1. Ntshinyi tshitu baledi basue bua bana babu?

 BALEDI WETU, tudi bamanye ne: nutu basue kuambuluisha bana benu bua bafike ku dimanya Yehowa ne ku dimunanga. Kadi Nzambi katu umueneka to. Mmunyi munudi mua kubambuluisha bua bamone Yehowa bu muntu mulelela ne basemene pabuipi nende?​—Yak. 4:8.

2. Mmunyi mudi baledi mua kulongesha bana babu ngikadilu ya Yehowa?

² Mushindu munene wa kuambuluisha bana benu bua kusemena pabuipi ne Yehowa nkubalongesha Bible. (2 Tim. 3:14-17) Bible udi uleja mushindu mukuabu udi bana mua kulonga malu a Yehowa. Mu mukanda wa Nsumuinu, mukalenge Solomo udi bushuwa uvuluija muanende bua kumbushi mêsu ende ku ngikadilu ya Yehowa idi imuenekela mu bufuki to. (Nsu. 3:19-21) Netumone mishindu ndambu idi baledi mua kuambuluisha bana bua kumanya ngikadilu ya Yehowa ku diambuluisha dia bufuki.

3. Mmunyi mudi baledi ne bua kuambuluisha bana babu?

³ Bible udi wamba ne: ‘Ngikadilu ya Nzambi idi kayiyi imueneka idi imueneka bimpe katshia buloba buafukibua, bualu badi bayijinguluila ku bintu bidi bifukibue.’ (Lomo 1:20) Baledi wetu, nutu pamuapa basue kuya kuendakana ne bana benu. Panudi nuya kuendakana nabu, bambuluishayi bua kumona mudi “bintu bidi bifukibue” bileja ngikadilu milenga ya Yehowa. Bua bualu ebu, tumonayi tshidi tshilejilu tshia Yezu mua kulongesha baledi.

4. Mmunyi muvua Yezu mulongeshe bayidi bende ne bintu bia mu bufuki? (Luka 12:24, 27-30)

 ⁴ Mona muvua Yezu mulongeshe bantu ne bintu bia mu bufuki. Dimue dituku, wakambila bayidi bende bua kubandila nyunyi ya bikololo ne bilongo bia kapapankole. (Bala Luka 12:24, 27-30.) Yezu si uvua mua kuikala mutele nyama anyi tshikunyibua kayi tshionso, kadi wakatela nyunyi ne bilongo bivua bayidi bende bamanye bimpe. Bayidi bende bavua mua kuikala bamona nyunyi ipita muulu ne bilongo bisampila mu budimi. Fuanyikijabi Yezu ufunkuna bintu abi pavuaye wakula. Ntshinyi tshivuaye muenze yeye mumane kubitela? Wakalongesha bayidi bende bualu bua mushinga mukole ebu pa bidi bitangila buimpe bua Tatuabu wa mu diulu ne kupeshangana kuende kua bintu: Yehowa neadishe batendeledi bende ba lulamatu ne neabavuadike anu mudiye wenza bua bikololo ne bilongo bia mu mpata.    

5. Ntshintu kayi tshia mu bufuki tshidi baledi mua kulongesha natshi bana babu malu a Yehowa?

⁵ Baledi wetu, nenuidikijaku mushindu uvua Yezu mulongeshe au anyi? Nudi mua kutelela muanenu tshifukibua tshinutu nuenu nuanyisha, bu mudi nyama anyi tshikunyibua tshinutu banange bikole. Panudi nuenza nanku, mbimpe numumvuije tshidibi bilongesha bua Yehowa. Pashishe nudi mua kumuebeja nyama anyi tshikunyibua tshituye munange pende bikole. Nuenu bamutelele tshintu tshikadiye munange, pamuapa neanuteleje bimpe panudi nuyukila nende bua ngikadilu ya Yehowa.

