1-2. Sadoka uvua nganyi? (1 Kulondolola 12:​22, 26-28)

 FUANYIKIJA ne: kudi musumba wa bantu bapite pa 340 000, mbadisangishe bua kuteka Davidi mukalenge mu Isalele. Mbasombe pabuipi ne Hebelone mu mikuna ya mabue munkatshi mua matuku asatu, bayukila, baseka, ne bimbila Yehowa misambu ya kumutumbisha nayi ne disanka. (1 Kul. 12:39) Munkatshi muabu mudi Sadoka utshivua nsongalume. Bantu ba bungi ki mbamutuishile mêsu to. Kadi Yehowa yeye uvua mumumone ne mmusue bua tumanya ne: Sadoka uvua mu bantu abu. (Bala 1 Kulondolola 12:​22, 26-28.) Sadoka uvua nganyi?

² Sadoka uvua muakuidi. Uvua wenza mudimu pamue ne muakuidi munene Ebeyatâ. Nzambi uvua mupeshe kabidi Sadoka meji a bungi ne bukole bua kujingulula nabu disua diende. (2 Sam. 15:27) Bantu bavua baya kudi Sadoka bua kupeta mibelu ya meji. Sadoka uvua muntu wa dikima. Netumone mu tshiena-bualu etshi muvua Sadoka muenze malu ne dikima.

3. a) Tudi ne bua kuikala bantu ba dikima bua tshinyi? b) Mbualu kayi butuakuila mu tshiena-bualu etshi?

³ Mu matuku a ku nshikidilu aa, Satana udi wenza muende muonso bua kunyanga ditabuja dietu kudi Yehowa. (1 Pet. 5:8) Nanku mbimpe tupete dikima dia kunanukila too ne pabutula Yehowa ndongoluelu mubi wa malu wa Diabolo eu. (Mis. 31:24) Tuakulayi bua malu asatu atudi ne bua kuenza bua kuidikija Sadoka.

TUAKU BUKALENGE BUA NZAMBI MPANDA

4. Bua tshinyi tudi ne bua kuikala ne dikima bua kutua Bukalenge bua Nzambi mpanda? (Tangila kabidi tshimfuanyi.)

⁴ Tudi tutua Bukalenge bua Nzambi mpanda ne muoyo mujima bualu tudi bantu ba Yehowa. Kadi bidi bitulomba dikima. (Mat. 6:33) Tshilejilu, bu mutudi munkatshi mua bantu babi, bitu bitulomba dikima bua kutumikila mikenji ya Yehowa ne kuamba lumu  luimpe lua Bukalenge buende. (1 Tes. 2:2) Bu mudi malu a tshididi enda atapulula bena panu, tudi ne bua kuikala ne dikima bua kubenga kubuelakanamu anyi kuepuka biyukiyuki bia malu a tshididi. (Yone 18:36) Midimu ya Bantemu ba Yehowa ba bungi mmifue, batute ba bungi ba kudibu, anyi babele mu maloko bualu mbabenge kubuela mu malu a tshididi anyi kuya ku busalayi.

5. Bua tshinyi Sadoka uvua dijinga ne dikima bua kutua Davidi mpanda?

⁵ Sadoka kavua muye ku Hebelone anu bua kusekelela bumfumu bua Davidi patupu to. Uvua muyaku ne bia mvita biende, mudiakaje bua kuluangana. (1 Kul. 12:38) Uvua pabuipi bua kuya ne Davidi ku mvita bua kusungila Isalele mu bianza bia baluishi bende. Pamuapa Sadoka kavua musalayi mupiluke mu mvita to, kadi bua dikima uvua nadi dipite bungi.

6. Mmunyi muvua Davidi mufile tshilejilu tshimpe tshia dikima kudi Sadoka? (Misambu 138:3)

⁶ Nkuepi kuvua Sadoka mupetele dikima dia bungi? Uvua mumanye bantu ba bukole bavua kabidi bena dikima. Pamuapa uvua mupetele dikima kudibu. Tshilejilu, bu muvua Davidi ulombola “Isalele mu mvita yende” ne dikima dia bungi, bena Isalele bonso bakajinga kumuteka mukalenge wabu. (1 Kul. 11:​1, 2) Davidi uvua anu ulomba Yehowa bua amuambuluishe atshimune baluishi bende. (Mis. 28:7; bala Misambu 138:3.) Sadoka uvua kabidi mupetele dikima kudi bantu bakuabu bu mudi Yehoyada ne Benaya muanende uvua tshilobo tshia mvita pamue ne bamfumu ba bisa 22 bavua batue Davidi mpanda. (1 Kul. 11:​22-25; 12:​26-28) Bantu bonso aba bavua badienze tshimuku bua kuteka Davidi mukalenge wabu ne kumukuba.

