1. Ntshinyi tshitu tshikemesha bantu ba bungi batu babuela mu bisangilu? (Tangila kabidi tshimfuanyi.)

 FUANYIKIJABI bena dibaka kampanda babuela mu bisangilu ku Nzubu wa Bukalenge bua musangu wa kumpala. Badi bakema bikole bua mudibu babakidila ne musangelu ne bua mudi bena mu tshisumbu banangangane. ‘Pakadibu bapingana kumbelu, mukaji udi wambila bayende ne: Bantemu ba Yehowa mbashilangane ne bantu bakuabu batukadi batuilangane nabu, patuvua nabu apu mvua musanke be!’

2. Bua tshinyi bamue mbalekele kuenzela Yehowa mudimu?

² Dinanga didi nadi bantu badi mu tshisumbu tshia bena Kristo ndia pa buadi. Mu bulelela, Bantemu ba Yehowa ki mbapuangane to. (1 Yone 1:8) Nunku patudi tuenda tumanya bena mu tshisumbu, bidi mua kuikala bipepele bua kumona bimue bilema bidibu nabi. (Lomo 3:23) Bia dibungama, bamue mbalekele kuenzela Yehowa mudimu bua bilema bia bakuabu.

3. Tshimanyinu tshia bayidi balelela ba Yezu ntshimayinu kayi? (Yone 13:34, 35)

³ Tangila kabidi mvese wa tshiena-bualu etshi. (Bala Yone 13:34, 35.) Tshimanyinu tshia bayidi balelela ba Kristo ntshimanyinu kayi? Ndinanga, kadi ki mbupuangane to. Mona ne: Yezu ki mmuambe ne: ‘Bua bualu ebu nenumanye ne: nudi bayidi banyi to.’ Kadi uvua muambe ne: “Bua bualu ebu bantu bonso nebamanye ne: nudi bayidi banyi.” Nunku Yezu wakaleja ne: bayidi bende ne bantu badi kabayi bayidi bende bavua  mua kumanya bena Kristo balelela bua mudibu banangangane ne muoyo mujima.

4. Ntshinyi tshidi bamue mua kujinga kumanya bua bena Kristo balelela?

⁴ Bamue bantu badi kabayi Bantemu ba Yehowa badi mua kudiebeja ne: ‘Mmunyi mudi dinanga dikale tshimanyi tshia bayidi balelela ba Yezu? Mmunyi muvua Yezu muleje ne: uvua munange bapostolo bende? Kudiku mushindu wa kuidikija tshilejilu tshia Yezu lelu anyi?’ Mbimpe Bantemu belele pabu mandamuna a nkonko eyi meji. Kuenza nanku kudi mua kubambuluisha bua kunangangana bikole, nangananga padi bakuabu benza bilema.​—Ef. 5:2.

5. Umvuija mêyi a Yezu adi mu Yone 15:12, 13.

⁵ Yezu uvua muleje patoke ne: dinanga dia pa buadi ke divua mua kuikala tshimanyinu tshia bayidi bende. (Bala Yone 15:12, 13.) Mona ne: Yezu uvua mubatumine dîyi ne: “Nunangangane anu bu mundi mununange.” Bidi biumvuija tshinyi? Anu mukavua Yezu mumvuije, ndinanga dia kunanga bakuabu kupita mutudi badinange, mmumue ne: dinanga didi disaka muena Kristo bua kufuila muena Kristo nende biobi bikengela kuenza nanku. b

6. Mmunyi mudi Dîyi dia Nzambi dilongesha ne: dinanga didi ne mushinga?

⁶ Dîyi dia Nzambi didi dilongesha ne: dinanga didi ne mushinga wa bungi. Tshilejilu, Mu mvese itu bantu ba bungi banange mutu mvese eyi: “Nzambi udi dinanga.” (1 Yone 4:8) “Udi ne bua kunanga mukuebe bu muudi mudinange.” (Mat. 22:39) “Dinanga didi dibuikila mpekatu mipite bungi.” (1 Pet. 4:8) “Dinanga kadiena dishikila nansha.” (1 Kol. 13:8) Mvese eyi ne mikuabu idi ileja bimpe  mushinga wa kuikala ne ngikadilu muimpe eu ne mutudi mua kunangangana.

