1-2. Ntshinyi tshitu tshitamba kuenzeka patu bantu babatijibua? Ntshinyi tshituakonkonona?

 UKADIKU mubandile tshisumbu tshia bantu badi babatijibua anyi? Udi umvua mudibu bandamuna ne dishindika dionso nkonko ibidi itubu babela kumpala kua bobu kubatijibua. Udi umona mudi bena mu dîku diabu ne balunda babu bikale ne disanka dia bungi. Padibu bapatuka mu mâyi, udi umvua mudibu babatutshila tshikaji ne umona mudibu ne disanka. Lumingu luonso elu, bantu binunu ne binunu batu badilambula ne babatijibua balua Bantemu ba Yehowa Nzambi.

² Kadi wewe? Wewe wela meji a kubatijibua, udi muntu wa pa buende mu bulongolodi bubi ebu bualu udi “ukeba Yehowa.” (Mis. 14:1, 2) Nansha wewe muana anyi mukole, tshiena-bualu etshi ntshikufundila wewe. Kadi mbimpe bamue ba kutudi bakadi babatijibue bakoleshe pabu dipangadika diabu dia kuenzela Yehowa mudimu bua kashidi. Mpindieu tukonkononayi malu asatu a ku atu atusaka bua kuenzela Yehowa mudimu.

3. Bua tshinyi bena mudimu ba Yehowa mbanange bulelela ne buakane? (Misambu 119:128, 163)

³ Yehowa uvua mutumine bantu bende dîyi bua ‘banange bulelela.’ (Zek. 8:19) Yezu wakakankamija bayidi bende bua bakebe buakane. (Mat. 5:6) Mbuena kuamba ne: mbimpe tuikale ne dijinga dikole dia kuenza malu makane, malu mimpe, ne adi makezuke ku mêsu kua Nzambi. Utu munange bulelela ne buakane anyi? Tudi batuishibue ne: utu mubinange. Udi mukine mashimi ne malu mabi onso a tshikisu. (Bala Misambu 119:128, 163.) Muntu udi ushima udi widikija Satana mukokeshi wa buloba ebu. (Yone 8:44; 12:31) Tshimue tshia ku bipatshila bia  Satana nkuamba malu a dishima bua dîna dinsantu dia Yehowa Nzambi. Katshia anu ku buntomboji bua mu Edene, Satana udi umuangalajila Nzambi wetu malu a dishima. Wakamba mudi Yehowa muikale Nzambi muena budinangi ne Mukokeshi mubi udi usokoka bantu bintu bimpe. (Gen. 3:1, 4, 5) Malu adi Satana ushiminyina Yehowa adi atungunuka ne kunyanga ngenyi ya bantu ne mioyo yabu. Bantu bobu kabayi basungule bua ‘kunanga bulelela’, Satana neabafikishe ku malu mabi a mishindu yonso ne ku bikadilu bibi.​—Lomo 1:25-31.

4. Mmunyi mudi Yehowa muleje ne: udi “Nzambi wa bulelela”? (Tangila kabidi tshimfuanyi.)

⁴ Yehowa ‘nNzambi wa bulelela,’ ne utu ulongesha bantu badiye munange bulelela ne muoyo mujima. (Mis. 31:5) Padiye wenza nanku, udi ubakangula mêsu anyi ubasulula ku mashimi a Satana. Yehowa udi kabidi ulongesha bena mudimu bende bua bikale bena bululame ne bantu bakane. Nunku bidi bibambuluisha bua bikale badimona ne mushinga ne bikale ne ditalala dia mu muoyo. (Nsu. 13:5, 6) Ke tshidiye mukuenzele pebe paudi mulonge Bible anyi? Udi mulonge ne: njila ya Yehowa mmitambe buimpe bua bantu bonso ne buebe wewe kabidi. (Mis. 77:13) Nunku mbimpe kuenza tshidi Nzambi wamba ne: ntshiakane. (Mat. 6:33) Bidi bikengela wakuila bulelela bua kuela malu a dishima adibu bambe bua Yehowa Nzambi wetu patoke. Mmunyi muudi mua kuenza nanku?

