TSHIENA-BUALU TSHIA KULONGA 32
Anu bu Yehowa, kuikadi muena malu makole to
“Enzayi bua bantu bonso bamanye munudi kanuyi bena malu makole.”—FILIP. 4:5.
MUSAMBU WA 89 Teleja, utumikile, bua bakubeneshe
KADIOSHA a
Mmutshi wa mushindu kayi uudi musue kufuana? (Tangila tshikoso 1)
1. Mmu mushindu kayi mudi bena Kristo ne bua kuikala bu mutshi? (Tangila kabidi tshimfuanyi.)
KUTU kasumuinu katu ne lungenyi lua ne: ‘Tshipepele katshiena mua kupula mutshi utu ukobama to.’ Bileja ne: bua mitshi kushalayi mishindame, mbimpe yikale ikobama. Bia muomumue, bena Kristo badi ne bua kuibidilangana ne nsombelu wabu padiyi ushintuluka bua bamone mua kushindama mu nyuma. Badi kabidi ne bua kunemeka mmuenenu wa bakuabu ne mapangadika abu.
2. Nngikadilu kayi yatuambuluisha bua kuibidilangana ne nsombelu padiyi ushintuluka? Ntshinyi tshituamona mu tshiena-bualu etshi?
2 Tuetu batendeledi ba Yehowa katuena ne bua kuikala ne malu makole to. Tudi ne bua kuikala tudipuekesha ne tumvuilangana luse. Mu tshiena-bualu etshi, netumone muvua ngikadilu eyi miambuluishe bamue bena Kristo bua bashale bashindame mu nyuma pavua nsombelu wabu mushintuluke. Netumone kabidi mudiyi mua kutuambuluisha petu. Kadi tuanjayi kumona tshidi tshilejilu tshitambe buimpe tshia Yehowa ne Yezu tshia dibenga kuikala ne malu makole tshitulongesha.
YEHOWA NE YEZU KABATU NE MALU MAKOLE TO
3. Ntshinyi tshidi tshitujadikila ne: Yehowa katu ne malu makole?
3 Bible udi ubikila Yehowa ne: “Dibue” bualu mmushindame, kayi unyungishibua. (Dut. 32:4) Nansha nanku, katu ne malu makole to. Utu wibidilangana ne malu a panu atu ashintulukangana, wenza ne muende muonso bua kukumbaja bualu buonso budiye mulaye. Mmutufuke mu tshimfuanyi tshiende, mutupeshe kabidi bukole bua kuibidilangana ne nsombelu padiyi ushintuluka. Mu Bible mudi mêyi manene adi atuambuluisha bua tuangate mapangadika mimpe nansha tuetu ne ntatu ya mushindu kayi. Tshilejilu tshia Yehowa ne mêyi manene aa ntshijadiki tshia ne: nansha mudiye “Dibue,” katu ne malu makole to.
4. Fila tshilejilu tshia mudi Yehowa kayi ne malu makole. (Lewitiki 5:7, 11)
4 Njila ya Yehowa mmipuangane ne katu wenzela bantu malu makole to. Tshilejilu, kavua mulombe bena Isalele bonso, babanji ne bapele, bua bafile milambu ya diatshimue to. Kuvua misangu ivuaye wanyishila muntu yonso bua kufila milambu ivuaye mukokeshe.—Bala Lewitiki 5:7, 11.
5. Fila tshilejilu tshia muvua Yehowa mudipuekeshe ne mufuilangane luse.
5 Yehowa katu ne malu makole to, bualu utu udipuekesha ne ufuilangana luse. Tshilejilu, wakaleja muvuaye ne budipuekeshi pakavuaye pa kubutula bantu babi ba mu Sodoma. Kutumaye banjelu bua kuambila Lota bua anyemene ku buloba bua ku mikuna. Kadi Lota uvua utshina bua kuyaku. Ke kusengelelaye Yehowa bua anyemene ne dîku diende mu kamusoko kakese ka Soâ, kavua Yehowa ne bua kubutula kabidi. Yehowa uvua mua kuumisha malu bua Lota enze anu tshivuaye muambe atshi. Kadi wakamuitabila, kubengaye kubutula Soâ. (Gen. 19:18-22) Panyima pa bidimu nkama ya bungi, Yehowa wakumvuila bena mu Niniwe luse. Kutumaye muprofete wende Yona bua kubamanyisha ne: ukavua pa kubabutula bobu ne tshimenga tshiabu. Kadi pakanyingalalabu ne kulekela malu abu mabi, Yehowa wakabafuila luse.—Yona 3:1, 10; 4:10, 11.
