1. Mmunyi muutu umona bulelela?

 TUETU Bantemu ba Yehowa tutu banange bulelela budi mu Dîyi dia Nzambi. Bulelela abu ke nshidamenu wa ditabuja dietu. (Lomo 10:17) Tudi batuishibue ne: Yehowa mmuenze tshisumbu tshia bena Kristo ne mmutshivuije “dikunji ne nshindamenu wa bulelela.” (1 Tim. 3:15) Tudi tukokela “bantu badi balombola” munkatshi muetu, tubakokela ku budisuile; badi batumvuija bulelela bua mu Bible ne batupesha bulombodi budi butuambuluisha bua kuenza disua dia Nzambi.—Eb. 13:17.

2. Bilondeshile Yakobo 5:​19, ntshinyi tshidi mua kutufikila nansha tuetu bamane kulonga bulelela?

² Kadi nansha mutukadi bitabe bulelela ne batuishibue ne: tudi dijinga ne bulombodi budi bulongolodi bua Yehowa butupesha, tuetu katuyi batangile bimpe, tudi anu mua kupambuka. (Bala Yakobo 5:19.) Satana udi ne dijinga dikole dia kutufikisha ku dibenga kueyemena Bible anyi buludiki budi bulongolodi bua Yehowa butupesha.—Ef. 4:14.

3. Tudi ne bua kutumikila bulelela butudi tulonga bua tshinyi? (Efeso 6:​13, 14)

³ Bala Efeso 6:​13, 14. Mu katupa kîpi emu, Satana neashime bantu ne budimu bua bungi bua kubafikisha ku ditombokela Yehowa. (Buak. 16:​13, 14) Tudi bamanye kabidi ne: neadienzeje bikole bua kutupambuisha. (Buak. 12:9) Ke bualu kayi mbia mushinga bua tuetu kulonga mua kutapulula bulelela ne dishima ne kuikala kutumikila bulelela butudi tulonga. (Lomo 6:17; 1 Pet. 1:22) Kuenza nanku ke kuatuambuluisha bua kupanduka ku dikenga dinene.

4. Ntshinyi tshituakuila mu tshiena-bualu etshi?

 ⁴ Mu tshiena-bualu etshi, netuakule bua ngikadilu ibidi itudi ne bua kupeta. Neyituambuluishe bua kumanya bulelela bua mu Bible ne kutumikila buludiki budi bulongolodi bua Yehowa butupesha. Netulue kuakula bua malu asatu atudi ne bua kuenza bua tuetu kutungunuka ne kutumikila bulelela butudi tulonga.

NGIKADILU YA KUPETA BUA KUMANYA BULELELA

5. Mmunyi mudi ditshina dia Yehowa dituambuluisha bua kumanya bulelela?

⁵ Ditshina dia Yehowa. Kutshina Yehowa kudi kumvuija kumunanga bikole ne kubenga kumunyingalaja. Kudi kumvuija kulonga mua kutapulula tshidi tshimpe ne tshidi tshibi, kutapulula bulelela ne dishima bua Yehowa atuanyishe. (Nsu. 2:​3-6; Eb. 5:14) Katuena ne bua kutshina bantu bikole kupita mutudi banange Yehowa to; bualu pa tshibidilu malu atu bantu basue atu amunyingalaja.

