1. Tshidi mua kuenza bua dilonga dia mêyi a buprofete a mu Bible kaditutondi ntshinyi?

 BEN, utuvua bakuile mu tshiena-bualu tshishale, udi wamba ne: “Ntu musue kulonga mêyi a buprofete a mu Bible.” Utu pebe musue kualonga anyi peshi atu akuenza kabuôwa? Pamuapa kualonga kutu kukutonda. Kadi wewe mumanye bua tshinyi Yehowa mmuafundishe mu Dîyi diende, udi mua kushintulula mmuenenu webe.

2. Netukonkonone malu kayi mu tshiena-bualu etshi?

² Mu tshiena-bualu etshi, netukonkonone tshitudi ne bua kulongela mêyi a buprofete a mu Bible, ne mutudi mua kualonga. Netumone kabidi mêyi a buprofete abidi avua Danyele mufunde, ne mudi kuajingulula mua kutuambuluisha.

3. Tuetu basue kujingulula mêyi a buprofete a mu Bible, tudi ne bua kuenza tshinyi?

³ Tuetu basue kujingulula mêyi a buprofete a mu Bible, mbimpe tukebe diambuluisha. Tshilejilu, fuanyikijabi ne: wewe ne mulunda webe nudi nuya kuendakana muaba kampanda uudi kuyi mumanye bimpe to. Kadi yeye mmuwumanye bimpe. Mmumanye muaba unudi ne kudi njila yonso ufikisha. Kakuyi mpata, neusanke bua munudi nuya nende muaba au! Bia muomumue, Yehowa mmumanye bimpe tshikondo tshitudi ne malu atufikila kumpala eku. Nunku, tuetu basue kujingulula mêyi a buprofete a mu Bible,  tudi ne bua kudipuekesha ne kumulomba diambuluisha.​—Dan. 2:28; 2 Pet. 1:19, 20.

4. Yehowa mmufundishe mêyi a buprofete mu Dîyi diende bua tshinyi? (Yelemiya 29:11) (Tangila kabidi tshimfuanyi.)

⁴ Yehowa udi anu bu muledi kayi yonso muimpe udi musue bua bana bende bikale ne matuku atshilualua mimpe. (Bala Yelemiya 29:11.) Kadi mmushilangane ne muledi kayi yonso, bualu udi wamba malu a matuku atshilualua ne bujalame buonso. Mmufundishe mêyi a buprofete mu Dîyi diende bua tumanye malu a mushinga enzeka kumpala eku. (Yesh. 46:10) Nanku mêyi a buprofete au ndipa dia kudi Tatuetu wa mu diulu. Kadi ntshinyi tshidi tshitujadikila ne: malu adi Bible mulaye neakumbane?

5. Biwikala nsonga, bualu bua Max budi bukulongesha tshinyi?

⁵ Patu bansonga betu mu tulasa, batu batuilangana ne bantu batu bangata Bible ne mushinga mukese anyi badi kabayi bamuangata ne mushinga. Mêyi abu ne bienzedi biabu mbifuane kufikisha bansonga betu ku dibenga kuitaba malu adi Bible wamba. Mona tshivua tshifikile muanetu wa balume Max. Udi wamba ne: “Pantshivua tshitende, ngakatuadija kudiebeja tshivua baledi banyi bandongesha ni tshivua bulelela, ne Bible ni uvua bushuwa Mukanda wa Nzambi.” Baledi bende bakenza tshinyi? Udi wamba ne: “Bakashala batukije, nansha mumvua mumanye ne: bivua bibatonde.” Bakandamuna nkonko yende yonso ne Bible. Max kakashala muvunge maboko to. Udi wamba ne: “Ngakadilongela mêyi a buprofete a mu Bible. Meme kuambila kabidi bansonga nanyi ba mu tshisumbu tshietu malongesha amvua mupetamu.” Ntshinyi tshiakenzeka? Max udi wamba ne: “Meme mumane kuenza malu au, ngakatuishibua ne: Bible mmukanda wa Nzambi.”

6. Ntshinyi tshiudi ne bua kuenza biwikala ne dielakana? Bua tshinyi?

⁶ Wewe mutuadije kuelakana pebe ne: Bible ki mmukanda wa Nzambi anu bu Max, kudiumvu bibi to. Kadi kudi tshiudi mua kuenza. Manya ne: dielakana didi anu bu dimomena. Dimomena didi mua kudia tshintu ku kakese ku kakese. Wewe musue kulekela dielakana diudi nadi didi mua kunyanga ditabuja diebe, mbimpe udiebeje ne: ‘Ntu ngitaba malu adi Bible wamba bua matuku atshilualua anyi?’ Wewe kuyi uitaba, mbimpe ulonge mêyi a buprofete a mu Bible akadi makumbane. Mmunyi muudi mua kualonga?