7. Bua tshinyi Satana kena mua kulongesha bantu bua kunangangana ne kuikala mu buobumue?

⁷ Bantu ba bungi batu badiebeja ne: ‘Mmunyi mutudi mua kumanya tshitendelelu tshilelela? Bitendelelu bionso bitu biamba mudibi bilongesha bulelela, kadi malu adibi bilongesha bua Nzambi mmashilangane.’ Satana muvudije bitendelelu bia dishima bua kupangisha bantu bua kujingulula tshitendelelu tshilelela. Kadi kena mua kuenza tshisumbu tshia batendeledi ba pa buloba bujima badi banangangane to. Anu Yehowa ke udi mua kuenza nanku. Bidi nanku bualu dinanga dilelela didi difumina anu kudiye. Didi anu mu tshisumbu tshia batendeledi badiye upesha nyuma wende ne badiye ubenesha. (1 Yone 4:7) Bidiku bitukemesha bua muvua Yezu muambe ne: dinanga dilelela ke divua ne bua kuikala tshimanyinu tshia bayidi bende balelela anyi?

8-9. Mmunyi mukadi dinanga didi munkatshi mua Bantemu ba Yehowa dikemeshe bantu ba bungi?

⁸ Anu mukavua Yezu muambe, bantu ba bungi mbamanyine bayidi bende balelela ku dinanga didibu banangangane. Tshilejilu, muanetu mukuabu wa balume diende Ian udi uvuluka mpungilu wa kumpala uvuaye mubuele mu tshipalu tshia ndundu tshivua pabuipi ne kuende. Ngondo mikese kumpala kua mpungilu au, uvua muye kumonamu ndundu. Udi wamba ne: “Mvua mumone malu a pa buawu mu mpungilu au. Bantemu bavua ne bukalanga, bavuale bimpe, ne bana babu kabavua ne mukodi to.” Udi wamba kabidi ne: “Kupita bionso, bantu abu bavua bamueneka ne disanka ne ditalala. Ke tshintu tshimvua nkeba bikole! Tshiena mvuluka miyuki ivuabu benze dituku adi to, kadi ndi mushale muvuluke anu mushindu uvua Bantemu badituala.” c Bushuwa, bikadilu bia nunku bidi bileja ne: tudi banangangane bikole. bu mutudi banange bena Kristo netu, tudi tubenzela malu mimpe ne tubanemeka.

⁹ Muanetu mukuabu diende John udi wamba pende bualu bua muomumue pavuaye mutuadije kubuela mu bisangilu. Udi uleja ne: “biakankemesha, muntu yonso uvua anu bu mulunda. Bivua anu bu ne: bavua bapuangane. Dinanga dilelela divuabu nadi diakanjadikila ne: mvua mupete tshitendelelu tshilelela.” d Malu a nunku ne makuabu adi ajadika ne: bantu ba Yehowa mbena Kristo balelela.

10. Ndîba kayi ditudi nangananga ne bua kuleja dinanga dia buena Kristo? (Tangila kabidi dimanyisha.)

¹⁰ Anu mutukadi baleje ku ntuadijilu, kakuena muena Kristo netu udi mupuangane to. Imue misangu nebatuambe dîyi dibi anyi kutuenzela malu mabi. e (Yak. 3:2) Dîba adi, ke ditudi nangananga ne bua kuleja ne: tudi ne dinanga dia buena Kristo, ku malu atudi tuenza. Tshilejilu tshidi Yezu mushiye tshidi tshitulongesha tshinyi mu bualu ebu?​—Yone 13:15.

11. Ntshilema kayi tshivua Yakobo ne Yone benze? (Tangila kabidi tshimfuanyi.)

¹¹ Yezu kavua utekemena bua bayidi bende benze malu bu bapuangane to. Kadi uvua ubambuluisha ne dinanga dionso bua bakaje bilema biabu bua Yehowa abanyishe. Musangu mukuabu, bapostolo babidi, Yakobo ne  Yone, bakambila mamuabu bua abalombele miaba minene mu Bukalenge bua Nzambi kudi Yezu. (Mat. 20:20, 21) Bapostolo aba bakaleja muvuabu ne lutambishi ne basue malu manene.​—Nsu. 16:18.