5. Mmunyi muudi mua kuakuila bulelela ne buakane?

⁵ Udi mua kusungula nsombelu udi uleja ne: udi ubenga mashimi a Satana, ne udi mukuate bulelela ne manza abidi. Udi musue bua Yehowa ikale mukalenge webe ne udi musue kuenza tshidiye wamba ne: ntshiakane. Mmunyi muudi mua kuenza nanku? Sambila, udilambula kudiye, ne pashishe ubatijibua bua kuleja didilambula diebe adi patoke. Kunanga bulelela ne malu adi makane ke bualu bunene butu butusaka bua kubatijibua.

6. Mmalu kayi adi mu Misambu 45:4 adi akusaka bua kunanga Yezu Kristo?

⁶ Bua tshinyi udi munange Yezu Kristo? Mona amue malu adi akusaka bua kumunanga mu Misambu 45:4. (Bala.) Yezu mmunange bulelela, budipuekeshi, ne buakane. Wewe munange bulelela ne buakane, bidi bileja ne: udi munange kabidi Yezu Kristo. Ela meji a muvua Yezu muakuile bulelela ne buakane ne  dikima dionso. (Yone 18:37) Mmunyi muvua Yezu muleje ne: uvua ne budipuekeshi?

7. Ntshinyi tshidi tshikukemesha bua budipuekeshi bua Yezu?

⁷ Malu avua Yezu wenza avua aleja mudiye ne budipuekeshi. Tshilejilu, uvua upesha Tatuende butumbi buonso pamutu pa kudipeshabu. (Mâko 10:17, 18; Yone 5:19) Udi umvua bishi bua budipuekeshi buende abu? Kabienaku bikusaka bua kunanga Muana wa Nzambi ne kumuidikija anyi? Bushuwa bidi nanku. Bua tshinyi Yezu udi ne budipuekeshi? Bualu mmunange Tatuende muena budipuekeshi ne udi umuidikija. (Mis. 18:35; Eb. 1:3) Kabienaku bikusemeja pabuipi ne Yezu udi ne ngikadilu ya buena ya Yehowa anyi?

8. Bua tshinyi tudi banange Yezu bu Mukalenge wetu?

⁸ Tudi banange Yezu bu Mukalenge wetu bualu mMukokeshi muimpe. Yehowa nkayende ke uvua mulongeshe Muanende ne mumuteke bua kukokesha. (Yesh. 50:4, 5) Elabi kabidi meji bua bungi bua malu avua Yezu ne bua kuikala mudipangishe bua kutuleja dinanga. (Yone 13:1) Bu mudiye Mukalenge wetu, mbikumbane bua kumunanga. Wakumvuija ne: udi ubikila bantu badi bamunange ne: mbaluda bende, bualu badi batumikila mikenji yende. (Yone 14:15; 15:14, 15) Ndiakalenga dia dikema dia kuikala mulunda wa Muana wa Yehowa!

9. Mmunyi mudi Batismo wa bena Kristo ufuanangana ne wa Kristo?

⁹ Umue wa ku mikenji ya Yezu udi ne: bayidi bende babatijibue. (Mat. 28:19, 20) Wakabatijibua bua tulonde tshilejilu tshiende. Ku lumue luseke, batismo wende mmushilangane ne wa bayidi bende. (Tangila kazubu ka “ Mudi batismo wa Yezu mushilangane ne wa bayidi bende.”) Kadi ku lukuabu, udi ufuanangana ne wa bayidi bende. Pavua Yezu mubatijibue, uvua mufile mubidi wende mujime bua kuenza disua dia Tatuende. (Eb. 10:7) Bia muomumue, padi bayidi ba Kristo babatijibua, badi baleja patoke mudibu badilambule kudi Yehowa Nzambi. Mpindieu badi badifila bua kuenza disua dia Nzambi mu nsombelu wabu, kadi ki ndiabu to. Nunku badi balonda tshilejilu tshia Mfumuabu.

10. Mmalu kayi adi akusaka bua kunanga Yezu? Dinanga adi didi ne bua kukusaka bua kuenza tshinyi?

¹⁰ Tudi tuitaba ne: Yezu mMuana mulela umuepele wa Yehowa ne mMukalenge udi Nzambi musungule bua kutukokesha. Tudi tuitaba ne: Yezu mmupuangane, mmuena budipuekeshi anu bu Tatuende. Tudi balonge ne: wakadiisha bantu bavua ne nzala, kukolesha bavua batekeshibue mu mikolo, ne kuondopaye too ne bavua basama. (Mat. 14:14-21) Tudi tumona mudiye ulombola tshisumbu lelu. (Mat. 23:10) Tudi bamanye ne: bu mudiye Mukalenge wa Bukalenge bua Nzambi, neenze bia bungi kupita apu. Mmunyi muudi mua kuleja ne: udi mumunange? Mpaudi ulonda tshilejilu tshiende. (Yone 14:21) Bua kutuadija kuenza nanku, udi mua kudilambula kudi Yehowa ne kubatijibua.

