1. Mmunyi mutu bamue bumvua bua kuyisha bakuabu? (Tangila kabidi tshimfuanyi.)

 TUETU batendeledi ba Yehowa tutu tuyisha bantu bualu tudi banange Tatuetu wa mu diulu ne tudi basue kubambuluisha bua bafike ku dimumanya. Mudimu wa buambi utu usankisha bamanyishi ba bungi, kadi kawutu usankisha bakuabu to. Bamue ba kudibu badi mua kuikala ne bundu anyi badimona kabayi bakumbane bua kuyisha. Bakuabu kabutu basue kuya ku mbanza ya bantu padibu kabayi bababikile anyi batu bumvua buôwa bua ne: badi mua kuya kubipata. Banga batu bobu babenga kuya kuyisha bantu, bela meji ne: bidi mua kupa bantu abu tshiji. Bakuabu pabu mbabalongeshe mua kuepuka bilumbu. Nansha mudi bana betu aba banange Yehowa bikole, bitu bibakolela bua kuyisha bantu badibu kabayi bamanye lumu luimpe. Kadi mbamanye ne: mudimu eu udi ne mushinga wa bungi, ne batu bayisha bakuabu pa tshibidilu. Yehowa utu usanka bikole patubu benza nanku!

2. Mudimu wa buambi owu kawuyi ukusankisha, bua tshinyi kuena ne bua kuteketa mu mikolo?

² Kudi misangu itu kuenza mudimu wa buambi kakuyi pebe kukusankisha anu bu bamanyishi batudi batele aba anyi? Biobi nanku, kuteketshi mu mikolo to. Didimona kuyi mukumbane bua kuyisha didi dileja ne: udi ne budipuekeshi, kuyi musue kukoka ntema ya bakuabu kuudi, ne kuena musue kufiikisha bakuabu munda to. Muntu nansha umue katu musue kufiikisha bakuabu munda to, nangananga padiye musue kubenzela malu mimpe. Tatuetu wa mu diulu mmumanye ntatu yebe bimpe ne mmusue kukuambuluisha. (Yesh. 41:13) Mu tshiena-bualu  etshi, netumone malu atanu a kuenza patudi tudimona katuyi bakumbane, ne mudi mudimu wa buambi mua kutusankisha.

ENZA BUA DÎYI DIA NZAMBI DIKUKOLESHE

3. Ntshinyi tshivua tshiambuluishe muprofete Yelemiya bua kuyisha?

³ Katshia ku kale, mukenji wa Nzambi mmukoleshe batendeledi bende pavuabu ne mudimu mukole wa kuenza. Tuakulayibi bua muprofete Yelemiya. Pavua Yehowa mumupeshe mudimu wa kuyisha, wakumvua buôwa, kuambaye ne: “Tshiena mumanye mua kuakula, bualu ntshidi anu muana.” (Yel. 1:6) Kadi Dîyi dia Nzambi diakamuambuluisha bua kubenga kumvua buôwa. Wakamba ne: “Diakalua munda muanyi bu kapia kadi kosha kabuta mu mifuba yanyi, ne ngakatshioka ne kudilama munda muanyi.” (Yel. 20:​8, 9) Nansha muvua Yelemiya ne bua kuyisha bantu bavua kabayi mua kumuteleja, mukenji uvua Yehowa mumuambile bua kumanyisha wakamupetesha bukole bua kukumbaja mudimu uvuaye mumupeshe.

4. Ntshinyi tshidi tshienzeka patudi tubala Dîyi dia Nzambi ne tuelangana meji a bitudi tubalamu? (Kolosayi 1:​9, 10)

⁴ Mukenji wa Nzambi udi mu Bible ke udi upetesha bena Kristo bukole. Pavua mupostolo Paulo mufundile bena mu tshisumbu tshia Kolosayi, wakabambila ne: kupeta dimanya dijalame kuvua ne bua kubambuluisha bua “kuenda mu mushindu udi muakanangane ne Yehowa” ‘pavuabu benda kukuama mamuma mu mudimu wonso muimpe.’ (Bala Kolosayi 1:​9, 10.) Mu mudimu au muvua kabidi kuyisha lumu luimpe. Patudi tubala Dîyi dia Nzambi ne tuelangana meji a bitudi tubalamu, ditabuja dietu kudi Yehowa didi dikola ne tudi tumanya bua tshinyi bidi ne mushinga bua kuyisha mukenji wa Bukalenge.

