1-2. Ntshinyi tshitudi ne bua kuenza patudi bindile bulongolodi bupiabupia?

 TUDI banange mulayi wa Yehowa wa kubutula ndongoluelu wa malu eu ne kujadika bulongolodi bupiabupia bua buakane. (2 Pet. 3:13) Nansha tuetu katuyi bamanye dîba diakumbana bualu ebu, malu adi enzeka adi ajadika ne: kubuakunengakana to.​—Mat. 24:32-34, 36; Bien. 1:7.

² Nunku nansha tuetu ne bidimu bungi kayi mu bulelela, tudi ne bua kukolesha ditabuja mu mulayi au. Bua tshinyi? Bualu ditabuja nansha diodi dikole, didi mua kuteketa dimue dituku. Ke bualu kayi mupostolo Paulo wakabikila dipangila ditabuja ne: “mpekatu udi utujingila bipepele.” (Eb. 12:1) Bua ditabuja dietu kubenga kuteketa, mbimpe tuikale tukonkonona bijadiki bidi bileja ne: bulongolodi bupiabupia nebulue mu katupa kîpi emu.​—Eb. 11:1.

3. Ntshinyi tshituakuila mu tshiena-bualu etshi?

³ Mu tshiena-bualu etshi netuakule bua malu asatu atudi ne bua kuenza bua kukolesha ditabuja dietu mu mulayi wa Yehowa wa bulongolodi bupiabupia: 1) kuelangana meji a mulambu wa tshia kupikulangana natshi, 2) kuela meji a bukole budi nabu Yehowa, ne 3) kudifila bikole mu malu adi atusemeja pabuipi ne Yehowa. Pashishe netuakule bua mudi mukenji uvua Yehowa mupeshe Habakuka utukolesha lelu. Tuanjayi kumona malu atudi mua kutuilangana nawu mpindieu adi alomba bua tuikale ne ditabuja dikole mu mulayi wa bulongolodi bupiabupia bualua.

 MALU ADI ALOMBA DITABUJA DIKOLE

4. Mmapangadika kayi adi alomba bua tuikale ne ditabuja dikole?

⁴ Matuku onso aa, tutu tuanganta mapangadika adi alomba bua tuikale ne ditabuja dikole. Tshilejilu, tutu tuangata mapangadika adi atangila balunda, dijikija lutetuku, tulasa, dibaka, bana, ne mudimu wa bianza. Mbimpe tudiebeje ne: ‘Mapangadika andi ngangata adi aleja ne: ndi mutuishibue ne: bulongolodi ebu mbua tshitupa tshîpi ne Nzambi ukadi pa kububutula ne kupingaja buende anyi?’ ‘Peshi ndi ngenza malu bu bantu badi bela meji ne: lufu ke ndekelu wa bionso?’ (Mat. 6:19, 20; Luka 12:16-21) Netuangate mapangadika mimpe tuetu tukolesha ditabuja dietu dia ne: bulongolodi bupiabupia bukadi pa kulua.

5-6. Bua tshinyi tudi dijinga ne ditabuja dikole patudi mu bikondo bia ntatu? Fila tshilejilu.

⁵ Tutu kabidi tutuilangana ne ntatu idi ilomba kuikala ne ditabuja dikole. Badi mua kutukengesha, tudi mua kupeta disama dia munanunanu, anyi malu makuabu adi mua kututekesha mu mikolo. Ku ntuadijilu tudi mua kumona ne: tudi tuyitantamena. Kadi padiyi inenga, nebitulombe kukolesha ditabuja bua kuyitantamena ne kutungunuka ne kuenzela Yehowa mudimu ne disanka.​—Lomo 12:12; 1 Pet. 1:6, 7.

⁶ Patudi mu ntatu tudi mua kuela meji ne: bulongolodi bupiabupia bua Yehowa kabuakulua to. Bualu ebu budiku bumvuija ne: ditabuja dietu nditekete anyi? Kabiena anu nanku to. Tuangatayi tshilejilu. Mvula yeye anu uloka mbingu milondangane, tudi mua kumona bu ne: munya kawakutema to. Kadi munya utu anu ulua kutema. Bia muomumue, patudi batshiokesha kudi malu, tutu mua kuela meji ne: bulongolodi bupiabupia kabuakulua nansha kakese. Kadi ditabuja dietu diodi dikole, dîba adi tudi bamanye ne: milayi ya Yehowa neikumbane. (Mis. 94:3, 14, 15; Eb. 6:17-19) Bu mutudi ne dishindika adi, mbimpe tutungunuke ne kuteka malu a mu nyuma pa muaba wa kumpala mu nsombelu wetu.

