Mbandele mu 1955. Mbatulele basatu ba balume kuetu, meme ke wa mukala. Ndi mukolele mu tshimenga tshidibu babikila lelu ne: Vantaa. Tshidi lua ku sud kua Finlande pabuipi ne Mbuu.

Mamu wakabatijibua, kuluaye Ntemu wa Yehowa bidimu ndambu kumpala kua yeye kundela. Kadi tatu kavua munange bulelela to. Kavua wanyishila mamu bua atulongeshe Bible anyi ikale uya netu mu bisangilu to. Ke bualu kayi uvua utulongesha malongesha a nshindamenu a mu Bible pavua tatu kayiku to.

Katshia ku buana buanyi, mvua anu ntumikila Yehowa. Tshilejilu, pamvua ne bidimu 7, mulongeshi wetu wa bakaji wakamfiikila munda bualu mvua mbenga kudia diampa dia tshiena Finlande dia dienza ne mashi (verilättyjä). Wakambonda mu matama ne tshianza tshimue bua kunkangula mukana, tshianza tshikuabu tshivua ne nsomo uvua ne diampa adi divuaye ukeba kungela mukana ku bukole. Kadi ngakakuma tshintu ku nsomo au, kumutukayi mu tshianza.

Tatu wakafua pamvua ne bidimu 12. Ke meme kutuadija kuya mu bisangilu mudilekelele. Bena Kristo ba mu tshisumbu tshietu bakangambuluisha bikole bua kusemena pabuipi ne Yehowa. Ngakatuadija kudibadila Bible dituku dionso ne kulonga mikanda yetu ne muoyo mujima. Bua bualu abu, pangakakumbaja bidimu 14, ngakabatijibua mu dia 8/8/1969.

 Matuku makese meme mumane kujikija tulasa tua bikadilu, ngakatuadija bumpanda-njila bua pa tshibidilu. Mu mbingu mikese yakalonda, ngakaya mu Pielavesi, tshimenga tshidi lua munkatshi mua Finlande, muvuabu dijinga ne bamanyishi ba bungi.

Mu Pielavesi amu, ngakapetanganamu ne Sirkka nsongakaji wakalua mukajanyi munanga. Ngakamunanga bikole bualu uvua munange Yehowa bikole ne uvua ne budipuekeshi. Kavua ukeba butumbi anyi bubanji to. Bubidi buetu tuvua basue kuenzela Yehowa mudimu bikole, ne tuvua basue kuenza mudimu onso uvuabu mua kutupesha. Ngakamusela mu dia 23/3/1974. Pamutu pa kuya mu luendu lua masanka bua dibaka dietu, tuakaya mu Karttula, kamusoko ka mu Finlande, muvuabu dijinga ne bamanyishi ba bungi.

Katshia ku ntuadijilu kua dibaka dietu, Yehowa mmuambule bujitu buetu bualu tuvua bateke anu malu a Bukalenge pa muaba wa kumpala. (Mat. 6:33) Tshilejilu, katuvua ne mashinyi mu Karttula amu to. Tuvua anu ne makalu. Kadi mu muvu wa mashika, mashika avua atua ne ku dînu. Tuvua dijinga ne mashinyi bua kuyisha mu teritware yonso mualabale wa tshisumbu tshietu. Kadi katuvua ne makuta a kusumba mashinyi to.

Dimue edi, mukuluanyi undi mulonde wakalua kutumona. Yeye kutupesha manyishi ende. Akavua ne mikanda. Tshivua tshitushadile tshivua tshia kuelamu kasolonyi. Ke mutuakapeta mashinyi nanku.

Yehowa wakatupesha tshionso tshituvua natshi dijinga. Wetu mudimu uvua anu wa kuteka malu a Bukalenge buende pa muaba wa kumpala.

