Bua tuetu kusankisha Yehowa, tudi ne bua kuikala ne ditabuja. Kadi Bible udi wamba ne: “Ki mbantu bonso badi ne ditabuja to.” (2 Tes. 3:2) Mupostolo Paulo uvua wakula bua bantu bavua bamukengesha mu mvese eu, wamba muvuabu “bantu bena tshinyangu ne babi.” Mvese eu udi utangila kabidi bantu bakuabu. Kudi bantu badi kabayi bitaba ne: Nzambi ke Mufuki wa bintu bionso to. (Lomo 1:20) Bakuabu badi ne ditabuja mu tshintu anyi mu muntu wa bukole bua bungi. Ditabuja dia nanku kadiena disankisha Yehowa to.

Tudi ne bua kutuishibua ne: Yehowa udiku ne mmufutshi wa badi ne ditabuja dikole. (Eb. 11:6) Ditabuja ntshibadi tshia dimuma dia nyuma wende muimpe. Tuetu basue kupeta nyuma muimpe, tudi ne bua kumulomba Nzambi mu disambila. (Luka 11:​9, 10, 13) Mushindu mukuambu mutambe buimpe utudi mua kumupeta, nkubala Dîyi dia Nzambi didi difundisha ku bukole bua nyuma. Mbimpe tuela kabidi meji a bitudi tubalamu ne tubitumikile. Tuetu benze nanku, netulekele bua nyuma wa Nzambi atuambuluishe bua tuikale ne nsombelu udi Yehowa musue ne tupete ditabuja didi dimusankisha.