1. Ntshinyi tshidi Yehowa musue bua tuenze?

 BUMUE bua ku malu atu asankisha mulume ne mukajende bikole mpatubu balela muana. Nansha mudibu banange muanabu au bikole, kabakujinga bua ashale anu muana kashidi to. Bualu muanabu yeye kayi ukola, nebituadije kubasamisha mutu bikole. Bidi kabidi nanku bua Yehowa. Utu umvua disanka patudi tutuadija kulonga malu ende, kadi ki mmusue bua tuimanyine anu apu to. (1 Kol. 3:1) Mmusue bua tulue “bantu bakole” mu nyuma.—1 Kol. 14:20.

2. Nnkonko kayi ituandamuna mu tshiena-bualu etshi?

² Mmunyi mudi muntu mukole mu nyuma wela meji ne wenza malu? Ntshinyi tshitudi ne bua kuenza bua kukola mu nyuma? Mmunyi mudi biakudia bikole bia mu nyuma bituambuluisha bua kukola? Bua tshinyi mbimpe tuepuke lungenyi lua ne: tukadi bakole mu nyuma ne katuena ne tshikuabu tshia kuenza bua kukolesha malanda etu ne Yehowa? Netuandamune nkonko eyi mu tshiena-bualu etshi.

MMUNYI MUDI MUNTU MUKOLE MU NYUMA WELA MEJI NE WENZA MALU?

3. Kulua muena Kristo mukole mu nyuma kudi kumvuija tshinyi?

³ Muaku wa mu tshiena Greke udibu bakudimune mu Bible ne: “mukole,” udi mua kumvuija kabidi “mushindame,” “mupuangane,” ne “mukumbane.” a (Ef. 4:​13, dim.) Nunku bua tuetu kufika ku dikola mu nyuma, tudi ne bua kutungunuka ne kukolesha malanda etu ne Yehowa anu mutu muana ukola ulua muntu mukulumpe. Ke bualu kayi, nansha tuetu bakole mu nyuma,  katuena ne bua kuimanyina anu apu to. (1 Tim. 4:15) Yonso wa kutudi udi mua kulua muena Kristo mukole mu nyuma, nansha yeye mutshikale muana mutekete. Kadi ntshinyi tshidi tshileja ne: muntu ukadi muena Kristo mukole mu nyuma?

4. Mmunyi mutudi mua kufika ku dimanya muntu mukole mu nyuma?

⁴ Muntu mukole mu nyuma udi wenza malu onso adi Yehowa umulomba bua kuenza kayi wenza anu adiye yeye musue to. Nansha nanku, neenze anu bilema bualu mmuntu mupange bupuangane. Kadi udi udienzeja bua kuenza malu ne kuela meji mudi Yehowa musue dituku dionso. Udi uvuala bumuntu bupiabupia ne udienzeja bua kuela meji anu bu Yehowa. (Ef. 4:​22-24) Mmulonge mua kuangata mapangadika a meji, udi ulonda mikenji ne mêyi manene a Yehowa. Kena dijinga ne mulongolongo wa malu a kutumikila to. Padiye upangadija bualu, udi udienzeja bua kubukumbaja.—1 Kol. 9:​26, 27.

5. Mmalu kayi adi mua kufikila muntu udi kayi mukole mu nyuma? (Efeso 4:​14, 15)

⁵ Kadi muntu udi kayi mukole mu nyuma, badi mua ‘kumushima’ bipepele ne “mayele adi ashimangana.” Udi mua kuitaba ngumu ya dishima idi bantu bamuangalaja peshi kuitaba malu a dishima a batontolodi. b (Bala Efeso 4:​14, 15.) Udi mua kulua muena mukawu, kantu wa bilumbu, ne muntu wa biji bia lukasa. Mmuntu udi ukuluka bipepele mu diteta.—1 Kol. 3:3.

