1. Bilondeshile 1 Petelo 5:2, ndiakalenga kayi didi nadi bakulu?

 MBAPESHE bakulu bena Kristo mudimu wa kulama mikoko ya Yehowa ya mushinga mukole. Bana betu ba lulamatu aba, badi ne dianyisha bua diakalenga didibu nadi dia kuenzela bena Kristo nabu mudimu; ne badi badienzeja bikole bua kuikala ‘balami badi balama bushuwa’ mikoko eyi. (Yel. 23:4; bala 1 Petelo 5:2.) Tudi ne dianyisha dia bungi bua mutudi ne balume ba nunku mu bisumbu bietu!

2. Nntatu kayi idi bamue bakulu mua kutuilangana nayi?

² Bakulu batu batuilangana ne ntatu ya bungi padibu bakumbaja mudimu wabu. Bumue bua ku malu budi buenza bua bikale nanku budi ne: kutabalela tshisumbu kudi kulomba mudimu wa bungi. Mukulu mukuabu wa mu Etats-Unis, diende Tony, wakadimona muenzejibue bua kuleja bupuekele bua bungi bua mudimu uvuaye muitabe bua kuenza. Udi wamba ne: “Pakatuadija tshipupu tshia Korona, mvua ndienzeja bua kulongolola malu bua bisangilu ne mudimu wa buambi. Kadi nansha mumvua ngenza mudimu wa bungi au, kutshivua anu bia bungi bia kuenza. Ndekelu wa bionso, tshitshivua kabidi ne dîba dia kubala Bible, kudilongela, ne kusambila to.” Mukulu mukuabu wa mu Kosovo, diende Ilir, uvua mutuilangane ne lutatu lua mushindu mukuabu. Pavuaye muaba uvua mvita yenzekela, biakamukolela bua kutumikila buludiki buvua bulongolodi bufile. Udi wamba ne: “Dikima dianyi divua ditetshibue pavua Betele mumpeshe mudimu wa kuambuluisha bana betu bavua muaba uvua njiwu. Mvua ne buôwa bua bungi, ne buludiki abu buvua bumueneka kabuyi bukumbana to.” Biakakolela misionere mukuabu wa mu Asie, diende Tim, bua kuenza midimu ivuaye ne bua kuenza dituku dionso. Udi wamba ne: “Kuvua misangu imvua ndiumvua mutshioke mu lungenyi, tshiyi nkumbana bua kuambuluisha bena Kristo nanyi to.” Ntshinyi tshidi mua kuambuluisha bakulu badi batuilangana ne ntatu ya nunku?

3. Mmunyi mudi tshilejilu tshia mulumbuluishi Gideona mua kuambuluisha bantu bonso?

 ³ Tshilejilu tshia mulumbuluishi Gideona tshidi mua kulongesha bakulu. (Eb. 6:12; 11:32) Uvua mulami ne mukubi wa tshisamba tshia Nzambi. (Bal. 2:16; 1 Kul. 17:6) Anu bu Gideona, mbapeshe bakulu mudimu wa kutabalela bantu ba Nzambi mu tshikondo tshikole etshi. (Bien. 20:28; 2 Tim. 3:1) Gideona uvua ne bupuekele, budipuekeshi, ne uvua utumikila; nunku tshilejilu tshiende tshidi mua kutulongesha. Dinanukila diende divua ditetshibue pavuaye wenza midimu ivuabu bamupeshe. Nansha tuetu bakulu anyi katuyi bakulu, tshilejilu tshia Gideona tshidi tshitulongesha mua kuikala ne dianyisha bua mudimu udi bakulu benza. Tukuatshishayi bana betu ba balume badi benza mudimu mukole aba.​—Eb. 13:17.

4. Mmunyi muvua Gideona muleje budipuekeshi ne bupuekele?

⁴ Gideona uvua ne budipuekeshi ne uvua muena bupuekele. b Pavua muanjelu wa Yehowa mumuambile ne: mbamusungule bua kusungila Isalele kudi bena Midiyana bavua ne bukole bua bungi, muena budipuekeshi eu wakamba ne: “Tshiota tshietu ntshikese menemene mu Manashe, ne meme ndi ne mushinga mutambe bukese mu nzubu wa tatuanyi.” (Bal. 6:15) Uvua mudimone kayi mukumbane bua mudimu au, kadi Yehowa uvua mumanye bimpe ne: uvua mua kuwenza. Yehowa wakambuluisha Gideona, kukumbajaye mudimu wende bimpe menemene.