5. Mmunyi mutudi mua kumvua malu a mu Bible bimpe patudi tuabala ne tualonga?

⁵ Bua tuetu kufika ku diumvua malu adi mu Dîyi dia Nzambi bimpe, katuena ne bua kuabala, kualonga, ne kuelela meji lubilu lubilu to. Mbimpe kuakebela dîba. Paudi ufika pa mvese wa mu Bible uudi kuyi umvua bimpe, kumutupiki to. Keba diumvuija diende mu Index des publications des Témoins de Jéhovah anyi mu Mukanda wa makebulula wa Bantemu ba Yehowa. Wewe ukeba dîba dia kudilongela, neutuishibue bikole ne: malu adi Bible wamba mmalelela. (1 Tes. 5:21) Paudi wenda  utuishibua nanku, newikale ne disanka dia kuambila bakuabu malu audi ulonga.

DILONGOLOLA BIMPE KUMPALA KUA KUYA MU BUAMBI

6. Tudi ne bua kudilongolola bimpe kumpala kua kuya mu buambi bua tshinyi?

⁶ Wewe udilongolola bimpe kumpala kua kuya mu buambi, kuakuikala pamuapa upeta kabuôwa bua kuyukila ne bantu to. Yezu wakalongolola bayidi bende bimpe kumpala kua kubatumaye mu buambi. (Luka 10:​1-11) Pavuabu batumikile malu avuaye mubalongeshe, bakumvua disanka dia bungi bua malu avuabu bakumbaje mu mudimu au.—Luka 10:17.

7. Mmushindu kayi utudi ne bua kudilongolola kumpala kua kuya mu buambi? (Tangila kabidi tshimfuanyi.)

⁷ Mmushindu kayi utudi mua kudilongolola kumpala kua kuya mu buambi? Mbimpe tuele meji a malu atuambila bantu ne mua kubambilawu mu etu mêyi. Bidi bikengela kabidi tudianjile kuela meji a amue malu atu bantu ba mu teritware wetu batamba kutuenzela ne mutudi mua kupita nawu. Mpindieu, patudi tuyukila nabu, mbimpe tuikale badilekelele, tufukisha mimuemue, ne tuyukila nabu ne musangelu.

8. Mmushindu kayi udi bena Kristo bafuanangane ne tshivuadi tshienza ne buloba tshivua mupostolo Paulo muakuile?

⁸ Mupostolo Paulo wakaleja bena Kristo tshivuabu ne bua kuenza mu mudimu wa kuyisha pavuaye mubambile ne: “Tudi ne tshiuma etshi mu bivuadi bienza ne buloba.” (2 Kol. 4:7) Ntshiuma kayi atshi? Mmudimu wa diyisha mukenji wa Bukalenge udi usungila mioyo ya bantu. (2 Kol. 4:1) Bivuadi bia buloba bidi bileja tshinyi? Bidi bileja bena mudimu ba Yehowa badi bamanyisha bakuabu lumu luimpe. Mu tshikondo tshia Paulo, bangenda mushinga bavua bambuila bintu bia mushinga bu mudi: biakudia, mvinyo, ne makuta mu milondo ya diima. Bia muomumue, Yehowa mmutupeshe mudimu wa kuamba lumu luimpe udi pawu wa mushinga. Yehowa neatupeshe bukole bua kutungunuka ne kuyisha.