6. Tudi mua kufuanyikija dikola mu nyuma ne tshinyi? (Tangila kabidi tshimfuanyi.)

⁶ Anu mutukadi bamone, Bible udi ufuanyikija dikola mu nyuma ne tshitu tshienzeka patu muana wenda ukola. Muana katu mumanye malu onso to, nunku bitu bikengela muntu mukole amukube ne ikale umuleja tshia kuenza. Bua kumvua bualu ebu bimpe, tuangatayi tshilejilu etshi: Patu mamu usambuka njila ne kana kende ka bakaji, utu ukambila bua kamukuate ku tshianza. Padi muanende au wenda ukola, udi umulekela udisambulukila njila; kadi umuvuluija bua kutangila ku dia balume ne ku dia bakaji kumpala kua kusambuka. Pakadiye mukole, udi umanya mua kuepuka njiwu ya mashinyi. Anu mutubi bikengela bua muntu mukulumpe akube muana ku njiwu, bena Kristo  badi kabayi bakole mu nyuma batu pabu misangu yonso dijinga ne diambuluisha dia badi bakole mu nyuma bua bamone mua kuepuka tshintu kayi tshionso tshidi mua kubanyangila malanda ne Yehowa ne bamone bua kuangata mapangadika a meji. Kadi padi bantu bakole mu nyuma bakeba kuangata mapangadika, batu bela meji a tshidi Bible wamba bua kumanya tshidi Yehowa musue ne pashishe batshitumikila.

7. Bena Kristo bakole mu nyuma batu pabu dijinga ne diambuluisha dia bakuabu anyi?

⁷ Bidiku biumvuija ne: muntu mukole mu nyuma kena dijinga ne diambuluisha dia muntu mukuabu anyi? Tòo. Misangu mikuabu bidi bikengela alombe pende diambuluisha. Kadi bena Kristo badi kabayi bakole mu nyuma batu bobu bindile bua bakuabu babambile tshia kuenza anyi babangatshile mapangadika. Muntu mukole mu nyuma padiye yeye ulomba diambuluisha kudi bantu badi ne meji ne dimonamona dia malu, mmumanye ne: neadiangatshile mapangadika ne “neadiambuile bujitu buende.”—Gal. 6:5.

8. Bena Kristo bakole mu nyuma mbashilangane mushindu kayi?

⁸ Bantu bonso kabatu ne tshimuenekelu tshia muomumue to. Bena Kristo bakole mu nyuma batu bashilangane pabu ku ngikadilu bu mudi: meji, dikima, lungenyi lua kupeshangana bintu, ne diditeka pa muaba wa bakuabu. Ke bualu kayi, bena Kristo bakole mu nyuma babidi bobu batuilangane ne nsombelu wa muomumue, badi mua kuangata mapangadika mashilangane kadi mimanyine anu pa mêyi manene a mu Bible. Bitu bienzeka nanku nangananga padi bena Kristo ne bua kuangata mapangadika balonda kondo kabu ka muoyo. Bu mudibu bamanye bualu ebu, kabatu balumbuluisha bakuabu padibu bangata mapangadika mashilangane ne abu to. Kadi badi badienzeja bua kulama buobumue.—Lomo 14:10; 1 Kol. 1:10.

TSHIA KUENZA NTSHINYI BUA KUKOLA MU NYUMA?

9. Bidiku mua kudienzekela bua tuetu kukola mu nyuma anyi? Umvuija.

⁹ Patu bidimu bienda bipita, muana utu wenda ukola. Kadi kabitu bidienzekela bua muntu kukola mu nyuma to. Tshilejilu, bena Kristo ba mu Kolinto bakitaba lumu luimpe, kubatijibuabu, kupetabu nyuma muimpe, ne kulongelabu malu a bungi kudi mupostolo Paulo. (Bien. 18:​8-11) Nansha nanku, bidimu bia bungi panyima pa batismo wabu, ba bungi ba kadibu batshivua anu batekete mu nyuma. (1 Kol. 3:2) Ntshinyi tshitudi ne bua kuenza bua bualu bua mushindu eu kabutufikidi?

10. Ntshinyi tshitudi ne bua kuenza bua kukola mu nyuma? (Yuda 20)

¹⁰ Bua kukola mu nyuma, bidi bikengela tuikale ne dijinga adi. Bantu badi ‘banange dipanga’ kabayi badienzeja bua kukola mu nyuma, nebashale anu batekete mu nyuma. (Nsu. 1:22) Katuena ne bua kuikala bu bantu bakole batshidibu bangatshila mapangadika kudi baledi babu to. Kadi tuetu ke badi ne tshia kuenza bua malanda etu ne Yehowa atungunuke ne kukola. (Bala Yuda 20.) Wewe udienzeja bua kukola mu nyuma, lomba Yehowa akupeshe “dijinga ne bukole bua kuenza malu adi amusankisha.”—Filip. 2:13.

