1. Mbualu kayi bua mushinga buvua Yehowa mulongeshe Abalahama?

 KUKADI bidimu bia bungi bivua Yehowa mutume muanjelu wende bua kuambila Abalahama ne: ukavua pa kubutula tshimenga tshia Sodoma ne tshia Amola. Bivua bikolele Abalahama bua kumvua bualu abu nansha muvuaye ne ditabuja dikole. Wakebeja muanjelu au ne: “Bushuwa wewe neujimije bantu bakane ne bantu babi popamue anyi? . . . Mulumbuluishi wa buloba bujima kakuenza tshidi tshiakane anyi?” (Gen. 18:​23-33) Yehowa uvua ne lutulu, kulongeshaye Abalahama bualu bua mushinga ebu: Nzambi kakubutula bantu bakane nansha kakese. Dilongesha adi didi ditukankamija petu lelu.

2. Ntshinyi tshidi tshituleja ne: patu Yehowa ulumbuluisha bantu, utu anu wenza tshidi tshiakane ne utu nabu luse?

² Ntshinyi tshidi tshituleja ne: patu Yehowa ulumbuluisha bantu, utu anu wenza tshidi tshiakane ne utu nabu luse? Tshidi tshituleja nanku tshidi ne: “Yehowa yeye udi umona mu muoyo” wa bantu. (1 Sam. 16:7) Mu kuamba kuimpe, ‘mmumanye muoyo wa muntu yonso.’ (1 Bak. 8:39; 1 Kul. 28:9) Abu si mbualu buimpe be! Bu mudi meji a Yehowa mapite etu kule ne kule, kudi misangu itudi katuyi mua kumvua tshidiye wangatshila amue mapangadika to. Mbikumbane bua muvua mupostolo Paulo muambe bua Yehowa Nzambi ne: “Malumbuluisha ende kaena kujingulula” to!—Lomo 11:33.

3-4. Nnkonko kayi itudi mua kudiela? Ntshinyi tshituakuila mu tshiena-bualu etshi?

³ Nansha nanku, tudi mua kudiela nkonko ya buena ivua Abalahama muele muanjelu au. Tudi mene mua kudiebeja ne: ‘Bantu  bavua Yehowa mushipe, bu mudi ba mu Sodoma ne ba mu Amola, badi mua kubishibua ku lufu anyi? Bamue ba kudibu nebabishibue mu “dibishibua dia bantu ku lufu, dia . . . badi kabayi bakane” anyi?’—Bien. 24:15.

⁴ Tuanjayi kuvuluka malu atutu bamanye bua dibishibua dia bantu ku lufu. Matuku mashale aa, tuvua bakajilule ngumvuilu wetu bua tshidi “dibishibua ku lufu dia muoyo” ne “dibishibua ku lufu dia dilumbuluisha” diumvuija. a (Bala Yone 5:28, 29.) Butoke bupiabupia abu mbutufikishe ku diakajilula malu makuabu atuakuila mu tshiena-bualu etshi ne mu tshialonda. Netuanji kuakula bua tshitudi katuyi bamanye bua malumbuluisha a Yehowa ne netulue kuakula bua tshitudi bamanye.

TSHITUDI KATUYI BAMANYE

5. Ntshinyi tshituvua tulongesha bua bena mu Sodoma ne mu Amola bavua Yehowa mushipe?

⁵ Ku kale, tuvua tulongesha ne: bantu bavua Yehowa mubutule, bu mudi ba mu Sodoma ne ba mu Amola, kabakubishibua ku lufu to. Kadi patudi batangilule dilongesha adi ne basambile bikole, tudi bamone ne: ki mbikumbane bua kuamba nanku to. Bua tshinyi?

6. Mbantu kayi bavua kabayi bakane bavua Yehowa mushipe? Ntshinyi tshidi Bible kayi uleja patoke?

⁶ Kudi mvese mikuabu ya bungi idi yakula bua bantu bavua kabayi bakane bavua Yehowa mubutule. Tshilejilu, wakabutula bantu bonso ku Mvula wa kabutu, kushiyaye anu Noa ne dîku diende. Wakatuma kabidi bena Isalele, kubutulabu bisamba muanda mutekete bia bantu bavua basombele mu Buloba bulaya. Ne wakatuma muanjelu umue, kubutulaye basalayi ba bena Ashû binunu 185 mu butuku bumue. (Gen. 7:23; Dut. 7:1-3; Yesh. 37:36, 37) Bible udiku uleja patoke ne: bantu bonso bavua Yehowa mubutule abu mbafue bua kashidi anyi? Tòo. Bua tshinyi tudi tuamba nanku?

