1-2. Wewe kuyi muanji kudiakaja bua kubatijibua, bua tshinyi ki mbimpe utekete mu mikolo? (Tangila tshimfuanyi tshia pa tshizubu.)

 WEWE ujinga bua kubatijibua, udi muditekele tshipatshila tshilenga tshia dikema. Ukadi mudiakaje bua kubatijibua mpindieu anyi? Biobi nanku, bakulu bobu bakuanyishile, kuelakanyi bua kubatijibua padi mpunga umueneka to. Wewe mubatijibue, newikale ne nsombelu mulenga mu mudimu wa Yehowa.

² Ku luseke lukuabu, bakadiku bakuambile ne: bikengela udienzeje kabidi bikole kumpala kua kubatijibua anyi? Peshi wewe nkayebe ke udi mujingulule bualu abu? Biobi nanku, kuteketshi mu mikolo to. Udi mua kudienzeja bua kukumbaja tshipatshila tshia mushinga atshi nansha wewe muana anyi mukole.

3. Ntshinyi tshivua muena Etshiopi uvua wenza mudimu mu lubanza lua mukalenge muebeje Filipo? Ndukonko kayi ludi lujuka? (Bienzedi 8:36, 38)

³ Bala Bienzedi 8:36, 38. Muena Etshiopi uvua wenza mudimu mu lubanza lua mukalenge wakebeja Filipo muambi wa lumu luimpe ne: “Ntshinyi tshidi tshimpangisha bua meme kubatijibua?” Uvua ne dijinga dia kubatijibua. Kadi uvuaku mudiakaje bua kuenza bualu bua mushinga abu anyi?

4. Ntshinyi tshidi tshileja ne: muena Etshiopi uvua mudisuike bua kutungunuka ne kulonga?

⁴ Muena Etshiopi au “uvua muye ku Yelushalema bua kutendelela.” (Bien. 8:27) Uvua mua kuikala muntu wa bisamba bikuabu uvua muitabe malongesha a bena Yuda. Kakuyi mpata, ukavua mulonge malu a Yehowa mu mikanda ya tshijila ya Mifundu ya mu tshiena Ebelu. Kadi uvua ne dijinga dikole dia kumanya  malu makuabu. Nunku ntshinyi tshivuaye wenza pavua Filipo mutuilangane nende mu njila? Uvua ubala mukanda wa muprofete Yeshaya. (Bien. 8:28) Au si avua malu male a mu Dîyi dia Nzambi! Muena Etshiopi au kavua musue kumanya anu malongesha makese a nshindamenu patupu to, kadi uvua musue kutungunuka ne kulonga.

5. Ntshinyi tshivua muena Etshiopi muenze bua malu avuaye mulonge?

⁵ Muena Etshiopi au uvua muntu munene muinshi mua Kandake, mukalenge mukaji wa mu Etshiopi; “uvua ku mutu kua tshibutshilu tshiende tshionso.” (Bien. 8:27) Nunku uvua ne bua kuikala ne bia bungi bia kuenza mu midimu ivuaye nayi. Nansha nanku, uvua ukeba dîba dia kutendelela Yehowa. Kavua anu ujinga bua kulonga bulelela patupu to; kadi uvua utumikila bivuaye ulonga abi. Ke bualu kayi, wakenza luendu lule umbuka mu Etshiopi bua kuya kutendelela Yehowa ku ntempelo mu Yelushalema. Luendu alu luvua ne bua kuikala lumuangata dîba dia bungi ne makuta a bungi, kadi uvua musue kutendelela Yehowa nansha muvuabi bimulomba kudienzeja bikole.

6-7. Dinanga divua muena Etshiopi munange Yehowa diakakola mushindu kayi?

⁶ Filipo uvua mulongeshe muena Etshiopi au malu mapiamapia a mushinga. Uvua mumulongeshe kabidi ne: Yezu ke Masiya. (Bien. 8:34, 35) Bushuwa wakasanka bua kumanya tshivua Yezu mumuenzele. Ntshinyi tshiakenzaye? Pamutu pa kushalaye anu tshivuaye atshi, tuambe ne: muntu uvua muitabuje buena Yuda uvuabu banemeka, wakananga Yehowa ne Muanende bikole. Kuenza nanku kuakamusaka bua kuangata dipangadika dia mushinga mukole dia kubatijibua bua kulua muyidi wa Kristo. Pakamona Filipo ne: muntu au uvua mudiakaje, wakamubatiza.

⁷ Wewe mulonde tshilejilu tshia muena Etshiopi au, udi mua kudiakaja pebe bua kubatijibua. Dîba adi newambe pebe ne dishindika dionso ne: “Ntshinyi tshidi tshimpangisha bua meme kubatijibua?” Mpindieu tumonayi malu avua muena Etshiopi muenze, audi pebe mua kuenza: Uvua anu ulonga, utumikila malu avuaye ulonga, ne wakatungunuka ne kukolesha dinanga diende kudi Nzambi.

