TSHIENA-BUALU TSHIA KULONGA 16
“Muanenu neajuke”!
“Yezu [wakambila Mâta] ne: ‘Muanenu neajuke.’” —YONE 11:23.
MUSAMBU WA 151 Neababikile
KADIOSHA a
1. Leja muvua muana kampanda muleje muvuaye ne ditabuja bua dibishibua dia bantu ku lufu.
MUANA mukuabu wa balume diende Matthew udi ne disama dikole ne mbamupande misangu ne misangu. Musangu kampanda patshivuaye ne bidimu 7, yeye ne bena mu dîku diabu bavua benda bamona ndongamu kampanda wa ku ngondo ku TV wa JW. Lua ku ndekelu kua ndongamu au, bakamona filme wa mijiki uleja bantu bakidila balela babu bavuabu babishe ku lufu. b Pakajika ndongamu, Matthew wakasemena kudi baledi bende, kubakuata ku bianza wamba ne: “Papa ne mama, si nudi bamone, nansha meme mufue, nenjuke pabishabu bantu ku lufu. Kanusamishi mutu to; nebienzeke.” Elabi meji disanka divua baledi abu mua kuikala nadi pakamonabu bukole bua ditabuja divua nadi muanabu bua dibishibua dia bantu ku lufu!
2-3. Bua tshinyi mbimpe tuelangane meji a mulayi wa dibishibua dia bantu ku lufu?
2 Mbimpe tuikale tuelangana meji a mulayi wa mu Bible wa dibishibua dia bantu ku lufu. (Yone 5:28, 29) Bua tshinyi? Bualu katuena bamanye dîba diatukuata disama dia lufu anyi dituafuisha to. (Muam. 9:11; Yak. 4:13, 14) Ditekemena dietu dia dibishibua dia bantu ku lufu didi mua kutuambuluisha bua kunanukila mu ntatu eyi. (1 Tes. 4:13) Mifundu idi itujadikila ne: Tatu wetu wa mu diulu mmutumanye bimpe ne mmutunange bikole. (Luka 12:7) Bu mudi Yehowa Nzambi mutumanye bimpe menemene, neatubishe ne bumuntu buetu ne netuvuluke malu avua mu meji etu. Mmutunange bikole ne mmutupeshe mushindu wa kushala ne muoyo kashidi. Nansha tuetu bafue, neatubishe ku lufu!
3 Mu tshiena-bualu etshi, netuanji kumona bua tshinyi tudi tuitabuja mulayi wa dibishibua dia bantu ku lufu. Pashishe netukonkonone muyuki wa mu Bible udi ukolesha ditabuja udi ne mêyi a mvese wa tshiena-bualu tshietu etshi: “Muanenu neajuke.” (Yone 11:23) Netumone kabidi tshia kuenza bua kukolesha ditabuja dietu mu ditekemena dia dibishibua dia bantu ku lufu.
BUA TSHINYI TUDI TUITABUJA MULAYI WA DIBISHIBUA DIA BANTU KU LUFU?
4. Bua kuitabuja bualu budibu balaye, tudi ne bua kuikala batuishibue bua bualu kayi? Fila tshilejilu.
4 Bua kuitabuja bualu budibu balaye, bitu bikengela kutuishibua ne: muntu udi mubulaye udi ne dijinga ne bukole bua kubukumbaja. Tshilejilu, Fuanyikijabi ne: tshipepele ntshinyangakaje nzubu webe. Mulunda webe udi ulua ukulaya ne: ‘Ndi nkuambuluisha bua wibakulule nzubu webe.’ Katu ushima to, ne udi mutuishibue ne: udi ne dijinga dia kukuambuluisha. Bikalaye mupiluke mu dibaka ne muikale ne bia kuibaka nabi bidi bikengedibua, udi umanya ne: udi ukumbana bua kukuambuluisha. Nanku udi witabuja tshidiye mukulaye atshi. Kadi netuambe bishi bua mulayi wa Nzambi wa dibishibua dia bantu ku lufu? Udi ne dijinga ne bukole bua kuwukumbaja menemene anyi?
5-6. Bua tshinyi mbimpe tutuishibue ne: Yehowa udi ne dijinga dia kubisha bantu ku lufu?