7. Ntshinyi tshitudi katuyi bamanye bua bantu bavua bafue ku Mvula wa kabutu ne bavua mu buloba bua Kânana bavua bena Isalele bashipe? (Tangila pa tshizubu.)

⁷ Katuena bamanye muvua Yehowa umona muntu yonso wa ku bavuaye mubutule abu to. Katuena nansha bamanye ni bavua bapete mpunga wa kulonga malu a Yehowa ne kulekela bikadilu biabu bibi to. Bible udi wamba bua tshikondo tshia Mvula wa kabutu ne: Noa uvua “muyishi wa buakane.” (2 Pet. 2:5) Kadi kena uleja ne: pavuaye wenda wibaka buatu bunene abu, uvua kabidi wenda uyisha muntu yonso uvua ne muoyo tshikondo atshi to. Ke muvuabi kabidi bua bisamba bia mu Kânana. Katuena bamanye ni bavua balongeshe bantu babi bonso abu malu a Yehowa ne bapete mpunga wa kulekela malu abu mabi to.

8. Ntshinyi tshitudi katuyi bamanye bua bena mu Sodoma ne mu Amola?

⁸ Kadi netuambe tshinyi bua bena mu Sodoma ne mu Amola? Muntu muakane Lota uvua musombele mu Sodoma amu. Kadi tudiku bamanye ni uvua muyishe bantu bonso bavuamu anyi? Tòo. Bavua bushuwa bantu babi, kadi bavuaku bamanye mua kutapulula tshidi tshimpe ne tshidi tshibi anyi? Tuvulukayi ne: musumba munene wa bantu balume ba mu tshimenga atshi bakaya kua Lota bua kulala ne benyi bavua batudilaku ku bukole. Bible udi uleja ne: mu musumba au muvua bantu ‘kubangila anu ku bansongalume too ne ku bakulakaje.’ Muvua too ne bana ba balume ba bitende. Bualu ebu budi buleja ne: buonso buabu bavua bakolele muaba uvua malu a bikadilu manyanguke bikole, ne pamuapa kabavua bapete mpunga wa kulonga mikenji ya Nzambi ya tshidi tshimpe ne tshidi tshibi to. (Gen. 19:4; 2 Pet. 2:7) Kudiku tshidi tshituleja ne: Yehowa Nzambi wa luse mmupangadije bua kubenga kubabisha bonso ku lufu anyi? Tòo. Bua tshinyi tudi tuamba nanku? Bualu Yehowa uvua muambile Abalahama ne: mu tshimenga atshi kamuvua nansha bantu bakane dikumi betu aba  to. (Gen. 18:32) Bantu abu kabavua bakane to. Yehowa uvua ne kabingila ka kubashipa bua bienzedi biabu bibi. Kadi tudiku mua kuamba tushindika ne: muntu nansha umue wa kudibu kakubishibua mu “dibishibua dia bantu ku lufu, dia . . . badi kabayi bakane” anyi? Tòo, katuena mua kuamba nanku to!

