TSHIENA-BUALU TSHIA KULONGA 25
MUSAMBU WA 7 Yehowa, udi bukole buetu
Vuluka ne: Yehowa “udi Nzambi wa mouyo”
“Yehowa udi ne mouyo!”—MIS. 18:46.
LUNGENYI LUNENE
Kuvuluka ne: Nzambi utudi tutendelela udi “Nzambi wa muoyo” kudi kutukolesha.
1. Bua tshinyi tudi tutendelela Yehowa nansha mutudi ne ntatu?
BIBLE udi wamba bua matuku atudi aa ne: “mmatuku a bikondo bia malu makole bidi bikole mua kupita nabi.” (2 Tim. 3:1) Pa kumbusha ntatu itudi nayi mu ndongoluelu wa malu eu, badi batukengesha tuetu Bantemu ba Yehowa bualu tudi tuenzela Yehowa mudimu. Bua tshinyi tudi tutendelela Yehowa nansha mutudi ne ntatu eyi? Bualu tudi bafike ku dimanya ne: Yehowa “udi Nzambi wa muoyo.”—Yel. 10:10; 2 Tim. 1:12.
2. Kumanya ne: Yehowa udi Nzambi wa muoyo kudi kutuenzela tshinyi?
2 Yehowa utu umona lutatu luonso lutudi nalu, mmusue kutuambuluisha. (2 Kul. 16:9; Mis. 23:4) Patudi tuvuluka ne: Nzambi wetu udi ne muoyo, tuambe ne: udi ututabalela ne udi pabuipi bua kutuambuluisha, tudi tupeta bukole bua kunanukila mu lutatu kayi luonso. Ke tshivua tshienzekele mukalenge Davidi.
3. Pavua Davidi muambe ne “Yehowa udi ne muoyo,” uvua usua kuamba tshinyi?
3 Davidi uvua mumanye Yehowa ne uvua umueyemena. Pavua mukalenge Shaula ne baluishi bende bakuabu bakeba kumushipa, wakalomba Yehowa diambuluisha. (Mis. 18:6) Nzambi wakandamuna dilomba diende, kumusungilaye. Davidi wakalua kuamba ne: “Yehowa udi ne muoyo!” (Mis. 18:46) Muaba eu Davidi kavua usua kuamba patupu ne: Nzambi utuku to. Mukanda mukuabu udi uleja ne: Davidi uvua uleja muvuaye mushindike ne: Yehowa nNzambi mulelela utu wambuluisha batendeledi bende misangu yonso. Davidi uvua mutuishibue ne: Nzambi wende uvua mumanye malu onso avua amufikila ne uvua mudiakaje bua kumuambuluisha. Bualu abu buakakolesha Davidi bua kutungunuka ne kumuenzela mudimu.—Mis. 18:28, 29, 49.
4. Kuikala batuishibue ne: Yehowa udi Nzambi wa muoyo kudi kutuenzela tshinyi?
4 Tuetu batuishibue ne: Yehowa udi Nzambi wa muoyo, netumuenzele mudimu ne tshisumi. Netupete bukole bua kutantamena ntatu, netupete kabidi dijinga dia kutungunuka ne kumuenzele mudimu wa bungi. Netuikale badisuike bua kushala pabuipi nende.
NZAMBI WA MUOYO NEAKUKOLESHE
5. Ntshinyi tshidi tshitupetesha dishindika dia ne: tudi mua kutantamena ntatu yetu? (Filipoyi 4:13)
5 Tuetu tuvuluka ne: Yehowa udi ne muoyo ne udi pabuipi bua kutuambuluisha, netuikale bakumbane bua kutantamena lutatu kayi luonso nansha luolu lunene anyi lukese. Mu kuamba kuimpe, kakuena lutatu ludi lumupite makanda to. Ngua bukole bonso, neatupeshe bukole bua kutantamena ntatu yetu. (Bala Filipoyi 4:13.) Kumanya bualu ebu kudi kutupesha dishindika dia ne: tudi mua kutantamena ntatu yetu. Patudi tumona mudi Yehowa utuambuluisha mu ntatu mikese, tudi tutuishibue ne: neatukuatshishe mu ya minene.