6. Mmunyi muvua ditshina dia bantu difikishe batentekedi 10 ku difila luapolo lua dishima?

⁶ Tuetu tutshina bantu bikole kupita Nzambi, netupambuke mu bulelela. Tuakulayi bua bena Isalele 12 bavua baye kutentekela buloba buvua Yehowa mulaye bena Isalele. Batentekedi 10 bavua batshina bena Kanâna bikole kupita muvuabu banange Yehowa. Pakapinganabu, bakambila tshisamba tshijima tshia Isalele ne: “Katuena mua kubanda bua kuluangana ne bantu abu to, bualu mbatupite bukole.” (Nom. 13:​27-31) Bua mmuenenu wa buntu, bena Kanâna bavua bapite bena Isalele bukole. Kadi kuamba ne: bena Isalele kabavua mua kutshimuna baluishi babu abu kudi kuleja ne: kabavua batume meji abu kudi Yehowa to. Bivua bikengela batentekedi 10 abu bimanyine pa tshivua Yehowa musue bua bena Isalele kuenza. Bivua kabidi mua kuikala bimpe bu bobu belangane meji a malu avua Yehowa mubenzele matuku makese mashale panyima. Dîba adi  bavua mua kujingulula ne: bena Kanâna kabavua ne bukole kumpala kua Nzambi wa bukole buonso to. Yoshua ne Kaleba bavua bobu basue bua Yehowa abanyishe; ke bualu kayi kabakenza malu bu batentekedi bakuabu abu bavua kabayi ne ditabuja to. Bakakankamija bena Isalele ne: “Yehowa yeye mutuanyishe, kakuyi mpata neatubueje mu buloba abu ne neatupeshabu.”—Nom. 14:​6-9.

7. Tshitudi ne bua kuenza ntshinyi bua tuetu kutshina Yehowa bikole? (Tangila kabidi tshimfuanyi.)

⁷ Tuetu basue kutshina Yehowa bikole, tudi ne bua kuela meji a kumusankisha dîba dionso ditudi ne bua kuangata dipangadika. (Mis. 16:8) Paudi ubala Bible, ikala udiebeja ne: ‘Bu meme muikalaku pavua bualu ebu buenzeke, mvua mua kuikala muenze tshinyi?’ Tshilejilu, bu wewe muikalaku pavua batentekedi 10 abu balue kuamba ne: bena Isalele kabavua bakumbana bua kutshimuna bena Kanâna to, uvua pebe mua kuikala muitabe tshivuabu bamba atshi, ulekela buôwa bukukuata anyi? Uvua ne bua kutungunuka ne kunanga Yehowa ne kuikala anu ne dijinga dia kumusankisha anyi? Bena Isalele bonso kabakitaba ne: tshivua Yoshua ne Kaleba babambila ke tshivua tshilelela to. Bua bualu abu, Yehowa kakabanyishila bua babuele mu Buloba bulaya to.—Nom. 14:​10, 22, 23.

8. Nngikadilu kayi utudi ne bua kudienzeja bua kupeta? Bua tshinyi?

⁸ Budipuekeshi. Yehowa utu usokoluela bantu badi badipuekesha bulelela. (Mat. 11:25) Tuvua badipuekeshe ne bitabe bua batulongeshe bulelela. (Bien. 8:​30, 31) Nansha nanku, tudi ne bua kudimuka bua katulu bena lutambishi. Bualu tudi mua kutuadija kudiambila ne: katuena dijinga ne mêyi manene a mu Bible anyi buludiki budi bufumina kudi bulongolodi bua Yehowa to.

9. Tshia kuenza ntshinyi bua kushala bena budipuekeshi?

⁹ Tuetu basue kushala bena budipuekeshi, tudi ne bua kuikala tuvuluka ne: tudi bakese kumpala kua Yehowa. (Mis. 8:​3, 4) Mbimpe tulombe kabidi Yehowa bua atuambuluishe tuikale tudipuekesha bikole ne tuitaba bua atulongeshe. Yehowa netuambuluishe bua katuikadi tuanyisha meji etu to, kadi bua tuikale tuanyisha meji ende Yeye atudi tupetela mu Bible ne kudi bulongolodi buende. Paudi udibadila Bible, ikala ukeba bua kumona mudi Yehowa munange budipuekeshi ne mukine lutambishi, didibandisha, ne diambu. Utambe kudienzeja bua kushala ne budipuekeshi padibu bakupesha mudimu munene mu bulongolodi bua Yehowa.