11. Ntshinyi tshidi Yehowa mutupeshe bua kutuambuluisha bua tukole mu nyuma? (Efeso 4:​11-13)

¹¹ Yehowa ki mmutulekele bua tudikolele mu nyuma to. Mmutupeshe balami ne balongeshi mu tshisumbu bua batuambuluishe bua ‘tufike ku tshipiminu tshia dikola tshia tshiuwidi tshia Kristo.’ (Bala Efeso 4:​11-13.) Mmutupeshe kabidi nyuma wende muimpe bua tupete “meji a Kristo.” (1 Kol. 2:​14-16) Kupita apu, mmutupeshe Evanjeliyo inayi bua kutuleja muvua Yezu wela meji, wakula, ne wenza malu pavuaye pa buloba. Wewe wenza malu ne wela  meji anu bu Yezu, neukumbane bua kulua muena Kristo mukole mu nyuma.

TSHIDI BIAKUDIA BIKOLE BIA MU NYUMA BITUENZELA

12. “Malongesha a ntuadijilu adi atangila Kristo” mmalongesha kayi?

¹² Bua tuetu kukola mu nyuma, katuena anu ne bua kuimanyina pa malongesha a ntuadijilu adi atangila Kristo to. Mu malongesha au mudi dia dinyingalala bua mpekatu, dia ditabuja, dia batismo, ne dia dibishibua dia bantu ku lufu. (Eb. 6:​1, 2) Owu ke adi enza nshindamenu wa buena Kristo. Ke bualu kayi, mupostolo Petelo wakaatela pavuaye uyisha mu Pentekoste. (Bien. 2:​32-35, 38) Tudi ne bua kuitaba malongesha au bua kulua bayidi ba Kristo. Tshilejilu, Paulo wakaleja ne: muntu udi kayi witaba dilongesha dia dibishibua dia bantu ku lufu ki mmuena Kristo mulelela to. (1 Kol. 15:​12-14) Kadi katuena ne bua kuimanyina anu pa malongesha a ntuadijilu au to.

13. Tshia kuenza ntshinyi bua biakudia bikole bia mu nyuma bidi bitela mu Ebelu 5:14 kutukuatshishabi? (Tangila kabidi tshimfuanyi.)

¹³ Biakudia bikole bia mu nyuma mbishilangane ne malongesha a ntuadijilu. Mu biobi mudi: mikenji ya Yehowa ne mêyi ende manene adi atuambuluisha bua kumanya mutuye wela meji. Bua malu adi mu biakudia ebi kutukuatshisha, tudi ne bua kualonga, kuelela meji, ne kutumikila Dîyi dia Nzambi ne muoyo mujima. Tuetu tuenza nanku, netuikale tuangata mapangadika adi asankisha Yehowa. c—Bala Ebelu 5:14.

14. Mmunyi muvua Paulo muambuluishe bena mu Kolinto bua kukola mu nyuma?

¹⁴ Bitu bikolela muntu utu kayi mukole mu nyuma bua kuangata dipangadika dimpe dia bualu budi kabuyi ne mukenji mu Bible to. Padiku kakuyi mukenji au, bamue batu bela meji ne: badi mua kuenza tshidibu basue. Bakuabu badi mua kukeba mukenji muaba udiwu kawuyi ne mushinga to. Tshilejilu, bidi bimueneka ne: bena Kristo ba mu Kolinto bakalomba Paulo bua abambile ni bavua mua kudia biakudia bilambula mpingu. Paulo kakabambila tshia kuenza to. Wakabaleja ne: yonso wa kudibu uvua ne ‘bukenji bua kudisunguila’ tshia  kuenza bilondeshile kondo kende ka muoyo. Wakabaleja anu mêyi manene a mu Bible avua mua kubambuluisha bua kuangata dipangadika divua kondo kabu ka muoyo kakayi mua kushala kabalumbuluisha ne divua kadiyi mua kulenduisha bakuabu to. (1 Kol. 8:​4, 7-9) Nunku Paulo uvua ubambuluisha bua bakole mu nyuma ne bikale benza mudimu ne bieledi biabu bia meji bia kujingulula nabi malu pamutu pa kuebeja bantu tshia kuenza anyi kukeba mukenji.