11. Buebe wewe, mbualu kayi butambe bunene budi mua kukusaka bua kubatijibua? Bua tshinyi bidi nanku?

¹¹ Mbualu kayi butambe bunene budi mua kukusaka bua kubatijibua? Yezu wakaleja mukenji mutambe bunene udi Nzambi mutuelele pakambaye ne: “Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso ne bukole buebe buonso.” (Mâko 12:30) Mêyi au adi aleja muudi munange Yehowa.

12. Bua tshinyi udi munange Yehowa? (Tangila kabidi tshimfuanyi.)

¹² Kudi malu a bungi adi atusaka bua kunanga Yehowa. Tshilejilu, tudi bafike ku dimona ne: yeye ke “mpokolo wa muoyo” ne mufidi wa  “dipa dionso dimpe ne dipa dionso dipuangane.” (Mis. 36:9; Yak. 1:17) Tshintu tshionso tshimpe tshidi tshikusankisha tshidi tshifumina kudi Nzambi wetu wa dinanga muena tshipapayi.

13. Ntshinyi tshidi tshienza bua tshia kupikulangana natshi tshikale dipa dia mushinga wa bungi?

¹³ Tshia kupikulangana natshi ndipa dia mushinga wa bungi didi Yehowa mutupeshe. Bua tshinyi tudi tuamba nanku? Tuakulayi bua malanda adi pankatshi pa Yehowa ne Muanende. Yezu wakamba ne: “Tatu mmunnange” ne “ndi munange Tatu.” (Yone 10:17; 14:31) Malanda adi pankatshi pabu avua enda akole mu bungi bua bidimu miliyare ne miliyare bivuabu basombe pamue. (Nsu. 8:22, 23, 30) Mpindieu elabi meji muvuabi mua kuikala binyingalaje Nzambi pavuaye mumone Muanende ukenga ufua. Yehowa mmunange bantu bonso bikole, mmukunange pebe; ke bualu kayi wakafila Muanende munanga bu mulambu bua wewe ne bantu bakuabu nupete muoyo wa tshiendelele. (Yone 3:16; Gal. 2:20) Ebu ke bualu butambe bunene budi butusaka bua kunanga Nzambi.

14. Ntshipatshila kayi tshitambe buimpe tshiudi mua kudimfundila?

¹⁴ Dinanga diudi munange Yehowa ndikole bualu udi mulonge malu ende a bungi. Kakuyi mpata, udi musue kusemena pabuipi nende mpindieu ne bua kashidi. Ki mbikole to. Udi ukukankamija ne bulenga buonso bua usankishe muoyo wende. (Nsu. 23:15, 16) Udi  mua kuenza nanku mu mêyi ne mu bienzedi. Mushindu uudi wenza malu newuleje ne: udi munange Yehowa bushuwa. (1 Yone 5:3) Atshi ke tshipatshila tshitambe buimpe tshiudi mua kudimfundila.

15. Mmunyi muudi mua kuleja ne: udi munange Yehowa?

¹⁵ Mmunyi muudi mua kuleja ne: udi munange Yehowa? Tshia kumpala, enza disambila dia pa buadi bua kudilambula kudi Nzambi umuepele mulelela. (Mis. 40:8) Tshibidi, batijibua bua kuleja patoke muudi mudilambule. Anu mutukadi bamone ku ntuadijilu, kubatijibua mbualu bua disanka ne bua mushinga mu nsombelu webe. Udi utuadija nsombelu mupiamupia bua kuenza disua dia Yehowa, kadi ki ndiebe to. (Lomo 14:8; 1 Pet. 4:1, 2) Biumvuika ne: ki mbualu bua bilele to. Budi buambuluisha bua kutuadija nsombelu mulenga. Mushindu kayi?

16. Anu mudibu baleje mu Misambu 41:12, Yehowa neafute bantu badi bamuenzela mudimu mu nsombelu wabu mujima mushindu kayi?