Patuakabuela mu Kalasa ka bampanda-njila mu 1978, muanetu Raimo Kuokkanen, a umue wa ku balongeshi ba mu kalasa aku, wakandomba bua kuuja dilomba bua Kalasa ka Gilada. Tuetu kutuadija kulonga Anglais ne meji a kuya ku kalasa aku. Kadi mu 1980, kumpala kua tuetu kuuja dilomba adi, bakatubikila ku Betele mu Finlande. Tshikondo atshi, bena ku Betele kabavua mua kuuja dilomba bua kuya ku Kalasa ka Gilada to. Tuvua basue kuenzela Yehowa mudimu muaba uvuaye yeye musue, ki ngutuvua tuetu basue to. Ke tuetu kuitaba, kuya ku Betele. Nansha nanku,  tuakatungunuka anu ne kulonga Anglais ne meji a ne: tuvua mua kulua kupeta mpunga wa kuuja dilomba bua kuya ku Kalasa ka Gilada.

Bidimu ndambu pashishe, Kasumbu kaludiki kakitabila bena ku Betele bua kuuja dilomba bua kuya ku Kalasa ka Gilada. Diakamue tuetu kuuja dilomba adi kabiyi ne: bualu mudimu wa ku Betele kawuvua utusankisha to. Uvua utusankisha! Tuvua anu basue kuikala pabuipi ne bakumbane bua kuambuluisha muaba onso uvuabu dijinga ne bamanyishi. Bakatubikila ku Kalasa ka Gilada ka 79, tuetu kupeta mapoloma aku mu ngondo wa 9/1985. Pashishe kututumabu mu Colombie.

Bakanji kututuma ku Betele mu Colombie. Ngakenza mudimu uvuabu batupeshaku ne muoyo mujima. Kadi panyima pa tshidimu tshimue, ngakamona ne: bivua bikengela batushintulule. Bua musangu wa kumpala mu nsombelu wanyi, ngakalomba bua bashintulule mudimu uvuabu bampeshe. Ke kututumabu bamisionere mu tshimenga tshia Neiva, mu musoko wa Huila.

Mvua anu munange mudimu wa buambi katshia konso eku. Pantshivua mujike ne muikale mpanda-njila mu Finlande, kuvua misangu imvua ntuadija buambi mu dinda menemene nya too ne butuku. Pantshivua nselelaku Sirkka, tuvua tuyisha nende pa tshibidilu dituku dijima. Patuvua tuya kuyisha mu teritware ya kule, kuvua matuku atuvua tuladila mu mashinyi etu au. Bivua bituambuluisha bua kubenga kupitshisha dîba dia kuenza luendu ne bituambuluisha bua kutuadija buambi patshiatshia dituku divua dilonda.

Patuvua bamisionere, mudimu wa buambi wakatuadija kabidi kutusankisha anu muvuawu utusankisha patutshivua tubuelelaku mu dibaka. Tshisumbu tshituvua tshiakatanta. Bena Kristo ba mu Colombie bavua bantu ba dianyisha, bavua banangangane, ne banemekangana.

Tshimenga tshia Neiva tshivuabu batutume tshivua tshituangane mutumba ne bimenga bikuabu bivua kabiyi ne Bantemu. Mvua anu nsamisha mutu bua muvua bena mu bimenga abi mua kupeta lumu luimpe. Kadi bu muvua mu bimenga abi mvita pankatshi pa basalayi ba ditunga ne bisumbu bia bantomboji, kabivua bimpe bua benyi kuya kusombelamu to. Nanku ngakasambila bua nansha muntu umue wa mu bimenga abi alue Ntemu wa Yehowa. Mvua njinga bua muntu umue au alue kusombela mu Neiva bua alonge bulelela. Ngakasambila kabidi bua pavuaye ubatijibua ne ukola mu nyuma, apingane kuabu bua kulongeshangana bulelela. Mvua mumanye ne: Yehowa ke uvua mumanye tshivua tshimpe tshia kuenza bua bualu abu.

Pakapita matuku, ngakatuadija kulonga Bible ne Fernando González utshivua nsonga. Uvua wa mu tshimenga tshia Algeciras, tshimue tshia ku bimenga bivua kabiyi ne Ntemu wa Yehowa nansha umue abi to. Fernando uvua wenza luendu lua kilometre 50 bua kulua kuenza mudimu mu tshimenga tshituvua tshia Neiva. Uvua ulongolola dilonga dionso bimpe bitambe ne wakatuadija diakamue kubuela mu bisangilu. Katshia anu lumingu lua kumpala lutuakatuadija kulonga nende, uvua usangisha bantu ba mu musoko wabu, ubalongesha malu a mu Bible amvua mmulongesha.