7. Mmuenenu kayi mubi wa malu utudi ne bua kuepuka?

⁷ Bualu bukuabu budi butulomba kuikala ne ditabuja dikole mmudimu wa diyisha. Bantu batutu tuyisha batu bela meji ne: “lumu luimpe” lua bulongolodi bupiabupia bua Nzambi bualua mbualu budi kabuyi mua kuenzeka to. (Mat. 24:14; Yeh. 33:32) Katulekedi mmuenenu wabu mubi eu utusaka bua kuitaba tshidibu bambe etshi to. Bua kuepuka mmuenenu au, tudi ne bua kutungunuka ne kukolesha ditabuja dietu. Tumonayi mishindu isatu itudi mua kuenza nanku.

IKALA WELANGANA MEJI A MULAMBU WA TSHIA KUPIKULANGANA NATSHI

8-9. Mmunyi mudi kuelangana meji a mulambu wa tshia kupikulangana natshi kukolesha ditabuja dietu?

⁸ Umue mushindu utudi mua kukolesha ditabuja dietu nkuelangana meji a mulambu wa tshia kupikulangana natshi. Mulambu eu ntshijadiki tshia ne: milayi ya Nzambi neikumbane. Tuetu bele meji a tshivuabu bafidile mulambu eu ne tshivua tshikengela kuenza bua kuwufila, netukoleshe ditabuja dietu dia ne: mulayi wa Nzambi wa kutupesha muoyo wa kashidi mu bulongolodi bupiabupia newukumbane bushuwa. Bua tshinyi tudi tuamba nanku?

⁹ Bivua bilomba tshinyi bua kufila mulambu wa tshia kupikulangana natshi? Yehowa wakatuma Muanende muanabute uvuaye munange bikole, mulunda wende wa pa muoyo, bua kuledibua pa buloba muikale muntu mupuangane. Yezu wakatantamena ntatu ya mishindu yonso pavuaye buloba. Pashishe wakakenga ne kufuaye lufu lubi menemene. Udi mumone tshivua Yehowa muitabe bua tshienzeke bua mulambu eu kufidibua anyi? Tatu wetu wa dinanga kavua mua kuanyisha bua Muanende akenge ne afue bua kupetesha anu  bantu nsombelu muimpe kadi wa tshitupa tshîpi to. (Yone 3:16; 1 Pet. 1:18, 19) Bu muvua Yehowa muitabe bua Yezu kufua, neenze bua tuikale ne muoyo wa kashidi mu bulongolodi bupiabupia.

IKALA WELA MEJI A BUKOLE BUDI NABU YEHOWA

10. Bilondeshile Efeso 3:20, Yehowa udi ne bukole bua kuenza tshinyi?

¹⁰ Mushindu muibidi wa kukolesha ditabuja dietu nkuela meji a bukole budi nabu Yehowa. Udi ne bukole bua kukumbaja malu onso adiye mulaye. Mu bulelela, bantu badi mua kumona ne: mulayi wa kuikala ne muoyo wa kashidi mu bulongolodi bupiabupia kawakukumbana to. Kadi Yehowa utu utamba kulaya malu adi bantu kabayi mua kukumbaja nansha kakese. Yeye muine si udi Wa Bukole Buonso. (Yobo 42:2; Mâko 10:27) Nanku kabiena bitukemesha padiye ulaya bua kuenza malu a kukema to.​—Bala Efeso 3:20.

11. Fila tshilejilu tshia umue wa ku milayi ya dikema ya Nzambi. (Tangila kazubu ka ne: “ Imue milayi ya dikema idi mikumbane.”)

¹¹ Tumonayi amue malu avua Yehowa mulaye bantu bende ku kale avua amueneka kaayi mua kuenzeka. Wakajadikila Abalahama ne Sala ne: bavua ne bua kulela muana wa balume nansha mukavuabu bakulakaje. (Gen. 17:15-17) Kumuambilaye kabidi ne: bavua ne bua kupesha ndelanganyi yende buloba bua Kanâna. Bu muvua bena Isalele bavua ndelanganyi ya Abalahama mu bupika mu Ejipitu munkatshi mua bidimu bia bungi, bivua bimueneka bu ne: mulayi au kawuvua mua kukumbana to. Kadi wakakumbana. Pashishe, Yehowa wakamanyisha Elizabeta ukavua mukulakaje ne: uvua ne bua kulela muana. Wakambila kabidi Mariya utshivua kamama ne: uvua ne bua kulela muana wa Nzambi ukavua Yehowa mumanyishe dilua diende bidimu binunu bia bungi mu budimi bua Edene. Eu mmulayi mukuabu uvua mukumbane.​—Gen. 3:15.