5 Yehowa utu ne dijinga dia kubisha bantu ku lufu anyi? Eyowa, udi nadi. Wakasaka bafundi ba Bible ba bungi ku bukole bua nyuma bua kufunda mulayi wende wa dibishibua dia bantu ku lufu dienzeka kumpala eku. (Yesh. 26:19; Hosh. 13:14; Buak. 20:11-13) Patu Yehowa ulaya bualu, utu anu ubukumbaja. (Yosh. 23:14) Mu bulelela, udi uzuka bua kubisha bantu ku lufu. Bua tshinyi tudi tuamba nanku?
6 Elabi meji a tshivua Yobo muambe. Uvua mutuishibue ne: nansha yeye mufue, Yehowa neajinge bua kumumona kabidi ne muoyo. (Yobo 14:14, 15, dim.) Ke mudiye kabidi umvua bua batendeledi bende bonso bakadi bafue. Udi uzuka bua kubabisha ku lufu, bikale ne disanka ne makanda a mubidi mimpe. Kadi bua bantu badi bafue bungi bu ntunta ne ngenena bavua kabayi bapete diakalenga dia kulonga bulelela budi bumutangila? Nzambi wetu wa dinanga mmusue kubabisha pabu. (Bien. 24:15) Mmusue bua bapete pabu diakalenga dia kulua balunda bende ne kuikala ne muoyo wa kashidi. (Yone 3:16) Mbimueneke bimpe ne: Yehowa udi ne muoyo wa kubisha bantu ku lufu.
7-8. Bua tshinyi mbimpe tutuishibue ne: Yehowa udi ne bukole bua kubisha bafue?
7 Yehowa utu kabidi ne bukole bua kubisha bantu ku lufu anyi? Eyowa udi nabu! Yeye udi “Wa Bukole Buonso.” (Buak. 1:8) Bua bukole budiye nabu, mmukumbane bua kutshimuna muluishi kayi yonso, nansha lufu. (1 Kol. 15:26) Bualu abu budi butukolesha ne butukankamija. Mona bualu buvua bufikile muanetu Emma Arnold. Mu Mvita mibidi ya buloba bujima, yeye ne bena mu dîku diabu bakapeta ntatu mikole ivua miteke ditabuja diabu mu diteta. Muanende wa bakaji wakafuisha bantu mu tumponya tua bena Nazi tua dienzejangana midimu mikole. Ke yeye kumuambila ne: “Lufu luolu lushale lulama bantu bua kashidi, neluikale ne bukole kupita Nzambi, ki mmuomu? Kadi atshi katshiena mua kuenzeka to.” Mu bulelela, kakuena tshintu tshidi ne bukole kupita Yehowa to! Nzambi wa bukole buonso uvua mufuke muoyo udi ne bukole bua kubisha bafue.
8 Bualu bukuabu budi butuleja ne: Nzambi udi ne bukole bua kubisha bafue mbua ne: utu ukuata malu kayi utshioka to. Utu ubikila mutoto wonso mu dîna diawu. (Yesh. 40:26) Mmumanye kabidi bantu bonso bakadi bafue. (Yobo 14:13; Luka 20:37, 38) Mbipepele bua yeye kuvuluka kalu ne kalu konso kadi katangila bantu babishaye ku lufu, kabidi ne bimfuanyi biabu ne bumuntu buabu, uvuluka ne malu avua mabafikile, ne avuabu nawu mu meji.
9. Bua tshinyi udi witabuja ne: mulayi wa Yehowa wa dibishibua dia bafue newukumbane?
9 Mbimueneke bimpe ne: mbimpe tuitabuje mulayi wa Yehowa wa kubisha bafue bualu tudi bamanye ne: udi ne dijinga ne bukole bua kuwukumbaja. Mona bualu bukuabu budi butusaka bua kuitabuja mulayi wa Nzambi wa dibishibua dia bantu ku lufu: Yehowa ukadi mujule bafue. Ku kale, wakapesha Yezu ne bamue bantu ba lulamatu bukole bua kubisha bafue. Tuangatayi tshilejilu tshimue tshia muntu uvua Yezu mubishe ku lufu tshidi mu Yone nshapita wa 11.
