• “Mvua mmona anu bu ne: bayanyi mmuende masandi njila ne njila.”

• “Ngakadiumvua mupuekeshibue milongo, tshiyi mukaji wa kutuishila mêsu, ne tshiyi ne mushinga.”

• “Tshivua mua kuambila muntu bualu abu to. Mvua mfua nabu munda.”

• “Mvua mmona ne: Yehowa kavua untabalela to.”

Mêyi aa adi aleja mudi mukaji utata bikole padi bayende utangila bintu bia malu a bantu butaka.  a Pikalaye mubitangile munkatshi mua ngondo ya bungi anyi bidimu, pamuapa mukajende kakumueyemena kabidi to. Mukaji mukuabu wakamba ne: “Tshiena mumanye tshidi bayanyi bimpe menemene to. Kudi malu makuabu adiye munsokoke anyi?”

Tshiena-bualu etshi ntshienzela mukaji udi b ne mulume udi utangila bintu bia malu a bantu butaka. Mudi mêyi manene a mu Bible adi akankamija mukaji, amujadikila ne: Yehowa mmumunange ne mmusue kumuambuluisha. Mêyi manene aa neamuambuluishe kabidi bua kuikala ne ditalala dia bungi ne kushala pabuipi ne Yehowa. c

Nansha muudi kuyi mua kumanya bualu buonso budi bayebe wenza, kudi malu audi mua kuenza bua kukepesha kanyinganyinga kebe ne kupeta ditalala dia bungi. Tangila adi alonda aa:

Kudiedi tshilumbu pambidi to. Pamuapa udi umona ne: wewe ke udi mufikishe bayebe ku ditangila bintu bia malu a bantu butaka. Alice uvua yeye udimona bu ne: katshivua mukaji mulengele uvua bayende mua kutuishila mêsu to. Wakadiebeja ne: ‘Bua tshinyi bayanyi ukadi utuishila bakaji bakuabu mêsu?’ Bamue bakaji batu badipisha bua tshidibu benze bua tshilele tshia babayabu atshi, bela meji ne: bobu ke badi banyanga nsombelu. Tuakulabi bua Danielle d uvua udipisha. Bu muvua bayende utungunuka ne kutangila bintu abi, bivua bimutonda bumuenza tshiji. Kuluaye kumona ne: pamuapa tshiji tshiende ke tshivua tshinyangakaja malu.

 Biwikala udiumvua pebe nanku, manya ne: Yehowa kena ukuela tshilumbu pambidi bua bilema bia bayebe to. Yakobo 1:14 udi wamba ne: “Muntu yonso udi utetshibua padi dijinga diende dimukoka ne dimulobesha.” (Lomo 14:12; Filip. 2:12) Yehowa kena ukuela tshilumbu pambidi to. Kadi udi ukuanyisha bua muudi ne lulamatu kudiye.​—2 Kul. 16:9.

Mbimpe kumanya kabidi ne: padi bayebe utangila bintu bia malu a bantu butaka, kabiena biumvuija ne: kuena mukaji mulenga to. Bamanyi bapiluke badi bamba ne: kutangila bintu ebi kudi mua kujula muntu majinga makole a kusangila adi mukaji nansha umue kayi mua kumujikija to.

Kusamishi mutu bikole menemene to. Catherine udi uleja ne: uvua usamisha mutu bikole menemene bua muvua bayende utangila bintu bia malu a bantu butaka. Frances udi wamba ne: “Ntu nsamisha mutu musangu wonso untu tshiyi mumanye kudi bayanyi, ngusamisha nanku dituku dijima.” Kudi bakaji badi baleja ne: batu badiumvua bibi padibu ku luseke lua bena Kristo nabu bakuabu badi mua kuikala bamanye tshilema tshia babayabu etshi. Bakuabu mbafike kudiamba ne: badi badiumvua nkaya bualu badi bela meji ne: kakuena muntu udi mumanye lutatu luabu to.