12. Yoshua 23:14 ne Yeshaya 55:10, 11 udi utujadikila tshinyi bua bukole budi nabu Yehowa?

¹² Tuetu tuela meji a milayi ya Yehowa idiye mulaye ne mukumbaje, tudi tukolesha ditabuja dietu mu bukole budiye nabu bua kutubueja mu bulongolodi bupiabupia. (Bala Yoshua 23:14; Yeshaya 55:10, 11.) Bualu ebu budi butulongolola bimpe bua tuikale tuambuluisha bakuabu bua kujingululabu ne: mulayi wa bulongolodi bupiabupia ki ntshilota anyi bualu busuikakaja to. Yehowa nkayende wakamba bua diulu dipiadipia ne buloba bupiabupia ne: “Mêyi aa nga lulamatu ne mmalelela.”​—Buak. 21:1, 5.

IKALA UDIFILA MU DIENZA MALU ADI AKUSEMEJA PABUIPI NE YEHOWA

13. Mmunyi mudi bisangilu mua kukolesha ditabuja dietu? Umvuija.

¹³ Mushindu muisatu utudi mua kukolesha ditabuja dietu nkudifila bikole mu malu adi atusemeja pabuipi ne Yehowa. Tshilejilu, elabi meji a mutu bisangilu bituambuluisha. Muanetu Ana ukadi ne bidimu bia bungi mu midimu mishilashilangane ya ku dîba ne ku dîba udi wamba ne: “Bisangilu bitu bikolesha ditabuja dianyi. Nansha ngamba-malu kayi mupiluke mu dilongesha anyi kayi wamba bualu buenyi kundi, ntu mpeta anu bualu butu buenza bua ngikale ne ngumvuilu muimpe wa bulelela bua mu Bible, ne bualu abu butu bukolesha ditabuja dianyi.” b Kakuyi mpata, tutu tusanka kabidi bua mandamuna adi akolesha ditabuja atu bakuabu bafila.​—Lomo 1:11, 12; 10:17.

14. Mmunyi mudi mudimu wa kuyisha ukolesha ditabuja dietu?

¹⁴ Tutu tukolesha kabidi ditabuja dietu patudi tuyisha. (Eb. 10:23) Muanetu Barbara ukadi muenze bidimu bipite 70 mu mudimu  wa Yehowa udi wamba ne: “Ntu mmona anu ne: mudimu wa kuyisha utu ukolesha ditabuja. Pantu ntungunuka ne kuambila bakuabu bua milayi mimpe ya Yehowa, ditabuja dianyi ditu dienda dikola.”

15. Mmunyi mudi didilongela dikolesha ditabuja dietu? (Tangila kabidi bimfuanyi.)

¹⁵ Tshintu tshikuabu tshitu tshikolesha ditabuja dietu ndidilongela. Muanetu Susan mmumone ne: kuikala ne programe wa kudilongela kutu kumuambuluisha. Udi wamba ne: “Mu Dia lumingu, ntu ndilongela tshiena-bualu tshia Tshibumba tshia Nsentedi tshia lumingu ludi lulonda. Mu Dimue ne mu Dibidi, ntu ndongolola bisangilu bia munkatshi mua lumingu. Matuku makuabu atu ashala, ntu ndilongela malu makuabu.” Bu mutuye unemeka programe wende wa kudilongela, ditabuja diende ditu dienda dikola. Muanetu Irene udi muenze mudimu ku biro bietu binene munkatshi mua bidimu bia bungi mmumone ne: kulonga mêyi a buprofete a mu Bible kudi kukolesha ditabuja. Udi wamba ne: “Bitu binkemesha bikole pandi mmona mudi mêyi a buprofete akumbana too ne mu katoba.” c

“NETSHIKUMBANE BULELELA”