YEZU UDI UFUISHA MULUNDA WENDE WA PA MUOYO
10. Ntshinyi tshivua tshienzeke pavua Yezu uyisha dishiya dia Yadene? Wakenza tshinyi? (Yone 11:1-3)
10 Bala Yone 11:1-3. Elabi meji a tshivua tshienzeke mu Betania lua ku ndekelu kua tshidimu tshia 32 P.Y. Yezu uvua ne balunda bende ba pa muoyo aba mu musoko au: Lazalo ne bana babu ba bakaji babidi, Mariya ne Mâta. (Luka 10:38-42) Kadi Lazalo wakabanga kusama, kutondabi bana babu ba bakaji. Yezu uvua dishiya dia Yadene, ke kumutuminabu mukenji. Bua kufika ku Betania, bivua bimulomba kuenza luendu matuku matue ku abidi. (Yone 10:40) Diakabi, Lazalo wakafua patshivua Yezu upetelaku mukenji. Nansha muvua Yezu mumanye ne: mulunda wende mmufume ku difua, udi ushala kabidi muaba udiye au matuku makuabu abidi, pashishe ulua kuasa luendu mutangile ku Betania. Nanku dituku divua Yezu mufike, Lazalo ukavua mufue kukavua matuku anayi. Yezu wakaya bua kuenza bualu buvua mua kuambuluisha balunda bende ne kutumbishisha Nzambi.—Yone 11:4, 6, 11, 17.
11. Mbualu kayi budi muyuki eu ulongesha bantu badi ne balunda?
11 Muyuki eu udi ulongesha bantu badi ne balunda bualu kampanda. Mona ne: pavua Mariya ne Mâta batumine Yezu mukenji, kabavua bamulombe bua kulua ku Betania to. Bakamba anu ne: mulunda wende wa pa muoyo uvua usama. (Yone 11:3) Pakafua Lazalo, Yezu uvua mua kuikala mumubishile ku bule. Kadi wakaya ku Betania bua ikale ne Mariya ne Mâta balunda bende. Udi ne mulunda udi mua kulua kukuambuluisha wewe kuyi mumubikile anyi? Dîba adi udi mumanye ne: udi mua kumueyemena bua akuambuluishe mu “bikondo bia dikenga.” (Nsu. 17:17) Anu bu Yezu, tuikalayi koku balunda ba nunku! Tupinganayi kabidi ku bualu buetu abu ne tumone tshidi tshilua kuenzeka.
12. Mbualu kayi budi Yezu ulaya Mâta? Bua tshinyi kabuvua dilaya dia mafi? (Yone 11:23-26)
12 Bala Yone 11:23-26. Mâta wakumvua ne: Yezu ukavua pabuipi ne Betania. Wakaya musangu umue bua kusambakena nende, kumuambilaye ne: “Mukalenge, bu wewe muikalapu, muanetu kavua mua kufua to.” (Yone 11:21) Mu bulelela, uvua mua kuikala muondope Lazalo. Kadi Yezu uvua musue kuenza bualu kampanda bua dikema. Udi umulaya ne: “Muanenu neajuke.” Udi wambila kabidi Mâta bualu bukuabu bua itabe tshivuaye mumuambile atshi, wamba ne: “Meme ndi dibishibua ku lufu ne muoyo.” Bushuwa, Nzambi mmumupeshe bukole bua kubisha bafue. Kumpala ukavua mubishe muana wa bakaji pavuaye ufuminaku ku difua ne ukavua kabidi mubishe nsongalume mukuabu, pamuapa anu dituku divuaye mufue adi. (Luka 7:11-15; 8:49-55) Kadi uvuaku mua kubisha muntu ukavua mufue kupita matuku anayi ne ukavua mubange kubola anyi?
“LAZALO, PATUKA!”
Yezu wakumvuila balunda bende bavua badila luse lua bungi (Tangila tshikoso 13-14)
13. Bilondeshile Yone 11:32-35, ntshinyi tshivua Yezu muenze pakamonaye Mariya ne bavuaye nabu badila? (Tangila kabidi tshimfuanyi.)
13 Bala Yone 11:32-35. Elabi meji a tshivua tshienzeke pashishe. Mariya wa ba Lazalo udi uya bua kusambakena ne Yezu. Udi wamba pende tshikavua Mâta wabu muambe ne: “Mukalenge, bu wewe muikalapu, muanetu kavua mua kufua to.” Yeye ne bavuaye nabu badi ne kanyinganyinga ka bungi. Pakabamona Yezu badila, biakamutonda bikole. Bu muvuaye umvuila balunda bende abu luse lua bungi, wakadila. Uvua mumanye mutubi bisama ku muoyo padi muntu ufua. Bushuwa, wakazuka bua kubisha Lazalo ku lufu.