Fernando wakabatijibua mu ngondo wa 1/1990, ngondo isambombo panyima pa dilonga dietu nende. Pashishe kuluaye mpanda-njila  wa pa tshibidilu. Bu mukavua muntu umue wa mu Algeciras mulue Ntemu, bivua mpindieu bikumbane bua Betele kutumamu bampanda-njila ba pa buabu. Mu ngondo 2/1992, tshisumbu tshiakenjibuamu.

Fernando wakashala uyishila anu mu musoko wabu amu anyi? Tòo. Pakaselaye, yeye ne mukajende bakaya mu San Vicente del Caguán, tshimenga tshikuabu muvua kamuyi Bantemu to. Bakayishamu bikole, tshisumbu kuenzekamu. Mu 2002, bakateka Fernando mutangidi wa tshijengu. Yeye ne mukajende Olga batshidi mu mudimu eu too ne lelu.

Bualu ebu mbundongeshe ne: kusambila, kulomba malu masunguluke adi atangila mudimu wa Yehowa, kudi ne mushinga wa bungi. Yehowa udi wenza malu atudi tuetu katuyi mua kuenza to. Mu kuamba kuimpe, mudimu wa dinowa nguende yeye, ke nguetu tuetu to.—Mat. 9:38.

Mu 1990, bakatutuma mu mudimu wa butangidi buena ngendu. Tshijengu tshia kumpala tshiakatutumabu tshivua mu tshimenga tshikulu tshia Bogotá. Tuvua bumvue buôwa bua mudimu au. Meme ne mukajanyi tuvua anu bantu betu ba tshianana aba, katuyi ne mamanya a pa buawu to. Katuvua bibidile kusombela mu tshimenga muvua bantu ba bungi to. Kadi Yehowa wakakumbaja mulayi wende udi mu Filipoyi 2:13 wa ne: “Nzambi yeye ke udi unupesha dikanda, unupesha dijinga ne bukole bua kuenza malu adi amusankisha.”

Bakalua kututuma kabidi mu butangidi bua tshijengu mu tshimenga tshia Medellín, tshimvua mutele ku ntuadijilu. Bantu ba mu Medellín bakavua bibidilangane ne malu a tshikisu avua enzekamu. Kaatshivua kabidi abambila bualu to. Tshilejilu, dimue edi tuvua basombele mu nzubu ndombola dilonga dia Bible, bantu kutuadija kuasangana bingoma pambelu. Nkamvua nsua kulala mu buloba mutue tshiadi panshi, kadi mulongi wanyi wa Bible au uvua anu mutukije, utungunuka ne kubala bikoso. Pakajikijaye kubala bikoso, wakandomba bua nganji ngindile apatuke pambelu. Katantshi aka kualukilaye ungambila anu mutukije ne: “Mfuila luse, mvua muye kuangata bana banyi aba.”

Kuvua misangu mikuabu ituvua batuilangane ne njiwu ya lufu. Dimue edi, patuvua mu buambi bua ku nzubu ne ku nzubu, mukajanyi wakalua lubilu mutangile kundi ne dipampakana. Kuambaye ne: muntu uvua mumuele masashi. Kunkemeshabi. Kadi tuakalua kumanya ne: muntu au kavua musue kumuasa yeye to; uvua wasa muntu mulume mukuabu uvua upitshila pabuipi nende.

Mu kupita kua matuku, tuakatuadija kuibidilangana ne nsombelu wa tshikisu au. Tshivua tshitupeteshe bukole ndikima dia bena Kristo netu ba mu tshimenga atshi bavua batuilangana ne nsombelu ayi ne ivua mibi kupita ayi. Tuakamona ne: Yehowa ke uvua ubambuluisha, ne uvua ne bua kutuambuluisha petu. Tuvua anu tutumikila mibelu ya bakulu ba mu tshimenga atshi, tuenza tshivua tshikengela bua kudikuba, ne tulekela bivua bishala mu bianza bia Yehowa.