16. Bua tshinyi tshivua Yehowa mujadikile Habakuka tshidi tshituambuluisha petu lelu? (Ebelu 10:36, 37)

¹⁶ Bamue batendeledi ba Yehowa mbindile nshikidilu wa ndongoluelu wa malu eu kukadi bidimu bia bungi. Bamue badi mua kumona bu ne: mulayi eu kawakukumbana mpindieu to. Yehowa mmumanye mudi bantu bende bumvua bua bualu abu, ke bualu kayi wakajadikila muprofete Habakuka ne: “Tshikena kumona etshi tshitshidi bua tshikondo tshiatshi tshisungula, ne tshidi tshiya lubilu ku ndekelu kuatshi, ne katshiakushima to. Nansha tshiotshi ne bua kunenga, tungunuka ne kutshitekemena! Bualu tshiotshi netshikumbane bulelela. Katshiakujanguluka nansha!” (Hab. 2:3) Nzambi  uvuaku mujadikile Habakuka nanku anu bua diakalenga diende nkayende anyi? Peshi mêyi avuaye mumuambile au adi atuambuluisha petu lelu? Nyuma muimpe wakasaka mupostolo Paulo bua kuambila bena Kristo badi batekemene pabu bulongolodi bupiabupia mêyi au. (Bala Ebelu 10:36, 37.) Mbimpe tutuishibue ne: nansha lupandu ludibu batulaye kaluyi lulua ne lukasa, nelulue bulelela. ‘Kaluakujanguluka nansha!’

17. Mmunyi muvua muanetu wa bakaji mutumikile mubelu uvua Yehowa mupeshe Habakuka?

¹⁷ Batendeledi ba Yehowa ba bungi mbatumikile mubelu wa Yehowa wa ‘kutungunuka ne kutekemena’ munkatshi mua bidimu bia bungi. Tshilejilu, muanetu Louise udi mutuadije kuenzela Yehowa mudimu mu 1939 udi wamba ne: “Tshikondo atshi, mvua ngela meji ne: Armagedone uvua mua kulua kumpala kua meme kujikija tulasa tubandile. Kadi ki ntshiakenzeka to. Mu kupita kua bidimu, ngakamona ne: pamvua mbala malu a mu Bible a bantu bavua bindile bua kumona dikumbana dia milayi ya Yehowa mbingambuluishe bua kuindila dikumbana dia milayi yende. Ngakabala bualu bua Noa, bua Abalahama, bua Jozefe ne malu a bantu bakuabu bavua bindile tshikondo tshile kumpala kua kupetabu difutu divuabu babalaye kudi Yehowa. Kushala mutekemene dikumbana dia milayi kuvua kungambuluishe meme ne bantu bakuabu bua kutuishibua ne: bulongolodi bupiabupia bukadi pabuipi. Bantu ba bungi badi benzele Yehowa mudimu kukadi bidimu bia bungi badi bitaba pabu bualu ebu.

18. Mmunyi mudi kubandila bufuki kukolesha ditabuja dietu mu mulayi wa bulongolodi bupiabupia bualua?

¹⁸ Mu bulelela, bulongolodi bupiabupia ki mbuanji kulua to. Kadi ela meji a bintu bidiku ebi: mitoto, mitshi, nyama, ne bantu. Nansha muvua bintu ebi kabiyiku tshikondo kampanda, kakuena muntu udi mua kuela dikalaku diabi mpata to. Bidiku lelu eu anu bualu Yehowa wakabifuka. (Gen. 1:1, 26, 27) Nzambi wetu mmulaye kabidi bua kujadika bulongolodi bupiabupia. Neakumbaje mulayi eu. Mu bulongolodi bupiabupia bantu nebikale ne muoyo wa kashidi ne makanda a mubidi mimpe. Tuikale batuishibue ne: bulongolodi bupiabupia nebulue dîba didi Nzambi mulongolole.​—Yesh. 65:17; Buak. 21:3, 4.

19. Mmunyi muudi mua kukolesha ditabuja diebe?

¹⁹ Bua mpindieu, enza tshionso tshidi tshikengela bua kukolesha ditabuja diebe. Ikala uleja dianyisha bua mulambu wa tshia kupikulangana natshi. Ikala wela meji a bukole budi nabu Yehowa. Ikala udifila bikole mu malu adi akusemeja pabuipi ne Nzambi. Wewe wenza malu aa, newikale pebe munkatshi mua “bantu badi bapiana milayi ku diambuluisha dia ditabuja ne lutulu.”​—Eb. 6:11, 12; Lomo 5:5.