14. Tshivua Yezu muenze pakamonaye Mariya udila tshidi tshitulongesha tshinyi bua Yehowa?
14 Tshivua Yezu muenze pakamonaye Mariya udila tshidi tshitulongesha ne: Yehowa udi Nzambi udi ne luse lua bungi. Bua tshinyi tudi tuamba nanku? Anu mutukavua bamone mu tshiena-bualu tshishale, malu adi Yezu wenza adi aleja mutu Tatuende umona malu ne umvua menemene. (Yone 12:45) Nanku patudi tubala ne: Yezu wakumvuila balunda bende bavua badila luse lua bungi kufikaye ne ku didila, tudi mua kuamba ne: Yehowa pende utu utumvuila luse lua bungi patuye utumona tudila bua kanyinganyinga. (Mis. 56:8) Bualu ebu kabuenaku bukupesha muoyo wa kusemena pabuipi menemene ne Nzambi wetu utu uditeka pa muaba wa bakuabu anyi?
Yezu wakaleja mudiye ne bukole bua kujula bafue (Tangila tshikoso 15-16)
15. Anu mudibu baleje mu Yone 11:41-44, ntshinyi tshiakenzeka ku lukita lua Lazalo. (Tangila kabidi tshimfuanyi.)
15 Bala Yone 11:41-44. Yezu wakafika ku lukita lua Lazalo, kuambaye bua bumbushe dibue divuabu bajikaku. Mâta wakabenga wamba ne: udi ne bua kuikala ukadi ununka. Yezu kumuandamuna ne: “Tshivua mukuambile ne: wewe muitabuje neumone butumbi bua Nzambi anyi?” (Yone 11:39, 40) Pashishe Yezu wakatangila muulu, kusambilaye kumpala kua bantu. Uvua musue bua Yehowa angata butumbi buonso bua tshikavua pa kuenzeka. Pashishe wakela dîyi ne: “Lazalo, patuka!” Lazalo wakapatuka mu lukita! Yezu wakenza bualu buvua bamue bela meji ne: kabuena mua kuenzeka to.
16. Mmunyi mudi muyuki udi mu Yone nshapita wa 11 ukolesha ditabuja dietu mu ditekemena dia dibishibua dia bantu ku lufu?
16 Bualu bua mu Yone nshapita wa 11 budi bukolesha ditabuja dietu mu ditekemena dia dibishibua dia bantu ku lufu. Mushindu kayi? Vuluka bualu buvua Yezu mulaye Mâta ebu: “Muanenu neajuke.” (Yone 11:23) Yezu udi pende ne dijinga ne bukole bua kukumbaja mulayi au anu bu Tatuende. Binsonji biende bidi bileja ne: udi ne dijinga dikole dia kumbusha lufu ne kanyinganyina kadilu lukebesha. Dîba divua Lazalo mupatuke mu lukita, Yezu wakaleja kabidi ne: udi ne bukole bua kubisha bafue. Ela kabidi meji a tshivua Yezu muvuluije Mâta etshi: “Tshivua mukuambile ne: wewe muitabuje neumone butumbi bua Nzambi anyi?” (Yone 11:40) Patudi bitabuje ne: Nzambi nealue kujula bafue bu mudiye mulaye, katuena baladile mayi mabole to. Kadi ntshinyi tshitudi mua kuenza bua kukolesha ditabuja dietu mu ditekemena dia dibishibua dia bantu ku lufu edi?
MUA KUKOLESHA DITABUJA DIETU
17. Mbualu kayi butudi ne bua kuvuluka patudi tubala malu a bantu bavuabu babishe ku lufu adi mu Bible?
17 Bala malu a bantu bavuabu babishe ku lufu uelele meji. Bible udi wakula bua bantu 8 bavuabu babishe ku lufu. c Kuenaku mua kukonkonona bualu bua muntu ne muntu bimpe bimpe anyi? Paudi wenda wenza nanku, uvuluke ne: bavua bantu betu ba mashi ne mâyi aba: balume, bakaji, ne bana. Keba tshidi malu au mua kukulongesha. Wele meji a mudi tshilejilu tshia muntu yonso tshileja mudi Nzambi ne dijinga ne bukole bua kujula bafue. Utambe kuelangana meji a dibishibua dia Yezu ku lufu bualu diodi didi ne mushinga wa bungi menemene. Uvuluke ne: bantu nkama ne nkama bakajadika muvuaye mubishibue ku lufu bualu bakamumona ne dibishibua diende ke didi ditamba kutupesha ditabuja dia ne: bafue nebabishibue.—1 Kol. 15:3-6, 20-22.