6. Leja muvua Yezu kayi pende ne malu makole anu bu Yehowa.
6 Anu bu Yehowa, Yezu kavua pende ne malu makole to. Yehowa uvua mumutume anu kudi “mikoko mijimine ya nzubu wa Isalele.” Kadi mushindu uvuaye wenzela bantu malu uvua uleja ne: kavua muena malu makole to. Tshilejilu, mukaji mukuabu uvua kayi muena Isalele wakamusengelela bua amuondopile muanende wa bakaji uvua ‘ukenga bikole bua demon uvua mumukuate.’ Yezu wakamumvuila luse, kumuondopilaye muanende au. (Mat. 15:21-28) Bualu bukuabu, patshivua Yezu utuadijilaku mudimu wende, wakamba ne: “Muntu yonso udi umvila . . . , meme panyi nemmuvile.” (Mat. 10:33) Kadi pakamuvila Petelo misangu isatu, yeye pende wakamuvila anyi? Tòo. Yezu uvua mumanye ne: Petelo uvua munyingalale bua muvuaye mumuvile ne uvua muntu wa lulamatu. Pakabishabu Yezu ku lufu wakamuenekela Petelo ne uvua pamuapa mumujadikile ne: uvua mumufuile luse ne utshivua mumunange.—Luka 24:33, 34.
7. Bilondeshile Filipoyi 4:5, tudi ne bua kumanyika bu bantu ba mushindu kayi?
7 Tudi bamone ne: Yehowa Nzambi ne Yezu Kristo ki mbena malu makole to. Bua bualu abu, Yehowa mmusue bua katuikadi petu bena malu makole to. (Bala Filipoyi 4:5.) Nanku tudiebeje ne: ‘Ndi mumanyike bu muntu udi kayi ne malu makole, udi umvuila bakuabu, ne witaba mmuenenu wabu, peshi tshitu mumanyike nanku? Ntuku nsumisha bua bantu benze malu anu mundi meme mmona anyi? Ntu nteleja bantu bakuabu, ndekela bua benze tshidibu basue padibi bikumbanyine anyi?’ Tudi tuidikija Yehowa ne Yezu ku mushindu utudi tudienzeja bua kubenga kuikala ne malu makole. Tuakulayi bua nsombelu ibidi idibi ne mushinga bua kubenga kuikala ne malu makole eyi: padi nsombelu wetu ushintuluka ne padi mmuenenu wa bakuabu ne mapangadika abu abengangana ne etu.
IKALA NE MEJI MIMPE PADI NSOMBELU USHINTULUKA
8. Ntshinyi tshidi mua kutuambuluisha bua kuikala ne meji mimpe padi nsombelu wetu ushintuluka? (Tangila kabidi dimanyisha.)
8 Mbimpe tuikale ne meji mimpe padi nsombelu wetu ushintuluka. Dishintuluka dia nsombelu didi mua kututuadila ntatu ya mu tshimpitshimpi. Tshilejilu, disama didi mua kutukuata. Peshi lutatu ludi mua kutukuata bualu malu a mpetu anyi a tshididi a mu ditunga dietu mmashintuluke mu mupodi wa dîsu. (Muam. 9:11; 1 Kol. 7:31) Bidi kabidi mua kutukolela bulongolodi buetu buobu bushintulule mudimu utuvua tuenza. Kadi nansha nsombelu wetu mushintuluke mushindu kayi, tudi mua kuibidilangana nende tuetu benze malu anayi aa: 1) kuitaba nsombelu mudiyi, 2) kukeba tshia kuenza, 3) kuimanyina pa malu mimpe, ne 4) kuambuluisha bakuabu. b Tumonayi muvua kuenza malu aa kuambuluishe bamue bena Kristo netu.