6. Ntshinyi tshivua tshienzekele Davidi patshivuaye nsonga tshivua tshimufikishe ku dieyemena Yehowa bikole?
6 Tuakulayi bua malu manene abidi avua menzekele Davidi avua menze bua eyemene Yehowa bikole. Patshivuaye nsonga ulama mikoko ya tatuende, nyama wa urse wakalua, kukuataye mukoko, kuyaye nawu. Pashishe ntambue kuluaye pende kuenza bia momumue. Misangu yonso ibidi ayi, Davidi wakalondakaja nyama ayi ne dikima, kusungilaye mikoko ivuayi mikuate. Kakadiambila ne: uvua muenze malu au ku bukole buende to. Uvua mumanye ne: Yehowa ke uvua mumupeshe bukole bua kuenza nanku. (1 Sam. 17:34-37) Davidi kavua mupue malu au muoyo to. Wakelangana meji a malu au, kudishindikilaye ne: Nzambi wa muoyo uvua ne bua kumupesha bukole mu matuku atshivua alua.
7. Ntshinyi tshivua tshipeteshe Davidi bukole bua kuya kuluangana ne Goleyata?
7 Davidi kayi anu muanji kukumbaja bidimu makumi abidi, wakaya mu tshitudilu muvua tshiluilu tshia Isalele. Wakapetamu basalayi bamba kufua ne buôwa, batshina Goleyata muena Peleshete mule wa mfiondo uvua mulue kubabunda. (1 Sam. 17:10, 11) Bavua bamutshina bualu bavua batuishile mêsu pa tshimuenekelu tshiende ne batume ntema ku mifunu yende. (1 Sam. 17:24, 25) Davidi uvua yeye mutuishile mêsu pa tshintu tshikuabu. Kavua yeye mumone ne: Goleyata uvua ubunda basalayi ba Isalele to, kadi uvua ubunda “basalayi ba Nzambi wa muoyo.” (1 Sam. 17:26) Davidi uvua mutume meji ende kudi Yehowa. Uvua mutuishibue ne: Nzambi wende uvua mumuambuluishe pavuaye ulama mikoko uvua ne bua kumuambuluisha kabidi musangu au. Bu Davidi ne dishindika adi, wakaya kukungamangana ne Goleyata, kumutshimunaye!—1 Sam. 17:45-51.
8. Ntshinyi tshitudi mua kuenza bua kukolesha dishindika dietu dia ne: Yehowa neikale anu netu patukuata ntatu? (Tangila kabidi tshimfuanyi.)
8 Tuetu tuvuluka ne: Nzambi wa muoyo udi pabuipi bua kutuambuluisha, netutantamene ntatu idi itukuata. (Mis. 118:6) Tudi mua kudishindikila ne: Yehowa neatuambuluishe tuetu tuelangana meji a malu avuaye muenze ku kale. Bala malu adi mu Bible adi aleja muvuaye mupandishe batendeledi bende. (Yesh. 37:17, 33-37) Tangila kabidi luapolo idi mu jw.org ya mudi Yehowa mupandishe bena Kristo ba matuku etu aa. Elangana kabidi meji a bungi bua misangu idi Yehowa mukuambuluishe. Pamuapa udi udiambila ne: Yehowa ki mmukuenzele bualu bunene bu mudi kukusungila kudi nyama wa ntambue anyi wa urse to. Tshia kumanya tshidi ne: Yehowa mmukuenzele malu a bungi. Mmukubikile bua ulue mulunda wende. (Yone 6:44) Nansha lelu eu, utshidi umuenzela mudimu bualu udi ukuambuluisha. Mulomba bua akuvuluije misangu ivuaye muandamune masambila ebe, ivuaye mukupeshe tshiuvua ujinga mu tshikondo tshiakanyine, ne ivuaye mukutabalele mu lutatu. Kuelangana meji a malu aa nekuenze bua utuishibue bikole ne: Yehowa neikale anu nebe.
Kushala ne lulamatu mu ntatu kudi kusankisha Yehowa (Tangila tshikoso tshia 8-9)
9. Mbimpe tuvuluke bualu kayi patudi mu ntatu? (Nsumuinu 27:11)
9 Patudi mu ntatu, mbimpe tutume meji ku bualu budi ne mushinga wa bungi. Diabolo utu wamba ne: ntatu yoyi mitukuate, netulekele Yehowa. Nanku, tshitudi tuenze patudi mu ntatu tshidi mua kusankisha Yehowa anyi kumunyingalaja. (Yobo 1:10, 11; Bala Nsumuinu 27:11.) Tuetu bashale ne lulamatu mu ntatu, netuleje mutudi banange Yehowa ne mudi Diabolo muena dishima. Pamuapa mbulamatadi wa ditunga dienu mmukandike midimu yetu, anyi udi ne lutatu lua makuta, bantu badi babenga kukuteleja mu buambi, peshi udi ne lutatu lukuabu. Biobi nanku manya ne: lutatu luebe alu ludi lukupesha mpunga wa kusankisha Yehowa. Uvuluke kabidi ne: kakulekela diteta didi dikupite bukole dikukuata to. (1 Kol. 10:13) Neakupeshe bukole bua uditantamene.
