1. Umvuija tshivua tshienzeke pavua Yezu muenze tshishima tshiende tshia kumpala.

 ELABI meji ne: tudi ku ndekelu kua tshidimu tshia 29 P.Y. pavua Yezu mutuadije mudimu wende. Mbababikile ne mamuende Mariya ne bayidi bende bakuabu mu difesto dia dibaka mu Kana, musoko wa ku nord kua Nazaleta, tshimenga tshia ba Yezu. Mariya mmulunda wa bena mu dîku adi, ne uvua wambuluisha bua kuakidila benyi. Kadi munkatshi mua difesto, kudi kumueneka lutatu luvua mua kubungamija bena mu dîku adi ne basedianganyi. Mvinyo uvua mujike. b Pamuapa benyi bavua balue bungi buvuabu kabayi belele meji. Mariya wakaya lukasa kudi muanende, kumuambilaye ne: “Kabena ne mvinyo to.” (Yone 2:1-3) Yezu wakenza tshinyi? Wakenza tshishima tshia dikema, kukudimunaye mâyi kuluawu “mvinyo mutambe buimpe.”​—Yone 2:9, 10.

2-3. a) Mmunyi muvua Yezu muenze mudimu ne bukole buende bua kuenza nabu bishima? (b) Ntshinyi tshituapeta tuetu bakonkonone bishima bia Yezu?

² Yezu wakenza kabidi bishima bikuabu bia bungi tshikondo tshivuaye uyisha. c Wakenza mudimu ne bukole buende bua kuenza bishima bua kuambuluisha bantu binunu ne binunu. Tshilejilu wakenza bishima bibidi. Mu tshimue wakadiisha bantu balume 5000 ne mu tshikuabu kuluaye kudiisha bantu balume 4000. Tuetu basangishe bungi bua bantu bonso  abu kusangisha ne bakaji ne bana bavua muaba au, bavua mua kuikala bapite pa 27000. (Mat. 14:15-21; 15:32-38) Misangu yonso ibidi ayi, uvua muondope kabidi bantu ba bungi bavua basama. (Mat. 14:14; 15:30, 31) Elabi meji muvuabi bikemeshe misumba ya bantu bua muvua Yezu mubondope ne mubadiishe mu tshishima.

³ Bishima bivua Yezu muenze bidi bitulongesha malu a bungi. Mu tshiena-bualu etshi, netumone malu adi akolesha ditabuja adi bishima abi bitulongesha. Netumone kabidi mutudi mua kudipuekesha ne kumvuilangana anu bu Yezu pavuaye wenza bishima.

4. Bishima bia Yezu bidi bitulongesha malu a nganyi adi akolesha ditabuja?

⁴ Bishima bia Yezu bidi bitulongesha malu ende ne a Tatuende adi akolesha ditabuja. Kupita bionso, Yehowa ke uvua umupesha bukole bua kuenza nabu bishima abi. Mu Bienzedi 10:38 badi bamba ne: “Nzambi [uvua] mumuele [Yezu] manyi a nyuma muimpe ne mumupeshe bukole, ne wakanyunguluka mu buloba buonso wenza malu mimpe ne wondopa bantu bonso bavua Diabolo ukengesha, bualu Nzambi uvua nende.” Vuluka kabidi ne: mu malu onso avua Yezu muenze ne muambe, too ne bishima bivuaye muenze, uvua uleja bimpe menemene muvua Tatuende umona malu ne umvua. (Yone 14:9) Tumonayi malu asatu adi bishima bia Yezu bitulongesha.

5. Ntshinyi tshivua tshisaka Yezu bua kuenza bishima? (Matayi 20:30-34)

⁵ Bua kumpala: Yezu ne Tatuende mbatunange bikole. Patshivua Yezu pa buloba, uvua muleje muvuaye munange bantu pavuaye wenza bishima bua kuambuluisha bavua bakenga. Dituku dikuabu, bampofo babidi bakamuela dîyi bua abambuluishe. (Bala Matayi 20:30-34.) Mona ne: “luse luakakuata” Yezu, pashishe yeye kubondopa. Muaku wa mu tshiena Greke udibu bakudimune muaba eu ne: “luse luakakuata” udi umvuija kumvua luse lua bungi menemene mu muoyo. Luse lua nanku (ludi luleja dinanga) ke luvua lusake kabidi Yezu bua kudiisha bantu bavua ne nzala ne kuondopa muena nsudi. (Mat. 15:32; Mâko 1:41) Mbimpe tutuishibue ne: Yehowa, Nzambi wa “luse lunene” ne Muanende mbatunange bikole ne badi bumvua bibi batudi tukenga. (Luka 1:78; 1 Pet. 5:7) Badi ne dijinga dikole dia kumbusha malu onso adi atatshisha bukua bantu.

