1-2. Bilondeshile Misambu 25:14, ntshinyi tshitudi ne bua kuenza tuetu basue kudia bulunda bukole ne Yehowa?

 BUEBE wewe, nngikadilu kayi itudi ne bua kuikala nayi bua kulama bulunda buetu ne muntu? Pamuapa udi mua kuandamuna ne: balunda bimpe badi ne bua kunangangana ne kuambuluishangana. Pamuapa udi mua kuamba ne: ditshina ki nngikadilu wa mushinga bua kuikala balunda bimpe to. Kadi anu mudi mvese wa nshindamenu uleja, bantu badi basue kudia bulunda bukole ne Yehowa badi ne bua ‘kumutshina.’​—Bala Misambu 25:14.

² Nansha tuetu tuenzela Yehowa mudimu kukadi bidimu bungi kayi, mbimpe yonso wa kutudi ikale ne ditshina dimpe kudiye. Kadi kutshina Nzambi kudi kumvuija tshinyi? Mmunyi mutudi mua kufika ku ditshina Yehowa? Tshilejilu tshia Obadaya uvua mulami wa nzubu wa mukalenge, tshia muakuidi munene Yehoyada, ne tshia mukalenge Yoasha tshidi mua kutulongesha tshinyi bua ditshina dia Nzambi?

3. Mmalu kayi atudi mua kutshina? Mmunyi mudi ditshina mua kutukuba?

³ Tuetu bamone ne: bualu kampanda mbufuane kutukebela njiwu, bidi mua kutuenza buôwa. Buôwa bua mushindu au ke ditshina dimpe didi ditusaka bua kuenza malu ne meji. Tuetu tutshina bua katukuluki, katuakuya kuendela ku mibangubangu ya lupongo to. Tuetu tutshina bua katutapiki, netuepuke nsombelu udi mua kutukebela njiwu. Tuetu tutshina bua bulunda buetu ne muntu utudi banange kabufu, netudikande bua kumuamba dîyi dibi anyi kumuenzela bualu bubi.

4. Nditshina dia Yehowa dia mushindu kayi didi Satana musue bua tuikale nadi?

 ⁴ Satana mmusue bua tuikale tumvua Yehowa buôwa. Mmusue tuitabe ne: Yehowa utu anu ne tshiji, mmusue kuikala utunyoka, ne katuena mua kumusankisha to. (Yobo 4:18, 19) Mmusue bua tumvue Yehowa buôwa bua bungi bua tulekele kumuenzela mudimu. Bua kuepuka buteyi abu mbimpe tulonge mua kumunemeka ne kuepuka bua kumunyingalaja.

5. Kutshina Nzambi kudi kumvuija tshinyi?

⁵ Muntu udi munange Nzambi ne kayi wenza bualu budi mua kunyanga malanda ende nende, muntu au udi ne ditshina dimpe kudiye. Yezu uvua ne ‘ditshina dia Nzambi’ dia mushindu eu. (Eb. 5:7) Kavua umvua Yehowa buôwa wamba kufua to. (Yesh. 11:2, 3) Kadi uvua mumunange bikole ne musue kumutumikila. (Yone 14:21, 31) Tudi petu tunemeka Yehowa bikole menemene anu bu Yezu bualu udi ne dinanga, meji, buakane, ne bukole. Tudi bamanye kabidi ne: Yehowa mmutunange bikole, ne patuye utulongesha, utu ushala muindile bua kumona tshitudi tuenza. Tuetu tumutumikila, udi usanka; tuetu katuyi tumutumikila, udi unyingalala.​—Mis. 78:41; Nsu. 27:11.

6. Ngumue mushindu kayi utudi mua kufika ku ditshina Nzambi? (Misambu 34:11)

⁶ Katuena baledibue tutshina Yehowa to; kadi tudi ne bua kudienzeja bua kuikala ditshina dia Nzambi. (Bala Misambu 34:11) Umue mushindu wa kudipeta ngua kukonkonona bufuki. Dîba ditudi tujingulula mudi bufuki bua Yehowa buleja mudiye ne meji, bukole, ne mudiye mutunange bikole, tudi tufika ku dimunemeka bikole ne ku dimunanga. (Lomo 1:20) Muanetu mukuabu wa bakaji, diende Adrienne, wakamba ne: “Meji a Yehowa antu mmona mu bintu bidiye mufuke atu ankemesha bikole ne atu angambuluisha bua kumona ne: mmumanye tshidi tshimpe bua bualu buanyi.” Kuelangana meji mushindu au kuakamufikisha ku diamba ne: “Tshiena mua kuenza bualu budi mua kushipa bulunda buanyi ne Yehowa udi mumpeshe muoyo undi nawu eu to.” Udiku mua kukeba dîba lumingu elu bua kuelangana meji a tshifukibua kampanda anyi? Wewe muenze nanku, neunemeke Yehowa bikole ne neumunange kabidi bikole.​—Mis. 111:2, 3.

