1-2. a) Paulo uvua muaba kayi pavuaye mufundile bena mu Efeso mukanda? Uvua mubafundilawu bua tshinyi? b) Nnkonko kayi ituandamuna?

 PAVUA Paulo mu buloko mu Lomo, uvua musue kukankamija bena Kristo nende. Bu muvuaye kayi mua kuya kubamona, wakabafundila mikanda. Umue wa kudiyi uvuaye mutumine bena Efeso, uvua muwufunde bu mu 60 anyi 61 P.Y.—Ef. 1:1; 4:1.

² Paulo ukavua mupitshishe tshikondo tshile mu Efeso amu bidimu bitue ku 10 kumpala, uyishamu lumu luimpe ne ululongeshangana. (Bien. 19:1, 8-10; 20:20, 21) Uvua munange bena Kristo nende bavuamu bikole ne uvua musue kubambuluisha bua bashale ne lulamatu kudi Yehowa. Kadi bua tshinyi uvua mufundile bena Kristo bela manyi bua butoke ne mîdima? Mibelu ivuaye mufundamu idi ilongesha bena Kristo bonso tshinyi? Tukebayi mandamuna a nkonko eyi.

BUMBUKE MU MÎDIMA, BAYE MU BUTOKE

3. Bua tshinyi Paulo mmutele butoke ne mîdima mu mukanda uvuaye mufundile bena Efeso?

³ Paulo uvua mufundile bena Kristo ba mu Efeso ne: “Kumpala nuvua mîdima, kadi mpindieu nudi butoke.” (Ef. 5:8) Mmutele mîdima ne butoke mu mvese eu bua kuleja muvua  bena mu Efeso balekele malu mabi avuabu benza. Tumonayi bua tshinyi uvua muambe ne: bena mu Efeso bavua ‘kumpala mîdima.’

4. Mmu ngumvuilu kayi muvua bena mu Efeso mu mîdima ya mu ntendelelu wa dishima?

⁴ Ntendelelu wa dishima. Kumpala kua bena mu Efeso kulonga bulelela ne kulua bena Kristo, bavua mu ntendelelu wa dishima ne bavua badiine mu malu a mîdima. Mu tshimenga tshia Efeso muvua ntempelo wa nzambi mukaji Atemise. Ntempelo au uvua tshimue tshia ku bintu biende lumu bia tshikondo atshi. Bantu bavua baya kutendelelamu mpingu. Bansenda bavua benza mpingu ya ku ntempelo au ne bayipanyisha bakapeta makuta a bungi. (Bien. 19:23-27) Bantu ba bungi ba mu Efeso bavua kabidi badiine mu malu a majimbu.—Bien. 19:19.

5. Mmu ngumvuilu kayi muvua bena mu Efeso mu mîdima ya malu a bikadilu?

⁵ Malu a masandi. Bena mu Efeso bavua badiine mu malu a masandi ne kabavua ne bundu bua bikadilu biabu bibi to. Bavua bapita kuakula bua malu a masandi mu manaya ne mu bibilu bia malu a ntendelelu bivuabu benza. (Ef. 5:3) Benamu ba bungi bavua “bajimije bikadilu bimpe bionso,” tuambe ne: bakavua ne “mioyo mipape.” (Ef. 4:17-19) Kumpala kua bena mu Efeso kulonga mikenji ya Yehowa ya tshidi tshimpe ne tshidi tshibi, tondo tuabu tua muoyo katuvua tubapisha pavuabu benza malu mabi to. Kabavua nansha bela meji a muvua Yehowa umvua bua bienzedi biabu to. Ke bualu kayi Paulo uvua muambe ne: “meji abu adi mu mîdima, ne badi kule ne muoyo wa kudi Nzambi.”