MUA KUTUNGUNUKA NE KUTUMIKILA BULELELA BUTUDI TULONGA

10. Mbantu kayi bavua Yehowa muteke bua kulombola tshisamba tshiende?

¹⁰ Tungunuka ne kulonda buludiki budi bufumina kudi bulongolodi bua Yehowa. Yehowa wakateka Mose bua kufila buludiki kudi bena Isalele. Pakafua Mose, wakalua kuteka Yoshua. (Yosh. 1:​16, 17) Bena Isalele bavua batuta diakalenga pavuabu bamona Mose ne Yoshua bu baleji mpala ba Yehowa. Bidimu nkama ya bungi pashishe, pakenjimbua tshisumbu tshia kumpala tshia bena Kristo, kasumbu ka bapostolo 12 ke kavua kafila buludiki. (Bien. 8:​14, 15) Bakalua kubueja bakulu bakuabu bavua mu Yelushalema mu kasumbu aku. “Bisumbu biakatungunuka ne kukoleshibua mu ditabuja ne kuvulangana ku dituku ne ku dituku” pavuabi bitumikila bulombodi bua kudi kasumbu aku. (Bien. 16:​4, 5) Lelu eu, Yehowa udi utubenesha patudi tutumikila buludiki bua kudi bulongolodi buende. Kadi mmunyi mumvua Yehowa tuetu  babenge kutumikila bantu badiye muteke bua kutulombola? Bua kuandamuna lukonko elu, tumonayi tshivua tshifikile bena Isalele pavuabu mu njila batangile mu Buloba bulaya.

11. Ntshinyi tshiakafikila bena Isalele bavua kabayi banemeka Mose uvua Yehowa muteke bua kubalombola. (Tangila kabidi tshimfuanyi.)

¹¹ Pavua bena Isalele mu njila batangile mu Buloba bulaya, bamue ba kudibu bavua bende lumu bakatombokela Mose, kubengabu ne mudimu uvua Yehowa mumupeshe. Bakamba ne: “Tshisumbu tshijima ntshia tshijila [ki nganu Mose to], buonso buabu, ne Yehowa udi munkatshi muabu.” (Nom. 16:​1-3) Bavua bambilamu; “tshisumbu tshijima” tshivua tshia tshijila ku mêsu kua Yehowa. Nansha nanku, Yehowa uvua muteke Mose bua kutshilombola. (Nom. 16:28) Pavua bantomboji abu bakula bibi bua Mose, bavua mu bulelela bakula bibi bua Yehowa. Kabavua bakeba disua dia Yehowa to, bavua bakeba tshivuabu bobu basue; tuambe ne: bavua bakeba bukokeshi ne lumu. Nzambi wakashipa bavua bakebesha buntomboji abu, kushipaye kabidi bena Isalele binunu bia bungi bavua baditue ku tshiabu. (Nom. 16:​30-35, 41, 49) Tumanyayi ne: nansha lelu Yehowa kena wanyisha bantu badi babenga kutumikila bulombodi bua kudi bulongolodi buende to.

12. Mbimpe tueyemene bulongolodi bua Yehowa bua tshinyi?

¹² Mbimpe tueyemene bulongolodi bua Yehowa. Padibi bikengela kuakajilula ngumvuilu wetu wa dilongesha kampanda dia mu Bible anyi kuakaja mushindu wetu wa kuenzela Yehowa mudimu, bana betu badi batulombola badi benza nanku ne lukasa kabayi belakana. (Nsu. 4:18) Badi benza nanku bualu mbasue kusankisha Yehowa, ki mbasue kusankisha bantu to. Badi badienzeja kabidi bua kuangatshila mapangadika abu mu Dîyi dia Nzambi didi bantu ba Nzambi bonso ne bua kunemeka.

13. Patudi tuakula bua “Tshilejilu tshia mêyi adi akolesha,” tudi tumona tshinyi? Ntshinyi tshitudi ne bua kuenza natshi?

 ¹³ “Ulamate tshilejilu tshia mêyi adi akolesha.” (2 Tim. 1:13) “Tshilejilu tshia mêyi adi akolesha” mmalongesha a bena Kristo adi mu Bible. (Yone 17:17) Malongesha au ke adi nshindamenu wa ditabuja dietu. Bulongolodi bua Yehowa mbutulongeshe bua tulamate ku malongesha au, dîba adi Yehowa neatubeneshe.