7. Mmunyi mudi disambila mua kutufikisha ku dikala ne ditshina dimpe dia Yehowa?

⁷ Tudi kabidi mua kufika ku ditshina Nzambi tuetu ne tshibidilu tshia kusambila. Tuetu tuenza nanku, netufike kudimanya Yehowa bimpe menemene. Dîba dionso ditudi tumulomba bukole bua kutantamena lutatu kampanda, tudi tuvuluka mudiye Nzambi wa Bukole bua bungi. Patudi tumusakidila bua dipa dia Muanende, tudi tuvuluka mudiye Nzambi wa dinanga. Patudi tumusengelela bua atuambuluishe mu bualu kampanda, tudi tuvuluka mudiye Nzambi wa meji. Masambila a mushindu eu adi atufikisha ku dinemeka Yehowa bikole. Adi kabidi enza bua tudisuike bua kubenga kuenza bualu budi mua kunyanga bulunda buetu nende.

8. Ntshinyi tshitudi mua kuenza bua tutungunuke ne kutshina Nzambi?

⁸ Tudi kabidi mua kutungunuka ne kutshina Nzambi tuetu tulonga Bible, bikale ne tshipatshila tshia kupeta malongesha adi mu bilejilu bimpe ne bibi bidimu. Tuakulayi bua bena mudimu ba Yehowa ba lulamatu aba: Obadaya mulami wa nzubu wa mukalenge Ahaba ne muakuidi munene Yehoyada. Pashishe, netumone tshidi tshilejilu tshia mukalenge Yoasha wa mu Yudaya tshitulongesha. Mukalenge eu uvua mutuadije kuenzela Yehowa mudimu kadi kuluaye kuwulekela.

9. Mmunyi muvua ditshina dia Nzambi diambuluishe Obadaya? (1 Bakalenge 18:3, 12)

⁹ Mu Bible badi batuadija kuakula bua  Obadaya b mu mêyi aa: “Obadaya uvua utshina Yehowa bikole.” (Bala 1 Bakalenge 18:3, 12.) Mmunyi muvua ditshina dimpe dia Nzambi divuaye nadi dimuambuluishe? Tshia kumpala, diakamuvuija muena bululame uvua bantu beyemena. Ke bualu kayi mukalenge wakamuteka mulami wa nzubu wa bukalenge. (Fuanyikija ne Nehemiya 7:2.) Tshibidi, diakamupetesha dikima dia dikema divuaye nadi dijinga menemene. Uvua ne muoyo tshikondo tshivua mukalenge mubi Ahaba ukokesha. Uvua mukalenge “mubi menemene ku mêsu kua Yehowa kupita bonso bavua kumpala kuende.” (1 Bak. 16:30) Bualu bukuabu, mukaji wa Ahaba, diende Yezabele, uvua mutendeledi wa Bâla. Uvua pende mukine Yehowa bikole, kukandikaye too ne bantu ba mu bukalenge bua bisa dikumi bia Isalele buvua ku nord bua kumutendelela. Wakashipa too ne baprofete ba Nzambi ba bungi. (1 Bak. 18:4) Mbimueneke bimpe ne: Obadaya uvua utendelela Yehowa mu tshikondo tshikole!

10. Mmunyi muvua Obadaya muleje ne: uvua ne dikima dia dikema?

¹⁰ Mmunyi muvua Obadaya muleje ne: uvua ne dikima dia dikema? Pavua Yezabele mutuadije kukeba baprofete ba Nzambi bua kubashipa, Obadaya wakasokoka baprofete 100, mubatapulule ‘mu bisumbu bia baprofete 50 mu nyongolo, 50 mu nyongolo, kutungunukaye ne kubapesha mampa ne mâyi.’ (1 Bak. 18:13, 14) Bu bobu bamujikile, bavua anu mua kumushipa. Tuamba eku tuela eku, Obadaya uvua muntu anu bu tuetu, kavua musue kufua to. Kadi uvua munange Yehowa ne batendeledi bende kupita muvuaye munange muoyo wende yeye muine.