5. Ndîba kayi didibi mua kukolela mukulu bua kuikala ne bupuekele ne budipuekeshi?

⁵ Bakulu batu benza muabu muonso bua kuikala ne bupuekele ne budipuekeshi mu malu onso. (Mika 6:8; Bien. 20:18, 19) Kabatu baditumbisha bua mudimu udibu benza anyi badimona kabayi ne mushinga patubu benza bilema to. Kadi imue misangu bidi mua kukolela mukulu bua kuikala ne bupuekele ne budipuekeshi. Tshilejilu, mukulu udi mua kuitaba midimu ya bungi kadi kuluabi kumukolela bua kuyikumbaja yonso. Peshi badi mua kumubipisha bua mudiye mupange kukumbaja mudimu kampanda anyi kumutumbisha bua mudiye mukumbaje mudimu kansanga. Mmunyi mudi tshilejilu tshia Gideona mua kuleja bakulu tshia kuenza mu nsombelu ya nunku?

6. Bupuekele bua Gideona budi mua kulongesha bakulu tshinyi? (Tangila kabidi tshimfuanyi.)

⁶ Lomba diambuluisha. Muena bupuekele mmumanye mikalu yende. Gideona uvua muena  bupuekele bualu uvua mudiakaje bua kulomba bantu bakuabu diambuluisha. (Bal. 6:27, 35; 7:24) Bakulu ba meji batu benza pabu nanku. Tony utukadi batele udi wamba ne: “Bilondeshile muvuabu bankoleshe, mvua ngitaba midimu ya bungi imvua tshiyi mua kukokesha bua kuenza. Nunku ngakapangadija bua tuetu kulua kuakula bua bupuekele mu ntendelelu wa mu dîku, meme kulomba mukajanyi bua aleje muvuaye wela meji bua bualu abu. Meme kutangilula filme udi mu jw.org wa Longesha bakuabu, ubeyemene, ubakoleshe anu bu mutu Yezu wenza.” Tony wakatuadija kulomba bakuabu bua bamuenzeje imue midimu. Mbipeta kayi bidi bimueneke? Yeye nkayende udi wamba ne: “Bana betu badi benza mudimu mu tshisumbu bimpe, ne nkadi ne dîba dia bungi dia kukolesha bulunda buanyi ne Yehowa.”

7. Mmunyi mudi bakulu mua kuidikija Gideona padibu babamba? (Yakobo 3:13)

⁷ Kufiiki munda padibu bakuamba to. Lutatu lukuabu lutu bakulu batuilangana nalu ndua patubu babamba. Tshilejilu tshia Gideona tshidi mua kubambuluisha kabidi. Bu muvuaye mumanye ne: mmupange bupuangane, kavua mufiike munda pavua bena Efelayima bamuambe to. (Bal. 8:1-3) Gideona kavua mubandamune ne tshiji to. Mmushindu kayi wakalejaye ne: uvua ne budipuekeshi? Wakashala muteleje bivuabu bamba abi, pashishe kubandamunaye ne dîyi dimpe. Bakulu ba meji badi bidikija Gideona, mmumue ne: badi bateleja ne ntema yonso bantu badi babamba ne babandamuna ne dîyi dimpe. (Bala Yakobo 3:13.) Padibu benza nanku badi bakebesha ditalala mu tshisumbu.