LOMBA YEHOWA DIKIMA

9. Mmunyi mutudi mua kujikija buôwa patudi tuyisha bantu? (Tangila kabidi tshimfuanyi.)

⁹ Kudi misangu itudi tutshina bantu tuela  meji ne: kabakuteleja bituabambila to. Ntshinyi tshitudi mua kuenza bua kujikija buôwa abu? Tumonayi disambila divua bapostolo benze pavuabu babakandike bua kuyisha. Kabakumvua buôwa to, kadi bakalomba Yehowa bua abambuluishe “batungunuke ne kuamba dîyi diende ne dikima dionso.” Yehowa wakandamuna disambila diabu anu dîba adi. (Bien. 4:​18, 29, 31) Tudi petu mua kulomba Yehowa diambuluisha tuetu tumvua buôwa bua kuyisha. Mulomba akuambuluishe bua kunanga bantu bikole, bua kuikadi utshina bua kubayisha to.

10. Mmunyi mudi Yehowa utuambuluisha bua kuyisha? (Yeshaya 43:​10-12)

¹⁰ Yehowa mmututeke Bantemu bende ne mmutulaye bua kutupetesha dikima. (Bala Yeshaya 43:​10-12.) Tumonayi mishindu inayi idiye utupeteshadi. Wa kumpala, Yezu udi netu dîba dionso ditudi tuyisha lumu luimpe. (Mat. 28:​18-20) Muibidi, Yehowa udi utuma banjelu bende bua kutuambuluisha. (Buak. 14:6) Muisatu, Yehowa udi utupesha nyuma wende muimpe bua tuvuluke malu atukadi balonge. (Yone 14:​25, 26) Muinayi, mmutupeshe bena Kristo badi batufila mu mudimu wa buambi. Bu mudi Yehowa ne bena Kristo netu batuambuluisha, mbipepele bua tuetu kuikala ne dikima ne kutungunuka ne kuyisha.

IBIDILANGANA NE NSOMBELU YA BANTU NE IKALA UMONA MALU MU BUIMPE

11. Ntshinyi tshiudi mua kuenza bua kupeta bantu ba bungi mu buambi? (Tangila kabidi tshimfuanyi.)

¹¹ Bitu bikutekesha mu mikolo pautu kuyi utamba kupeta bantu ku mbanza yabu anyi? Diebeja ne: ‘Bantu ba mu teritware wanyi badi penyi dîba edi?’ (Bien. 16:13) ‘Mbaye ku mudimu peshi mu tshisalu anyi?’ Biobi nanku, si udi mua kupeta bantu ba bungi wewe uyishila mu njila. Muanetu Joshua udi wamba ne: “Mvua mpeta mpunga ya kuyisha pamvua nya miaba ya tshisalu anyi ivua bantu ba bungi.” Yeye ne mukajende Bridget bavua bapeta bantu ba bungi ba kuyisha pavuabu baya kubatangila dilolo ne mu Dia lumingu mu mêba a mapingaja.—Ef. 5:​15, 16.

12. Mmunyi muudi mua kumanya malu adi bantu bitabuja ne adi abasankisha?

¹² Bantu bobu kabayi basue kuteleja malu  audi ubambila, dienzeja bua kumanya malu adibu bitabuja ne adi abasankisha. Bua Joshua ne Bridget kutuadija kuyukila ne bantu, batu babaleja lukonko ludi pamutu pa trakte. Tshilejilu, bua trakte wa Buebe wewe Bible ntshinyi? batu bambila muntu ne: “Bamue batu bamona Bible ne: mmukanda wa Nzambi, bakuabu kabatu bamumona nanku to. Wewe udi umumona bu tshinyi?” Kuenza nanku kuvua kubambuluisha bua kutuadija muyuki ne bantu.

13. Bua tshinyi mbimpe tumanye ne: tudi tukumbaja mudimu wetu patudi tuyisha nansha bantu kabayi batuteleja? (Nsumuinu 27:11)

¹³ Nansha bantu kabayi batuteleja, patudi tuyisha tudi tukumbaja mudimu wetu. Bidi nanku bualu tudi tuenza mudimu udi Yehowa ne Muanende batupeshe. (Bien. 10:42) Nansha tuetu katuyi bapete muntu wa kuyisha anyi bantu bobu babenga bitudi tubambila, tudi anu mua kuikala ne disanka bualu tudi bamanye ne: tudi tusankisha Tatuetu wa mu diulu.—Bala Nsumuinu 27:11.