6. Bua tshinyi Paulo uvua muambile bena mu Efeso ne: bakavua ‘mpindieu butoke’?

⁶ Kadi bamue bena mu Efeso bakumbuka mu mîdima ayi. Paulo wakabafundila ne: “Mpindieu nudi butoke mu diumvuangana ne Mukalenge.” (Ef. 5:8) Bakavua batumikila mikenji ya Yehowa ivua bu butoke buvua bubalombola. (Mis. 119:105) Bavua balekele bikadilu bia mu ntendelelu wa dishima ne malu a masandi. Bavua ‘balue bidikiji ba Nzambi’ ne bavua badienzeja bua kutendelela Yehowa ne kumusankisha.—Ef. 5:1.

7. Nku tshinyi kudi nsombelu wetu mufuanangane ne uvua nende bena Kristo ba bungi ba mu Efeso?

 ⁷ Tuetu petu tuvua mu mîdima ya malu a ntendelelu ne ya malu a bikadilu kumpala kua kulua Bantemu. Bamue ba kutudi bavua benza mafesto a mu ntendelelu ya dishima, bakuabu benza malu a masandi. Kadi patuakamanya mikenji ya Yehowa, tuakatuadija kuyitumikila, tuetu kulekela malu au. Bua bualu abu, tudi bapete masanka a bungi. (Yesh. 48:17) Kadi kabitu anu bipepele misangu yonso bua kuepuka mîdima itudi bashiye ne ‘kutungunuka ne kuenda bu bana ba butoke to.’ Ntshinyi tshidi mua kuambuluisha?

EPUKA MÎDIMA

8. Bilondeshile Efeso 5:3-5, mmalu kayi avua bena mu Efeso ne bua kulekela?

⁸ Bala Efeso 5:3-5. Bena mu Efeso bakepuka mîdima ya mu malu a bikadilu pakatungunukabu ne kulekela bikadilu bivua Yehowa mukine; tuambe ne: malu a masandi ne ngakuilu wa busenji. Paulo wakabaleja ne: bavua ne bua kulekela malu au bua bobu kupeta “bumpianyi mu Bukalenge bua Kristo ne bua Nzambi.”

9. Tudi ne bua kubenga malu adi mua kutufikisha ku dienda dia masandi bua tshinyi?

⁹ Tuetu petu tudi ne bua kudienzeja bua kulekela “kubuelakana mu bienzedi bia mîdima.” (Ef. 5:11) Mu kuamba kuimpe, padi muntu utangila malu a masandi, uateleja, anyi uakula, mbipepele bua yeye kufika ku dienza. (Gen. 3:6; Yak. 1:14, 15) Bena Kristo netu ba bungi ba mu ditunga dikuabu bakenza kasumbu ka “bulunda” bua ku Enternete. Ba bungi ba kudibu bakatuadija kuyukidilangana malu a mu nyuma. Mu kupita kua matuku, kutuadijabu kuyukidilangana malu avua kaayi asankisha Yehowa to. Bakavua bapita kuakula malu a balume ne bakaji. Ba bungi ba kudibu bakalua kuamba ne: malu mabi avuabu bayukidilangana au akabafikisha ku dienda dia masandi.

10. Satana udi ukeba kutufikisha ku tshinyi? (Efeso 5:6)

¹⁰ Bena panu mbasue kutuitabijija ne: malu adi Yehowa umona ne: nga masandi ne a bukoya kaena anu mabi to. (2 Pet. 2:19) Kabiena bitukemesha to! Diabolo utu anu udienzeja bua kubueja bantu mu tshibuejakaji bua bamone malu mabi ne: mmimpe. (Yesh. 5:20; 2 Kol. 4:4) Ke bualu kayi filme ya bungi, ndongamu ya ku TV, ne site ya ku Enternete, itu isaka bantu ku dienza malu adi abengangana ne mikenji ya Yehowa! Satana utu ukeba kutufikisha ku dimona ne: kuenza malu a bukoya ki nkubi to, kudi mene kusankisha, ne kakuena ne njiwu to.—Bala Efeso 5:6.

11. Bualu budi Angela muambe ebu budi buleja mudibi ne mushinga bua kutumikila mubelu udi mu Efeso 5:7 mushindu kayi? (Tangila kabidi tshimfuanyi.)