12. Anu Yakobo ne Yone ke bavua benze tshilema anyi? Umvuija.

¹² Ki nganu Yakobo ne Yone bavua benze tshilema musangu au to. Mona tshivua bapostolo bakuabu benze: “Pakumvua bapostolo bakuabu dikumi bualu ebu, bakafikila bana ba muntu babidi aba munda.” (Mat. 20:24) Yakobo ne Yone bavua mua kuikala bambangane ne bapostolo bakuabu. Pamuapa bapostolo bakuabu bavua mua kuikala babambe ne: ‘Nudi nudimona nuenu batupite bua kulomba miaba minene mu Bukalenge bua Nzambi! Tuetu petu si tudi benze mudimu mukole ne Yezu ne tudi bakumbanyine petu miaba minene!’ Nansha biobi ne: bavua bambilangane malu kayi, bavua balekele bualu abu bubapangisha bua kunangangana.

13. Ntshinyi tshivua Yezu muenze pavua bapostolo benza malu mu mushindu mubi? (Matayi 20:25-28)

¹³ Mmunyi muvua Yezu mupite ne bualu abu? Kakabafikila munda to. Kavua muambe ne: uvua ukeba bapostolo bakuabu bimpe bavua ne budipuekeshi bua bungi ne bavua mua kuenzelangana malu mimpe to. Kadi Yezu wakabeleshisha meji ne lutulu luonso bualu uvua mumanye ne: bavua bantu  bimpe. (Bala Matayi 20:25-28.) Wakatungunuka ne kubenzela malu mimpe nansha muvuabi ne: katshivua musangu wa kumpala anyi wa ndekelu uvua bapostolo bajinga kumanya uvua munene kupita bakuabu munkatshi muabu.​—Mâko 9:34; Luka 22:24.

14. Bapostolo ba Yezu bavua bakolele muaba wa mushindu kayi?

¹⁴ Kakuyi mpata, Yezu wakanji kutangila muvua bapostolo bakole. (Yone 2:24, 25) Bavua bakolele miaba ivua bamfumu ba bitendelelu basue mianzu minene bikole. (Mat. 23:6; fuanyikija ne tshiena-bualu tshia ne: “Nsunagoga mmiaba ivua Yezu ne bayidi bende bayisha,” mu Tshibumba tshia Nsentedi tshia 1/4/2010, dib. 16-18.) Bamfumu ba bitendelelu bena Yuda bavua badiamba pabu muvuabu bakane kupite bakuabu. f (Luka 18:9-12) Yezu wakamona ne: kukolela muaba wa nunku kuvua mua kunyanga mushindu uvua bapostolo badimona ne bamona bakuabu. (Nsu. 19:11) Uvua mumanye ne: bavua mua kuenza bilema, ne kavua ubenzela malu bibi pavuabu benza tshilema to. Uvua mumanye ne: bavua ne meji mimpe; nunku wakabambuluisha ne lutulu bua balekele lutambishi ne lungenyi lua kujinga malu manene, kadi bikale ne dinanga.

15. Bualu buvua bufikile Yakobo ne Yone budi mua kutulongesha tshinyi?

¹⁵ Bualu bua Yakobo ne Yone budi mua kutulongesha malu a bungi. Bavua benze bibi pavuabu balombe miaba minene mu Bukalenge bua Nzambi. Bapostolo bakuabu bavua benze pabu bibi pavuabu balekele bualu abu bubanyangila buobumue. Yezu yeye uvua muenzele bapostolo bende bonso 12 abu malu mimpe ne uvua mubanange. Bidi bitulongesha tshinyi? Tshidi ne bualu ki anu bilema bidi bakuabu batuenzela to, tshitudi tuenza padibu batuenzela bilema tshidi patshi ne bualu. Ntshinyi tshidi mua kutuambuluisha? Muena Kristo netu yeye mutunyingalaje, mbimpe tudiebeje ne: “Bua tshinyi tshidiye mungenzele ntshinyingalaje bikole nunku? Tshidiku tshileja butekete kampanda bundi ne bua kuakaja anyi? Bidiku mua kuikala ne: muanetu udi munnyingalaje eu udi ne lutatu ludi lumutonde anyi? Nansha biobi ne: ndi ne bualu bua kufikila munda, tshienaku mua kulengulula tshilema tshiende bua kumuleja mundi mumunange anyi? Tuetu tutungunuka ne kuenzela bakuabu malu adi aleja mutudi babanange, netuleje mutudi bayidi balelela ba Yezu.