14. Bua tshinyi tuetu bonso tutu tusanka padi mumanyishi upeta muntu udi witaba bua kulonga?

¹⁴ Mbimpe tuikale ne disanka padi mumanyishi netu upeta muntu wa kuyisha. Tshibumba tshia Nsentedi tshikuabu tshiakafuanyikija mudimu wa diyisha ne wa dikeba muana mujimine. Bantu ba bungi badi baditua mu dimukeba, benda babuela miaba yonso. Padibu bamupeta, muntu udi mumupete ne bonso bavua bamukeba, badi basanka. Bia muomumue, mudimu wa divuija bantu bayidi ki mmudimu wa muntu umue to. Bidi bikengela kuikale bantu ba bungi bua kuyisha bantu bonso badi mu teritware. Bonso badi bumvua disanka padi muntu mupiamupia utuadija kubuela mu bisangilu.

IKALA MUNANGE YEHOWA NE BANTU NETU

15. Mmunyi mudi kutumikila malu adi mu Matayi 22:​37-39 kuenza bua mudimu wa buambi utusankishe bikole? (Tangila kabidi tshimfuanyi.)

¹⁵ Kuenza mudimu wa buambi kudi mua kutusankisha bikole tuetu banange Yehowa ne bantu netu. (Bala Matayi 22:​37-39.) Ela meji a disanka dikala nadi Yehowa patumonaye tukumbaja mudimu udiye mutupeshe, ne disanka dikala nadi bantu patuadijabu kulonga Bible. Ela kabidi meji bua muoyo wa tshiendelele wapeta bantu badi bateleja mukenji utudi tubayisha.—Yone 6:40; 1 Tim. 4:16.

16. Nansha tuetu katuyi mua kupatuka kumbelu, tshia kuenza ntshinyi bua mudimu wa buambi kutusankisha? Fila tshilejilu.

 ¹⁶ Kudi malu adi akupangisha bua kupatuka kumbelu anyi? Enza malu audi ukokesha bua kuenza adi aleja ne: udi munange Yehowa ne bantu nebe. Mu tshikondo tshia tshipupu tshia korona, muanetu Samuel ne Dania kabavua ne mushindu wa kupatuka to. Bavua bayishila bantu ku telefone pa tshibidilu, babafundila mikanda, ne balombuela malonga a Bible ku zoom. Samuel uvua uyisha bantu mu lupitadi pavuaye uyaku bua bamuondope disama dia kansere. Udi wamba ne: “Patudi tutuilangana ne ntatu, tudi mua kumvua kanyinganyinga anyi kudiumvua batshioke. Bidi mua kutukolela bua kushala ne ditabuja dikole. Mbimpe tuikale ne disanka patudi tuenzela Yehowa mudimu.” Mu tshikondo tshikole atshi, Dania wakakuluka, kushalaye mu bulalu bua disama ngondo 3. Pashishe kuluaye kuenza ngondo 6 wendela anu mu kakalu ka balema. Dania udi wamba ne: “Ngakadienzeja bua kuenza tshimvua nkokesha. Mvua nyisha munganga uvua ulua kutangila ne nyukila ne bantu bavua balua kutushila bintu kumbelu. Mvua nyukila kabidi bimpe ku telefone ne mamu mukuabu uvua wenza mudimu mu kumpanyi wa dipana dia manga.” Nsombelu ukavua nende Samuele ne Dania uvua ubapangisha bua kuenza malu bu pa tshibidilu. Bavua benza tshionso tshivuabu mua kuenza ne bivua bibapetesha disanka.

17. Tshia kuenza tshinyi bua malu onso atanu atudi bamone mu tshiena-bualu etshi atuambuluishe?

¹⁷ Mbimpe tudienzeje bua kutumikila malu onso atanu atudi bamone mu tshiena-bualu etshi. Mmenze anu bu bilengejilu bia kuela mu tshiakudia. Paudi wela bilengejilu bionso bidi bikengela mu tshiakudia, tshidi tshilua ne muenya wa katshia. Tuetu batumikile malu onso atanu aa, kakuakuikala tshiatupangisha bua kuyisha to, ne mudimu wa buambi newikale utusankisha bikole.