Kudiumvua nanku ki nkubi to. Kadi wewe ushala usamisha mutu bua bualu abu, bidi mua kukuenzela bibi. Pamutu pa kuwusamisha nanku, tuma meji ku bulunda buudi mudie ne Yehowa. Wewe muenze nanku neupete bukole bua kutantamena lutatu alu.​—Mis. 62:2; Ef. 6:10.

Mona bualu bukuabu budi mua kukuambuluisha: Ikala ubala malu adi mu Bible a bakaji bavua ne kanyinganyinga bavua bapete busambi kudi Yehowa pavuabu basambile, welangane meji a malu au. Nansha muvua Yehowa kayi mubumbushile ntatu yabu misangu yonso, wakabapesha ditalala. Tshilejilu, Hana “uvua ne kanyinganyinga ka bungi menemene” bua lutatu luvuaye nalu. Kadi pavuaye “musambile muntatshi mule kumpala kua Yehowa,” wakapeta ditalala nansha muvuaye kayi mumanye tshivua mua kulua kumufikila.​—1 Sam. 1:10, 12, 18; 2 Kol. 1:3, 4.

Lomba mibelu kudi bakulu. Badi “muaba wa kueyema ku tshipepele, tshinyemenu ku mvula wa tshipepele.” (Yesh. 32:2, dim.) Badi mua kukukebela muanetu wa bakaji uudi mua kuambila malu adi makutonde bua akukankamije.—Nsu. 17:17.

Pamuapa udi mua kuambuluisha bayebe bua alekele tshilele tshia kutangila bintu bia malu a bantu butaka. Bible udi wamba bua kujikija lutatu anyi bua kutshimuna muluishi wa makanda ne: “Bantu babidi mbapite muntu umue.” (Muam. 4:9-12) Bamanyi  bapiluke mbamone ne: pa tshibidilu, padi bena dibaka badienzeja pamue, mulume udi mua kumbuka ku bupika bua ditangila bintu bia malu a bantu butaka ne mukajende kutuadija kumueyemena kabidi.

Mu bulelela, malu neende bimpe pikala mulume ne dijinga dikole dia kulekela kutangila bintu abi. Ukadiku mulombe Yehowa bukole bua alekele tshilele etshi ne mulombe mibelu kudi bakulu anyi? (2 Kol. 4:7; Yak. 5:14, 15) Kudiku malu adiye wenza bua katangidi bintu abi anyi? Tshilejilu, mmudielelaku mikenji ya dîba dia kubuela mu biamu ne miaba ya kubuela bua kuepuka njiwu anyi? (Nsu. 27:12) Udi witaba diambuluisha diebe ne ukuambila malu onso mudiwu anyi? Biobi nanku, udi mua kumuambuluisha.

Tuangate tshilejilu tshia Felicia mukaji wa Ethan. Ethan uvua ku bupika bua ditangila bintu bia malu a bantu butaka katshia ku buana. Felicia mmulombe bayende bua ikale umuambila padiye upeta dijinga dia kubitangila. Ethan udi wamba ne: “Ntu nyukila ne mukajanyi mudilekelele, mmuambila malu onso anu mudiwu. Utu ungambuluisha ne dinanga dionso bua tshikuluki mu diteta adi, ne ungebeja pa tshibidilu ni ndi nkandamena diteta adi bipepele. Utu ungambuluisha bua kutabalela dîba dia kubuela ku enternete ne miaba ya kubuelaku.” Bidi biumvuika bua mudi Felicia udiumvua bibi bua mudi bayende musue kutangila bintu bia malu a bantu butaka. Kadi udi wamba ne: “Mushindu undi ngumvua ne tshiji tshindi natshi ki ntshidi tshimana bualu ebu to. Mmudiakaje bua kungambuluisha bua ntantamene lutatu luanyi, tuetu bamane kuyukila nende bua tshilele tshiende tshibi atshi.”

Kuyukila nanku kudi kuambuluisha mulume bua alekele tshilele tshiende tshia kutangila bintu bia malu a bantu butaka, kuambuluisha ne mukaji bua amueyemene kabidi. Mu kuamba kuimpe, padi mulume uleja mukajende butekete budiye nabu, umuambila kudiye uya ne tshidiye uya kuenzaku, nebikale bipepele bua mukajende kumueyemena bualu kakutshiena tshintu tshidiye umusokoka to.