9. Ntshinyi tshitudi katuyi bamanye bua Solomo?

⁹ Bible udi wakula kabidi bua bantu bavua bakane, kadi kuluabu kabayi bakane ku mêsu kua Nzambi. Mukalenge Solomo ngumue wa kudibu. Wakatumikila mikenji ya Yehowa bimpe, Yehowa kumubeneshaye bikole; kadi wakalua kutendelela nzambi ya dishima. Mpekatu yende yakafiikisha Yehowa munda bikole, kutuadilayi ne tshisamba tshijima tshia Isalele ntatu munkatshi mua bidimu bia bungi. Bushuwa, Bible udi wamba ne: pakafua Solomo, “wakalala bua kuikisha ne bankambua bende,” mu bankambua bende abu muvua balume ba lulamatu bu mudi mukalenge Davidi. (1 Bak. 11:​5-9, 43; 2 Bak. 23:13) Nansha mudi Bible wamba nanku, bidiku bileja ne: Solomo neabishibue ku lufu anyi? Bible ki mmufile diandamuna to. Kadi bamue badi mua kuamba ne: Solomo neabishibue ku lufu bualu Bible utu wamba ne: “muntu udi mufue mmubingishibue ku mpekatu wende.” (Lomo 6:7) Mmuomu, kadi abi kabiena biumvuija ne: muntu yonso udi mufue neabishibue ku lufu to. Dibishibua dia bantu ku lufu ndipa dia kudi Nzambi wetu wa dinanga. Neabishe anu muntu udiye musue bua alue kumuenzela kabidi mudimu bua kashidi. (Yobo 14:​13, 14; Yone 6:44) Solomo neapetaku dipa adi anyi? Katuena bamanye to, Yehowa nkayende ke udi mumanye. Tshitudi tuetu bamanye tshidi ne: Yehowa neenze anu tshidi tshiakane.

TSHITUDI BAMANYE

10. Yehowa utu usanka bua kubutula bantu anyi? (Yehezekele 33:11) (Tangila kabidi tshimfuanyi.)

¹⁰ Bala Yehezekele 33:11. Yehowa udi utuambila tshituye umvua bua dilumbuluisha bantu. Tshivua Yehezekele mufunde tshidi tshipetangana ne mêyi a mupostolo Petelo a ne: “Yehowa . . . ki mmusue bua muntu nansha umue abutudibue” to. (2 Pet. 3:9) Bilondeshile mvese eu, tudi bamanye ne: Yehowa kena mua kushipa muntu bua kashidi padiku kakuyi bualu to. Mmubanji mu luse, ne utu ululeja bantu padiku mushindu.

11. Mbanganyi bikala kabayi mua kubishibua ku lufu? Bua tshinyi tudi tuamba nanku?

¹¹ Ntshinyi tshitudi bamanye bua bantu bikala Yehowa kayi mua kubisha ku lufu? Bible mmutele anu bakese ba kudibu. b Yezu wakaleja ne: Yudasa Isakaliote kakubishibua ku lufu to. (Mâko 14:21; tangila kabidi Yone 17:12.) Yudasa uvua mumanye ne: Yehowa ne Muanende bavua bakandike tshivuaye ujinga kuenza. Kadi wakatshienza ku bukole. (Tangila Mâko 3: 29, ne Tshibumba tshia Nsentedi tshia dia 15/7/2007 dib. 18.) Yezu wakaleja kabidi ne: bamue bamfumu ba tshitendelelu bavua bamuluisha kabakubishibua ku lufu to. (Mat. 23:33; tangila kabidi Yone 19:11) Mupostolo Paulo wakamba pende ne: batontolodi badi kabayi banyingalala kabakubishibua ku lufu to.—Eb. 6:4-8; 10:29.

12. Ntshinyi tshidi muntu ne bua kuenza bua Yehowa kumufuila luse? Fila bilejilu.

¹² Ntshinyi tshidi muntu ne bua kuenza bua Yehowa kumufuila luse? Ntshinyi tshidiye muenze bua kuleja ne: “ki mmusue bua muntu nansha umue abutudibue”? Tumonayi muvuaye mufuile bamue bantu bavua benze mpekatu minene luse. Mukalenge Davidi wakenza mpekatu minene ya bungi, mu yoyi muvua wa dilala ne mukaji wa bende ne wa dishipangana. Kadi pavuaye munyingalale, Yehowa wakamufuila luse. (2 Sam. 12:1-13) Mukalenge Manashe wakenza malu mabi matambe mu nsombelu wende. Kadi Yehowa wakamufuila luse bualu uvua munyingalale bua mpekatu yende ne muyilekele.  (2 Kul. 33:9-16) Tshilejilu tshia Davidi ne tshia Manashe bidi bitulongesha ne: Yehowa utu ufuila bantu badi banyingalala bua mpekatu yabu luse. Neajule bantu abu ku lufu bualu bavua bitabe mpekatu minene ivuabu benze ne banyingalale.

13. a) Yehowa uvua mufuile bena Niniwe luse bua tshinyi? b) Ntshinyi tshiakalua Yezu kuamba bua bena Niniwe?