8. Ntshinyi tshidi bakulu ne bua kuenza padibu babatumbisha? Fila tshilejilu.

⁸ Pesha Yehowa butumbi buonso. Pavuabu batumbisha Gideona bua muvuaye mutshimune bena Midiyana, wakatuma ntema ya bantu kudi Yehowa. (Bal. 8:22, 23) Mmunyi mudi bakulu mua kumuidikija? Badi ne bua kupesha Yehowa butumbi bua bionso bidibu benza. (1 Kol. 4:6, 7) Tshilejilu, bobu bela mukulu kalumbandi bua mutuye ulongesha bimpe, bidi bikengela atume ntema ya bantu ku Dîyi dia Nzambi didi mpokolo wa mêyi a kulonda, anyi abaleje ne: bulongolodi bua Nzambi budi butulongesha tuetu bonso. Mbimpe bakulu bikale badiebeja ne: mushindu wabu wa kulongesha udi ubatumbishisha bobu anyi udi utumbishisha Yehowa? Tuangate tshilejilu tshia mukulu mukuabu, diende Timothy. Patshivuaye uluilaku mukulu, uvua musue kuenza miyuki ya patoke be! Udi wamba ne: “Mvua ntuadija ne bilejilu bile anyi ne mêyi mapite bungi. Kuenza nanku kuvua misangu ya bungi kufikisha bantu ku dintumbisha. Diakabi, pamutu pa kutuma ntema yabu ku Bible anyi kudi Yehowa, bavua bayituma kundi.” Panyima pa matuku, Timothy kumonaye ne: bivua bikengela akaje ndongeshilu wende bua bantu kabikadi batuma ntema yabu kudiye to. (Nsu. 27:21) Tshiakamueneka ntshinyi? Udi wamba ne: “Matuku aa bana betu bakadi bangambila mudi muyuki wanyi kampanda mubambuluishe bua kutantamena lutatu kansanga, bua kunanukila mu diteta anyi mudiwu mubasemeje pabuipi menemene ne Yehowa. Ndi ne disanka dia katshia bua malu adibu bamba aa, kadi tshivua ngumvua disanka edi pavuabu bantumbisha to.”

9. Ntshinyi tshivua tshienza bua bikolele Gideona bua kutumikila ne kuikala ne dikima? (Tangila tshimfuanyi tshia pa tshizubu.)

⁹ Bamane kuteka Gideona mulumbuluishi, biakamukolela bua kutumikila ne kuikala ne dikima. Bavua bamupeshe mudimu wa njiwu wa kupula tshioshelu tshia Bâla tshia tatuende. (Bal. 6:25, 26) Pashishe yeye mumane kusangisha basalayi bende, bakamutumina dîyi misangu ibidi bua akepeshe bungi buabu. (Bal. 7:2-7) Ndekelu wa bionso, bakamuambila bua kuluisha tshiluilu tshia bena lukuna babu abu mundankulu.​—Bal. 7:9-11.

10. Ntshinyi tshidi mua kuenza bua bikolele mukulu bua kutumikila?

 ¹⁰ Bakulu badi ne bua kuikala ‘badiakaje bua kutumikila.’ (Yak. 3:17) Mukulu udi utumikila mmudiakaje bua kulonda tshidi Bible wamba ne kuitaba buludiki bua kudi bulongolodi bua Nzambi. Yeye wenza nanku, neikale tshilejilu tshimpe tshidi bakuabu mua kulonda. Kadi bidi mua kumukolela bua kutumikila.Tshilejilu, bobu bamutumine mêyi a kulonda a bungi anyi baashintulule diakamue, bidi mua kumukolela bua kuatumikila. Imue misangu, udi mua kudiebeja bua kumanya bikala buludiki budibu bafile abu mbuimpe anyi mbua meji. Peshi badi mua kumulomba bua kuenza mudimu udi mufuane kuenza bua bamukuate. Mmunyi mudi bakulu mua kuidikija tshilejilu tshia Gideona uvua mutumikile mu nsombelu ya nunku?

11. Ntshinyi tshidi mua kuambuluisha bakulu bua kutumikila?

¹¹ Umvua buludiki bimpe, ubulonde. Nzambi wakaleja Gideona mua kupula tshioshelu tshia tatuende, kumuleja muaba wa kuibakila Yehowa tshioshelu tshipiatshipia ne nyama ya kumulambula. Gideona kakabipisha buludiki abu to, kadi wakabulonda kayi utontolola. Lelu, bulongolodi bua Yehowa butu buambila bakulu mêyi a kulonda mu mikanda, mu mamanyisha, ne mêyi makuabu a mutudi mua kudikuba ne kuikala mu malanda mimpe ne Yehowa. Tutu banange bakulu betu bualu batu batumikila ne lulamatu luonso buludiki butu bulongolodi bua Nzambi bufila. Kuenza nunku kutu kuambuluisha tshisumbu tshijima.​—Mis. 119:112.