7. Ntshilejilu kayi tshia mua kudilongela mêyi a buprofete tshidi Danyele mutushile? (Danyele 12:10) (Tangila kabidi tshimfuanyi.)

⁷ Danyele mmutushile tshilejilu tshia mua kulonga mêyi a buprofete. Uvua ualonga ne meji mimpe. Uvua musue kumanya bulelela. Uvua kabidi udipuekesha, witaba ne: Yehowa neambuluishe bantu badi basue kumumanya ne kutumikila mikenji yende bua baajingulule. (Dan. 2:27, 28; bala Danyele 12:10.) Wakaleja muvuaye ne didipuekesha bualu uvua weyemena Yehowa ne umulomba diambuluisha. (Dan. 2:18) Uvua kabidi udilongela Dîyi dia Nzambi bimpe, wenza makebulula mu mifundu ya mu Bible ivuaku tshikondo tshiende. (Yel. 25:11, 12; Dan. 9:2) Mmunyi muudi mua kumuidikija?

8. Bamue bantu batu balonga mêyi a buprofete a mu Bible bua tshinyi? Ntshinyi tshitudi tuetu ne bua kuenza?

 ⁸ Manya tshidi tshikusaka bua kudilongela. Utu udilongela mêyi a buprofete a mu Bible bualu udi ne dijinga dikole dia kumanya bulelela anyi? Biobi nanku, Yehowa neakuambuluishe. (Yone 4:23, 24; 14:16, 17) Kadi kudi bantu batu baalonga bua malu makuabu. Bamue badi baalonga ne meji a kupeta bijadiki bia ne: Bible ki n’Dîyi dia Nzambi to. Badi bela meji ne: Bible yeye kayi mukanda wa Nzambi, dîba adi badi mua kudielela mikenji ya tshidi tshimpe ne tshidi tshibi. Kadi meji adi atusaka tuetu bua kudilongela ikale mimpe. Kupita apu, tuetu basue kumanya tshidi mêyi a buprofete a mu Bible umvuija, mbimpe tuikale ne ngikadilu mukuabu wa mushinga.

9. Bidi bikengela kuikala ne ngikadilu kayi bua kujingulula mêyi a buprofete a mu Bible? Umvuija.

⁹ Ikala udipuekesha. Yehowa mmulaye bua kuambuluisha bantu badi badipuekesha. (Yak. 4:6) Nanku mbimpe tumulombe diambuluisha bua tujingulule mêyi a buprofete a mu Bible. Tuetu tudipuekesha, netuitabe kabidi diambuluisha dia kudi mupika wa lulamatu udi Yehowa muteke bua kutupesha biakudia bia mu nyuma mu tshikondo tshiakanyine. (Luka 12:42) Bu mudi Yehowa Nzambi wa bulongame, mbia meji bua kuamba ne: udi utuambuluisha bua kujingulula bulelela budi mu Dîyi diende kupitshila anu kudi mupika wa lulamatu au.​—1 Kol. 14:33; Ef. 4:4-6.

10. Bualu bua Esther budi bukulongesha tshinyi?

¹⁰ Ikala wenza makebulula. Sungula dîyi dia buprofete didi dikusankisha, udienzele makebulula. Ke tshivua Esther utuvua bakuile mu tshiena-bualu tshishale muenze. Mêyi a buprofete a dilua dia Masiya ke avua amusankisha. Udi wamba ne: “Pamvua ne bidimu 15, ngakatuadija kuenza makebulula bua kupeta bijadiki bidi bileja ne: mêyi a buprofete au avua mafunda kumpala kua Yezu kuledibua.” Malu avuaye mupete a Mivungu ya Mbuu mufue ke avua mamutuishishe. Udi wamba ne: “Bavua bafunde imue ya ku mivungu ayi kumpala kua Yezu kuledibua. Nunku, mêyi a buprofete adimu adi ne bua kuikala a kudi Nzambi.” Udi wamba kabidi ne: “Ngakabalulula malu amue amue au njila ne njila bua kushisha kuumvua.” Kadi udi ne disanka bua muvuaye muenze makebulula au. Yeye mumane kuenzela mêyi a buprofete ndambu a mu Bible makebulula, udi wamba ne: “Ngakadijadikila mudi Bible Dîyi dia Nzambi!”   

