1. Ntshinyi tshitudi ne bua kuenza bua kupanduka ku dituku dia Yehowa?

 PADI Bible wakula bua “dituku dia Yehowa,” udi wakula bua tshikondo tshikala Yehowa mua kubutula bena lukuna bende ne kupandisha bantu bende. Ku kale, kuvua misangu ivua Yehowa munyoke bimue bisamba. (Yesh. 13:1, 6; Yeh. 13:5; Sef. 1:8) Bikondo bietu ebi, “dituku dia Yehowa” nedituadije pabundabu Babilona Munene ne nedijike ne mvita ya Armagedone. Bua kupanduka ku “dituku” adi, mbimpe tudilongolole ku mpindieu. Bushuwa, Yezu mmulongeshe ne: tudilongolole bua “dikenga dinene,” kadi tudi kabidi ne bua kutungunuka ne ‘kuikala badilongolole.’​—Mat. 24:21; Luka 12:40.

2. Mukanda wa 1 Tesalonike udi mua kutuambuluisha mushindu kayi?

² Mu mukanda wa kumpala uvua mupostolo Paulo mufundile bena Kristo ba mu Tesalonike, uvua mufile bilejilu ndambu bua kubambuluisha bua bikale badilongolole bua dituku dinene dia Yehowa dia dilumbuluisha. Paulo uvua mumanye ne: dituku dia Yehowa kadivua mua kulua tshikondo atshi to. (2 Tes. 2:1-3) Kadi wakabakankamija bua kudilongolola bua dituku adi bienze anu bu ne: divua dituku dia malaba. Tutumikilayiku petu mubelu wende au. Tukonkononayi mpindieu tshivuaye mumvuije bua: 1) mushindu walua dituku dia Yehowa, 2) bantu bapanga kupanduka dituku adi, ne 3) mutudi mua kudilongolola bua kupanduka.

3. Mmushindu kayi udi dituku dia Yehowa dilua bu muivi butuku? (Tangila kabidi tshimfuanyi.)

³ “Anu bu mutu muivi ulua butuku.” (1 Tes. 5:2) Etshi ntshilejilu tshia kumpala mu bisatu bidi Paulo mutele bua kumvuija dilua dia dituku dia Yehowa. Pa tshibidilu, bivi batu benza malu lukasa lukasa butuku padi bena nzubu kabayi bamanye. Dituku dia Yehowa  nedilue padi mu tshimpitshimpi, ne bantu ba bungi nebapapuke. Nansha bena Kristo balelela nebapapuke bua muenzeka malu lukasa dituku adi. Kadi katuakubutudibua bu bantu babi to.

4. Mmushindu kayi udi dituku dia Yehowa difuanangane ne didinyenga dia pa kulela?

⁴ “Bu mutu didinyenga dia pa kulela dikuata mukaji udi ne difu.” (1 Tes. 5:3) Mamu udi ne difu kena mua kumanya dituku menemene dialelaye to. Nansha nanku mmumanye ne: nedilue. Padidi dikumbana, lulelu ludi mua kulua mu tshimpitshimpi, lua didinyenga, ne kakuyi mushindu wa kulukanda. Bia muomumue, katuena bamanye dituku ne dîba diatuadija dituku dia Yehowa to. Nansha nanku tudi batuishibue ne: nedilue, ne dibutuka dia bantu babi nedikale dia tshimpitshimpi, kakuyi mushindu wa kudiepuka.

5. Mmushindu kayi udi dikenga dinene difuanangane ne patshiatshia?

⁵ Bu mutu patshiatshia. Tshilejilu tshisatu tshia Paulo tshidi tshiakula kabidi bua bivi batu biba butuku. Kadi musangu eu Paulo udi ufuanyikija dituku dia Yehowa ne patshiatshia. (1 Tes. 5:4) Bivi batu balua butuku bua kuiba, pamuapa meji abu onso atu anu ku tshidibu baluile, bibapangisha bua kumvua mudi dîba diya. Badi mua kupapuka kuîsu kukadi kutoke ne badi mua kubakuata. Bia muomumue, dikenga dinene nedikuate bantu badi mu mîdima anu bu bivi, tuambe ne: badi batungunuka ne kuenza malu adi anyingalaja Nzambi. Tuetu tudi bashilangane nabu bualu tudi tubenga kuenza malu adi anyingalaja Yehowa ne tudi tutungunuka ne “buimpe ne buakane ne bulelela bia mishindu yonso.” (Ef. 5:8-12) Paulo udi ufila kabidi bilejilu bibidi bua kuleja tshidi bantu babutulabu.