6. Tshilejilu tshia mamuende wa Christopher tshidi mua kutulongesha tshinyi?

⁶ Baledi badi ne bua kuangata dîba dia bungi bua kukeba nyama anyi tshikunyibua kumpala kua kuyukilabu ne bana babu tshidibi bileja bua Yehowa anyi? Tòo. Yezu kavua mumvuije malu a bungi bua mudi bikololo bidia anyi mudi bilongo bia kapapankole bikola to. Bushuwa, muanebe udi mua kuikala musue bua umulondele malu a bungi a mu bufuki, kadi imue misangu kutangila nende tshintu patupu anyi kumuela lukonko kudi mua kumupetesha dilongesha. Mona bualu budi muanetu Christopher uvuluka patshivuaye muana, udi wamba ne: “Mamu uvua utuambila tumalu tukese bua tuanyishe bintu bia mu bufuki bivua muaba utuvua. Tshilejilu, patuvua pabuipi ne mikuna, uvua utuambila ne: ‘Monayi mudi mikuna yaya minene ne mimpe ya dikema! Yehowa nNzambi muimpe wa dikema, ki mmuomu?’ Patuvua tusemena pabuipi ne mbuu uvua utuambila ne: ‘Monayi bukole budi nabu mavuala aa’s! Kaenaku aleja bukole budi nabu Nzambi anyi?’” Christopher udi wamba ne: “Malu makese avuaye utuambila au, avua atuelesha meji bikole.”

7. Mmunyi muudi mua kulongesha bana bebe bua bikale belela bintu bia mu bufuki meji?

⁷ Padi bana bebe benda bakola, udi mua kubalongesha bua bikale belela bia mu bufuki meji bikole ne bafike ku dimanya ngikadilu ya Yehowa. Udi mua kubatelela tshintu ne kubebeja ne: “Tshidi tshinulongesha tshinyi bua Yehowa?” Pamuapa malu mimpe akulondelabu neakukemeshe.​—Mat. 21:16.

8. Mmpunga kayi uvua baledi bena Isalele nende pavuabu benda “mu njila”?

⁸ Bavua balombe baledi bena Isalele bua kulongesha bana babu mêyi a mu mikenji ya Yehowa pavuabu benda nabu “mu njila.” (Dut. 11:19) Njila ivua ipitshila mu misoko ya pa mpenga pa Isalele. Bivua bipepele bua kumona nyama, nyunyi, ne bilongo bishilashilangane. Pavua bena Isalele bendela mu njila ayi, baledi bavua ne mushindu wa kuleja bana babu bintu bidi Yehowa mufuke. Nuenu baledi, nutu pamuapa nupeta mpunga ya buena eyi  bua kulongesha bana benu ne bintu bia mu bufuki. Tumonayi mudi bamue baledi benze nanku.

9. Tshilejilu tshia Punitha ne Katya tshidi mua kukulongesha tshinyi?

⁹ Mamu mukuabu udi musombele mu tshimenga tshinene tshia mu Inde diende Punitha udi wamba ne: “Patuvua tuya kumona balela betu ku musoko, tuvua tumona luendu alu bu mpunga wa kulongesha bana betu bintu bilenga bia dikema bidi Yehowa mufuke. Mvua mmona ne: bana banyi bavua bumvua malu a mu bufuki bimpe pavuabu kabayi mu tshimenga anyi mu njila muvua kamuyi mashinyi peshi bantu ba bungi to.” Baledi wetu, pamuapa bana benu kabakupua tshikondo tshinuvua baye nabu muaba kampanda mulenga muoyo to. Katya muanetu wa bakaji wa mu Moldavie udi wamba ne: “Bikondo bitambe buimpe bia ku buana bindi mvuluka mpatuvua tuya ne baledi banyi ku musoko. Ndi ne diayisha dia bungi kudibu bua mudibu bandongeshe katshia ku buana bua kuikala kuimana ne kubandila bintu bidi Yehowa mufuke, ne kumona mudibi bileja ngikadilu yende.”

10. Ntshinyi tshidi baledi mua kuenza biobi bibakolela bua kuya ku musoko?(Tangila kazubu ka “ Diambuluisha bua baledi.”)

¹⁰ Newenze tshinyi wewe kuyi ne mushindu wa kuya ku musoko? Amol udi pende mu Inde udi wamba ne: “Baledi ba muaba undi batu benza mudimu mêba a bungi, ne kuya ku musoko kutu kulomba paku makuta a bungi. Nansha nanku, kamuaba kimpe ka kupitshila kapepe anyi ntanda milenga itu kuulu kua nzubu ya bisasa idi mua kuambuluisha bua kubandila bintu bidi Yehowa mufuke ne kuyukila bua ngikadilu yende.” Wewe mutangile bimpe muaba uudi, udi mua kumona kabidi bintu bia bungi biudi mua kuleja bana bebe. (Mis. 104:24) Pamuapa neumone nyunyi, tuishi, bikunyibua, ne bintu bikuabu. Karina wa mu Allemagne udi wamba ne: “Mamu uvua munange bilongo  bikole, nunku pamvua muana uvua undeja bilongo bilenga dîba dionso dituvua tuya kuendakana.” Nuenu baledi, nudi kabidi mua kulongesha bana benu ne filme ne mikanda ya bungi idi yakula bua bufuki idi bulongolodi buetu bupatula. Nansha nuenu mu nsombelu kayi, nudi mua kubambuluisha bua kubandila bintu bidi Nzambi mufuke. Tumonayi mpindieu imue ngikadilu ya Yehowa inudi mua kulongesha bana benu.