¹¹ Satana mmusue bua tusombe ne bantu badi mua kutupangisha bua kutumikila mikenji ya Yehowa. Ke bualu kayi, Paulo wakafundila bena mu Efeso bua bantu badi benza malu mabi ne: “Kanubuelakanyanganyi nabu to.” (Ef. 5:7) Mbimpe tuvuluke ne: kudia bulunda ne muntu kakuena anu kumvuija kusomba nende pamue to. Kudi kabidi kutangila kuyukila nende ku Enternete, njiwu ivua bena mu Efeso wa kale kabayi nayi to. Angela a wa mu Asie wakajingulula njiwu idi nayi kudia bulunda ne bantu ku Enternete. Udi wamba ne: “Ngelelu wanyi wa meji wakatuadija kunyanguka ku kakese ku kakese. Ngakafika ne ku didia ‘bulunda’ ne bantu bavua kabayi batumikila mikenji ya Yehowa to.  Ndekelu wa bionso, ngakatuadija kumona ne: kuikala ne nsombelu uvua kayi usankisha Yehowa kuvua kuimpe.” Bia diakalenga, bakulu bakambuluisha Angela ne dinanga dionso. Udi wamba ne: “Ndi mudie bulunda bukole ne Yehowa mpindieu pamutu pa kubudia ne bantu ku Enternete.”

12. Tshia kuenza ntshinyi bua kutumikila mikenji ya Yehowa?

¹² Tudi ne bua kubenga tshidi bena panu bamba tshia ne: dienda dia masandi kadiena ne bualu to. Tudi bamanye ne: ndibi. (Ef. 4:19, 20) Nanku mbimpe tudiebeje ne: ‘Ntu ndienzeja bua kubenga kupitshisha dîba ne bena mudimu betu, balongi betu, anyi bantu bakuabu badi kabayi banemeka mikenji ya Yehowa padibi kabiyi ne mushinga anyi? Ntuku ne dikima dia kutumikila mikenji ya Yehowa nansha bantu bangamba ne: ndi muena malu makole pandi ngitumikila anyi?’ Bualu bukuabu, anu mudi 2 Timote 2:20-22 uleja, tudi ne bua kuikala ne budimu nansha patudi tukeba balunda munda mua tshisumbu. Mbimpe tuvuluke ne: mudi bamue badi mua kutupangisha bua kushala ne lulamatu kudi Yehowa.

ENDAYI “BU BANA BA BUTOKE”

13. ‘Kutungunuka ne kuenda bu bana ba butoke’ kudi kumvuija tshinyi? (Efeso 5:7-9)

¹³ Paulo wakalomba bena mu Efeso bua bepuke mîdima ne ‘batungunuke ne kuenda bu bana ba butoke.’ (Bala Efeso 5:7-9.) Bidi biumvuija kuenza malu bu bena Kristo balelela dîba dionso. Umue mushindu wa kufika ku dienza nanku ngua kudibadila Bible ne kudilongelayi ne muoyo mujima pamue ne mikanda yetu idi imumvuija. Mbia mushinga bua kuidikija Yezu ne kutumikila malongesha ende bualu udi “butoke bua pa buloba.”—Yone 8:12; Nsu. 6:23.

14. Ntshinyi tshidi nyuma muimpe utuenzela?

¹⁴ Mbimpe tulombe kabidi Yehowa nyuma wende bua tumone mua kutungunuka ne kuenda “bu bana ba butoke.” Bidi nanku bualu ki mbipepele bua kushala bakezuke mu bulongolodi bukoyike ebu to. (1 Tes. 4:3-5, 7, 8) Tuetu bapete nyuma muimpe, netulekele meji a bena panu adi abengangana ne meji  a Nzambi. Nyuma muimpe neapatule kabidi munda muetu ‘buimpe ne buakane bia mishindu yonso.’—Ef. 5:9.