16. Tshilejilu tshia Yezu tshidi mua kutulongesha kabidi tshinyi?

¹⁶ Tshilejilu tshia Yezu tshidi tshitulongesha kabidi bua tuikale tumvuila bena Kristo netu. (Nsu. 20:5) Bushuwa, Yezu uvua mua kumona bivua mu mioyo ya bantu. Tuetu katuena mua kubimona to. Kadi tudi mua kubuikidila bena Kristo netu padibu batuenzela bilema. (Ef. 4:1, 2; 1 Pet. 3:8) Mbipepele bua kuenza nanku, tuetu balonge mua kumanya mudibu bakole. Tuangata tshilejilu.

17. Pavua mutangidi wa tshijengu mufike ku dimanya muena Kristo nende bimpe, bivua bimuambuluishe mushindu kayi?

¹⁷ Mutangidi wa tshijengu mukuabu wa mu Afrike wa ku est udi uvuluka muanetu mukuabu wa balume uvuaye umona kumpala bu ne muntu mubi. Ntshinyi tshiakenzaye? Udi wamba ne: “Pamutu pa meme kuepuka muanetu  au, ngakapangadija bua kumumanya bimpe.” Pakenzaye nanku, wakamanya bimue bilele bia muaba uvua muanetu au mukolele bivua bimushiye tshivuaye atshi. Udi wamba kabidi ne: “Pangakamanya muvuaye mudienzeje bua kulekela bilele bivuaye mukole nabi ne muenze muende muonso bua kushintuluka, ngakamunanga bikole. Tuakalua balunda ba katapula kateka.” Bushuwa, patutu tudienzeja bua kumanya bena Kristo netu, bitu bipepela bua kubananga.

18. Nnkonko kayi itudi mua kudiela bobu batuenzele tshilema kudi muena Kristo netu? (Nsumuinu 26:20)

¹⁸ Imue misangu tutu tumvua bua kuleja muena Kristo netu tshilema tshidiye mutuenzele. Kadi mbimpe tuanji kudiela nkonko eyi: ‘Ndiku mumanye malu onso muvuawu menzeke anyi?’ (Nsu. 18:13) ‘Bidiku mua kuikala ne: kavua ne meji a kunnyingalaja anyi?’ (Muam. 7:20) ‘Nkadiku panyi muenze tshilema tshia nunku anyi?’ (Muam. 7:21, 22) ‘Meme mumuleje tshilema tshiende, tshiakulundula kapia pamutu pa kukajima anyi?’ (Bala Nsumuinu 26:20.) Tuetu bakebe dîba dia kudiela nkonko ya nunku, netufike ku dimona ne: dinanga ditudi banange muanetu neditusake bua kulengulula tshilema atshi.

19. Ntshinyi tshitudi badisuike bua kuenza?

¹⁹ Bu mudi Bantemu ba Yehowa banangangane, badi baleja mudibu bayidi balelela ba Yezu. Yonso wa kutudi udi uleja mudiye muyidi mulelela wa Yezu padiye unanga bena Kristo nende nansha bobu bamuenzela bilema. Tuetu banagangane, bantu bakuabu badi mua kumona ne: tudi mu tshitendelelu tshilelela, ne badi mua kulua kutendelela Yehowa Nzambi wa dinanga pamue netu. Tudisuikayiku bua kutungunuka ne kunangangana, bualu dinanga ke tshimanyinu tshia bena Kristo balelela.