6. Mbukole kayi budi Nzambi mupeshe Yezu?

⁶ Buibidi: Nzambi mmupeshe Yezu bukole bua kujikija ntatu ya bukua bantu. Pavua Yezu muenze bishima, wakaleja mudiye ne bukole bua kutshimuna ntatu itudi katuyi mua kudijikijila. Tshilejilu, udi ne bukole bua kumbusha mpekatu utudi bapiane udi ukebela bukua bantu ntatu, kabidi ne masama ne lufu bidiye ukebesha. (Mat. 9:1-6; Lomo 5:12, 18, 19) Bishima biende bidi bijadika ne: udi mua kujikija masama a “mishindu yonso,” ne kubisha too ne bafue. (Mat. 4:23; Yone 11:43, 44) Udi kabidi ne bukole bua kutumina bipepele bikole dîyi ne kutshimuna nyuma mibi. (Mâko 4:37-39; Luka 8:2) Bidi bitukolesha bua kumanya ne: Yehowa mmupeshe Muanende bukole bua nunku.

7-8. a) Bishima bia Yezu bidi bitupesha dishindika kayi? (b) Ntshishima kayi tshiudi muindile ne muoyo kuulu kuulu bua kumona mu bulongolodi bupiabupia bualua?

⁷ Buisatu: tudi batuishibue ne: malu mimpe a mu Bukalenge bua Nzambi adibu batulaye neakumbane. Bishima bivua Yezu muenze pavuaye pa buloba bidi bituleja tshienzaye pa buloba bu mukadiye Mukalenge wa Bukalenge bua Nzambi mu diulu. Mona nsombelu utukadi pa  kuikala nende pikalaye ukokesha. Netuikale bapuangane bualu neumbushe masama onso ne matekete a mishindu yonso bidi bitatshisha bukua bantu. (Yesh. 33:24; 35:5, 6; Buak. 21:3, 4) Katuakufiototoka ne nzala anyi kukenga bua bipupu to. (Yesh. 25:6; Mâko 4:41) Netuikale ne disanka dia bungi dia kuakidila balela ne balunda betu bajulabu mu “nkita ya tshivulukilu.” (Yone 5:28, 29) Ntshishima kayi tshiudi muindile nangananga ne muoyo kuulu kuulu bua kumona mu bulongolodi bupiabupia bualua?

⁸ Pavua Yezu wenza bishima, uvua ne budipuekeshi ne uvua umvuilangana. Ngikadilu eyi ngitudi petu ne bua kuikala nayi. Tumonayi bilejilu bibidi. Tutuadije ne tshia difesto dia dibaka dia mu Kana.

9. Ntshinyi tshivua Yezu muenze mu difesto dia dibaka? (Yone 2:6-10)

⁹ Bala Yone 2:6-10. Pavua mvinyo mujike mu difesto dia dibaka, Yezu uvuaku muenzejibue bua kuenza bualu kampanda anyi? Tòo. Kakuvua dîyi dia buprofete dia ne: Masiya uvua ne bua kupatula mvinyo mu tshishima to. Kadi elabi meji muudi mua kumvua maluvu owu majike mu difesto diebe dia dibaka. Pamuapa Yezu uvua mumvuile bena mu dîku adi luse, kadi nangananga bavua baselengana, bualu kavua musue bua bibatonde to. Nanku anu mutukadi baleje ku ntuadijilu, wakenza tshishima. Wakakudimuna litre ya mâyi 390 kuluawu mvinyo mutambe buimpe. Pamuapa uvua mukudimune mvinyo wa bungi nanku ne  lungenyi lua ne: mukuabu ashale bua balue kabidi kumunua matuku kumpala, anyi bua bena dibaka abu bamupane bua kupeta dikuta. Kakuyi mpata bena dibaka abu bavua bumvue disanka dia bungi.

10. Mmalu kayi a mushinga adi mu Yone nshapita 2? (Tangila kabidi tshimfuanyi.)

¹⁰ Tumonayi amue malu a mushinga adibu bafunde mu Yone nshapita 2. Mona ne: Yezu ki nguvua muwuje milondo ayi ne mâyi to. Kadi wakambila bena mudimu bua bayuwuje bua kubenga kukoka ntema ya bantu kudiye. (Mvese 6, 7) Yeye mumane kukudimuna mâyi malue mvinyo, kavua muangate mvinyo au muye nende kudi mulombodi wa difesto to. Kadi wakambila bena mudimu. (Mvese wa 8) Yezu kavua mutunte mvinyo mu dikopo, mudiele muulu kumpala kua babikidibue wamba ne lutambishi luonso ne: ‘Labulayi numvue mvinyo undi meme mukudimune!’