11. Bua tshinyi mbimpe kutuishibua ne: Bible n’Dîyi dia Nzambi?

¹¹ Patudi tumona mukadi amue mêyi a buprofete a mu Bible makumbane, tudi tueyemena Yehowa ne bulombodi buende ne muoyo mujima. Mêyi au adi atuambuluisha kabidi bua tuikale anu ne ditekemena nansha tuetu mu nsombelu kayi. Tumonayi mpindieu mu tshikoso mêyi a buprofete abidi avua Danyele mufunde adi enda akumbana. Kumanya tshidiwu umvuija nekutuambuluishe bua kuangata mapangadika mimpe.

12. Makasa a “tshiamu tshifiike tshisambakane ne diima dinefuke” adi aleja tshinyi? (Danyele 2:41-43)

¹² Bala Danyele 2:41-43. Mu tshilota tshia mukalenge Nebukadenesâ tshivua Danyele mumvuije,  makasa a lupingu avua mukalenge mumone avua menza ne “tshiamu tshifiike tshisambakane ne diima dinefuke.” Tuetu bafuanyikije mêyi aa ne makuabu adi mu mukanda wa Danyele ne wa Buakabuluibua netumone ne: makasa adi aleja bukokeshi bua bukole bua buloba bujima bua Grande-Bretagne ne États-Unis. Danyele udi wamba bua bukokeshi abu ne: “nebuikale tshitupa bukole ne tshitupa butekete.” Nebuikale tshitupa butekete bua tshinyi? Bualu bantu ba mu bukokeshi abu badi tshimfuanyi tshia diima dinefuke badi batekesha bukole buabu bua kuenza malu budi bu bua tshiamu tshifiike. b

13. Dîyi dia buprofete edi didi ditupetesha malongesha kayi a mushinga?

¹³ Malu a lupingu avua Danyele mumvuije, nangananga a makasa alu, adi atupetesha malongesha a bungi. Dia kumpala, bukokeshi bua buloba bujima bua Grande-Bretagne ne États-Unis mbuleje mudibu ne bukole bua bungi. Tshilejilu, buvua munkatshi mua makalenge makuabu avua matshimune mvita ya kumpala ne mibidi ya buloba bujima. Kadi mbutekesha kudi benamu ne nebatungunuke ne kubutekesha bualu badi baluishangana mu buobu ne baluisha mbulamatadi yabu. Dibidi, bukokeshi ebu mbua ndekelu budi bukokesha kumpala kua Bukalenge bua Nzambi kulua bua kubutula makalenge onso a bana ba bantu. Nansha mutuku misangu itu makalenge makuabu aluisha bukokeshi ebu, kaakupingana pa muaba wabu to. Bidi nanku bualu “dibue” didi dileja Bukalenge bua Nzambi nedizaze makasa a lupingu alu adi tshimfuanyi tshia bukokeshi abu.​—Dan. 2:34, 35, 44, 45.

14. Mmunyi mudi kumanya diumvuija dia dîyi dia buprofete dia makasa a tshiamu tshifiike ne diima kutuambuluisha bua kuangata mapangadika mimpe?

¹⁴ Udi witaba ne: dîyi dia buprofete dia makasa a diima ne tshiamu tshifiike ndilelela anyi? Biobi nanku, nebimuenekele ku malu audi wenza. Tshilejilu, bu muudi mumanye ne: ndongoluelu eu ukadi pa kubutudibua, kuakudiina ne kasuki mu dikeba dia bintu to. (Luka 12:16-21; 1 Yone 2:15-17) Kumanya tshidi dîyi dia buprofete edi diumvuija nekutuambuluishe kabidi bua kumanya mushinga udi nawu mudimu wa diyisha ne dilongesha. (Mat. 6:33; 28:18-20) Mpindieu utudi balonge dîyi dia buprofete edi, diebeja ne: ‘Mapangadika andi ngangata adiku aleja mundi mutuishibue ne: Bukalenge bua Nzambi bukadi pa kubutula makalenge onso a bana ba bantu anyi?’

15. Nnganyi udi mukalenge wa ku nord ne mukalenge wa ku sud lelu? (Danyele 11:40)

¹⁵ Bala Danyele 11:40. Danyele nshapita wa 11 udi wakula bua bakalenge babidi, anyi mbulamatadi ibidi idi iluishangana. Patudi tufuanyikija dîyi dia buprofete edi ne makuabu adi mu Bible tudi tumona ne: mukalenge wa ku nord nditunga dia Russie ne adi madisange kudidi, mukalenge wa ku sud mbukokeshi bua Grande-Bretagne ne États-Unis. c

16. “Mukalenge wa ku nord” udi wenzela bantu ba Nzambi tshinyi?