¹³ Tudi kabidi bamanye muvua Yehowa mufuile bena Niniwe luse. Nzambi wakambila Yona ne: “Malu mabi abu mmafike kundi.” Kadi pakanyingalalabu bua mpekatu yabu, Yehowa wakabafuila luse ne muoyo mujima. Yehowa uvua ne luse lua bungi kupita Yona. Nansha muvua Yona mumvue tshiji, Yehowa wakamuvuluija ne: bena Niniwe kabavua “bamanye nansha mua kutapulula tshidi tshimpe ne tshidi tshibi” to. (Yona 1:​1, 2; 3:10; 4:​9-11) Bidimu ndambu pashishe, Yezu wakalua kuakula bua tshilejilu tshiabu bua kulongesha bantu bua buakane bua Yehowa ne luse luende, kuambaye ne: bena Niniwe bavua banyingalale abu “nebajuke dîba dia dilumbuluisha.”—Mat. 12:41.

14. Mmu ngumvuilu kayi muikala bena Niniwe ne bua ‘kubishibua ku lufu bua dilumbuluisha’?

¹⁴ Bena Niniwe ‘nebajuke dîba kayi dia dilumbuluisha’? Yezu uvua muambe ne: nekuikale “dibishibua ku lufu dia dilumbuluisha” kumpala eku. (Yone 5:29) Uvua wakula bua Bukokeshi buende bua bidimu tshinunu muikala ‘bantu bakane ne badi kabayi bakane’ ne bua kubishibua ku lufu. (Bien. 24:15) Bua badi kabayi bakane, nedikale “dibishibua ku lufu dia dilumbuluisha.” Tuambe ne: bobu bamane kubishibua ku lufu, Yehowa ne Yezu nebikale babatangila bua kumona ni badi bitaba malu adibu babalongesha ne baatumikila. Muena Niniwe wabishibua ku lufu yeye mubenge bua kutendelela Yehowa, Yehowa kakumuanyishila bua ashale ne muoyo to. (Yesh. 65:20) Kadi bonso bitaba bua kutendelela Yehowa ne lulamatu, dibishibua diabu ku lufu nedikale dia muoyo. Yehowa neabapeshe mpunga wa kushala ne muoyo kashidi!—Dan. 12:2.

15. a) Bua tshinyi katuena ne bua kuamba ne: muntu nansha umue wa mu bantu bavua Yehowa mushipe mu Sodoma ne mu Amola kakubishibua ku lufu? b) Mêyi adi mu Yuda 7 adi umvuija tshinyi? (Tangila kazubu ka “ Yuda uvua usua kuamba tshinyi?”)

¹⁵ Pavua Yezu wakula bua bena mu Sodoma ne mu Amola, uvua muleje ne: “mu Dituku dia Dilumbuluisha,” nebikale bipepele buabu bobu kupita muikalabi bua bantu bavua bamubenge yeye ne malongesha ende. (Mat. 10:​14, 15;  11:​23, 24; Luka 10:12) Uvua usua kuamba tshinyi? Uvua wela kalele wamba ne: bantu ba mu tshikondo tshiende bavua babi kupita ba mu Sodoma ne mu Amola anyi? Tòo! Mêyi ende nga kuangata anu mudiwu amu. “Dituku dia Dilumbuluisha” divuaye muakuile muaba eu ndiodi dimue ne divuaye muakuile bua bena Niniwe. Vuluka ne: Yezu uvua muambe ne: bantu “bavua benze malu mabi” nebabishibue ku lufu bua dilumbuluisha. (Yone 5:29) Anu bu bena Niniwe, bena mu Sodoma ne mu Amola bavua benze malu mabi. Bakayisha bena Niniwe, kunyingalalabu bua bilema biabu ne kubilekela. Kadi kabavua bayishe bena mu Sodoma ne mu Amola to. Nanku, bidi bimueneka ne: kudi ditekemena buabu bobu. Bidi mua kuenzeka ne: nansha bakese ba kudibu babishibue ku lufu. Pamuapa netubalongeshe malu a Yehowa ne a Yezu Kristo.

