1. Ntshinyi tshitu Yehowa ulomba batendeledi bende bua kuenza? (Tangila kabidi tshimfuanyi.)

 NNGANYI utudi mua kulomba bua atusambe anyi atuludike? Tudi bamanye diandamuna bimpe. Tudi mua kulomba Yehowa Nzambi mu disambila. Ke tshituye utulomba bua kuenza. Mmusue bua tuikale tusambila misangu ya bungi, mmumue ne: tuikale ‘tusambila misangu yonso.’ (1 Tes. 5:17) Tudi mua kumusambila ne muoyo mujima, tumulomba bua atuludike mu malu onso a mu nsombelu wetu. (Nsu. 3:5, 6) Bu mudi Yehowa Nzambi tshipapayi, ki mmutukosele bungi bua misangu itudi mua kumusambila to.

2. Ntshinyi tshituakonkonona mu tshiena-bualu etshi?

² Tudi tuanyisha dipa dia disambila bikole. Kadi bu mututu ne bia bungi bia kuenza, bidi mua kutukolela bua kupeta dîba dia kusambila. Pamuapa tudi kabidi mua kumona ne: mbimpe tuakaje masambila etu. Diakalenga, tudi mua kupeta mibelu ya bungi ne buludiki mu Bible. Mu tshiena-bualu etshi, netukonkonone tshilejilu tshia Yezu bua kumona mutudi mua kupeta dîba dia kusambila. Netumone kabidi malu atanu a mushinga a kuenza bua kuakaja masambila etu.

3. Ntshinyi tshivua Yezu mumanye bua disambila?

³ Yezu uvua mumanye ne: disambila ditu ne mushinga wa bungi kudi Yehowa. Bidimu bia bungi kumpala kua kuluaye pa buloba, uvua umona muvua Tatuende wandamuna masambila a bantu balume ne bantu bakaji ba lulamatu. Tshilejilu, pavuaye ku luseke lua Tatuende, wakamona muvuaye muandamune  masambila avua Hana, Davidi, Eliya ne bantu bakuabu ba lulamatu benze ne muoyo mujima. (1 Sam. 1:10, 11, 20; 1 Bak. 19:4-6; Mis. 32:5) Ke bualu kayi, wakalongesha bayidi bende bua kusambila misangu yonso ne dishindika dionso.​—Mat. 7:7-11.

4. Masambila a Yezu adi atulongesha tshinyi?

⁴ Bu muvua Yezu usambila pa nkayende, uvua mushile bayidi bende tshilejilu tshia kulonda. Uvua usambila misangu yonso mu mudimu wende wa diyisha. Bu muvuaye anu ne bia bungi bia kuenza, eku bantu kabayi bamushila muaba, uvua udimona muenzejibue bua kukeba dîba dia kusambila. (Mâko 6:31, 45, 46) Uvua ujuka patshiatshia bua amone mua kusambila pa nkayende. (Mâko 1:35) Musangu mukuabu, wakasambila butuku bujima kumpala kua kuangata dipangadika dia mushinga mukole. (Luka 6:12, 13) Butuku kumpala kua Yezu kufua, wakasambila misangu ne misangu pakavuaye pa kukumbaja bumue bua ku malu buvua bukole menemene buvuabu bamutumine pa buloba.​—Mat. 26:39, 42, 44.

5. Mmunyi mutudi mua kuidikija Yezu patudi tusambila?

⁵ Tshilejilu tshia Yezu tshidi tshitulongesha ne: nansha tuetu ne malu a bungi a kuenza, mbimpe tuikale tukeba dîba dia kusambila. Anu bu Yezu, pamuapa bidi bikengela tuikale tuditekela petu dîba dia kusambila bu mudi patshiatshia anyi dilolo. Tuetu tuenza nanku, netuleje Yehowa ne: tudi tuanyisha dipa dia pa buadi edi. Muanetu wa bakaji Lynne udi uvuluka disanka divuaye nadi pakamanyaye bua musangu wa kumpala diakalenga ditudi nadi dia kusambila. Udi wamba ne: “Pangakamanya ne: mvua mua kuyukila ne Yehowa dîba kayi dionso, biakangambuluisha bua kumumona bu mulunda wanyi wa pa muoyo ne bua kuakaja masambila anyi.” Kakuyi mpata, ba bungi ba kutudi badi bumvua pabu nanku. Nunku, tuakulayi bua malu manene atanu atudi ne bua kuenza patudi tusambila.