8. Mêyi adi mu Yone 17:3 adi akusaka bua kuenza tshinyi?

⁸ Bala Yone 17:3. Mêyi a Yezu aa ke avua makusake bua kuangata dipangadika dia kulonga Bible anyi? Bidi nanku bua ba bungi ba kutudi. Kadi adiku atusaka kabidi bua kutungunuka ne kulonga anyi? Eyowa. Katuakulekela ‘kumanya . . . Nzambi umuepele mulelela’ nansha kakese. (Muam. 3:11) Netutungunuke anu ne kulonga kashidi ne tshiendelele. Patudi tuenda tulonga,  tudi tusemena pabuipi menemene ne Yehowa.​—Mis. 73:28.

9. Ntshinyi tshitudi ne bua kuenza tuetu bamane kulonga malongesha a nshindamenu a mu Bible?

⁹ Mu bulelela, patudi tubanga kulonga malu a Yehowa, tudi tulonga anu malu a nshindamenu. Mu mukanda uvua mupostolo Paulo mumfundile bena Ebelu, wakakula bua malongesha au bu “malu a ntuadijilu.” Kavua upepeja “malongesha a ntuadijilu” to, uvua uafuanyikija ne mabele atubu bamuisha muana mutoke. (Eb. 5:12; 6:1) Wakakankamija kabidi bena Kristo bonso bua kabimanyinyi anu pa malongesha a nshindamenu au to, kadi batungunuke ne kulonga malu male a mu Dîyi dia Nzambi. Ukadiku mukoleshe dijinga dia kulonga malu male a mu Bible anyi? Udiku ne dijinga dia kutungunuka ne kukola, mmumue ne: dia kulonga malu a Yehowa ne a bidiye mulongolole anyi?

10. Bua tshinyi bitu bikolela bamue bua kulonga?

¹⁰ Bitu bikolela ba bungi ba kutudi bua kolonga. Nansha wewe anyi? Pauvua mu kalasa, uvua mulonge mua kubala ne kudilongela bimpe anyi? Kudilongela kuvuaku kukusankisha bikole anyi? Peshi uvua mudiambile ne: kuvua mufue mutu mu bia dilonga mikanda? Biobi nanku, kuena nkayebe to. Yehowa udi mua kukuambuluisha. Yeye mmupuangane ne udi Mulongeshi muimpe menemene.

11. Mmunyi mudi Yehowa muleje mudiye “Mulongeshi Munene”?

¹¹ Yehowa udi udibikila ne: “Mulongeshi webe Munene.” (Yesh. 30:20, 21) Utu ne lutulu, bulenga, ne utu umvuila bantu. Utu ukeba anu malu mimpe kudi balongi bende. (Mis. 130:3) Katu utulomba tshitudi katuyi mua kukokesha bua kuenza to. Vuluka ne: uvua muenze buongo buebe budi dipa dilenga dia katshia. (Mis. 139:14) Tudi bafukibue ne dijinga dia kulonga. Mufuki wetu mmusue bua tutungunuke ne kulonga bua kashidi, ne tuikale ne disanka patudi tulonga. Nunku mbia meji bua ‘kupeta dijinga dikole’ dia kumanya bulelela bua mu Bible mpindieu. (1 Pet. 2:2) Difundila bipatshila biudi mua kukumbaja, wenze programe wa kudibadila Bible ne wa kudilongela. (Yosh. 1:8) Yehowa yeye mukuambuluishe, kubala nekukusankishe ne newikale ulonga malu ende bikole.

12. Bua tshinyi tudi ne bua kuimanyina pa nsombelu wa Yezu patudi tudilongela Bible?

¹² Ikala ukeba dîba dia kuelangana meji a nsombelu wa Yezu ne mudimu wende. Kulonda mu makasa a Yezu bimpe menemene ke bualu bunene budi butuambuluisha bua kuenzela Yehowa mudimu, nangananga mu bikondo bikole bitudi ebi. (1 Pet. 2:21) Yezu wakambila bayidi bende ntatu ivuabu ne bua kutuilangana nayi kayi udia tshibanga to. (Luka 14:27, 28) Nansha nanku uvua mutuishibue ne: bayidi bende balelela bavua mua kushala ne lulamatu anu bu yeye. (Yone 16:33) Longa malu a bungi a mu nsombelu wa Yezu, udifundile bipatshila bia kumuidikija mu nsombelu webe wa buatshia buila.