15. Mmunyi muvua Paulo muambuluishe bena Kristo ba mu Ebelu bua kukola mu nyuma?

¹⁵ Kudi bualu bua mushinga butudi tulonga mu mukanda uvua Paulo mufundile bena Kristo bavua ku Ebelu. Bamue ba kudibu kabakadienzeja bua kutungunuka ne kukola mu nyuma to; ‘bakatuadija kujinga mabele, kabayi dijinga ne biakudia bikole’ to. (Eb. 5:12) Kabavua bitaba malongesha anyi malu mapiamapia avua Yehowa ubalongesha to. (Nsu. 4:18) Tshilejilu, bena Yuda ba bungi batshivua balamate ku Mikenji ya Mose nansha mukavuaku kupite bidimu bitue ku 30 katshia mulambu wa Yezu wayimanyika. (Lomo 10:4; Tito 1:10) Bidimu bitue ku 30 abi bivua bikumbane bua bobu kujingulula ne: kabatshivua kabidi muinshi mua Mikenji ya Mose to! Muntu yonso uvua ubala mukanda uvua Paulo mutumine bena mu Ebelu au, uvua umona ne: muvua biakudia bikole bia mu nyuma. Mukanda au wakabambuluisha bua kumona ne: mushindu mupiamupia wa kutendelela Yehowa kupitshila kudi Yezu uvua muimpe mupite wa kumpala. Mukanda au uvua kabidi mubapeteshe dikima dia kutungunuka ne kuyisha nansha muvua bena Yuda babaluisha.—Eb. 10:​19-23.

EPUKA DIDIEYEMENA

16. Pakumbusha diya kumpala mu nyuma, ntshinyi tshitudi ne bua kuenza?

¹⁶ Tudi ne bua kudienzeja bua kukola mu nyuma ne kushala bakole mu nyuma. Bua bualu abu, katuena ne bua kudieyemena to. (1 Kol. 10:12) Tudi ne bua ‘kutungunuka ne kuditeta’ bua kumanya ni tudi tuya kumpala mu nyuma.—2 Kol. 13:5.

17. Mmunyi mudi mukanda uvua Paulo mufundile bena mu Kolosayi uleja mudibi ne mushinga bua kushala bakole mu nyuma?

¹⁷ Paulo uvua muleje mu mukanda uvuaye mufundile bena mu Kolosayi ne: mbia mushinga bua kushala bakole mu nyuma. Nansha  mukavuabu bakole mu nyuma, wakabadimuija bua ngelelu wa meji wa bena panu kabanyangi to. (Kolos. 2:​6-10) Epafa, uvua mumanye bena mu tshisumbu atshi bimpe, uvua usambila bua bashale ‘ndekelu wa bionso bajalame bakumbane tshishiki,’ anyi bakole mu nyuma. (Kolos. 4:12) Dilongesha muaba eu didi ne: Paulo ne Epafa bavua bajingulule ne: tudi ne bua kudienzeja bikole bua kushala bashindame mu nyuma ne kulomba Yehowa diambuluisha. Bavua basue bua bena mu Kolosayi bashale bakole mu nyuma, anyi bashindame, nansha muvuabu batuilangana ne ntatu.

18. Ntshinyi tshidi mua kuenzekela muena Kristo mushindame mu nyuma yeye kayi mudimuke? (Tangila kabidi tshimfuanyi.)

¹⁸ Paulo wakabela bena mu Ebelu ne: muena Kristo mushindame mu nyuma yeye kayi mudimuke, Yehowa udi mua kumubenga bua kashidi. Yeye kayi utumikila Yehowa, muoyo wende udi mua kupapa, kayi kabidi unyingalala bua mpekatu idiye wenza to. Dîba adi, Yehowa kakumufuila luse to. Bia diakalenga, bena mu Ebelu kabavua bafike mu au nsombelu to. (Eb. 6:​4-9) Kadi netuambe tshinyi bua bena Kristo badi kabatshiyi bayisha lelu anyi badi bipatshibua mu tshisumbu ne balua kunyingalala pashishe? Dinyingalala diabu didi dileja ne: mbashilangane ne bantu bavua Paulo muakuile. Padi muena Kristo wa mushindu au upingana kudi Yehowa, bidi bikengela kumuambuluisha. (Yeh. 34:​15, 16) Bakulu badi mua kulomba muena Kristo mukuabu mushindame mu nyuma bua amuambuluishe bua akajilule malanda ende ne Yehowa.

19. Mbimpe tudisuike bua kukumbaja tshipatshila kayi?

¹⁹ Wewe mudisuike bua kukola mu nyuma, udi mua kukumbaja tshipatshila atshi! Tungunuka ne kulonga malu male a mu Dîyi dia Nzambi ne kuenza bua meji ebe afuanangane ne a Yehowa. Kadi biwikala mushindame mu nyuma, dienzeja bua ushale anu mushindame mpindieu ne bua kashidi.