¹⁶ Mukalenge wa ku nord udi ukengesha bantu ba Nzambi badi mu matunga adi ku bukokeshi buende. Mbakume bamue Bantemu bua ditabuja diabu, babeele ne mu maloko. Dibakengesha edi ndikoleshe ditabuja diabu, ki ndiditekeshe to. Tudi tuamba nanku bualu bana betu mbamanye ne: dibakengesha adi didi dikumbaja mêyi a  buprofete adi mu mukanda wa Danyele. d (Dan. 11:41) Kumanya bualu ebu kudi kutuambuluisha petu bua kuikala ne ditekemena ne kushala ne lulamatu kudi Yehowa.

17. Nntatu kayi idi bantu ba Nzambi badi mu matunga adi ku bukokeshi bua “mukalenge wa ku sud” bapeta?

¹⁷ “Mukalenge wa ku sud” uvua pende mukengeshe bantu ba Yehowa ku kale. Tshilejilu, mu mvita ya kumpala ne mibidi ya buloba bujima, bakela bana betu ba bungi mu maloko, kuipatabu bana ba Bantemu mu tulasa bua muvuabu babenge kubuelakana mu malu a tshididi. Nansha mu bidimu bidi panshi ebi, bivua bikolele batendeledi ba Yehowa badi mu matunga adi ku bukokeshi bua mukalenge wa ku sud bua kushala balamate ku tshia Bukalenge bua Nzambi. Tshilejilu, patubu benza tumpanye tua masungulangana, muena Kristo udi mua kutetshibua bua kuditua ku tshia tshisumbu kampanda tshia tshididi anyi ku dia muntu udi muele mpala mu masungula. Nansha mudiye kayi mua kumuelela kakanda, mmusue bua apite. Mbimpe tuetu kubenga kubuelakana mu malu a tshididi ku bienzedi bietu, nansha mu muoyo wetu!​—Yone 15:18, 19; 18:36.

18. Ntshinyi tshidi diluishangana dia “mukalenge wa ku nord” ne “mukalenge wa ku sud” dituenzela? (Tangila kabidi tshimfuanyi.)

 ¹⁸ Pamuapa nebitonde bantu badi kabayi ne ditabuja mu dîyi dia buprofete edi pamonabu “mukalenge wa ku nord” ne “mukalenge wa ku sud” ‘bapindakajangana nsengu.’ (Dan. 11:40, dim.) Bakalenge bonso babidi aba badi ne bia mvita bia mpolondo bidi mua kushipa bantu bonso badi pa buloba. Kadi Yehowa kakubalekela bashipa bantu bonso to. (Yesh. 45:18) Diluishangana dia “mukalenge wa ku nord” ne “mukalenge wa ku sud” didi dikolesha ditabuja dietu, kadiena dituenza buôwa to. Didi dijadika ne: nshikidilu ukadi mulembelele.

19. Ntshinyi tshitudi ne bua kumanya bua mêyi a buprofete a mu Bible?

¹⁹ Katuena bamanye muakumbana amue mêyi a buprofete a mu Bible to. Too ne muprofete Danyele kavua mujingulule diumvuija dia bualu buonso buvuaye mufunde nansha. (Dan. 12:8, 9) Kadi kupanga kumanya muakumbana dîyi dia buprofete kampanda kakuena kumvuija ne: kadiakukumbana to. Kadi tuikalayi batuishibue ne: Yehowa neatumanyishe malu adi akengela mu tshikondo tshiakanyine anu bu muvuaye muenze ku kale.​—Amo. 3:7.

20. Mmêyi a buprofete kayi a mu Bible akadi pa kukumbana? Tudi ne bua kutungunuka ne kuenza tshinyi?

²⁰ Bantu nebele lubila lua ne: “Ditalala, ne kakuena bualu bua kutshina!” (1 Tes. 5:3) Paluelabu, bamfumu ba tshididi nebabutule bitendelelu bia dishima. (Buak. 17:16, 17) Pashishe, nebalue bua kuluisha bantu ba Nzambi. (Yeh. 38:18, 19) Adi ke dîba diatuadija mvita ya Armagedone. (Buak. 16:14, 16) Malu onso aa akadi pa kuenzeka. Mu dindila tshikondo tshienzekawu, tutungunukayi ne kuteya ntema ku mêyi a buprofete a mu Bible ne tuambuluishe bantu bakuabu bua kuenza bia muomumue bua kuleja mutudi ne dianyisha kudi Tatuetu wa mu diulu udi mutunange.