11. Tshishima tshia Yezu tshidi tshitulongesha tshinyi?

¹¹ Tshishima tshia Yezu tshia kukudimuna mâyi alue mvinyo tshidi tshitulongesha tshinyi? Tshidi tshitulongesha bua kuikala ne budipuekeshi. Yezu kavua muditumbishe bua tshishima atshi to; yeye muine kakaditumbisha musangu nansha umue bua malu avuaye muenze to. Kadi uvua udipuekesha, ne misangu yonso upesha Tatuende butumbi buonso. (Yone 5:19, 30; 8:28) Tuetu bidikije Yezu, bikale ne budipuekeshi mu mushindu utudi tudimona, katuakuditumbisha bua malu atudi tuenza to. Nansha tuetu benze malu kayi mu mudimu wa Yehowa, tuditumbishe bua diakalenge ditudi nadi dia kuenzela Nzambi muimpe mudimu, kadi katuditumbishi buetu tuetu to. (Yel. 9:23, 24) Tumupeshayi butumbi budi bumuakanyine. Tuambe eku tuela eku, katuena ne bualu buimpe nansha bumue butudi mua kuenza Yehowa yeye kayi utuambuluisha to.​—1 Kol. 1:26-31.

12. Mmushindu kayi mukuabu utudi mua kufuana Yezu ku budipuekeshi? Fila tshilejilu.

¹² Tumonayi mushindu mukuabu utudi mua kuidikija budipuekeshi bua Yezu. Tuangate tshilejilu etshi: Mukulu udi wangata dîba dia bungi bua kuambuluisha musadidi wa mudimu bua kulongolola muyuki wende wa patoke wa kumpala. Bua bualu abu, musadidi au udi wenza muyuki muimpe udi ukolesha bantu mu tshisumbu. Panyima pa bisangilu, muanetu mukuabu udi ulua kudi mukulu au umuambila ne: ‘Muanetu au mmuenze muyuki muimpe wa dikema, ki mmuomu?’ Bidiku bikengela mukulu au ambe ne: ‘Udi muambilamu, kadi ndi muangate dîba dia bungi bua kumuambuluisha anyi?’ Peshi neadipuekeshe yeye kuamba ne: ‘Eyowa mmuenze bimpe ne mmunsankishe be!’ Tuetu tudipuekesha, katuakuditumbisha bua malu mimpe atudi tuenzela bakuabu to. Tudi ne disanka dia kumanya ne: Yehowa utu umona bitudi tuenza ne utu ubiangata ne mushinga. (Fuanyikija ne Matayi 6:2-4; Eb. 13:16) Bushuwa tudi tusankisha Yehowa patudi tuenza malu ne budipuekeshi bua kuidikija Yezu.​—1 Pet. 5:6.

13. Ntshinyi tshivua Yezu mumone pabuipi ne tshimenga tshia Naina? Wakenza tshinyi bua bualu abu? (Luka 7:11-15)

¹³ Bala Luka 7:11-15. Elabi meji a bualu buvua buenzeke ebu patshivua Yezu uyisha pa buloba. Uvua muye ku Naina, tshimenga tshia mu Galela tshivua pabuipi ne Shunema, muaba uvua muprofete Elisha mubishe muana wa mukaji kampanda ku lufu kukavua bidimu 900. (2 Bak. 4:32-37) Pakavuaye pabuipi ne tshiibi tshia tshimenga, wakamona bantu bapatukamu baya ku nkita. Bualu abu budi bubungamija bikole. Mukaji au uvua mufuishe muanende mulela umue.  Kadi kavua nkayende to, uvua ne bantu ba bungi ba mu tshimenga. Yezu wakimanyika musumba wa bantu au ne kuenzelaye mukaji au bualu bua dikema. Wakabisha muanende ku lufu. Eu mmusangu wa kumpala wa ku misangu isatu idibu bakuile mu mikanda ya Evanjeliyo ivua Yezu mubishe bantu ku lufu.   