NZAMBI WA MUOYO NEAKUFUTE
10. Nzambi wa muoyo neenzele badi bamutendelela tshinyi?
10 Yehowa mmufutshi wa badi bamutendelela. (Eb. 11:6) Udi utupesha ditalala ne bitudi nabi dijinga mpindieu. Neatupeshe muoyo wa tshiendelele mu matuku atshilualua. Mbimpe tumueyemene batuishibue ne: udi ne dijinga ne bukole bua kutufuta. Dituishibua adi neditusake bua tushale tumutendelela anu muvuadi disake batendeledi bende ba kale. Ke tshiakenzekela Timote.—Eb. 6:10-12.
11. Bua tshinyi Timote uvua wenza mudimu mukole mu tshisumbu? (1 Timote 4:10)
11 Bala 1 Timote 4:10. Timote uvua ne ditabuja dikole dia ne: Nzambi uvua ne bua kumufuta. Ke bualu kayi uvua wenzela Yehowa mudimu mukole, uwenzela ne bena Kristo nende. Mmudimu kayi au? Mupostolo Paulo wakamulomba bua alue mulongeshi muimpe wa Dîyi dia Nzambi mu buambi ne mu tshisumbu. Wakamulomba kabidi bua ikale tshilejilu kudi bana ne bakole. Paulo wakamupesha midimu mikole. Mu yoyi ayi muvua wa kufila mibelu mikole kadi ne dinanga dionso kudi bavua bakengela kuyipesha. (1 Tim. 4:11-16; 2 Tim. 4:1-5) Kuvua misangu ivua bakuabu kabayi bamona mudimu uvua Timote wenza anyi bawanyisha to, nansha nanku, uvua mutuishibue ne: Yehowa uvua ne bua kumufuta.—Lomo 2:6, 7.
12. Bua tshinyi bakulu batu badifila bikole mu mudimu wabu? (Tangila kabidi tshimfuanyi.)
12 Mbimpe bakulu bikale batuishibue pabu lelu ne: Yehowa udi umona mudimu wabu ne uwanyisha. Pa kumbusha dienza makumbula a bulami, dilongesha mu tshisumbu, ne dienza mudimu wa buambi, bakulu ba bungi batu bambuluisha mu midimi yetu ya luibaku ne patu bipupu bienzeka. Bakuabu batu mu Komite ya diumvuangana ne mpitadi anyi mu Tusumbu tua dikumbula babedi. Bakulu badi benza mudimu ne muoyo mujima bualu mbamanye ne: tshisumbu ntshia Yehowa, ki ntshia muntu to. Mbatuishibue ne: Nzambi neabafute bua mudimu wabu.—Kolos. 3:23, 24.
Nzambi wa muoyo neakufute bua mudimu uudi wenzela tshisumbu tshiende (Tangila tshikoso tshia 12-13)
13. Mmunyi mudi Yehowa umvua bua mudimu utudi tumuenzela?
13 Ki mmuntu yonso udi mua kulua mukulu to. Kadi tuetu bonso tudi ne tshintu tshia kupesha Yehowa. Udi usanka bikole patudi tumuenzela mudimu ne muoyo mujima. Udi umona mapa atudi tufila bua mudimu wende, nansha owu makese. Udi usanka padiye utumona tuela munu kuulu bua kuandamuna mu bisangilu nansha tuetu bikale ne buôwa. Udi kabidi usanka patudi tufuila badi batuenzele bibi luse. Wewe mumone ne: kuena mua kuenzela Yehowa mudimu wa bungi bu muudi musue bua makanda ebe a mubidi, manya anu ne: udi wanyisha bionso biudi umuenzela. Mmukunange bua mudimu uudi umuenzela, ne neakufute.—Luka 21:1-4.