11. Mmushindu kayi udi bantu ba Yehowa lelu bafuane Obadaya? (Tangila kabidi tshimfuanyi.)

¹¹ Lelu bantu ba Nzambi ba bungi badi mu matunga adibu bakandike midimu yetu. Badi banemeka bakokeshi mu mushindu mukumbanyine; kadi anu bu Obadaya, badi bapesha Yehowa tshidi tshimuakanyine, tuambe ne: badi bashala bamulamate anu yeye. (Mat. 22:21) Badi batumikila Nzambi pamutu pa kutumikila bantu bua kuleja mudibu bamutshina. (Bien. 5:29) Mushindu kayi? Badi batungunuka ne kuamba lumu luimpe lua Bukalenge ne badisangisha pamue mu musokoko. (Mat. 10:16, 28) Badi baditatshisha bua bena Kristo nabu bapete bidibu nabi dijinga bua kushala  pabuipi ne Yehowa. Tuangate tshilejilu tshia muanetu Henri uvua mu ditunga kampanda dia mu Afrike muvuabu banji kukandika midimu yetu bua tshipolo kansanga. Tshikondo atshi, Henri uvua mudifile bua kushila bena Kristo nende mikanda ku mabu. Wakamba ne: “Ntu muena lumamamama. Nunku ndi mutuishibue ne: ngakapeta dikima ndivua nadi dijinga bualu mvua nnemeka Yehowa bikole.” Tuamba aku buebe wewe, udi pebe ne dikima dia buena dia Henri anyi? Udi mua kudipeta wewe unemeka Nzambi bikole.

12. Mmushindu kayi uvua muakuidi munene Yehoyada ne mukajende baleje muvuabu balamate Yehowa bikole?

¹² Muakuidi munene Yehoyada uvua utshina Yehowa; ke bualu kayi wakashala ne lulamatu, ukankamija bakuabu bua kumutendelela. Ke tshiakenzaye pavua Atalaya (muana wa bakaji wa Yezabele) mudishiye mukalenge mu Yudaya. Tshikisu tshivua natshi Atalaya ke tshivua tshienza bua bantu bamumvue buôwa. Uvua ujinga bukalenge wamba kufua, ke yeye kushipa ne bikulu bende bonso anu bua ne: akokeshe. (2 Kul. 22:10, 11) Yoasha, umue wa ku ndelanganyi ayi uvua mupande bualu Yehoshabata, mukaji wa Yehoyada, uvua mumusungile. Yehoshabata ne bayende bakasokoka muana au, bobu kumutabalela bimpe. Au ke mushindu uvua Yehoyada ne Yehoshabata bambuluishe bua kulama mulongolongo wa bakalenge ba mu ndelanganyi ya Davidi. Yehoyada uvua mulamate Yehowa, kavua uzakala ne buôwa kumpala kua Atalaya to.​—Nsu. 29:25.

13. Mmushindu kayi uvua Yehoyada muleje kabidi ne: uvua ne lulamatu pavua Yoasha ne bidimu 7?

¹³ Pakavua Yoasha ne bidimu 7, Yehoyada wakaleja kabidi muvuaye mulamate Yehowa. Wakalongolola mayele. Pavuawu akumbana, Yoasha uvua ulua mukalenge, tuambe ne: mupianyi mulelela wa nkuasa wa bukalenge wa Davidi. Kadi pavua mayele au apangila, pamuapa bavua anu mua kushipa Yehoyada. Yehowa wakambuluisha, mayele au kukumbana. Yehoyada ne bamfumu bavua bamutue mpanda pamue ne bena Lewi, bakateka Yoasha mukalenge, kutumabu dîyi, bobu kushipa Atalaya. (2 Kul. 23:1-5, 11, 12, 15; 24:1) Pashishe Yehoyada “wakenza tshipungidi pankatshi pa Yehowa ne mukalenge ne bantu tshia ne: bavua ne bua kutungunuka ne kuikala tshisamba tshia Yehowa.” (2 Bak. 11:17) Yehoyada “wakateka kabidi balami ba biibi ku biibi bia nzubu wa Yehowa, bua muntu mukoya wa mushindu kayi yonso kabuedi to.”​—2 Kul. 23:19.

14. Leja muvua Yehoyada mupeshibue lumu bua muvuaye unemeka Yehowa.

¹⁴ Yehowa ukavua muambe ne: “Nennemeke bantu badi bannemeka.” Bushuwa, wakafuta Yehoyada. (1 Sam. 2:30) Tshilejilu, mmufundishe malu mimpe a muakuidi munene au mu Bible bua kutulongesha. (Lomo 15:4) Bualu bukuabu, pakafua Yehoyada, bakamujiika ne lumu lua pa bualu bualu bavua bamujiike “mu Tshimenga tshia Davidi pamue ne bakalenge, bualu uvua muenze malu mimpe mu Isalele pa bidi bitangila Nzambi mulelela ne nzubu Wende.”​—2 Kul. 24:15, 16.