Udi mumona ne: udi mua kuambuluisha bayebe mushindu eu anyi? Biobi nanku, balayi malu adi mu tshiena-bualu etshi pamue ne nuayukidilangane. Bayebe ikale ne tshipatshila tshia kulekela kutangila bintu bia malu a bantu butaka, ne enze bua umueyemene kabidi. Udi ne bua kujingulula tshidi tshilema tshiende tshikuenzela pamutu pa kukufiikila munda. Tshipatshila tshiebe tshikale tshia kumutua mpanda ku bionso bidiye wenza bua umueyemene kabidi. Nukebe bua kumanya tshitu tshifikisha bantu ku dipeta dijinga dia kutangila bintu bibi abi ne munudi mua kujikija lutatu alu. e

Wewe wela meji ne: kanuakuakula bualu ebu bimpe ne bayebe kabiyi bifikisha ku matandu, nudi mua kubikila mukulu unudi nuenu bonso babidi bibidilangane  nende bua ikalapu panudi nuakula bualu abu. Manya ne: nansha bayebe mumane kumbuka ku bupika bua ditangila bintu bia malu a bantu butaka, bidi mua kukulomba tshipolo tshile bua kushisha kumueyemena kabidi. Kadi kutshioki to. Imanyina pa tumalu tukese tukadiye muakaje. Manya ne: mu kupita kua matuku, bayebe neafike ku dilekela tshilele tshiende tshibi binuikala nuenu bonso babidi ne lutulu.​—Muam. 7:8; 1 Kol. 13:4.

Bayebe yeye mutangile kabidi bintu bia malu a bantu butaka nansha mukavuaye muanji kulekela, bidiku biumvuija ne: ki mmusue kulekela kubitangila ne kakuena tshia kuenza bua kumuambuluisha anyi? Kabiena nanku to. Bikala tshilele atshi tshikadi tshiele miji mu muoyo wende, udi mua kushala uluangana natshi too ne muafuaye. Udi mua kubitangila kabidi panyima pa bidimu bia bungi bia yeye mumane kudienzeja bua kulekela kubitangila. Bua yeye kubenga kubitangilula, mbimpe adielele mikenji mikole ne ashale anu mulamate ku mikenji ayi nansha biobi bimueneke ne: ukadi mulekele tshilele atshi. (Nsu. 28:14; Mat. 5:29; 1 Kol. 10:12) Udi ne bua kupeta ‘ngelelu mupiamupia wa meji udi ulombola meji ende’ ne “kukina malu mabi.” Mu malu au mudi ditangila bintu bia malu a bantu butaka, ne tshilele kayi tshionso tshia bukoya bu mudi tshia kudijikijila majinga a kusangila. (Ef. 4:23; Mis. 97:10; Lomo 12:9) Mmusue kuenza malu aa anyi? Biobi nanku, neafike ku dilekela tshilele tshiende tshibi atshi. f

Kadi tshia kuenza ntshinyi bikala bayebe kayi musue kulekela kutangila bintu bibi ebi? Kakuyi mpata, udi mua kushala anu umvua tshiji ne udimona muedibue mâyi ku makasa. Wewe mupuile Yehowa lutatu luebe alu, udi mua kupeta ditalala. (1 Pet. 5:7) Tungunuka ne kusambila, kulonga, ne kuelangana meji a biudi ulonga abi bua usemene pabuipi ne Yehowa. Dîba adi, yeye pende neasemene pabuipi nebe. Anu mudi Yeshaya 57:15 uleja, udi usomba ne badi “bazajibue ne bapuekele.” Mmusue kubambuluisha bua bapetulule disanka diabu. Dienzeja bua kuikala muena Kristo wa tshitembu. Lomba bakulu mibelu, ne wikale anu mutekemene ne: tshimue tshikondo, bayebe udi mua kulekela tshilele tshiende tshibi tshia kutangila bintu bia malu a bantu butaka atshi.​—Lomo 2:4; 2 Pet. 3:9.