11. Mmunyi mudi baledi mua kuambuluisha bana babu bua kujingulula dinanga dia Yehowa?

¹¹ Udi mua kuleja bana bebe mushindu muimpe utu nyama ya bungi itabalela bana bayi bua kubambuluisha bua bajingulule dinanga dia Yehowa. (Mat. 23:37) Udi mua kubatelela kabidi bintu bilenga bishilashilangane bia mu bufuki bitutu banange bikole. Karina utukadi batele udi wamba ne: “Patuvua tuya kuendakana ne mamu, uvua unkankamija bua kuimana ne kubandila mudi tshilongo tshionso tshikale watshi mushindu ne mudi bulenga buabi buleja mudi Yehowa ne dinanga. Pakapita bidimu, ngakatuadija kubandila bilongo ne kumona mudibi bienza ne mekala mashilashilangane. Bitu anu bimvuluija ne: Yehowa mmunange bikole.”

12. Mmunyi mudi baledi mua kuambuluisha bana babu bua kujingulula meji a Nzambi? (Misambu 139:14) (Tangila kabidi tshimfuanyi.)

¹² Ambuluisha bana bebe bua bajingulule meji a Nzambi. Yehowa udi ne meji kutupita kule ne kule. (Lomo 11:33) Tshilejilu, udi mua kuleja bana bebe mutu mâyi enza matutu muulu ne mudi matutu au enza mvula utu uloka bipepele ku muaba ne ku muaba. (Yobo 38:36, 37) Udi mua kubaleja kabidi mudi mubidi wetu muenjibue mu mushindu wa dikema. (Bala Misambu 139:14.) Tumonayi muvua tatu mukuabu diende Vladimir muenze nanku. Udi wamba ne: “Dimue dituku, muananyi wa balume uvua mukuluke ne dikalu, yeye kutapika. Matuku makese pashishe mputa kuumayi. Meme ne mamuende tuakamumvuija ne: Yehowa mmuenze mubidi wetu ne bukole bua kudiondopa nkayawu. Tuetu kumuambila ne: katutu banji kumona bualu bua nunku mu bintu bidi bantu benze to. Tshilejilu, mashinyi owu mapetakane ne njiwu, kaatu adilongolola nkayawu to. Bualu abu buakamuambuluisha bua kujingulula bimpe meji a Yehowa.”

13. Mmunyi mudi baledi mua kuambuluisha bana babu bua kujingulula bukole bua Nzambi? (Yeshaya 40:26)

 ¹³ Yehowa udi utulomba bua tubandishe mêsu etu mu diulu ne tuele meji a mudi bukole buende bua dikema bulama bintu bia muulu kabiyi bikuluka to. (Bala Yeshaya 40:26.) Udi mua kukankamija bana bebe bua bikale batangila muulu ne bela meji a bintu bidimu. Mona bualu bua ku buana budi Tingting, muanetu wa bakaji wa mu Taïwan uvuluka: “Dimue dituku patuvua baye kuendakana ne mamu, tuakatangila muulu butuku tuetu kumona mitoto bualu tuvua muaba uvua kawuyi nzembu to. Atshi ntshikondo tshimvua nsamisha mutu bikole bua muvua balongi betu bantatshisha, ne mvua ndiebeja ni mvua mua kushala mulamate Yehowa. Mamu wakankankamija bua kuela meji a bukole budi Yehowa mufuke nabu mitoto yonso ayi; kumvuluijaye ne: Yehowa udi ne bukole bua kungambuluisha bua kutua lutatu kayi luonso tshiadi. Bintu bituvua bamone patuvua baye kuendakana biakamfikisha ku dimanya Yehowa bimpe, ne ngakadisuika bua kumuenzela mudimu bikole.”