7. a) Mbanganyi badi tshilejilu tshia dikima matuku etu aa batudi mua kuidikija? b) Bualu bua muanetu Nsilu budibu baleje mu filme budi bukulongesha tshinyi?

⁷ Kuvuluka bantu bavua ne dikima, bashale balamate Yehowa ne Bukalenge buende kudi kutupetesha petu dikima. Tshilejilu, pavua Mukalenge wetu Yezu Kristo pa buloba,  kakabuelakana mu malu a tshididi a mu bulongolodi bua Diabolo ebu to. (Mat. 4:​8-11; Yone 6:​14, 15) Uvua anu ulomba Yehowa dikima bua kuenza malu mimpe. Tudi kabidi ne bilejilu bia bansonga bena Kristo ba bungi ba matuku etu aa badi babenge kuya ku mvita anyi kubuelakana mu malu a tshididi. Kuenaku mua kubala malu abu mu site wa jw.org anyi? a

AMBULUISHA BENA KRISTO NEBE

8. Ndîba kayi didi bakulu mua kuenza malu ne dikima bua kuambuluisha bena Kristo nabu?

⁸ Tuetu Bantemu ba Yehowa tutu tuambuluishagana. (2 Kol. 8:4) Kadi kutu misangu itubi bitulomba dikima bua kuambuluisha bena Kristo netu. Tshilejilu, patu mvita ibudika, bakulu batu bakankamija bena mu bisumbu biabu ne babakolesha, pamuapa benza bua bikale ne Bible ne mikanda yetu mikuabu, anyi babapetela biakudia ne bia kuvuala ne muaba wa kusombela. Bakulu mbanange bena Kristo nabu, ke bualu kayi badi mua kuteka muoyo wabu mu njiwu bua kubakebela bidibu nabi dijinga. (Yone 15:​12, 13) Bushuwa, badi bidikija Sadoka muena dikima.

9. Bilondeshile 2 Samuele 15:​27-29, Davidi uvua mupeshe Sadoka mudimu kayi? (Tangila kabidi tshimfuanyi.)

⁹ Davidi uvua mu njiwu ya lufu. Muanende Abashaloma uvua mudisuike bua kumushipa bua angate bukalenge buende. (2 Sam. 15:​12, 13) Davidi uvua ne bua kumbuka mu Yelushalema ne lukasa luonso! Wakambila bena mudimu bende ne: “Jukayi tunyeme, bualu muntu nansha umue wa kutudi kakupanduka kudi Abashaloma to!” (2 Sam. 15:14) Pavuabu benda bumbuka, Davidi wakamona ne: bivua bikengela bua muntu wa kudibu ashale mu Yelushalema bua ikale umuambila malu avua Abashaloma ulongolola bua kuenza. (Bala 2 Samuele 15:​27-29.) Ke yeye kupingajamu Sadoka ne bakuidi bakuabu. Bivua bibalomba budimu bua bungi bualu kutentekela Abashaloma kuvua ne njiwu ya lufu. Abashaloma uvua muntu  wa tshikisu ne budinangi. Uvua mutungile tatuende mumuledi tshitungu. Elabi meji atshivuaye mua kuenzela Sadoka ne bakuidi bakuabu abu bu yeye mufike ku dimanya ne: bavua bamutentekela bua kukuba Davidi!

10. Mmunyi muvua Sadoka ne bakuidi nende bakuabu bakube Davidi?

¹⁰ Davidi wakaluka meji, kupetaye tshia kuenza. Wakalomba Sadoka ne Hushai mulunda wende mukuabu wa pa muoyo bua bamukumbajilatshi. (2 Sam. 15:​32-37) Hushai uvua ne bua kushima Abashaloma ne: uvua muena mudimu wende ne kumupesha mayele a mua kuluisha Davidi; bionso abi bua kupesha Davidi tshikondo tshia yeye kudilongolola. Pakateleja Abashaloma mibelu ya Hushai, Hushai wakaya kuambila Sadoka ne Ebeyatâ tshivuaye ufuma ku dienza. (2 Sam. 17:​8-16) Ke bobu pabu kutumina Davidi mukenji wa tshivua Abashaloma ujinga kuenza. (2 Sam. 17:17) Yehowa wakambuluisha Sadoka ne bakuidi nende bakuabu abu bua kukuba Davidi.—2 Sam. 17:​21, 22.