16. Ntshinyi tshidi Yehowa ukonkonona bua kumanya muntu wa yeye kubisha ku lufu? (Yelemiya 17:10)

¹⁶ Bala Yelemiya 17:10. Mvese eu udi uleja tshitudi bamanye tshia ne: anu Yehowa ke utu ‘ukonkonona muoyo, ne ukonkonona meji a munda menemene.’ Bua bidi bitangila dibishibua ku lufu, neenze anu bu pa tshibidilu, tuambe ne: ufuta “muntu ne muntu bilondeshile njila yende.” Yehowa neikale ne dîsu dikole padibi bikengela, ne nealejangane luse koku bualu bua kululejangana. Nanku, katuena ne bua kuamba ne: muntu kampanda kakubishibua ku lufu padi Bible kayi muambe nanku to!

“MULUMBULUISHI WA BULOBA BUJIMA” NEENZE “TSHIDI TSHIAKANE”

17. Ntshinyi tshienzekela bantu badi bafue?

¹⁷ Katshia Adama ne Eva ne Satana batombokela Yehowa, bantu miliyare ne miliyare mbafue. Bushuwa, ‘lufu mmuena lukuna wetu’ mubi wa dikema! (1 Kol. 15:26) Kadi ntshinyi tshienzekela bantu bonso badi bafue abu? Bayidi ba Kristo ba lulamatu binunu 144 nebabishibue ku lufu bua kupeta muoyo udi kawuyi ufua mu diulu. (Buak. 14:1) Batendeledi bakuabu ba Yehowa ba lulamatu bungi tshianana nebabishibue mu ‘dibishibua dia bantu ku lufu dia bakane,’ ne nebashale ne muoyo kashidi pa buloba anu bobu batungunuke ne kuikala bantu bakane mu Bukokeshi bua bidimu 1000 bua Kristo ne mu diteta dia ndekelu. (Dan. 12:13; Eb. 12:1) Bualu bukuabu, mu Bukokeshi bua bidimu 1000 bua Kristo,  bantu “badi kabayi bakane,” too ne bavua kabayi benzele Yehowa mudimu, nansha “bavua benze malu mabi,” nebapete mpunga wa kulekela bienzedi biabu bibi ne kulua batendeledi ba Yehowa ba lulamatu. (Luka 23:​42, 43) Kadi kudi bantu babi menemene bavua anu badisuike bua kutombokela Yehowa. Buabu bobu, Yehowa mmupangadije bua kubenga kubabisha ku lufu.—Luka 12:​4, 5.

18-19. a) Bua tshinyi mbimpe tueyemene Yehowa pakosaye tshilumbu tshia bantu babishaye ku lufu ne babengaye kubisha? b) Nnkonko kayi ituandamuna mu tshiena-bualu tshialonda?

¹⁸ Tudiku ne bua kuikala bashindike ne: patu Yehowa ulumbuluisha bantu utu anu wenza tshidi tshiakane anyi? Eyowa! Abalahama uvua mujinguluilamu ne: Yehowa “mulumbuluishi wa buloba bujima” mmupuangane, udi ne meji a bungi, ne mmubanji mu luse. Mmulongeshe Muanende, ne mmumupeshe mudimu wa kulumbuluisha muntu yonso. (Yone 5:22) Yehowa ne Muanende mbamanye malu adi mu muoyo wa muntu yonso. (Mat. 9:4) Palumbuluishabu muntu yonso, nebenze anu “tshidi tshiakane”!

¹⁹ Tuikalayi badisuike bua kueyemena Yehowa ne kuitaba mapangadika ende onso. Tuikale kabidi bamanye ne: katuena bakumbane bua kulumbuluishangana to, anu Yehowa ke udi mukumbane! (Bala Yeshaya 55:​8, 9.) Ke bualu kayi tudi ne bua kubalekeela yeye ne Muanende dilumbuluisha dionso. Tudi bamanye ne: Yezu Mukalenge wetu nealumbuluishe bantu ne buakane ne luse anu bu Tatuende. (Yesh. 11:​3, 4) Kadi mmunyi mualumbuluishabu bantu mu dikenga dinene? Ntshinyi tshitudi katuyi bamanye? Ntshinyi tshitudi bamanye? Tshiena-bualu tshialonda netshiandamune nkonko eyi.