6. Bilondeshile Buakabuluibua 4:10, 11, Yehowa mmukumbane bua kuangata tshinyi?

⁶ Tumbisha Yehowa. Mu tshikena kumona tshia dikema, mupostolo Yone wakamona bakulu 24 mu diulu batendelela Yehowa. Bavua bamutumbisha, bamba mudiye mukumbane bua kuangata “butumbi ne bunême ne bukole.” (Bala Buakabuluibua 4:10, 11.) Banjelu ba lulamatu badi kabidi ne malu a bungi  adi abasaka bua kutumbisha Yehowa ne kumupesha bunême. Badi nende mu diulu, ne mbamumanye bimpe. Badi bamuenena ngikadilu yende ku malu adiye wenza. Bu mudibu bamona malu adiye wenza, bidi bibasaka bua kumutumbisha.​—Yobo 38:4-7.

7. Tudi mua kutumbisha Yehowa bua malu kayi?

⁷ Tudi ne bua kutumbisha petu Yehowa patudi tusambila, tumuambila tshitudi banange ne tuanyisha kudiye. Paudi ubala Bible anyi umulonga, keba bua kumanya ngikadilu ya Yehowa iutu wanyisha. (Yobo 37:23; Lomo 11:33) Pashishe, umuambile muudi umvua bua ngikadilu ayi. Tudi kabidi mua kutumbisha Yehowa bua malu adiye utuenzela tuetu ne bena Kristo netu bonso. Utu utukuba ne ututabalela misangu yonso.​—1 Sam. 1:27; 2:1, 2.

8. Mmalu kayi adi atusaka bua kuela Yehowa tuasakidila? (1 Tesalonike 5:18)

⁸ Ela Yehowa tuasakidila. Kudi malu a bungi adi atusaka bua kuela Yehowa tuasakidila mu disambila. (Bala 1 Tesalonike 5:18.) Tudi mua kumuela tuasakidila bua bintu bimpe bitudi nabi, bualu dipa dionso dimpe didi difumina kudiye. (Yak. 1:17) Tshilejilu, tudi mua kumuela tuasakidila bua mudiye mufuke buloba bulenga ne bintu bikuabu bimpe. Tudi kabidi mua kumuela tuasakidila bua muoyo udiye mutupeshe, bua bena mu dîku dietu, balunda betu, ne bua ditekemena ditudi nadi. Tudi basue kumuela tuasakidila bua mudiye mutuanyishile bua kudia nende malanda mimpe.

9. Bua tshinyi mbimpe tudienzeje bua kuikala kuleja Yehowa dianyisha?

⁹ Pamuapa mbimpe yonso wa kutudi adienzeje bikole bua kuela meji bua malu adi amusaka bua kuleja Yehowa dianyisha. Bantu ba bungi lelu ki mbena dianyisha to. Badi badifila bikole ku malu adibu basue pamutu pa kudifila ku malu adibu ne bua kuenza bua kuleja dianyisha bua bintu bidibu nabi. Tshikadilu atshi tshiotshi tshitulamate, masambila etu neikale anu a dilomba bintu. Bua kuepuka bualu ebu, mbimpe tudienzeje bua kuikala ne dianyisha ne kudileja Yehowa bua bionso bidiye utuenzela.​—Luka 6:45.

10. Mmunyi muvua kuikala ne dianyisha kuambuluishe muanetu mukuabu bua kununakila? (Tangila kabidi tshimfuanyi.)

¹⁰ Kuikala bena dianyisha kudi mua kutuambuluisha bua kunanukila mu ntatu. Tumonayi bualu bua muanetu Kyung-sook budi mu Tshibumba tshia Nsentedi tshia dia 15/1/2015. Bakamukuata ne disama dia kansere ka mu bisulusulu. Wakamba ne: “Tshilumbu tshia disama etshi tshivua tshintonde bikole. Mvua ndiumvua bu ne: mvua mujimije bionso ne mvua ne buôwa bua bungi.” Ntshinyi tshiakamuambuluisha bua kutantamena lutatu alu? Wakamba ne: butuku buonso kumpala kua yeye kulala, uvua ubanda mu nzubu wabu wa kuulu, usambilaku ne dîyi dikole bua malu atanu avuaye muanyishe dituku adi. Kuenza nanku kuakamukolesha ne kuakamusaka bua  kuleja muvuaye munange Yehowa. Wakamona mudi Yehowa wambuluisha bena mudimu bende ba lulamatu padibu batuilangana ne ntatu mikole, kujingululaye ne: mabenesha atudi nawu nga bungi kupita ntatu itudi tupeta. Anu bu muanetu Kyung-sook, tudi ne malu a bungi a kuelela Yehowa tuasakidila nansha tuetu mu lutatu lukole. Kuela Yehowa tuasakidila mu disambila kudi mua kutuambuluisha bua kunanukila ne kuikala batukije.