6. Bantu ba bungi mbalale mu ngumvuilu kayi? (1 Tesalonike 5:6, 7)

⁶ “Bantu badi balala.” (Bala 1 Tesalonike 5:6, 7.) Paulo wakafuanyikija bantu babutuka mu dituku dia Yehowa ne bantu badi balala.  Ki mbamanye malu adi enzeka muaba udibu anyi mudi dîba diya to. Ke bualu kayi kabena mua kujingulula malu a mushinga anyi kuitaba to. Lelu bantu ba bungi mbalale mu ngumvuilu wa mu tshimfuanyi. (Lomo 11:8) Kabena bitaba bijadiki bidi bileja ne: tudi mu “matuku a ku nshikidilu” ne dikenga dinene dikadi pabuipi to. Malu manene adi enzeka pa buloba adi mua kubisha bamue ku tulu tua mu nyuma ne kubasaka bua kuitaba mukenji wa Bukalenge. Nansha nanku, ba bungi batu bapingana ku tulu pamutu pa kushala batabale. Tòo ne bamue bantu batu bitaba ne: dituku dia dilumbuluisha nedikalaku, badi bela meji ne: ditshidi kule. (2 Pet. 3:3, 4) Kadi tuetu tudi tuitaba ne: mubelu mufila ku bukole bua nyuma wa kushala batabale mmubelu wa kutumikila ne lukasa dituku dionso edi.

7. Mmushindu kayi udi bantu bikala Nzambi ne bua kubutula bafuanangane ne bantu badi bakuatshika?

⁷ “Bantu badi bakuatshika.” Mupostolo Paulo wakafuanyikija bantu bikala Nzambi ne bua kubutula ne bantu badi bakuatshika maluvu. Bantu badi ku bupika bua maluvu batu bajanguluka bua kuitaba malu atu enzeka muaba udibu, ne kabatu bangata mapangadika mimpe to. Bia muomumue, bantu babi kabatu bitaba madimuija a Nzambi to. Mbasue kuenza malu adi abafikisha ku kabutu. Kadi badi balomba bena Kristo bua kulama bieledi biabu bia meji ne kabikadi bakuatshiki ba maluvu to. (1 Tes. 5:6) Mumanyi wa malu a mu Bible kampanda udi umvuija dibenga kukuatshika edi ne: “ndikala mutukije anyi kuikala ne lungenyi kaluyi lulubakana, kadi lukumbane bua kutata malu bua kuangata mapangadika mimpe.” Bua tshinyi mbimpe tuikale batukije, katuyi tulubakana? Bua katubuelakanyi mu malu a tshididi anyi mu bimvundu bia bantu to. Bu mudi dituku dia Yehowa disemena bikole, nebatuenzeje bua kulamata ku luseke kampanda mu malu aa. Kadi katuditatshishi bua tshituamba to. Nyuma wa Nzambi udi mua kutuambuluisha bua kuikala batukije, katuyi tulubakana; ne netuangate mapangadika mimpe.​—Luka 12:11, 12.

8. Mmunyi mudi 1 Tesalonike 5:8 umvuija ngikadilu yatuambuluisha bua kushala batabale ne kulama bieledi bietu bia meji? (Tangila kabidi tshimfuanyi.)

⁸ ‘Tuvuale tshibuikilu tshia pa tshiadi ne tshifulu.’ Paulo udi utufuanyikija ne basalayi badi badiakaje bua kuya ku mvita. (Bala 1 Tesalonike 5:8.) Musalayi udi mudiakaje bua mvita udi ne bua kuikala pabuipi bua kuyiluangana dîba diondo didiyi ibudika. Ke mutudi petu ne bua kuikala. Bua kumuenekabi ne: tudi badilongolole, mbimpe tuvuale tshibuikilu tshia pa tshiadi tshia ditabuja ne dinanga ne tshifulu tshia ditekemena. Ngikadilu eyi idi mua kutuambuluisha bikole.

9. Ditabuja didi ditukuba mushindu kayi?

⁹ Tshibuikilu tshia pa tshiadi tshivua tshikuba muoyo wa musalayi. Ditabuja ne dinanga bitu bikuba muoyo wetu wa mu tshimfuanyi. Ngikadilu eyi neituambuluishe bua kutungunuka ne kuenzela Nzambi mudimu ne kutumikila Yezu. Ditabuja didi dienza bua tuikale batuishibue ne: Yehowa neatufute bua mutudi tumukeba ne muoyo mujima. (Eb. 11:6) Neditusake bua kushala ne lulamatu kudi Mulombodi wetu Yezu, nansha tuetu ne bua kunanukila mu ntatu. Tudi mua kukolesha ditabuja dietu bua kutuilangana ne ntatu patudi tukonkonona bilejilu bia bantu ba matuku etu aa badi bashale ne muoyo mutoke nansha mudibu babakengesha anyi bapangila makuta. Tudi mua kuepuka dinanga dinekesha dia bintu bia ku mubidi patudi tuidikija bantu bavua bakaje nsombelu wabu bua kuteka malu a Bukalenge pa muaba wa kumpala. b