12. Mmunyi mudi bakulu mua kutumikila mêyi adi mu Ebelu 13:17 padi bulongolodi bua Yehowa bushintulula mushindu wa kuenza malu?

¹² Itaba bua kuakaja malu. Vuluka ne: Gideona wakapingaja basalayi bende pa kuamba bonso ku mabu anu muvua Yehowa mumuambile. (Bal. 7:8) Pamuapa uvua mudiebeje ne: ‘Mbia mushinga menemene bua kubapingaja nanku anyi? Nebikumbane anyi?’ Nansha nanku, wakatumikila. Lelu, bakulu badi bidikija Gideona padibu balonda mushindu udi bulongolodi bua Nzambi bushintulula malu. (Bala Ebelu 13:17.) Tshilejilu, mu 2014, Kasumbu kaludiki kakashintulula mushindu wa kuikala kufila makuta a mudimu wa luibaku lua Nzubu ya Bukalenge ne Nzubu ya Mpuilu. (2 Kol. 8:12-14) Bisumbu kabivua kabidi ne bua kufuta makuta avua bulongolodi butule bua kubibakila Nzubu wa Bukalenge to. Kadi bisumbu bia pa buloba bujima bivua ne bua kusangisha makuta bua kuibaka Nzubu ya Bukalenge muaba uvua ukengela kuyibaka nansha bana betu ba muaba au kabayi bafile tshintu tshia nsongo. Pavua muanetu muakuabu, diende José, mumvue bualu ebu, wakabenga wamba muvuabi kabiyi mua kuenda; wakadiambila ne: ‘Nzubu wa Bukalenge nansha umuepele kakuibakibua to. Malu kaatu enzeka mushindu au muaba utudi eu to.’ Ntshinyi tshivua tshimuambuluishe bua kulonda buludiki abu? Udi wamba ne: “Mêyi adi mu Nsumuinu 3:5, 6 akamvuluija bua kueyemena Yehowa. Bipeta biakamueneka bivua bimpe bia dikema! Bushuwa, tudi tuibaka Nzubu ya Bukalenge ya bungi, kadi tudi balonge kabidi bua kuikala kufila mapa mu mishindu mishilangane bua kuikale dikumbajijangana.”

13. a) Ndituishibua kayi divua nadi Gideona? b) Mmushindu kayi udi bakulu mua kuidikija Gideona? (Tangila kabidi tshimfuanyi.)

 ¹³ Enza disua dia Yehowa ne dikima dionso. Gideona wakatumikila Yehowa nansha muvuaye ne buôwa ne muikale mu njiwu ya mudimu uvuabu bamupeshe. (Bal. 9:17) Uvua mutuishibue ne: Yehowa uvua ne bua kumuambuluisha bua kukuba bantu bende bualu ke tshivua Nzambi mumujadikile. Bakulu badi miaba idibu bakandike mudimu wetu batu bidikija Gideona. Badi balongolola malu bua bisangilu ne bua mudimu wa buambi ne dikima dionso nansha mudibu babakanyina bua kubakuata, kubela nkonko, kuenza bua midimu yabu ifue anyi kubenzela malu a tshikisu. c Mu dikenga dinene, nebilombe bua bakulu bikale ne dikima bua kulonda buludiki buapetabu nansha kubulonda aku mua kubakebela njiwu. Pamuapa buludiki abu nebuikale bua kufila mukenji mukole wa dilumbuluisha ne tshia kuenza bua kupanduka patubundabu kudi Goga wa ku Magoga.​—Yeh. 38:18; Buak. 16:21.