11. Bua tshinyi bivua bikengela bayidi ba Yezu bikale ne dikima pavuaye mupingane mu diulu?

¹¹ Lomba Yehowa dikima paudi uyisha. Kumpala kua Yezu kupingana mu diulu, wakavuluija bayidi bende mudimu wabu wa kumanyisha bualu buende “mu Yelushalema, mu Yudaya mujima ne mu Samalea, too ne ku miaba ya kule menemene ya pa buloba.” (Bien. 1:8; Luka 24:46-48) Matuku makese pashishe, bamfumu ba bitendelelu bena Yuda bakakuata mupostolo Petelo ne Yone kuya nabu ku Tshilumbuluidi tshinene, kutuminabu balume ba lulamatu aba dîyi bua balekele kuyisha, ne kubakanyinabu. (Bien. 4:18, 21) Petelo ne Yone bakenza tshinyi?

12. Bilondeshile Bienzedi 4:29, 31, ntshinyi tshivua bayidi benze?

¹² Petelo ne Yone bakandamuna bamfumu ba bitendelelu bena Yuda bavua babakanyine abu ne: “Bikalabi bimpe ku mêsu kua Nzambi bua kunuteleja nuenu pamutu pa kuteleja Nzambi, abu mbualu buenu. Kadi buetu tuetu, katuena mua kulekela kuakula bua malu atudi bamone ne bumvue to.” (Bien. 4:19, 20) Pakalekelabu Petelo ne Yone, bayidi bakasambila ne dîyi dikole, balomba Yehowa bua batambe kuenza disua diende. Bakasambila ne: “Wambuluishe bapika bebe bua batungunuke ne kuamba dîyi diebe ne dikima dionso.” Yehowa wakandamuna disambila dienza ne muoyo mujima adi.​—Bala Bienzedi 4:29, 31.

13. Tshilejilu tshia Jin-hyuk tshidi mua kutulongesha tshinyi?

¹³ Tudi mua kuidikija bayidi abu patudi tutungunuka ne kuyisha nansha bakokeshi ba mbulamatadi batukandika. Tuangate tshilejilu tshia muanetu wa balume Jin-hyuk uvuabu bele mu buloko bua dibenga kulamata ku luseke kampanda lua malu a panu. Bavua bamupeshe mudimu wa kutangila bena buloko bavua mu tuzubu tua buloko tua muntu nkayende, bavua bamuanyishile bua ayukile nabu anu malu avua atangila mudimu au; kadi kavua mua kubambila malu a mu Bible to. Wakasambila bua apete dikima ne budimu bua kuyisha pavua mpunga umueneka. (Bien. 5:29) Udi wamba ne: “Yehowa wakandamuna masambila anyi, kumpeshaye dikima ne meji bua kutuadija kulonga Bible ne bantu ba bungi lua ku biibi bia tuzubu tua munda mua buloko atu, ndonga ne muntu yonso mu minite itanu. Pashishe, butuku mvua mfunda mikanda ya kubapesha dituku divua dilonda.” Mbimpe tuikale petu batuishibue ne: Yehowa neatuambuluishe bua kukumbaja mudimu wetu wa diyisha. Anu bu muanetu Jin-hyuk, tudi mua kusambila bua tupete dikima ne meji.

14. Ntshinyi tshidi mua kutuambuluisha patudi mu ntatu? (Misambu 37:3, 5)

¹⁴ Lomba Yehowa diambuluisha bua unanukile mu ntatu. Ba bungi ba kutudi badi batata bua masama anyi bua malu adi abatshiokesha mu lungenyi, peshi bualu mbafuishe, bua ntatu ya mu dîku, bua dikengeshibua, anyi bua ntatu mikuabu. Bipupu ne mvita mbienze bua ntatu ya bungi ya ku ntatu eyi ilue mikole menemene mua kupita nayi. Ambila Yehowa yebe yonso ya munda. Muambila malu audi nawu anu bu muudi mua  kuambila mulunda webe wa pa muoyo. Ikala mutuishibue ne: Yehowa “neenze tshienzedi bua bualu buebe.”​—Bala Misambu 37:3, 5.