10. Mmushindu kayi udi dinanga ditudi banange Nzambi ne bantu dituambuluisha bua kunanukila?

¹⁰ Dinanga didi kabidi ne mushinga bua kushala  batabale ne kulama bieledi bietu bia meji. (Mat. 22:37-39) Dinanga ditudi banange Nzambi didi dituambuluisha bua kutungunuka ne kuyisha nansha ntatu ya mushindu kayi mua kutufikila. (2 Tim. 1:7, 8) Bu mutudi banange bantu badi kabayi batendelela Yehowa, tudi tutungunuka ne kuyisha bantu mu teritware yetu, ku telefone ne mu mikanda itudi tubafundila. Tudi batekemene ne muoyo mujima ne: dimue dituku bantu nebashintuluke ne kutuadijabu kuenza malu makane.​—Yeh. 18:27, 28.

11. Mmunyi mudi kunanga bena Kristo netu kutuambuluisha? (1 Tesalonike 5:11)

¹¹ Tutu kabidi banange bena Kristo netu. Tudi tuleja dinanga dia mushindu eu patudi ‘tukankamijangana ne tukoleshangana.’ (Bala 1 Tesalonike 5:11.) Anu bu mutu basalayi bambuluishangana mu mvita, tutu petu tukankamijangana. Bushuwa, musalayi udi mua kutapa musalayi nende ku mpukapuka mu mvita, kena mua kuenza nanku ku bukole to. Bia muomumue, katuena mua kuenzela bena Kristo netu bibi ku bukole anyi kubapingajila bubi ku bubi to. (1 Tes. 5:13, 15) Tudi tuleja kabidi mutudi banange bana betu badi batulombola mu tshisumbu patudi tubanemeka. (1 Tes. 5:12) Pavua Paulo mufunde mukanda eu, tshisumbu tshia mu Tesalonike katshivua tshianji kuenza tshidimu tshijima to. Pamuapa bana betu ba balume bavua balombola kabavua ne dimanya dia bungi to, ne bavua mua kuikala benza bilema. Nansha nanku, bivua bikengela kubanemeka. Pikala dikenga dinene mu tshiibi, pamuapa nebikengele ne: tuikale ne mêsu etu matangija anu kudi bakulu bua batuleje tshia kuenza kupita ne mudibi bienzeka lelu. Pamuapa katuakuikala ne mushindu wa kupeta buludiki bua kudi biro bietu binene anyi bua kudi Betele to; nunku mbia mushinga bua tuetu kunanga bakulu betu ne kubanemeka ku mpindieu. Nansha malu owu enzeka mushindu kayi, tulamayi bieledi bietu bia meji, katuimanyinyi pa bilema biabu to, kadi tuimanyinayi pa ne: Yehowa ke udi ulombola bana betu ba lulamatu aba ku diambuluisha dia Kristo.

12. Mmunyi mudi ditekemena dikuba meji etu?

¹² Anu muvua tshifulu tshikuba mutu wa musalayi, ditekemena dietu dia lupandu didi dikuba meji etu. Ditekemena dietu diodi dikole, tudi  tuitaba ne: tshionso tshidi bulongolodi ebu mua kutupetesha katshiena ne mushinga to. (Filip. 3:8) Ditekemena dietu didi dituambuluisha bua kushala batukije, katuyi tulubakana to. Ke muvuabi bua Wallace ne Laurinda bavua benzela Nzambi mudimu mu Afrike. Mu mbingu isatu patupu, yonso wa kudibu kufuishaye umue wa ku baledi bende. Bu muvuaku tshipupu tshia Korona, kabavua ne mushindu wa kupingana kuabu bua kuya kumonangana ne bena mu mêku abu to. Wallace udi wamba ne: “Ditekemena dia dibishibua dia bantu ku lufu ditu dingambuluisha bua kuela meji a nsombelu wikalabu nende matuku abu a kumpala mu bulongolodi bupiabupia, kadi kadiena dinsaka bua kuela meji a nsombelu uvuabu nende matuku a ndekelu a bobu kufua to. Ditekemena edi ditu dienza bua ntukije pantu ne kanyinganyinga ka muntu undi mufuishe.”