14. Bua tshinyi kabivua bipepele bua Gideona kunanukila?

¹⁴ Mudimu wa dikala mulumbuluishi uvua nawu Gideona uvua mudimu mukole. Pavua bena Midiyana banyeme mvita butuku, bakabalondakaja kumbukila ku tshibandabanda tshia Yizelele too ne ku musulu wa Yadene uvua pamuapa munkatshi mua mitshi mipite bungi. (Bal. 7:22) Gideona wakashikidila ku Yadene aku anyi? Tòo! Nansha muvuaye yeye ne basalayi bende 300 batshioke, bakasabuka musulu, kutungunukabu ne kubalondakaja. Ndekelu wa bionso, bakakuata bena Midiyana, kubatshimunabu.​—Bal. 8:4-12.

15. Ndîba kayi didibi mua kukolela mukulu bua kunanukila?

¹⁵ Imue misangu, mukulu udi mua kudiumvua mutshioke bua mudimu udiye muenze bua kutabalela bena mu tshisumbu ne bena mu dîku diende. Mmunyi mudi bakulu mua kuidikija Gideona mu nsombelu ya nunku?

16-17. Ntshinyi tshivua tshiambuluishe Gideona bua kunanukila? Bakulu badi mua kuikala ne dishindika kayi? (Yeshaya 40:28-31) (Tangila kabidi tshimfuanyi.)

¹⁶ Ikala mutuishibue ne: Yehowa neakukoleshe.  Gideona uvua mutuishibue ne: Yehowa neamupeshe bukole, ne kavua muedibue mâyi ku makasa to. (Bal. 6:14, 34) Umue musangu, Gideona ne bantu bende bakalonda bakalenge babidi ba Midiyana lua makasa, kadi bakalenge abu bavua bobu pamuapa babanyema babande pa tumelu. (Bal. 8:12, 21) Kadi Nzambi wakambuluisha bena Isalele bua kubakuata ne kubatshimuna. Bakulu pabu badi mua kueyemena Yehowa bualu yeye “kena utshioka anyi upungila nansha.” Neabapeshe bukole padibu nabu dijinga.​—Bala Yeshaya 40:28-31.

¹⁷ Tuangatayi tshilejilu tshia Matthew, wa mu Komite kampanda wa diumvuangana ne mpitadi. Ntshinyi tshitu tshimuambuluisha bua kunanukila? Udi wamba ne: “Ndi mudimuenene mudi mêyi adi mu Filipoyi 4:13 makumbane. Misangu ya bungi pamvua ntshioka, mpanga tshia kuenza, mvua sambila bikole, nsengelela Yehowa bua ampeshe makanda a mubidi a bungi ne akoleshe lungenyi luanyi bua mmone mua kuambuluisha bana betu. Misangu yonso ayi, mvua ngumvua muvua nyuma wa Yehowa umpesha bukole, ungambuluisha bua kunanukila.” Anu bu Gideona, bakulu betu badi benza mudimu mukole bua kutabalela bantu ba Yehowa, nansha mudibi kabiyi bipepele misangu yonso. Bushuwa, mbimpe bamanye mikalu yabu, ne benze malu bilondeshile mikalu ayi; kadi bikale batuishibue ne: Yehowa neateleje masambila abu a kulomba diambuluisha ne neabapeshe bukole bua kunanukila.​—Mis. 116:1; Filip. 2:13.

18. Mmushindu kayi udi bakulu mua kuidikija Gideona?

¹⁸ Tshilejilu tshia Gideona tshidi mua kulongesha bakulu malu a bungi a mushinga. Bakulu bobu bitabe bua kuenza mudimu wa bungi, badi ne bua kuikala ne bupuekele ne budipuekeshi. Bobu bababipisha anyi babatumbisha, mbimpe bikale anu ne bupuekele ne budipuekeshi. Badi ne bua kutumikila ne kuikala ne dikima, nangananga bu mukadi nshikidilu wa ndongoluelu wa malu eu mulembelele bikole. Mbimpe batuishibue ne: nansha bobu batuilangane ne ntatu ya mushindu kayi, Nzambi neabakoleshe. Bushuwa, tudi tuanyisha balami badi benza mudimu mukole aba ne tudi ‘tutungunuka ne kuangata bantu ba mushindu eu ne mushinga wa bungi.’​—Filip. 2:29.