Nkonko ya babadi
Mmunyi mudi tshiena-bualu tshia “Dîna diebe dijidibue” tshidi mu Tshibumba tshia Nsentedi tshia ngondo 6/2020 tshiakaje ngumvuilu wetu wa tshidi dîna dia Yehowa ne tshidi bumfumu buende?
Mu tshiena-bualu atshi tuvua balonge ne: tshilumbu tshidi anu tshimue tshidi tshitangila bantu bonso ne banjelu, ke tshia dijidibua dia dîna dinene dia Yehowa. Bualu bua ne: Yehowa mmukokeshi muimpe anyi mubi, ntshimue tshibadi tshia tshilumbu atshi. Bia muomumue, bualu bukuabu bua ne: muntu udi mua kushala ne lulamatu kudi Yehowa anyi kubenga kushala nalu, ntshibadi tshikuabu tshia tshilumbu atshi.
Bua tshinyi tukadi tuamba mpindieu ne: tshilumbu tshinene atshi tshidi tshitangila anu dîna dia Yehowa ne dijidibua diadi? Tuakulayi bua malu asatu.
Satana mmupende dîna dia Nzambi katshia wajula butomboji mu budimi bua Edene, udi wenza nanku too ne lelu
Bua kumpala, Satana wakaluisha dîna dia Yehowa anyi lumu luende mu budimi bua Edene. Mu lukonko lua budimu luvua Satana muele Eva, uvua usua kuamba ne: Yehowa nNzambi udi welelangana mikenji idi kayiyi miakane ne ki nNzambi tshipapayi to. Pashishe, Satana wakabenga buludiludi tshivua Yehowa mubambile, usua kuleja ne: Nzambi mmuena dishima. Tshivuaye muenze atshi, uvua mushiminyine Yehowa malu. Nunku wakalua “Diabolo,” dîna didi diumvuija “mushiminyinyanganyi wa malu.” (Yone 8:44) Bu muvua Eva muitabe mashimi a Satana au, wakabenga kutumikila Nzambi, yeye kutombokela bumfumu buende. (Gen. 3:1-6) Satana utshidi ushiminyina Yehowa malu too ne lelu. Mbipepele bua bantu badi bitaba malu a mafi au kubenga kutumikila Yehowa. Kadi bua bantu ba Nzambi, kunyanga dîna dia tshijila dia Yehowa mbualu bubi butambe. Kunyanga lumu luadi ke kudi kukebeshe makenga onso adi pa buloba lelu.
Bualu buibidi, Yehowa mmudisuike bua kubingisha dîna diende, tuambe ne: kumbusha bipendu bionso bidibu badipende bua amone mua kuambuluisha bifukibua biende bionso. Abu ke bualu budi ne mushinga wa bungi menemene kudi Yehowa. Ke bualu kayi udi wamba ne: “Bulelela, nenjidile dîna dianyi dinene.” (Yeh. 36:23) Pavua Yezu muambe ne: “Dîna diebe dijidibue,” uvua uleja batendeledi ba Yehowa bonso bualu budibu kabayi ne bua kupua muoyo padibu basambila. (Mat. 6:9) Bible udi uleja misangu ne misangu mudi kutumbisha dîna dia Yehowa ne mushinga. Mona bilejilu bikese bidi bijadika bualu ebu: “Peshayi Yehowa butumbi budi buakanyine dîna diende.” (1 Kul. 16:29; Mis. 96:8) “Imbayi misambu ya kutumbisha nayi dîna diende dia butumbi.” (Mis. 66:2) “Nentumbishe dîna diebe kashidi.” (Mis. 86:12) Umue wa ku misangu ivua Yehowa nkayende muakule kumbukila mu diulu, ndîba divua Yezu ku ntempelo pavuaye mumuambile ne: “Tatu, utumbishe dîna diebe.” Yehowa wakamuandamuna ne: “Ndi muditumbishe, nenditumbishe kabidi.”—Gen. 38:21. a
Buisatu, malu onso adi Yehowa mulongolole bua kuenza adi atangila dîna diende anyi lumu luende. Tshilejilu, ntshinyi tshienzeka panyima pa diteta dia ndekelu dienzeka ku ndekelu kua Bukokeshi bua bidimu tshinunu bua Kristo? Bantu ne banjelu nebikale anu batapulukangane mu tshilumbu tshinene tshia dijidibua dia dîna dia Yehowa etshi anyi? Bua kuandamuna lukonko alu, tuvulukayi bibadi bibidi bia tshilumbu atshi. Ke muoyo mutoke wa bantu ne bumfumu butambe bunene bua Yehowa. Tshikondo atshi, kabiakulomba bantu bua kuleja mudibu ne muoyo mutoke to. Bualu nebikale bapuangane, bamane kupita diteta dia ndekelu, ne bapete muoyo wa tshiendelele. Kakuakuikala kabidi dijinga dia Yehowa kuleja bikala bukokeshi buende butambe buimpe to. Bualu tshikondo atshi banjelu badi mu diulu ne bantu pa buloba nebikale mu buobumue ne nebitabe bukokeshi bua Yehowa. Kadi netuambe bishi bua dîna dia Yehowa?
Tshikondo atshi, dîna dia Yehowa nedikale dijidibue bua kashidi. Kadi nedikale anu ne mushinga wa bungi kudi batendeledi bende bonso ba mu diulu ne pa buloba. Bualu nebamone muatungunuka Yehowa ne kuenza malu adi akemesha. Pikala Yezu mupingajile Yehowa bukokeshi buonso, Nzambi ‘neikale bintu bionso kudi muntu yonso.’ (1 Kol. 15:28) Dîba adi, bantu bonso nebapete “budikadidi bua butumbi bua bana ba Nzambi.” (Lomo 8:21) Yehowa neakumbaje tshipatshila tshiende tshia kusangisha bana bende badi mu diulu ne badi pa buloba mu dîku dimue dikala mu buobumue.—Ef. 1:10.
Panyima pa malu aa, ntshinyi tshiumvua bena mu dîku dia Yehowa badi mu diulu ne badi pa buloba? Mbikumbane bua kuamba ne: netuikale ne dijinga dikole dia kutungunuka ne kutumbisha dîna dia Yehowa. Nyuma muimpe wakasaka Davidi bua kufunda ne: “Yehowa Nzambi atumbishibue . . . Dîna diende dia butumbi ditumbishibue kashidi.” (Mis. 72:18, 19) Bushuwa, netuikale anu ne malu mimpe mapiamapia atusaka bua kutumbisha dîna diende bua kashidi.
Dîna dia Yehowa didi dileja malu onso adi amutangila. Didi nangananga dituvuluija mudiye mutunange. (1 Yone 4:8) Netuikale anu tuvuluka ne: Yehowa wakatufuka ne wakafila tshia kupikulangana natshi bualu mmutunange. Netuikale kabidi tuvuluka ne: udi ukokesha ne buakane ne dinanga. Netutungunuke ne kumona mudi Yehowa mutunange bua kashidi. Bu mudi Yehowa Tatuetu, nekuikale anu malu atusaka bua kusemena pabuipi nende, ne netumuimbile misambu ya kutumbisha nayi dîna diende bua kashidi.—Mis. 73:28.