9. Mmunyi muvua Emanuele ne Francesca bananukile mu ntatu?
9 Itaba nsombelu mudiyi. Bavua batume Emanuele ne mukajende Francesca bamisionere ku babende. Pakatuadijabu kulonga muakulu ne kudia bulunda ne bena mu tshisumbu tshiabu tshipiatshipia, tshipupu tshia korona tshiakabudika, bobu kusomba pa nkayabu. Pashishe mamuende wa Francesca kufuaye lufu lua tshikoso. Francesca uvua ne dijinga dikole dia kuya kumonangana ne bena mu dîku diabu, kadi tshipupu tshiakamupangisha. Tshiakamuambuluisha bua kunanukila mu ntatu ayi ntshinyi? Tshia kumpala, bubidi buabu bakalomba Yehowa meji bua kunanukila mu ntatu ya ku dituku. Yehowa wakandamuna masambila abu mu tshikondo tshiakanyine kupitshila kudi bulongolodi buende. Tshilejilu, bualu buvua muanetu wa balume mukuabu uvuabu bela nkonko mu filme muambe ebu buakabakankamija: “Tuetu ne lukasa lua kuibidilangana ne nsombelu mipiamipia idi itukuata, netupetulule kabidi disanka dietu ne lukasa ne nebituambuluishe bua kubabidila nsombelu mupiamupia au bua kulama disanka dietu.” c Tshibidi, bakabangisha kuyisha bantu bikole ku telefone, kutuadijabu too ne dilonga dia Bible. Tshisatu, bakitaba dikankamija dia bena Kristo nabu. Muanetu mukuabu wa bakaji uvua ubatumina mesaje mîpi mikale ne mvese dituku dionso munkatshi mua tshidimu tshijima. Bia muomumue, tuetu bitabe nsombelu mudiyi, netuikale ne disanka dia tshituenza.
10. Mmunyi muvua Christina muibidilangane ne nsombelu wende pavuaye mushintuluke bikole?
10 Keba tshia kuenza, wimanyine pa malu mimpe. Biakatonda Christina, muanetu wa mu Roumanie udi musombele mu Japon, pavuabu bashipe tshisumbu tshia Anglais tshivuaye ubuela. Nansha nanku, kakashala mutumaku meji to. Wakaya mu tshisumbu tshia muakulu wa tshiena Japon, kudifilaye kabidi bikole mu mudimu wa buambi. Wakalomba mamu mukuabu uvuabu benza nende mudimu kumpala bua amuambuluishe ikale wakula tshiena Japon bimpe. Yeye kuitaba bua ikale umulongeshatshi ne Bible ne broshire wa Shala ne muoyo kashidi! Christina wakatuadija kuakula tshiena Japon bimpe. Kadi mamu au kujingaye pende bua kumanya malu a mu Bible a bungi. Bushuwa, patudi tukeba tshia kuenza ne tuimanyina pa malu mimpe, dishintuluka dia malu didi mua kutupetesha mabenesha avua kaayi matekemena.
11. Ntshinyi tshivua muanetu mukuabu ne mukajende benze pavuabu ne lutatu lua makuta?
11 Ambuluisha bakuabu. Muanetu mukuabu ne mukajende badi mu ditunga didibu bakandike mudimu wetu bakapeta lutatu lua makuta pavua malu a mpetu a mu ditunga adi manyanguke. Tshiakenzabu ntshinyi? Bakakepesha ditula dia makuta. Pashishe bakadifila bikole mu diambuluisha bakuabu mu mudimu wa buambi pamutu pa kuimanyina pa lutatu luabu. (Bien. 20:35) Muanetu wa balume au wakamba ne: “Bu mutuvua tuyisha bikole, tuvua tupita kuelangana meji a mua kuenza disua dia Yehowa bikole; katuvua ne dîba dia bungi dia kuimanyina pa lutatu luetu to.” Padi nsombelu wetu ushintuluka, mbimpe tuvuluke mushinga udi nawu kuambuluisha bakuabu nangananga mu mudimu wa buambi.