15. Bualu bua Yehoyada budi butulongesha tshinyi? (Tangila kabidi tshimfuanyi.)

¹⁵ Bualu bua Yehoyada budi mua kutuambuluisha bua kutshina Nzambi. Padi batangidi bena Kristo bakeba mishindu ya kukuba tshisumbu, bidi bileja mudibu bidikija Yehoyada ne mudibu ne lulamatu. (Bien. 20:28) Tshilejilu tshia Yehoyada tshidi mua kulongesha bawetu bakadi bakulakaje ne: bobu batshina Yehowa, bashala anu bamulamate, neakumbaje disua diende ku diambuluisha diabu. Kakubela nyima to. Tshilejilu tshia muvua Yehowa muenzele Yehoyada malu tshidi mua kulongesha bansonga,  ne badi mua kumuidikija. Mushindu kayi? Mbimpe banemeke bawetu bakulakaje, nangananga bakadi benzele Nzambi mudimu ne lulamatu bidimu bia bungi. (Nsu. 16:31) Tshilejilu tshia bamfumu ne bena Lewi bavua beleshe Yehoyada diboko tshidi mua kutulongesha tuetu bonso. Nanku, tutumikilayi bana betu ‘badi batulombola,’ tueleshangana nabu diboko ne lulamatu luonso.​—Eb. 13:17.

16. Ntshinyi tshidi tshileja ne: mukalenge Yoasha uvua ne butekete?

¹⁶ Yehoyada wakambuluisha Yoasha bua kuikala muntu muimpe. (2 Bak. 12:2) Ke bualu kayi mukalenge utshivua muana eu wakajinga bua kusankisha Yehowa. Kadi pakafua Yehoyada, Yoasha wakateleja bakokeshi batontolodi. Tshiakenzeka ntshinyi? Yeye ne bantu bavuaye ukokesha ‘bakatuadija kuenzela mitshi ya tshijila ne mpingu mudimu.’ (2 Kul. 24:4, 17, 18) Nansha muvua Yehowa mubungame bikole bua bualu abu, “uvua anu utuma baprofete munkatshi muabu bua kubapingaja kudiye . . . , kadi bakabenga kuteleja.” Kabavua nansha bateleja Zekâya muana wa Yehoyada to. Zekâya eu uvua muprofete wa Yehowa, uvua muakuidi, ne uvua kabidi muanabu ne Yoasha. Mukalenge Yoasha wakashipesha too ne Zekâya nansha muvua bena mu dîku dia Zekâya eu bamusungile. Bidi bileja muvuaye mupange dianyisha.​—2 Kul. 22:11; 24:19-22.

17. Mmushindu kayi wakalua malu kupitakana bua Yoasha?

¹⁷ Yoasha katshivua kabidi utshina Yehowa to. Ke bualu kayi malu ende kaakenda bimpe nansha. Yehowa wakamba ne: “Badi bampetula  nebapetudibue.” (1 Sam. 2:30) Tshiluilu tshikese tshia bena Sulia tshiakalua kutshimuna “tshiluilu tshinene menemene” tshia Yoasha, ‘kumutapabu bibi menemene.’ Pakaya bena Sulia, bakashipa Yoasha kudi bena mudimu bende yeye muine bua muvuaye mushipe Zekâya. Bantu bakamona ne: mukalenge mubi au kavua nansha mukumbane bua bamujiike “mu Tshimenga tshia Davidi” to.​—2 Kul. 24:23-25.

18. Bilondeshile Yelemiya 17:7, 8, ntshinyi tshitudi mua kuenza bua katufuanyi Yoasha?

¹⁸ Tshilejilu tshia Yoasha tshidi tshitulongesha tshinyi? Yoasha uvua bu mutshi udi miji yawu kayiyi mibuele menemene mu buloba to, kadi muimane anu bua mpanda idibu bawutue. Dîba divua mpanda kayitshiyiku, tuambe ne: Yehoyada katshiyiku ne Yoasha mutuadije kuteleja batontolodi, wakapanga lulamatu kudi Yehowa. Ebi bidi bileja patoke ne: katuena ne bua kutshina Nzambi anu bualu bena Kristo netu anyi bena mu dîku dietu badi bamutshina to. Bua tuetu kushala pabuipi ne Yehowa, mbimpe tuikale ne tshibidilu tshia kudilongela, kuelangana meji, ne kusambila; dîba adi tudi tukolesha dinanga ditudi bamunange ne tumunemeka bikole.​—Bala Yelemiya 17:7, 8; Kolos. 2:6, 7.

19. Ntshinyi tshidi Yehowa utulomba bua kuenza?

¹⁹ Yehowa katu utulomba malu mapite bungi to. Tshidiye utulomba ntshileja mu Muambi 12:13, mudibu bamba ne: “Tshina Nzambi mulelela ne tumikila mikenji yende, bualu, ebu ke bualu buonso budi muntu ne bua kuenza.” Tuetu tutshina Nzambi, netutantamene ntatu ituikala mua kupeta ne netushale bashindame anu bu Obadaya ne Yehoyada. Tshintu nansha tshimue katshiakushipa bulunda buetu ne Yehowa to.