15. Tshia kuenza ntshinyi bua kupeta nyuma muimpe? (Efeso 5:19, 20)

¹⁵ Tudi tupeta nyuma muimpe patudi tumulomba Yehowa. Yezu wakamba ne: Yehowa udi ufila nyuma muimpe kudi ‘badi bamulombaye.’ (Luka 11:13) Tudi kabidi tupeta nyuma muimpe patudi tutumbisha Yehowa mu bisangilu. (Bala Efeso 5:19, 20.) Tuetu bapete nyuma muimpe, netuikale ne nsombelu udi usankisha Nzambi.

16. Tshia kuenza ntshinyi bua kuangata dipangadika dimpe? (Efeso 5:10, 17)

¹⁶ Kumpala kua kuangata dipangadika, tudi ne bua kuanji kumanya “tshidi disua dia Yehowa” ne kushisha kuangata dipangadika didi dipetangana ne disua diende adi. (Bala Efeso 5:10, 17.) Patudi tukeba mêyi manene a mu Bible adi apetangana ne dipangadika adi, tudi mu bulelela tukeba tshidi Nzambi musue bua tuenze. Patudi tuatumikila, tudi tuleja mutudi bangate dipangadika dimpe.

17. Mmunyi mutudi mua kuenza malu bimpe bitambe ne dîba dietu? (Efeso 5:15, 16) (Tangila kabidi tshimfuanyi.)

¹⁷ Paulo uvua mulombe kabidi bena mu Efeso bua kuenza malu bimpe bitambe ne dîba diabu. (Bala Efeso 5:15, 16.) “Mubi,” tuambe ne: Satana muena lukuna wetu, mmusue bua tudifile bikole mu malu a panu, tupange ne dîba dia kuenzela Yehowa mudimu. (1 Yone 5:19) Mbipepele bua muena Kristo kudifila ku dikeba dia makuta, tulasa, ne mudimu, pamutu pa kudifila ku mishindu mishilashilangane ya kuenzela Yehowa mudimu. Yeye muenze nanku, nebileje ne: udi ne meji a bena panu. Tuamba eku tuela eku, kuenza malu au kakuena anu kubi to, kadi kaena ne bua kutudia dîba dia kuenzela Yehowa mudimu to. Tuetu basue kuenda “bu bana ba butoke,” tudi ne bua “kuenza malu bimpe bitambe ne dîba [dietu],” tuambe ne: kudifila ku malu a mushinga.

18. Ntshinyi tshivua Donald muenze bua kuenza malu bimpe bitambe ne dîba diende?

 ¹⁸ Keba mpunga ya kuenzela Yehowa mudimu wa bungi. Ke tshivua Donald wa mu Afrique du Sud muenze. Udi wamba ne: “Ngakatangilula nsombelu wanyi meme kulomba Yehowa bua angambuluishe mmuenzele mudimu wa bungi. Ngakamulomba bua mpete mudimu wa bianza uvua mua kunshila dîba dia bungi dia kuyisha. Ke tshiakenzeka. Meme ne mukajanyi tuakatuadija mudimu wa ku dîba ne ku dîba.”

19. Mmunyi mutudi mua kutungunuka ne kuenda “bu bana ba butoke”?

¹⁹ Mukanda uvua Paulo mufundile bena mu Efeso wakabambuluisha bua kushala ne lulamatu kudi Yehowa. Udi utuambuluisha petu lelu. Anu mutudi bamone, udi utuambuluisha bua kusungula balunda bimpe ne kupita kapepe mu mushindu muimpe. Udi utusaka bua tutungunuke ne kudilongela Bible pa tshibidilu ne bua butoke bua bulelela butulombole mu malu etu onso. Udi uleja kabidi mushinga udi nawu nyuma muimpe udi upatuisha ngikadilu mimpe kutudi. Kutumikila malu adimu nekuenze bua tuangate mapangadika mimpe adi apetangana ne disua dia Yehowa. Tuetu benze malu aa, netuepuke mîdima ya panu ne netushale mu butoke!