12. Mmunyi mudi tshilejilu tshia mupostolo Paulo mua kutuambuluisha mu buambi?
12 Mbimpe tuibidilangane ne nsombelu itudi tupeta mu buambi. Tutu tuyisha bantu ba bilele bishilangane, badi kabayi bamanye Nzambi bimpe to. Nanku mbimpe tuidikije mupostolo Paulo. Yezu wakamuteka “mupostolo bua bisamba bikuabu.” (Lomo 11:13) Paulo wakayisha bena Yuda, bena Greke, bamanyi ba mukanda, bena ku musoko, banene ba mbulamatadi, ne bakalenge. Wakalua “malu onso kudi bantu ba mishindu yonso,” bua amone mua kulenga mioyo ya bantu bonso abu. (1 Kol. 9:19-23) Uvua wanji umanya nkoleshilu wa bantu, bilele biabu, ne malu avuabu bitabuja, pashishe udienzeja bua kubayisha mu mushindu uvua mua kubalenga ku muoyo. Tudi petu mua kuyisha bimpe tuetu tuibidilangana ne nsombelu wa bantu batudi tupeta ne tukeba mua kuyisha yonso wa kudibu bimpe.
NEMEKA MMUENENU WA BAKUABU
Tuetu katuyi bena malu makole, netunemeke mmuenenu wa bakuabu (Tangila tshikoso 13)
13. Mbualu kayi bubi budi mu 1 Kolinto 8:9 butudi mua kuepuka tuetu tunemeka mmuenenu wa bakuabu?
13 Netunemeke mmuenenu wa bakuabu tuetu katuyi ne malu makole to. Tshilejilu, bamue bana betu ba bakaji batu basue kudilengeja, bakuabu kabatu basue to. Kudi bena Kristo batu basue kunua maluvu makole pa nnuinu, bakuabu bobu kabatu basue nansha kualabula to. Bena Kristo bonso mbasue kuondopibua, kadi bonso kabatu basue ngondopilu wa muomumue to. Tuetu tusumisha bua bana betu balonde anu tshitudi basue, tudi mua kubalenduisha ne kukebesha matapuluka mu tshisumbu. Katuena ne bua kuenza nanku to. (Bala 1 Kolinto 8:9; 10:) Tuakulayi bua malu abidi adi aleja mudi kutumikila mêyi manene a mu Bible kutuambuluisha bua kuikala ne nkatshinkatshi ne kulama ditalala dietu. 23, 24
Tuetu katuyi bena malu makole, netunemeke mmuenenu wa bakuabu (Tangila tshikoso 14)
14. Mmêyi manene kayi a mu Bible atudi ne bua kulonda bua mvuadilu ne dilengeja dia nsuki?
14 Mvuadilu ne dilengeja dia nsuki. Yehowa ki mmutuelele mikenji ya mua kuvuala to, kadi mutupeshe mêyi manene a kulonda. Tudi ne bua kuvuala mu mushindu udi upesha Nzambi lumu, bikale ne bupuekele, ne “meji majalame.” (1 Tim. 2:9, 10; 1 Pet. 3:3) Bua bualu abu, katuena ne bua kukoka ntema ya bantu ku mvuadilu wetu to. Mêyi manene au adi kabidi ne bua kuambuluisha bakulu bua kubenga kuelela bana betu mikenji ya mua kuvuala ne kulengeja nsuki. Monayi tshiakenzeka mu tshimue tshisumbu: bakulu bavua bajinga kuambuluisha bamue bansonga bavua balonda nkoseshilu wa nsuki wa bena panu, bayipidija bikole ne kabayi bayela kasaku to. Mmunyi muakabambuluishabu kabayi babelele yabu mikenji? Mutangidi wabu wa tshijengu wakabalomba bua bambile bansonga abu ne: “Nuenu nuenza miyuki kumpala, numona ne: bantu mbalengemene tshimuenekelu tshienu pamutu pa kutuma ntema ku binudi nuamba, numanye ne: kanuena bakoseshe nsuki yenu bimpe to.” Bualu bupepele ebu buakajikija tshilumbu atshi. d
Tuetu katuyi bena malu makole, netunemeke mmuenenu wa bakuabu (Tangila tshikoso 15)
15. Mmikenji ne mêyi manene kayi a mu Bible adi atuambuluisha patudi tusungula ngondopilu? (Lomo 14:5)