14. Mmalu kayi a mushinga adi mu Luka nshapita wa 7? (Tangila kabidi tshimfuanyi.)

¹⁴ Tumonayi malu makuabu a mushinga adi mu Luka nshapita wa 7. Mona ne: Yezu ‘wakamona’ mamu uvua mufuishe au, ne pashishe “wakamumvuila luse.” (Mvese wa 13) Pamuapa mushindu uvuaye mumone mamu au wenda udila kumpala kua muanende uvua mufue ke uvua mumusake bua kumumvuila luse lua bungi. Yezu kavua anu mumumvuile luse patupu to, wakamulejalu mu tshienzedi. Wakayukila nende ne dîyi dimpe umuambila ne: “Lekela kudila.” Pashishe wakenza bualu kampanda. Wakapeshilula muanende au muoyo ne “kumufila kudi mamuende.”​—Mvese wa 14, 15.

15. Tshishima tshia Yezu tshidi tshitulongesha tshinyi?

¹⁵ Tshishima tshia Yezu tshia kubisha muana wa mukaji mukamba tshidi tshitulongesha tshinyi? Tshidi tshitulongesha ne: mbimpe tuikale tumvuila bantu badi bafuishe luse. Bushuwa, katuena mua kubisha bafue bu muvua Yezu muenze to. Kadi tudi mua kutangila badi bafuisha bua kubumvuila luse anu muvua Yezu muenze. Mbimpe tubaleje mutudi tubumvuila luse patudi tubambila anyi tubenzela bualu kampanda bua kubambuluisha ne kubakolesha. d (Nsu. 17:17; 2 Kol. 1:3, 4; 1 Pet. 3:8) Kubambila mêyi makese anyi kubenzela kabualu kampanda kudi mua kubambuluisha bikole.

16. Anu mudibu baleje mu tshimfuanyi, tshilejilu tshia mamu uvua ufuma ku difuisha muanende tshidi tshikulongesha tshinyi?

¹⁶ Tumonayi bualu bukuabu. Bidimu bishale ebi, muanetu wa bakaji mukuabu uvua mumone mamu uvua ku luseke luende udila pavuabu bimba musambu mu bisangilu. Musambu uvua wa ditekemena dia dibishibua dia  bantu ku lufu, ne mamu au utshivua ufuma ku difuisha muanende wa bakaji. Bu muvua muanetu au mumanye bualu abu, wakaya diakamue kudiye, kumuelaye diboko, kutungunukabu ne musambu. Mamu au wakamba ne: “Ngakamona ne: bena Kristo nanyi mbanange bikole.” Uvua ne disanka dia bungi dia muvuaye muye mu bisangilu dituku adi. Wakamba ne: “Ku Nzubu wa Bukalenge ke muaba utudi mua kupetela diambuluisha.” Tuikalayi batuishibue ne: Yehowa utu umona too ne tumalu tukese tutudi tuenza bua kumvuila bantu badi bafuishe ne “bazajibue mu lungenyi luabu” luse; utu kabidi wanyisha tumalu atu.​—Mis. 34:18.

17. Mmalu kayi atudi balonge mu tshiena-bualu etshi?

¹⁷ Kudilongela malu a mu Evanjeliyo adi akula bua bishima bia Yezu kudi mua kutukolesha. Adi atulongesha mudi Yehowa ne Yezu batunange bikole, mudi Yezu ne bukole bua kujikija ntatu ya bukua bantu, ne mua kuikale ne dishindika mu milayi yakumbana mu katupa kîpi emu patuadija Bukalenge bua Nzambi kukokesha buloba. Patudi tukonkonona malu au, tudi mua kuelangana meji a mushindu utudi mua kuidikija ngikadilu ya Yezu. Kuenaku mua kuenza programe wa kudilongela bishima bikuabu bia Yezu anyi kubilonga mu ntedelelu wa mu dîku anyi? Keba malu audi mua kulongamu ne pashishe uambile bakuabu. Newikale ne malu mimpe a bungi adi akolesha audi mua kuambila bantu bakuabu.​—Lomo 1:11, 12.

18. Ntshinyi tshituamona mu tshiena-bualu tshialonda?

¹⁸ Pakavua Yezu ku ndekelu kua mudimu wende, wakenza tshishima tshisatu ne tshia ndekelu tshia kubisha muntu ku lufu. Kadi etshi tshivua tshishilangane ne bikuabu. Uvua mubishe mulunda wende wa pa muoyo ku lufu; kuenzaye nanku nansha mukavua matuku anayi mapite. Mmalu kayi adi tshishima tshia mu Evanjeliyo etshi tshitulongesha? Mmunyi mutudi mua kukolesha ditabuja dietu bua ditekema dia dibishibua dia bantu ku lufu? Netuandamune nkonko eyi mu tshiena-bualu tshialonda.