11. Mmunyi mutudi mua kuenza malu ne dikima anu bu Sadoka patudi tuambuluisha bena Kristo netu?

¹¹ Biobi bikulomba bua kuteka muoyo webe mu njiwu bua kuambuluisha bena Kristo nebe, mmunyi muudi mua kuleja dikima anu bu Sadoka? 1) Londa buludiki budibu batupesha. Mu bikondo bia nanku mbimpe tuikale tulonda buludiki bua tushale mu buobumue. Londa buludiki budi Betele wa mu ditunga dienu ufila. (Eb. 13:17) Bakulu badi ne bua kuikala bosha dîsu mu mêyi a kulonda a mua kudilongolola ku bipupu ne a tshia kuenza padibi bienzeka. (1 Kol. 14:​33, 40) 2) Enza malu ne dikima kadi muikale mudimuke. (Nsu. 22:3) Ikala ne meji, kuditeki mu njiwu tshianana tshianana to. 3) Eyemena Yehowa. Vuluka ne: Yehowa mmusue bua wewe ne bena Kristo nebe nuikale mu bukubi. Udi mua kukuambuluisha bua wewe kukuba bena Kristo nebe.

12-13. Tshivua Viktor ne Vitalii benze tshidi tshikulongesha tshinyi? (Tangila kabidi tshimfuanyi.)

¹² Tuakulabi bua bakulu babidi aba: Viktor ne  Vitalii. Bavua baya kupesha bena Kristo nabu biakudia ne mâyi mu ukraine. Viktor udi wamba ne: “Tuvua tuya kukeba biakudia miaba yonso. Misangu ya bungi bingoma bivua bididila pabuipi netu. Muanetu mukuabu wakafila biakudia bia mu magazen ende. Biakudia abi biakambuluisha bana betu matuku ndambu. Patuvua tuenda tubiela mu mashinyi etu, musile wakalua kukulukila mu ntanta wa metre matue ku 20 ne muaba utuvua. Ngakashala ndomba Yehowa dikima dituku adi dijima bua ntungunuke ne kuambuluisha bena Kristo netu.”

¹³ Vitalii udi wamba ne: “Biakatulomba dikima dia bungi. Luendu lua kumpala lungakenza luakangangata mêba 12. Mvua nsambila mu luendu alu.” Vitalii uvua ne dikima, wenza kabidi malu ne meji. Udi wamba kabidi ne: “Ngakatungunuka ne kulomba Yehowa meji ne bupuekele. Ngakendela ne manshinyi anu mu njila ivua mbulamatadi muanyishe. Kudimuenena muvua bena Kristo netu benza mudimu pamue kuakakolesha ditabuja dianyi. Bavua bumbusha bintu bivua mu njila bivua mua kutupangisha bua kupita, basangisha biakudia, bia kuvuala, ne bintu bikuabu bia mushinga, babiela mu mashinyi etu. Bavua batupesha kabidi miaba ya kuikishila mu luendu alu.”

SHALA MULAMATE YEHOWA

14. Mmunyi mutudi mua kumvua padi muntu utudi banange ulekela Yehowa?

¹⁴ Muena mu dîku dietu anyi mulunda wetu wa pa muoyo yeye mulekele Yehowa, bidi mua kututonda bikole menemene. (Mis. 78:40; Nsu. 24:10) Bidi nanku bualu tudi bamunange bikole menemene. Biwikale mutuilangane ne lutatu alu, manya ne: tshilejilu tshia Sadoka tshidi mua kukukolesha.