14. Mmunyi muvua bamue bena Kristo balekele kulamata “tshilejilu tshia mêyi adi akolesha”?

¹⁴ Tuetu katutshiyi balamate “tshilejilu tshia mêyi adi akolesha,” ntshinyi tshiatufikila? Tuangatayi tshilejilu etshi: Bamue bena Kristo ba mu tshikondo tshia bapostolo bakamuangalaja dilongesha dia dishima dia ne: dituku dia Yehowa dikavua dilue. Bavua mua kuikala bapete mukanda uvua ne dilongesha adi, bela meji ne: mupostolo Paulo ke uvua muwufunde. Bamue bena Kristo bavua mu Tesalonike bakitaba bualu abu, kutuadijabu kubumuangalaja kabayi nansha babukonkonone bua kumanya ni buvua bulelela anyi bua dishima. Bu bobu bavuluke malu avua Paulo mubalongeshe patshivuaye munkatshi muabu, kabavua mua kuikala babashima to. (2 Tes. 2:​1-5) Paulo wakababela bua kabitabi dîyi dionso divuabu bumvua. Bua kubambuluisha bua bikale bajingulula mikanda ivuaye ufunda matuku atshivua alua, wakajikija mukanda muibidi uvuaye mufundile bena Tesalonike ne mêyi aa: “Eu mmuoyo wanyi, meme Paulo, wa ku tshianza tshianyi udi tshimanyinu mu mikanda yonso; eu ke mushindu undi mfunda.”—2 Tes. 3:17.

15. Tshia kuenza ntshinyi bua kudikuba ku malu a dishima adi mua kumueneka bu malelela? Fila tshilejilu. (Tangila kabidi tshimfuanyi.)

¹⁵ Mêyi avua Paulo mufundile bena Tasalonike au adi atulongesha tshinyi? Patudi tumvua bualu budi kabuyi bupetangana ne malongesha a mu Bible atudi balonge, peshi tumvua bualu budi bufuane kutekesha ditabuja dietu, mbimpe tuenze malu ne meji. Mu ditunga dia kale dia Union soviétique, baluishi betu bakapesha bena Kristo netu mukanda, babambila ne: uvua ufumina ku biro  bietu binene. Mukanda au uvua ukankamija bamue bana betu bua badienzele buabu bulongolodi bukuabu butapuluke ne buetu ebu. Mukanda au uvua umueneka bu uvua ufumina ku biro bietu binene. Kadi bena Kristo ba lulamatu kabakawitaba to. Bakajingulula ne: malu avua mu mukanda au kaavua apetangana ne malongesha etu to. Lelu eu, baluishi betu badi benza mudimu ne Enternete anyi miaba ya kupetelanganaku bua kukuna dielakana mu mitu ya bana betu anyi bua kutupandulula. Pamutu pa kubalekela ‘batutenkakaja mu meji etu ne lukasa,’ mbimpe tukonkonone bitudi tubala anyi tumvua bua kumanya ni bidi bipetangana ne bulelela butukadi balonge; tuetu benze nanku netudikube.—2 Tes. 2:2; 1 Yone 4:1.

16. Bilondeshile Lomo 16:​17, 18, tshitudi ne bua kuenza ne bantu badi balongesha malu a dishima ntshinyi?

¹⁶ Shala mu buobumue ne bantu badi balamate Yehowa. Yehowa mmusue bua tumutendelele mu buobumue ne bena Kristo netu. Netushale nabu mu buobumue anu tuetu tutumikila bulelela butudi tulonga. Muntu yonso udi ulongesha malu a dishima udi ukeba matapuluka mu tshisumbu. Yehowa udi utulomba bua ‘tumuepuke.’ Tuetu katuyi bamuepuke, neatupambuishe, tufika ku dilekela Yehowa.—Bala Lomo 16:​17, 18.

17. Tuetu bamanye bulelela ne bashale babulamate, mmasanka kayi atuapeta?

¹⁷ Tuetu bamanye bulelela ne bashale babulamate, netushale pabuipi ne Yehowa; ne ditabuja dietu nedikale anu dikole. (Ef. 4:​15, 16) Malongesha a dishima a Satana ne malu a dishima adiye umuangalaja kaakutupambuisha to, ne Yehowa neatukube ku dikenga dinene. Nuenu bashale balamate malu malelela, “Nzambi wa ditalala neikale nenu.”—Filip. 4:​8, 9.