15 Ngondopilu. Muena Kristo yonso udi ne bua kudisunguila ngondopilu. (Gal. 6:5) Tuetu tukeba ngondopilu, tudi ne bua kutumikila mukenji udi mu Bible wa kuepuka mashi ne malu a mîdima. (Bien. 15:20; Gal. 5:19, 20) Bua bidi bitangila ngondopilu mikuabu, muntu ne muntu udi ne bua kudisunguila. Bamue batu balomba anu baminganga bua babondope, bakuabu batu bobu bakeba ngondopilu ya tshianana. Nansha tuetu bamone ne: ngondopilu eu mmuimpe anyi udi ne njiwu, tudi ne bua kunemeka udi bakuabu basungule. Bua bualu abu, tudi ne bua kuvuluka malu anayi aa: 1) Anu Bukalenge bua Nzambi ke buajikija masama etu. (Yesh. 33:24) 2) Muena Kristo yonso udi ne bua ‘kuikala mutuishibue bimpe’ ne ngondopilu udiye musungule. (Bala Lomo 14:5.) 3) Katulumbuluishi bana betu bua mapangadika adibu bangata mu tshilumbu etshi anyi katubalenduishi to. (Lomo 14:13) 4) Bena Kristo mbanangangane, kabena bajinga kuenza tshidibu basue paditshi tshifuane kunyanga buobumue bua tshisumbu to. (Lomo 14:15, 19, 20) Tuetu benze malu aa, bulunda buetu ne bana betu nebukole ne tshisumbu netshikale mu ditalala.
Tuetu katuyi bena malu makole, netunemeke mmuenenu wa bakuabu (Tangila tshikoso 16)
16. Mmunyi mudi mukulu kayi mua kuikala muena malu makole kudi bakulu nende bakuabu? (Tangila kabidi tshimfuanyi.)
16 Bakulu badi ne bua kuikala tshilejilu, kabayi bena malu makole to. (1 Tim. 3:2, 3) Mukulu kena ne bua kudiambila ne: bakulu nende bakuabu badi ne bua kuikala bitaba tshidiye wamba anu bualu mbana kudiye to. Mbimpe amanye ne: Yehowa udi mua kupesha mukulu kayi yonso nyuma wende bua kubafikisha buonso buabu ku dipangadika dimpe. Padi dîyi dinene dia mu Bible kadiyi dishipa, bakulu badi kabayi bena malu makole badi bitaba dipangadika dia ba bungi ne muoyo mujima nansha diodi kadiyi dibasankisha.
MASANKA A DIBENGA KUIKALA NE MALU MAKOLE
17. Mmasanka kayi atuapeta tuetu katuyi ne malu makole?
17 Patudi katuyi ne malu makole netupete masanka a bungi. Tshilejilu, netusombe ne bena Kristo netu bimpe, tshisumbu patshi netshikale mu ditalala. Netutendelele Yehowa mu buobumue ne bana betu ne netuanyishe dishilangana dietu nabu. Tshia mushinga tshidi ne: netuikale ne disanka bualu tudi tuidikija Yehowa Nzambi wetu udi kayi ne malu makole.
MUSAMBU WA 90 Tukoleshangane
a Yehowa ne Yezu kabatu ne malu makole to. Mbasue bua tubidikije. Tuetu katuyi ne malu makole, nebikale bipepele bua kuibidilangana ne nsombelu wetu padiye ushintuluka. Tshilejilu, padi disama ditukuata anyi patudi bapangile makuta. Tuetu bibidilangane ne nsombelu nanku, tshisumbu netshikale mu ditalala ne mu buobumue.
b Tangila tshiena-bualu tshia “Comment faire face aux changements,” mu Tabulukayi! wa No. 4 2016.
c Tangila filme wa Diela muanetu Dmitri Mikhaïlov nkonko udibu baledile mu tshiena-bualu tshia “Yehowa wakakudimuna dikengeshibua kuluadi bumanyishi,” tshidi mu Mabeji a tshisangilu tshia Nsombelu ne mudimu wetu wa buena Kristo a ngondo 3 ne 4/2021.
d Bua kumanya malu makuabu a mua kuvuala ne kulengeja nsuki, tangila dilongesha dia 52 mu mukanda wa Shala ne muoyo kashidi!