SHALA PABUIPI NE NZAMBI WA MUOYO
14. Mmunyi mudi kudia bulunda ne Yehowa kutuambuluisha bua kushala ne lulamatu? (Tangila kabidi tshimfuanyi.)
14 Tuetu badie bulunda bukole ne Yehowa, netushale ne lulamatu bipepele. Ke tshivua Jozefe muenze. Wakabenga kuenda masandi; kavua musue kunyingalaja Nzambi to. (Gen. 39:9) Tuetu basue kushala pabuipi ne Yehowa, tudi ne bua kukeba dîba dia kusambila ne kubala Dîyi diende. Dîba adi, bulunda buetu nende nebukole. Tuetu badie bulunda ne Yehowa anu bu Jozefe, katuakuenza bualu budi mua kumunyingalaja to.—Yak. 4:8.
Wewe pabuipi ne Nzambi, neushale ne lulamatu (Tangila tshikoso tshia 14-15)
15. Bualu buvua bena Isalele benze mu tshipela budi butulongesha tshinyi? (Ebelu 3:12)
15 Bantu badi balekela kueyemena Yehowa kabatu bashala ne lulamatu to. Monayi tshivua bena Isalele benze pavuabu mu tshipela. Nansha muvuabu bamanye ne: Yehowa udi ne muoyo, kabatshivua ne ditabuja dia ne: uvua mua kuambula bujitu buabu to. Bakafika too ne ku diamba ne: “Yehowa udi munkatshi muetu emu anyi kenamu?” (Ekes. 17:2, 7) Ke bualu kayi bakamutombokela. Katuena ne bua kuidikija tshilejilu tshiabu tshibi etshi to. Mbatshifunde mu Bible bua kutusopuesha.—Bala Ebelu 3:12.
16. Ntshinyi tshidi tshifuane kutekesha ditabuja dietu?
16 Malu a panu adi atupangisha bua kushala pabuipi ne Yehowa. Bantu ba bungi batu bamba ne: Nzambi kenaku to. Pa tshibidilu, bantu badi kabayi batumikila Nzambi batu bamueneka ne nsombelu wa manyi. Patudi tubamona nanku, ditabuja dietu ndifuane kuteketa. Nansha mutudi batuishibue ne: Nzambi udiku, tudi mua kutuadija kuelakana ne: kakuambula bujitu buetu to. Kuvua musangu uvua mufundi wa musambu wa 73 mutuadije pende kuelakana nanku. Uvua umona ne: bantu bavua kabayi batumikila Nzambi bavua ne nsombelu wa manyi. Ke kutuadijaye kudiambila ne: kuenzela Nzambi mudimu kakuvua ne bualu bua nsongo to.—Mis. 73:11-13.
17. Tshia kuenza ntshinyi bua kushala pabuipi ne Yehowa?
17 Ntshinyi tshivua tshiambuluishe mufundi wa Musambu wa 73 bua kuakaja meji ende? Uvua muele meji a njiwu ivua bantu bavua balekela Yehowa bapeta. (Mis. 73:18, 19, 27) Uvua kabidi muele meji a masanka adi afumina ku dienzela Yehowa mudimu. (Mis. 73:24) Mbimpe tuetu petu tuele meji a mudi Yehowa mutubeneshe. Tudifuanyikijile tshivua nsombelu wetu mua kuikala bu katuyi Bantemu ba Yehowa. Tuetu tuela meji a masanka atuapeta patudi tuenzela Yehowa mudimu, netushale ne lulamatu, tuamba petu anu bu mufundi wa Misambu ne: “Buanyi meme, kusemena pabuipi ne Nzambi nkuimpe buanyi meme.”—Mis. 73:28.
18. Bua tshinyi katuena ne bua kutshina malu akadi pa kutuenzekela?
18 Bu mutudi ‘tuenzela Nzambi mulelela wa muoyo mudimu bu bapika,’ tudi mua kutantamena lutatu luonso ludi mua kutukuata mu matuku a ku nshikidilu aa. (1 Tes. 1:9) Nzambi wetu utu ututabalela, neikale anu utuambuluisha. Uvua ne batendeledi bende ku kale, neikale petu netu lelu. Tukadi pa kutuilangana ne dikenga dinene. Kadi katuakuikala nkayetu to, Yehowa neikale netu. (Yesh. 41:10) Tuetu bonso tuikalayi ne dikima dikole ne tuambe ne: “Yehowa mmuambuluishi wanyi; tshiakutshina to.”—Eb. 13:5, 6.
MUSAMBU 3 Bukole buetu, ditekemena dietu, tshieyemenu tshietu