15. Mbualu kayi buvua buenzeke buvua bulombe Sadoka dikima bua kushala ne lulamatu kudi Yehowa? (1 Bakalenge 1:​5-8)

¹⁵ Sadoka wa kashala ne lulamatu pavua mulunda wende wa pa muoyo Ebeyatâ mulekele Yehowa. Bualu ebu buakenzeka matuku makese kumpala kua Davidi kufua. Pakavua Davidi mununu upunga ne lufu, muanende Adoniya wakajinga kuangata bukalenge buvua Yehowa mulaye Solomo. (1 Kul. 22:​9, 10) Ebeyatâ wakaditua ku tshia Adoniya. (Bala 1 Bakalenge 1:​5-8.) Wakapanga mua kushala ne lulamatu kudi Davidi ne kudi Yehowa. Bualu ebu buvua ne bua kuikala butonde Sadoka bikole, mudiumvue muedibue mâyi ku makasa. Pabi yeye ne Ebeyata bavua benze mudimu wa buakuidi pamue munkatshi mua bidimu bipite pa 40. (2 Sam. 8:17) Bavua bambule kabidi pamue “Mushete wa Nzambi mulelela.” (2 Sam. 15:29) Anu mutukavua baleje, bakakuba mukalenge wabu Davidi, kuenzabu malu makuabu a bungi mu mudimu wa Yehowa.—2 Sam. 19:​11-14.

16. Tshivua pamuapa tshiambuluishe Sadoka bua kushala ne lulamatu ntshinyi?

¹⁶ Nansha muvua Ebeyatâ mupange mua kushala ne lulamatu kudi Yehowa pavuaye muditua ku tshia Adoniya bua kutungila Davidi, Sadoka wakashala yeye ne lulamatu kudi Yehowa. Davidi wakashala pende mueyemene Sadoka. Pakatandulabu tshivua Adoniya ukeba kuenza, Davidi wakalomba Sadoka, Natana, ne Benaya bua bele Solomo manyi ne bamubanjije mu bukalenge. (1 Bak. 1:​32-34) Tshilejilu tshia Natana ne tshia batendeledi bakuabu ba Yehowa bavua bashale ne lulamatu kudiye ne kudi mukalenge Davidi tshivua ne bua kuikala tshikoleshe Sadoka, ne tshimukankamije. (1 Bakalenge 1:​38, 39) Pakalua Solomo mukalenge, “wakateka muakuidi Sadoka pa muaba wa Ebeyatâ.”—1 Bak. 2:35.

17. Mmunyi muudi mua kuidikija Sadoka padi muntu uudi munange ulekela Yehowa?

¹⁷ Mmunyi muudi mua kuidikija Sadoka? Muntu uudi munange yeye mulekele Yehowa, wewe enza malu adi aleja ne: udi musue kushala ne lulamatu. (Yosh. 24:15) Yehowa neakupeshe  bukole ne dikima dia kuenza tshidi tshimpe. Ikala usambila ne wikale pabuipi ne bena Kristo nebe ba lulamatu. Yehowa mmukunange bua muudi ne lulamatu ne neakufute.—2 Sam. 22:26.

18. Bualu bua Marco ne Sidse budi bukulongesha tshinyi?

¹⁸ Tuakulayi bua muanetu Marco ne mukajende Sidse. Bana babu ba bakaji babidi bakavua bakole bakalekela Yehowa. Marco udi wamba ne: “Muledi yonso utu munange bana bende bikole. Katshia anu dîba didibu baledibua, udi ubakuba ne muende muonso. Kadi bobu balekele Yehowa pakadibu bakole, bidi bitonda bibi menemene.” Udi wamba kabidi ne: “Nansha nanku Yehowa mmutupeshe bukole bua kunanukila mu lutatu alu. Musangu wonso umvua ntshioka mu lungenyi, uvua upesha mukajanyi bukole. Pavuaye utshioka pende, uvua umpesha panyi bukole. Sidse udi wamba ne: “Katuvua mua kunanukila mu lutatu elu bu yeye kayi utupesha bukole to. Mvua mbungama bikole ndipisha anu kudipisha, ndiambila ne: bana banyi aba mbalekele Yehowa bua tshilema tshianyi. Mvua nsambila ndeja Yehowa dibungama dianyi adi. Matuku makese pashishe, muanetu wa bakaji mukuabu umvua tshiyi mumone bidimu bia bungi wakalua kunteka bianza pa makaya, kuntangilaye mu mêsu wamba ne: Sidse wetu manya ne: ki ntshilema tshiebe to. Yehowa wakangambuluisha, meme kupeta bukole bua kutungunuka ne kumuenzela mudimu ne disanka.”

19. Udi mudisuike bua kuenza tshinyi?

¹⁹ Yehowa mmusue bua batendeledi bende bikale ne dikima anu bu Sadoka. (2 Tim. 1:7) Kadi ki mmusue bua tudieyemene to, mmusue bua tumueyemene yeye. Nanku mulomba dikima dîba dionso diudi nadi dijinga, neakupeshe diabuena divua nadi Sadoka.—1 Pet. 5:10.