13. Ntshinyi tshiudi ne bua kuikala ulomba Yehowa? Bua tshinyi?

¹³ Ki mbimpe kuikala anu ne dimanya nkayadi to. Dimanya didi ne mushinga bualu didi dikuambuluisha bua kulonga malu a Yehowa a bungi bua ufike ku dimunaga ne ku dimulamata. (1 Kol. 8:1-3) Paudi utungunuka ne kulonga, ikala ulomba Yehowa akuambuluishe bua wikale ne ditabuja dia bungi. (Luka 17:5) Utu wandamuna masambila a nanku ne muoyo mujima. Ditabuja dilelela didi dimanyine pa dimanya dijalame dia Nzambi wetu nedikuambuluishe bua kuya anu kumpala.​—Yak. 2:26.

14. Mmunyi muvua mupostolo Petelo muleje ne: bidi ne mushinga bua kutumikila bitudi tulonga? (Tangila kabidi tshimfuanyi.)

¹⁴ Mupostolo Petelo wakaleja mudibi ne mushinga bua bayidi ba Kristo batungunuke ne kutumikila malu adibu balonga. Wakatela bualu  bua Noa budi mu Bible. Yehowa wakambila Noa ne: uvua ne bua kubutula bantu babi ba tshikondo atshi ku mvula wa kabutu. Kumanya patupu ne: Mvula wa kabutu uvua ne bua kuloka kakuvua kukumbane bua kupandisha Noa ne dîku diende to. Mona ne: Petelo uvua wakula bua tshikondo tshivua Mvula wa kabutu kayi muanji kutuadija wamba ne: “pavuabu benza buatu.” (1 Pet. 3:20) Bushuwa Noa ne dîku diende bakatumikila malu avua Nzambi mubambile, kuenzabu buatu bunene. (Eb. 11:7) Pashishe Petelo wakafuanyikija dibatijibua ne tshivua Noa muenze, kuambaye ne: “Dibatiza didi dipetangana ne bualu ebu didi dinupandisha penu mpindieu.” (1 Pet. 3:21) Mu ngumvuilu kampanda, tudi mua kufuanyikija mudimu uudi wenza mpindieu bua kudilongolola bua batismo ne mudimu wa kuenza buatu uvua Noa ne dîku diende benze mu bidimu bia bungi. Mmudimu kayi uudi ne bua kuenza bua wewe kukumbana bua kubatijibua?

15. Kunyingalala ne muoyo mujima kudi kulomba kuenza tshinyi?

¹⁵ Bumue bua ku malu atudi ne bua kuenza, nkunyingalala ne muoyo mujima bua mpekatu yetu. (Bien. 2:37, 38) Dinyingalala ne muoyo mujima didi difikisha muntu ku dishintuluka. Ukadiku mulekele malu onso adi anyingalaja Yehowa, bu mudi dienda masandi, dinua makanya, ne ngakuilu mubi anyi? (1 Kol. 6:9, 10; 2 Kol. 7:1; Ef. 4:29) Wewe kuyi muanji anu kualekela, ikala udienzeja bikole. yukila ne mulongeshi webe wa Bible anyi bakulu ba mu tshisumbu bakuambuluishe ne bakuleje tshia kuenza. Biobi ne: udi nsonga muikale kua baledi bebe, ikala ubalomba bakuambuluishe bua kulekela bikadilu bibi bionso bidi mua kukupangisha bua kubatijibua.

16. Kuikala kutendelela Yehowa pa tshibidilu kudi kulomba kuenza tshinyi?

¹⁶ Mbimpe tuikale kabidi ne tshibidilu tshia kutendelela Yehowa. Tshilejilu, tubuela mu bisangilu ne tuandamunamu. (Eb. 10:24, 25) Bobu bakuanyishile bua kutuadija kuyisha, udienzeje bua kuikala kuyisha pa tshibidilu. Paudi wenda wenza mudimu udi usungila mioyo ya bantu eu, neulue kuwunanga kabidi bikole. (2 Tim. 4:5) Biobi ne: utshidi nsonga muikale kua baledi bebe, diebeja ne: ‘Bitu bikengela bua baledi banyi bamvuluije bua kuya mu bisangilu ne mu buambi anyi? Peshi meme  nkayanyi ke utu udiyila?’ Wewe udienzela malu aa nkayebe, udi uleja muudi ne ditabuja kudi Yehowa Nzambi, muudi mumunange, ne muudi umuanyisha. Ebi ke “bienzedi bia dilamata Nzambi” bidi bu mapa audi upesha Yehowa. (2 Pet. 3:11; Eb. 13:15) Mapa onso atudi tupesha Nzambi ku budisuile katuyi benzeja, adi amusankisha. (Fuanyikija ne 2 Kolinto 9:7.) Tudi tuenza malu aa bualu bitu bitusankisha patudi tupesha Yehowa tshintu tshitambe buimpe tshitudi natshi.