Kadi imue nsombelu ituvua tutuilangana nayi kayivua anu ya njiwu ya bungi menemene mutuvua bayelele meji to. Dimue edi tuvua mu buambi  mu nzubu mua muntu, tuetu kumvua mutoyi pambelu anu bu bantu bakaji babidi benda bapendangana. Tshivua musue kumona bantu batandangana to, kadi muena kumbelu aku wakangambila bua tupatukile mu lutanda. “Matandu” au avua enzeka pankatshi pa nkusu ibidi ivua yambulula bipendu bia bena mutumba. Bualu bua dikema!

Mu 1997, bakanteka mulongeshi mu Kalasa ka dilongesha b mudimu. Kubuela mu tulasa tua malu a Yehowa kuvua anu kunsankisha, kadi tshivuaku muele meji ne: dimue edi mvua mua kushala panyi mulongeshi wa mu tulasa atu to.

Bakalua kunteka mutangidi wa distrike. Kadi pakashipabu mudimu au, bakampingaja mutangidi wa tshijengu. Nkadi ne bidimu bipite pa 30 mu butangidi bua tshijengu ne mu dilongesha mu tulasa tua malu a Yehowa. Midimu eyi mmimpeteshe masanka a bungi. Kadi muvua kabidi ntatu. Indilayi nnulondele.

Mvua muntu wa dikima dia bungi. Ke tshiakangambuluisha bua kutantamena nsombelu mikole ayi. Kadi kuvua misangu imvua ne tshisumi mu diakaja malu a mu bisumbu ngela ne kalele. Dimue edi, ngakabela bamue bena Kristo bua bikale banangangane ne kabikadi bena malu makole to. Kadi tshikondo atshi, tshivua ne ngikadilu imvua mbabela bua bikale nayi ayi to.—Lomo 7:​21-23.

Bua matekete anyi au, kuvua misangu imvua nteketa bikole mu mikolo. (Lomo 7:24) Umue musangu, ngakasambila bua ndekele mudimu wa bumisionere, mpingane muetu mu Finlande. Tuvua ne bisangilu dilolo dia dituku dimvua muenze disambila adi. Dikankamija dingakapetamu diakantuishisha ne: bivua bikengela ntungunuke ne kuenza mudimu wanyi ne ngakaje bilema bianyi. Too ne lelu eu, mushindu uvua Yehowa muandamune disambila dianyi adi utshidi untua ku muoyo bikole. Bualu bukuabu budi ne: ndi ne dianyisha dia bungi kudiye bua mudiye mungambuluishe bua kujikija matekete anyi.

Meme ne mukajanyi Sirkka tudi ne dianyisha dia bungi kudi Yehowa bua mudiye mutuanyishile bua kumuenzela mudimu wa ku dîba ne ku dîba katshia ku bunsonga buetu. Ndi kabidi ne dianyisha kudi Yehowa bua mudiye mumpeshe mukaji udi munnange ne udi mundamate munkatshi mua bidimu bionso ebi.

Nkadi pa kukumbaja bidimu 70. Pakumbanabi, nebangumbushe mu mudimu wa butangidi bua tshijengu ne wa bulongeshi mu kalasa ka malu a Nzambi. Kadi kabiena bimbungamija to. Bualu ndi mutuishibue ne: tshidi tshitumbishisha Yehowa, ndimuenzela mudimu ne budipuekeshi, ne tudi tumutumbisha patudi tumuleja dianyisha ne tumunanga ne muoyo mujima. (Mika 6:8; Mâko 12:​32-34) Bua tuetu kutumbisha Yehowa, kabiena bikengela anu tuikale bamanyike mu bulongolodi buende to.

Pandi ntangila midimu indi muenze mu bulongolodi bua Yehowa, ndi mmona ne: tshiena muyenze bualu mvua mupite bakuabu anyi bualu mvua ne mamanya a pa buawu to. Kadi mbua ngasa wa Yehowa. Mmunganyishile bua kumuenzela midimu eyi nansha mundi ne matekete. Ndi muyenze bualu uvua ungambuluisha. Mu mushindu eu ke muvua matekete anyi matumbishishe bukole bua Nzambi.—2 Kol. 12:9.