15. Mmunyi mudi disambila mua kutuambuluisha bua ‘kunanukila mu makenga’? Fila tshilejilu.

¹⁵ Tuetu tusuminyina mu disambila nebituambuluishe bua ‘kunanukila mu makenga.’ (Lomo 12:12) Yehowa mmumanye ntatu idi batendeledi bende batuilangana nayi, ne utu “umvua muadi wabu wa dilomba diambuluisha.” (Mis. 145:18, 19) Muanetu Kristie, mpanda-njila udi ne bidimu 29 udi witaba pende bualu abu. Wakatuadija kupeta masama makole avuaye kayi muelele meji to. Ke kutuadijaye kumvua kanyinganyinga kakole. Pashishe wakumvua ne: mbakuate mamuende ne disama dibi dia lufu. Udi wamba ne: “Ngakasambila bikole, ndomba Yehowa bua ampeshe bukole bumvua nkengela ku dituku ne ku dituku. Mvua ndienzeja bua kuenza malu a mu nyuma pa tshibidilu, mbuela mu bisangilu ne ndilongela.” Udi wamba kabidi ne: “Disambila ndingambuluishe mu bikondo bikole. Mvua mumanye ne: Yehowa uvua anuku misangu yonso, ne kuela meji nanku kuvua kunkolesha bikole. Nansha muvua masama amvua nawu kaayi majike diakamue, Yehowa mmuandamune masambila anyi, mumpeshe ditalala dia mu muoyo.” Tuikalayi anu bavuluke ne: “Yehowa mmumanye mua kusungila bantu badi balamate Nzambi mu diteta.”​—2 Pet. 2:9.

16. Bua tshinyi bidi bikengela ne: Yehowa atuambuluishe bua kukandamena diteta?

¹⁶ Lomba Yehowa diambuluisha bua kukandamena diteta. Bu mutudi bapange bupuangane, tutu tudienzeja misangu yonso bua kukandamena diteta dia kuenza malu mabi. Satana udi wenza muende muonso bua bitukolele bua kukandamena diteta. Umue mushindu udiye udienzeja bua kunyanga meji etu, mpadiye utusaka bua kujikija lutetuku ne malu a masandi. Dijikija lutetuku dia nunku didi mua kuwuja meji etu ne ngenyi mibi  idi mua kutuvuija bakoya ku mêsu kua Yehowa ne kutusaka bua kuenza mpekatu.​—Mâko 7:21-23; Yak. 1:14, 15.

17. Mmunyi mutudi mua kuenza malu mu diumvuangana ne disambila dietu bua kuepuka diteta? (Tangila kabidi tshimfuanyi.)

¹⁷ Bidi bikengela ne: Yehowa atuambuluishe bua kukandamena diteta dia kuenza malu mabi. Yezu wakatela kabidi malu adi alonda aa mu disambila dia tshilejilu: “Kutubueji mu ditetshibua, kadi utusungile kudi mubi.” (Mat. 6:13) Yehowa mmusue kutuambuluisha, kadi tudi ne bua kumulomba diambuluisha. Tudi ne bua kuenza kabidi malu mu diumvuangana ne masambila etu. Mbimpe tuenze muetu muonso bua kuepuka kubala ne kuteleja ngenyi mibi idi mitangalake mu bulongolodi bua Satana ebu. (Mis. 97:10) Tudi mua kuwuja meji etu ne ngenyi mimpe patudi tubala Bible ne tudilongelayi. Tuetu tubuela mu bisangilu ne tuandamuna, netulame kabidi meji etu. Yehowa pende mmulaye ne: kakulekela bua tutetshibue ne diteta ditudi katuyi mua kutantamena to.​—1 Kol. 10:12, 13.

18. Mmalu kayi atudi ne bua kuenza tuetu bonso bua disambila?

¹⁸ Tuetu bonso tutu banange kusambila bikole bua kushala ne lulamatu kudi Yehowa mu matuku makole a ku nshikidilu aa. Ikala ukeba dîba dia kusambila ne muoyo mujima dituku dionso. Yehowa mmusue bua ‘tupumune mioyo yetu kumpala kuende’ mu disambila. (Mis. 62:8) Ikala utumbisha Yehowa, umuela tuasakidila bua malu onso adiye wenza. Ikala umulomba bua akupeshe dikima paudi uyisha. Ikala umulomba bua akuambuluishe bua kunanukila mu ntatu ne bua kukandamena diteta kayi dionso didi mua kukukuata. Kulekedi tshintu nansha tshimue anyi muntu ukupangisha bua kuikala kusambila pa tshibidilu to. Kadi mmunyi mutu Yehowa wandamuna masambila etu? Netuandamune lukonko lua mushinga elu mu tshiena-bualu tshidi tshilonda.