17-18. Nngikadilu kayi wa mushinga udi mua kukusaka bua kuya too ne ku batismo? Mushindu kayi? (Nsumuinu 3:3-6)

¹⁷ Paudi wenda udienzeja bua kuya too ne ku batismo, neutuilangane ne ntatu. Pamuapa bamue nebakupuekeshe milongo anyi mene kukukengesha bua malu aukadi witabuja. (2 Tim. 3:12) Paudi wenda udienzeja bua kulekela tshikadilu tshibi kampanda, manya ne: kudi misangu iudi mua kudimona ukadi utshienza kabidi. Udi mua kutuadija kuteketa mu mikolo ne ubungama bualu kuena mutshilekele musangu umue to. Ntshinyi tshiakuambuluisha bua kuikala ne lutulu? Nngikadilu muimpe eu: dinanga diebe kudi Yehowa.

¹⁸ Dinanga diudi munange Yehowa nngikadilu mulenga wa katshia uudi nende. (Bala Nsumuinu 3:3-6.) Kunanga Nzambi bikole kudi mua kutuambuluisha bua kutshimuna ntatu itu itukuata. Ke tshitu Bible utamba kuamba bua dinanga dia Yehowa dia lulamatu kudi bena mudimu bende. Kubananga bikole mushindu eu kudi kumvuija ne: kakubalekela nansha kakese. (Mis. 100:5) Udi mufukibue mu tshimfuanyi tshia Nzambi. (Gen. 1:26) Mmunyi muudi mua kuikala pebe ne dinanga dia mushindu au?

19. Mmunyi muudi mua kuvudija dianyisha diudi nadi bua bionso bidi Yehowa mukuenzele? (Galatiya 2:20)

¹⁹ Tutuadijayi ne dianyisha. (1 Tes. 5:18) Ikala udiebeja dituku dionso ne: ‘Mmunyi mudi Yehowa muleje ne: mmunange?’ Pashishe paudi usambila, dienzeja bua kumuela tuasakidila, utele malu masunguluke adiye mukuenzele. Ikala umona ne: Yehowa mukuenzele malu mimpe bualu mmukunange anu bu muvua mupostolo Paulo mufike ku dijingulula pende. (Bala Galatiya 2:20.) Diebeja ne: ‘Ndiku musue kumuleja panyi ne: ndi mumunange anyi?’ Dinanga diudi munange Yehowa nedikuambuluishe bua kupita bimpe ne ntatu. Nebikusake bua kuikala kutendelela Yehowa pa tshibidilu ne kuleja muudi munange Tatu webe dituku dionso.

20. Ntshinyi tshiudi ne bua kuenza bua kudilambula kudi Yehowa? Bua tshinyi ndipangadika dia mushinga?

 ²⁰ Mu kupita kua matuku, dinanga diudi munange Yehowa nedikusake bua kuenza disambila dia pa buadi. Neudilambule kudiye. Manya ne: paudi udilambula kudiye, neupete ditekemena dimpe edi: Neulue muntu wende bua kashidi ne tshiendelele. Paudi uditshipa bua kudilambula kudi Yehowa, udi umulaya bua kumuenzela mudimu bikondo bionso. Ki mmutshipu wa kuenzulula to. Mu bulelela, patudi tudilambula, ki ndipangadika dia bilele to. Tshilejilu, newangate mapangadika a bungi mu nsombelu webe, makuabu neikale mimpe menemene, kadi kakuakuikala dipangadika dimpe ditambe kupita dia kulambula muoyo webe kudi Yehowa to. (Mis. 50:14) Satana neadienzeje bua kutekesha dinanga diebe kudi Tatu webe wela meji ne: kuakushala ne lulamatu kudiye to. Kulekedi Satana ukuela tshibula to. (Yobo 27:5) Bu muudi munange Yehowa bikole, nebikuambuluishe bua kukumbaja mutshipu webe wa kumuenzela mudimu ne neusemene pabuipi ne Tatu webe wa mu diulu.

21. Bua tshinyi tudi mua kuamba ne: kubatijibua ki nndekelu wa nsombelu wa buena Kristo to, kadi nntuadijilu patupu?

²¹ Wewe mumane kudilambula kudi Yehowa, yukila ne bakulu ba mu tshisumbu tshienu bua wewe kubatijibua. Ikala anu uvuluka ne: kubatijibua ki nndekelu wa nsombelu wa buena Kristo to, kadi ntuadijilu patupu. Patudi tubatijibua, tudi tuenzela Yehowa mudimu mu nsombelu wetu mujima. Nanku kolesha dinanga diebe kudi Tatu webe ku mpindieu. Ditekela bipatshila bidi mua kukolesha dinanga diebe dituku dionso. Wewe muenze nanku, nebikusake bua kubatijibua. Dituku adi nedikale dilenga dia dikema. Kadi nntuadijilu patupu. Tungunukaku ne kukolesha dinanga diudi munange Yehowa ne Muanende bua kashidi.