14. Mmunyi mudi baledi mua kulongesha bana babu ne bia mu bufuki bua bikale bamona Yehowa bu Nzambi wa disanka?

¹⁴ Bintu bidi Yehowa mufuke bidi bileja mudiye Nzambi wa disanka ne mmusue bua bantu bikale pabu basanka. Bamanyi ba bia panu mbamone ne: nyama ya bungi itu inaya, nansha nyunyi ne mishipa payi. (Yobo 40:20) Bana bebe batuku baseka patubu bamona nyama unaya anyi? Pamuapa bakadi bamone kana ka mpusu kenda kalonda tshikutu tshia buanda anyi bana ba mbua bafinangana panshi. Musangu uwabamona baseka padibu bamona nyama yenza malu adi asekesha, mbimpe ubavuluije ne: tudi tuenzela Nzambi wa disanka mudimu.​—1 Tim. 1:11.

15. Ntshinyi tshidi mua kuambuluisha baledi bua kufikisha bana babu ku dibambila malu adibu nawu? (Nsumuinu 20:5) (Tangila kabidi tshimfuanyi.)

¹⁵ Kudi misangu idibi mua kukolela baledi bua kuebeja bana babu ntatu idibu batuilangana nayi. Biobi bikufikile nanku, mbimpe ufikishe bana bebe ku diamba malu adibu nawu.  (Bala Nsumuinu 20:5.) Bamue baledi mbamone ne: mbipepele bua kuenza nanku dîba ditubu babandila nabu bia mu bufuki. Bua tshinyi? Bumue bua ku malu budi ne: kakuena bintu bia bungi bidi bibabueja mu ditanaji to. Tatu mukuabu wa mu Taïwan diende Masahiko udi utela pende bualu bukuabu ebu: “Misangu yonso patutu tuya kuendakana ne bana tubanda nabu mikuna anyi tuendela kumpenga kua mâyi, batu badiumvua badilekelele. Nunku bitu bipepele bua kupatula malu adi mu muoyo wabu ne kuamanya.” Katya utukadi batele udi wamba ne: “Pavua kalasa kapatuka, mamu uvua uya nanyi muaba mulenga wa kupitshila kapepe. Patuvua muaba mutalale au, bivua bipepele bua kumuambila malu avua mamfikile mu kalasa anyi avua ansamisha mutu.”

16. Mmunyi mudi bena mu mêku mua kuela bilele ne kuikala ne disanka padibu babandile bufuki?

¹⁶ Bintu bia mu bufuki bidi kabidi mua kuambuluisha bena mu dîku bua kuikala kusanka ne kueleshangana bilele; dîba adi malanda abu adi akola. Bible udi wamba ne: kudi “tshikondo tshia kuseka” ne “tshikondo tshia kubosoka.” (Muam. 3:1, 4, dim.) Yehowa mmuenze miaba mimpe pa buloba itudi mua kuenzela malu atudi banange. Bena mu mêku a bungi batu banange kupitshisha dîba pamue babandila nyama ne mitshi, baya ku musoko, babanda mikuna anyi baya kusomba kumpenga kua mâyi. Bamue bana batu banange kunayila muaba wa kupitshila kapepe, kubandila nyama, kuowela mu musulu anyi mu dijiba peshi mu mbuu. Tudi ne mishindu mitambe buimpe ya kuya kupita kapepe miaba idi ne bintu bidi Yehowa mufuke!

17. Bua tshinyi baledi badi ne bua kuambuluisha bana babu bua kusanka ne bintu bidi Nzambi mufuke?

¹⁷ Mu bulongolodi bupiabupia bua Nzambi, baledi ne bana babu nebasanke ne bintu bia mu bufuki bikole kupita lelu. Kakuakuikala bualu bua kutshinyina nyama bu mudibi lelu, nansha yoyi payi kayakuikala itutshina to. (Yesh. 11:6-9) Bintu bidi Yehowa mufuke nebikale bitusankisha bua kashidi. Nunku baledi wetu, kanuindidi too ne dîba adi bua kushisha kuambuluisha bana benu bua kusanka ne bia mu bufuki to. Panudi nubalongesha ne bia mu bufuki bua bamanye Yehowa, pamuapa nebafike pabu ku ditaba tshivua Davidi muambe ne: “Yehowa wanyi, kakuena midimu mikuabu idi bu yebe to.”​—Mis. 86:8.