuaye mupuangane, uvua ne mushindu wa kushala ne muoyo kashidi pa buloba. 3) Uvua mudiakaje bua kutufuila. (Eb. 10:9, 10) Bu muvuaye muntu mulume mupuangane, uvua mukumbanangane ne muntu wa kumpala Adama, tuambe ne: pavua Adama kayi muanji kuenza mpekatu. (1 Kol. 15:45) Nunku bu muvua Yezu mutufuile, wakafuta mushinga menemene uvua ukengela bua kupetulula tshivua Adama mujimije. (Lomo 5:19) Ke muvua Yezu mulue “Adama wa ndekelu” nanku. Kakuena kabidi bualu bua muntu mukuabu mupuangane kulua kufuta tshivua Adama mujimije to. Yezu ukadi mufue “musangu umue bua kashidi.”​—Eb. 7:27; 10:12.

13. Ndishilangana kayi didi pankatshi pa dibuikila mpekatu ne tshia kupikulangana natshi?

¹³ Kadi ndishilangana kayi didi pankatshi pa dibuikila mpekatu ne tshia kupikulangana natshi? Dibuikila mpekatu mbualu budi Nzambi wenza bua bantu badie kabidi nende malanda mimpe. Tshia kupikulangana natshi mmushinga udibu bafuta bua kubuikidila bantu mpekatu. Mushinga au mmuleja kudi mashi a Yezu avua maye panshi bua bualu buetu.​—Ef. 1:7; Eb. 9:14.

DIKUUDIBUA NE DIBADIBUA BAKANE

14. Ntshinyi tshituamona mpindieu? Bua tshinyi?

¹⁴ Malu avua Yehowa mulongolole bua dibuikila mpekatu adi atuambuluisha mushindu kayi? Bua kuandamuna lukonko elu, netuakule bua diumvuija dia biambilu bibidi bia mu Bible biatuambuluisha bua kumanya mudi luse ludi Yehowa utufuila lutuambuluisha.

15-16. a) Muaku “dikuudibua” udi mu Bible udi umvuija tshinyi? b) Mmunyi mutudi tumvua patudi tupikudibua ku mpekatu ne ku lufu?

¹⁵ Muaku dikuudibua udi umvuija kulekela muntu uvuabu bakuate bualu mbafute tshia kumupikula natshi. Ke tshivua mupostolo Petelo muleje pavuaye muambe ne: “Nudi bamanye ne: kabavua banupikule [Ku mua.: “kabavua banukuule”] ku nsombelu wa tshianana uvua munushila kudi bankambua benu ne bintu bidi binyanguka, ne arjan anyi ne or to. Kadi bavua banupikule ne mashi a mushinga mukole, bu a muana wa mukoko udi kayi kalema, kayi katoba, mashi a Kristo.”​—1 Pet. 1:18, 19; dim.

¹⁶ Mulambu wa tshia kupikulangana natshi ke udi utupikula ku mpekatu ne ku lufu bidi bitutatshisha. (Lomo 5:21) Tudi ne dianyisha dia bungi kudi Yehowa ne kudi Yezu bua mutudi bapikudibue ku diambuluisha dia mashi a Yezu a mushinga mukole.​—1 Kol. 15:22.

17-18. a) Kubadibua bakane kudi kumvuija tshinyi? b) Mmunyi mudiku kutuambuluisha?

¹⁷ Bible udi wamba ne: bena mudimu ba Yehowa badi babadibua bakane. Bidi biumvuija ne: Nzambi kena utulomba bua kufuta tshintu kampanda bua mpekatu yetu to. Padiye wenza nanku kabiena bileja ne: kena unemeka mikenji yende ya buakane to. Ki mmalu atudi tuenza adi enza bua tukumbane bua Nzambi kutubikila ne: bakane to, ne kena wanyisha mpekatu yetu to. Kadi Yehowa udi utubuikidila mibi yetu bualu tudi tuitabuja tshidi yeye ne Yezu benze bua kutupikula.​—Lomo 3:24; Gal. 2:16.

¹⁸ Kubadibua bakane kudi Nzambi kudi kutuambuluisha mushindu kayi? Bantu badibu basungule bua kukokesha ne Yezu mu diulu  bakadi babadibue bakane bu bana ba Nzambi. (Tito 3:7; 1 Yone 3:1) Bakadi bababuikidile mpekatu yabu. Mbienze anu bu ne: kabatu banji kuenza mpekatu nansha umue; nunku mbakumbane bua kuikala mu Bukalenge bua Nzambi. (Lomo 8:1, 2, 30) Bantu badi ne ditekemena dia kushala ne muoyo pa buloba, Nzambi udi ubabala bakane, ubabuikidila mibi yabu ne balua balunda bende. (Yak. 2:21-23) Bena mu musumba munene bapanduka ku Armagedone kabakulabula lufu nansha kakese. (Yone 11:26) “Bantu bakane” ne “badi kabayi bakane” badi bafue nebabishibue ku lufu. (Bien. 24:15; Yone 5:28, 29) Ndekelu wa bionso, batendeledi bonso ba Yehowa badi pa buloba badi bamutumikila nebapete “budikadidi bua butumbi bua bana ba Nzambi.” (Lomo 8:21) Atshi ntshikondo tshitudi bindile ne muoyo kuulu kuulu tshituikala mu malanda a mushindu au ne Yehowa, Tatu wetu!

19. Nsombelu wetu mmulengele mushindu kayi? (Tangila kabidi ka nzubu ka “ Mudibi bituambuluisha.”)

¹⁹ Mu bulelela, bu mutuvua katuyi ne ditekemena kumpala, nsombelu wetu mmufuanangane ne wa nsongalume utuvua bakuile ku ntuadijilu; uvua mujimije bintu bionso, mupiane mabanza bungi kabuyi kubala avuaye kayi mua kufuta. Kadi Yehowa mmutuambuluishe. Nsombelu wetu mmushituluke bualu Yehowa mmulongolole malu bua kutubuikidila mibi yetu ne Yezu pende wakitaba bua kufila tshia kupikulangana natshi. Ditabuja ditudi nadi kudi Yezu Kristo didi dituambuluisha bua kupikudibua ku mpekatu ne ku lufu. Padi Yehowa utubuikidila mpekatu yetu, bidi bilua anu bu ne: katutu banji kuyenza to. Kadi bualu bua mushinga mukole budi ne: mpindieu tudi mua kuikala mu malanda mimpe ne Yehowa Tatu wetu wa mu diulu udi mutunange.

20. Ntshinyi tshituakonkonona mu tshiena-bualu tshialonda?

²⁰ Patudi tuelangana meji a tshidi Yehowa ne Yezu batuenzele, mioyo yetu idi yuwula tente ne dianyisha. (2 Kol. 5:15) Bu bobu kabayi batuambuluishe, katuvua mua kuikala ne ditekemena nansha kakese! Padi Yehowa ukufuila luse, mmunyi mudibi bikuambuluisha wewe? Netuandamune lukonko elu mu tshiena-bualu tshidi tshilonda.