18. Leja muudi mua kuenza bua misambu yetu idi yakula bua dibishibua dia bantu ku lufu ikuambuluishe. (Tangila kabidi dimanyisha dia kuinshi kua dibeji.)
18 Enza bua “misambu ya mu nyuma” idi yakula bua ditekemena dia dibishibua dia bantu ku lufu ikuambuluishe. d (Ef. 5:19) Misambu ayi idi ileja bimpe ne: dibishibua dia bantu ku lufu nedienzeke bulelela ne idi ikolesha ditabuja dietu mu ditekemena dimpe edi. Ikale uyiteleja ne uyimba. Mu ntendelelu wa mu dîku, nuikale nuyukidilangana bua diumvuija dia mêyi ayi. Kuata mêyi ayi ku muoyo ne enza bua alenge muoyo webe. Dîba adi, wewe mupete disama dia lufu anyi mufuishe, nyuma wa Yehowa neakuvuluije misambu eyi bua ikusambe ne ikukoleshe.
19. Mmalu kayi atudi mua kudifuanyikijila tshikondo tshia dibishibua dia bantu ku lufu? (Tangila kazubu ka “ Neubebeje tshinyi?”)
19 Ikala udifuanyikijila malu mu lungenyi. Yehowa mmukufuke ne mushindu wa kudifuanyikija ukadi mu bulongolodi bupiabupia. Muanetu mukuabu wakamba ne: “Bua bungi bua dîba dindi muenze pamvua ndifuanyikija nkadi mu bulongolodi bupiabupia, bivua anu bu ne: nkavua ngumvua dipembu dia bilongo bienda bikanguka mu Mparadizu.” Fuanyikijabi utuilangana ne balume ne bakaji ba ditabuja badi Bible muakuile. Wewe udi muindile bua kutuilangana ne nganyi? Nnkonko kayi iwamuela? Fuanyikijabi kabidi umonangana ne bantu baudi mufuishe. Fuanyikijabi malu a kumpala anuenzelangana: mêyi a kumpala anuambilangana, munupukilangana ne disanka nuenda nupuekesha binsonji.
20. Tudi ne bua kudisuika bua kuenza tshinyi?
20 Tudi ne disanka dia bungi bua mulayi wa Yehowa wa dibishibua dia bantu ku lufu! Tuikale batuishibue ne: mulayi au neukumbane, bualu Yehowa udi ne dijinga ne bukole bua kuwukumbaja. Tuikalayi badisuike bua kutungunuka ne kukolesha ditabuja dietu mu mulayi muimpe eu. Tuetu tuenza nanku, netusemene pabuipi menemene ne Nzambi udi mulaye yonso wa kutudi ne: ‘Bantu baudi mufuishe nebajuke!’
MUSAMBU WA 147 Mbatulaye muoyo wa tshiendelele
a Biwikale ukadi mufuishe, kakuyi mpata, mulayi wa dibishibua dia bantu ku lufu udi ukukolesha bikole. Kadi mmunyi muudi mua kumvuija bakuabu bua tshinyi udi witabuja mulayi au? Ntshinyi tshiudi mua kuenza bua kukolesha ditabuja diebe mu dibishibua dia bantu ku lufu? Tshiena-bualu etshi netshikoleshe ditabuja dietu tuetu bonso mu mulayi wa dibishibua dia bantu ku lufu.
b Filme wa mijiki eu uvua ne dîna ne: Anu pabuipi apa. Uvua mupatuke mu ndongamu wa ku TV wa JW wa ngondo wa 11/2016.
c Tangila kazubu ka ne: “Bible udi wakula bua dibishibua dia bantu muanda mukulu ku lufu” mu Tshibumba tshia Nsentedi tshia 1/8/2015, dib. 4.
d Tangila misambu idi ilonda eyi mu mukanda wa ‘Tuimbile Yehowa ne disanka ne dîyi dikole’: “Fuanyikijabi palua bintu bionso bipiabipia!” (Musambu wa 139), “Tangila anu ku difutu!” (Musambu wa 144), ne wa “Neababikile” (Musambu wa 151). Tangila kabidi misambu ya pa buayi eyi mu jw.org eyi: “Anu pabuipi apa,” “Buloba bupiabupia bualua,” ne wa “Neumone!”