13. Ntshinyi tshitudi mua kuenza bua kupeta nyuma muimpe?

¹³ “Kanujimi kapia ka nyuma.” (1 Tes. 5:19) Paulo wakafuanyikija nyuma muimpe ne kapia kadi munda muetu. Muntu udi ne nyuma wa Nzambi, udi ne tshisumi tshisaba ne udi anu ne muoyo wa kuenza tshidi tshiakane; udi kabidi ne bukole bua kuenzela Yehowa mudimu. (Lomo 12:11) Ntshinyi tshitudi mua kuenza bua kupeta nyuma muimpe? Tudi mua kumulomba Nzambi mu disambila, kudilongela Dîyi dia Nzambi difundisha ku bukole bua nyuma wende, ne tudi mua kudisangisha ne bulongolodi buende budiye ulombola ne nyuma wende. Tuetu benze malu aa, netupete “dimuma dia nyuma.”​—Gal. 5:22, 23.

14. Tuetu basue ne: tutungunuke ne kupeta nyuma wa Nzambi, ntshinyi tshitudi ne bua kuepuka? (Tangila kabidi tshimfuanyi.)

¹⁴ Nzambi yeye mutupeshe nyuma wende muimpe, tuenzayi muetu muonso bua ‘katujimi kapia ka nyuma to.’ Anu bantu batu balama meji ne bikadilu biabu bikezuke, ke batu Nzambi upesha nyuma wende. Tuetu tuela anu meji a malu mabi ne tuenza malu au, kakutungunuka ne kutupeshayi nansha. (1 Tes. 4:7, 8) Bualu bukuabu mbobu abu: bua tuetu kutungunuka ne kupeta nyuma muimpe, ‘katupetudi mêyi a buprofete to.’ (1 Tes. 5:20) Muaba eu “Mêyi a buprofete”  adi aleja malu adi Yehowa utuambila ku bukole bua nyuma wende. Mu malu au mudi malu adi atangila dituku dia Yehowa ne a mudibi bikengela kuenza malu ne lukasa bikondo bietu ebi. Katuena tusemeja dituku adi kule mu lungenyi luetu, tuela meji ne: Armagedone kakulua mpindieu to. Kadi tudi tuleja mutudi bamanye ne: ukadi pabuipi patudi anu ne bikadilu bimpe ne “bienzedi bia dilamata Nzambi” dituku dionso.​—2 Pet. 3:11, 12.

15. Mmunyi mutudi mua kubenga kudingibua kudi ngumu ya dishima idi bademon bamuangalaja? (1 Tesalonike 5:21)

¹⁵ Mu katupa kîpi emu, bena lukuna ba Nzambi nebambe mu mushindu kampanda ne: “Ditalala, ne kakuena bualu bua kutshina!” (1 Tes. 5:3) Mêyi mamba ku nyuma wa bademon neatangalake pa buloba bujima, apambuisha bantu ba bungi. (Buak. 16:13, 14) Kadi tuetu? Tuetu ‘bakonkonone anyi batete malu onso, katuakudingibua to. (Bala 1 Tesalonike 5:21.) Muaku wa mu tshiena Greke udibu bakudimune ne: “nukonkonone” bavua bawutela pavuabu bateta biamu bia mushinga mukole bua kumanya ni bivua biobi menemene. Nunku, mbimpe tutete malu atudi tuteleja anyi atudi tubala bua kumanya ni mmalelela. Bualu ebu buvua ne mushinga bua bena Tesalonike, ne nebuikale ne mushinga wa bungi kutudi bu mudi dikenga dinene dienda disemena. Pamutu pa kuitaba tshianana tshianana malu adi bakuabu bamba, tudi tukuata mudimu ne bieledi bietu bia meji bua kufuanyikija malu atudi tubala anyi atudi tuteleja ne tshidi Bible anyi bulongolodi bua Yehowa biamba. Tuetu tuenza nanku, katuakudingibua ku mashimi a bademon to.​—Nsu. 14:15; 1 Tim. 4:1.

16. Nditekemena kayi dilelela ditudi nadi? Tudi badisuike bua kuenza tshinyi?

¹⁶ Tudi bamanye ne: bantu ba Yehowa mu tshibungi nepanduke ku dikenga dinene. Nansha nanku, katuena bamanye tshiafikila yonso wa kutudi malaba to. (Yak. 4:14) Kadi nansha tuetu bafue kumpala kua dikenga dinene anyi nansha diodi ditusangane ne muoyo, nebatufute muoyo wa tshiendelele tuetu bashale ne lulamatu. Bela manyi nebikale ne Kristo mu diulu. Mikoko mikuabu neikale mu Mparadizu pa buloba. Tuetu bonso tutumayiku meji ku ditekemena dietu dilenga ne tuikale badilongolole bua dituku dia Yehowa!