Nzambi udi utubuikidila mpekatu yetu anu ku diambuluisha dia mulambu wa tshia kupikulangana natshi wa Yezu uvuaye mufile ne mashi ende. (Ef. 1:7) Kadi Bible udi wamba ne: “Nzambi mu lutulu luende uvua ubuikidila bantu mpekatu ivua mienzeke kale,” mmumue ne: kumpala kua Yezu kufila mulambu wa tshia kupikulangana natshi. (Lomo 3:25, dim.) Mmunyi muvua Yehowa mua kubuikidila bantu mpekatu yabu kumpala kua Yezu kufila mulambu au ne kushalaye Nzambi wa buakane?

Yehowa uvua mulaye ‘muana’ uvua ne bua kusungila bantu bavua ne bua kuleja ditabuja kudiye ne mu milayi yende. (Gen. 3:15; 22:18) Pavuaye mulaye bualu abu, bivua anu bu ne: ukavua mufute tshia kupikulangana natshi. Nzambi uvua mutuishibue ne: Muanende uvua ne bua kuitaba bua kufila tshia kupikulangana natshi mu tshikondo tshivuaye yeye Nzambi mujadike. (Gal. 4:4; Eb. 10:7-10) Pavua Yezu pa buloba, Yehowa uvua mumupeshe bukokeshi bua kubuikidilangana mpekatu nansha muvuaye kayi muanji kufila tshia kupikulangana natshi to. Yezu uvua ubuikila mpekatu ya bantu bavua ne ditabuja bualu uvua mumanye ne: mulambu wende uvua ne bua kulua kuyibuikila.—Mat. 9:2-6.