¹⁶ Yehowa ke mupeshanganyi wa bintu munene. Nansha wewe mumupeshe tshinyi, neakupingajile bia bungi menemene. (Mâko 10:29, 30) Neakupeshe difutu ditambe buimpe, ne newikale ne nsombelu mulenga nansha mu ndongoluelu mubi wa malu ukadi pa kubutudibua eu. Atshi ntuadijilu patupu. Nsombelu uudi utuadija paudi ubatijibua kena ne ndekelu to. Udi mua kutungunuka ne kuenzela Tatu webe wa dinanga mudimu kashidi ne tshiendelele. Dinanga didi pankatshi pebe nende neditungunuke ne kukola. Anu bu yeye, newikale pebe ne muoyo bua kashidi.​—Bala Misambu 41:12.

17. Ntshinyi tshiudi mua kupesha Yehowa tshidiye kayi natshi?

¹⁷ Paudi udilambula ne ubatijibua, udi upeta diakalenga dia kupesha Tatu webe tshintu tshia mushinga mukole. Mmukupeshe bintu bionso bimpe, bikondo bionso bia disanka biutu kuyi muanji kupeta. Nunku wewe pebe, udi mua kupesha Mufuki wa diulu ne buloba tshintu tshidiye kayi natshi, mmumue ne: mudimu wa lulamatu uudi umuenzela ku budisuile. (Yobo 1:8; 41:11; Nsu. 27:11) Ebu ke bualu buimpe menemene buudi mua kuenza. Kakuyi  mpata, dinanga diudi manange Yehowa ke bualu butambe buimpe budi bukusaka bua kubatijibua.

18. Nnkonko kayi iudi mua kudiela?

¹⁸ Mmunyi muudi mua kuandamuna lukonko elu: Neubatijibue anyi? Anu wewe ke udi mua kuluandamuna. Kadi bidi mua kukuambuluisha wewe mudiebeje ne: ‘Bua tshinyi ki mbimpe ngindile?’ (Bien. 8:36) Vuluka malu asatu atudi bakuile. Bua kumpala, udi munange bulelela ne buakane. Diebeja ne: ‘Ndi musue kumona dituku dikala bantu bonso ne bua kuamba bulelela ne kuenza malu makane anyi?’ Buibidi, udi munange Yezu Kristo. Diebeja ne: ‘Ndi musue Muana wa Nzambi ikale Mukalenge wanyi anyi? Ndi musue kulonda tshilejilu tshiende anyi?’ Buisatu budi bupite bionso, udi munange Yehowa. Diebeja ne: ‘Ntu musue kuenzela Yehowa mudimu bua kumusankisha anyi?’ Wewe muandamune nkonko yonso eyi ne: eyowa, bua tshinyi kuena mubatijibue? Bua tshinyi ki mbimpe windile?​—Bien. 16:33.

19. Bua tshinyi kuena ne bua kuelakana bua kubatijibua? Fila tshilejilu. (Yone 4:34)

¹⁹ Wewe welakana bua kubatijibua, konkonona tshilejilu tshivua Yezu mufile etshi. (Bala Yone 4:34) Mona ne: Yezu wakafuanyikija kuenza disua dia Tatu wende ne biakudia. Bua tshinyi? Biakudia bitu bituambuluisha. Yezu uvua mumanye ne: tshintu tshionso tshidi Yehowa utulomba tshidi tshituambuluisha. Yehowa ki mmusue bua tuenze bualu nansha bumue budi mua kutuenzela bibi to. Yehowa mmusue bua ubatijibue anyi? Eyowa. (Bien. 2:38) Nunku ikala mutuishibue ne: kutumikila mukenji wa kubatijibua au nekukuambuluishe. Wewe kuyi welakana bua kudia biakudia bitambe buimpe, bua tshinyi udi welakana bua kubatijibua?

20. Netuandamune lukonko kayi mu tshiena-bualu tshidi tshilonda?

²⁰ Bua tshinyi bamue batu bindila? Bantu ba bungi badi mua kuandamuna ne: “Tshiena anu muanji kuikala pabuipi to.” Bulelela budi ne: kudilambula kudi Yehowa ne kubatijibua ndipangadika dia mushinga mukole diudi ne bua kuangata. Nunku bidi biangata dîba, bilomba kuela meji bimpe ne kudienzeja bikole bua kushisha kubatijibua. Kadi wewe ujinga ne muoyo mujima bua kubatijibua, ntshinyi tshiudi mua kuenza mpindieu bua kudilongolola? Netuandamune lukonko elu mu tshiena-bualu tshidi tshilonda.