1. Bena mu Babilona bavua batuishile Danyele mêsu bua tshinyi?

 MUPROFETE Danyele utshivua nsonga pavuabu bamukuate baye nende mu bupika mu Babilona. Nansha nanku, banene ba mu Babilona bavua bamutuishile mêsu bualu uvua muimpe kumona ne uvua wa mu tshisa tshia Yuda. (1 Sam. 16:7) Bua malu au, bakamulongesha bua alue kuenza mudimu mu dibalasa dia mukalenge.​—Dan. 1:3, 4, 6.

2. Mmunyi muvua Yehowa umona Danyele? (Yehezekele 14:14)

² Tshivua Yehowa munangile Danyele ki ntshimuenekelu tshiende anyi mudimu uvuaye wenza mu dibalasa dia mukalenge to. Uvua mumunange bua ngikadilu yende mimpe. Mu bulelela, Danyele uvua mua kuikala ne bidimu bu 20 pavua Yehowa muambe ne: uvua bu Noa ne Yobo. Yehowa wakamubala muakane anu bu Noa ne Yobo bavua ne lulamatu munkatshi mua bidimu bia bungi. (Gen. 5:32; 6:9, 10; Yobo 42:16, 17; bala Yehezekele 14:14.) Yehowa uvua munange Danyele mu nsombelu wende mujima.​—Dan. 10:11, 19.

3. Ntshinyi tshituakuila mu tshiena-bualu etshi?

³ Mu tshiena-bualu etshi, netuakule bua ngikadilu ibidi ya Danyele ivua mimuvuije muntu wa mushinga kudi Yehowa. Netuanji kuyimona ne netumone muvuaye muyileje. Netulue kabidi kumona tshivua tshienze bua ayipete ne mutudi mua kumuidikija. Nansha mudi tshiena-bualu etshi tshitangila bansonga, malu adimu adi mua kutulongesha tuetu bonso.

4. Leja muvua Danyele muenze malu ne dikima.

⁴ Bantu ba dikima badi mua kumvua buôwa, kadi kabena balekela buôwa abu bubapangisha bua kuenza malu makane to.  Danyele uvua nsonga wa dikima dia bungi. Tumonayi nsombelu ibidi ivuaye muenze malu ne dikima adi. Wa kumpala, panyima pa bidimu bu bibidi bamane kubutula Yelushalema kudi bena Babilona, Nebukadenesâ mukalenge wa Babilona uvua mulote tshilota tshivua tshimuenze buôwa tshia lupingu lunene lule. Uvua mutumine bena meji bende bonso dîyi, too ne Danyele, bua bamuambile tshilota atshi ne diumvuija diatshi; tshianana uvua ubashipa. (Dan. 2:3-5) Biakalomba Danyele bua kuenza malu ne dikima bua kusungila mioyo ya bantu ba bungi. Ke yeye ‘kubuela, kulomba mukalenge bua amushile tshikondo tshia kumumvuija tshilota atshi.’ (Dan. 2:16) Bualu ebu budi buleja muvua Danyele ne dikima ne ditabuja. Bua tshinyi tudi tuamba nanku? Bualu Bible kena wamba ne: Danyele ukavua mumvuije bilota musangu mukuabu to. Wakalomba Shadalaka, Meshaka ne Abedenego (balunda bende basatu bavuabu binyike mêna a mu Babilona) “bua balombe luse lua kudi Nzambi wa mu diulu bua bualu busokoka ebu.” (Dan. 2:18) Yehowa wakandamuna masambila abu. Kuambuluishaye Danyele bua kumvuija Nebukadenesâ tshilota tshiende. Ke Danyele ne balunda bende 3 abu kupandukabu.

5. Mmusangu kayi mukuabu uvua Danyele muenze malu ne dikima?

⁵ Panyima pa matuku Danyele mumane kumvuija tshilota atshi, biakamulomba kabidi bua kuenza malu ne dikima. Nebukadenesâ wakalota tshilota tshikuabu tshivua tshimuenze buôwa. Wakalota mutshi mule menemene. Danyele wakamumvuija tshilota atshi ne dikima. Kumuambilaye kabidi ne: uvua ne bua kupaala ne kujimija bukalenge buende bua tshikondo kampanda. (Dan. 4:25) Bivua bipepele bua mukalenge kushipa Danyele bualu uvua mua kuela meji ne: uvua umuluisha. Nansha nanku, Danyele wakamumvuija tshilota atshi kayi utshina.

6. Tshivua mua kuikala tshipeteshe Danyele dikima ntshinyi?

⁶ Ntshinyi tshivua mua kuikala tshiambuluishe Danyele bua kuikala ne dikima? Baledi bende bavua bushuwa bamulongeshe malu a bungi katshia ku buana. Bidi bimueneka ne: bavua batumikila mikenji ivua Yehowa muelele baledi bena Isalele ne bavua bamulongeshe Mikenji ya Mose. (Dut. 6:6-9) Danyele uvua  mumanye mikenji ayi, mumanye ne tshivuayi imvuija. Tshilejilu, uvua mumanye tshivua muena Isalele mua kudia ne tshivuaye kayi mua kudia. b (Lew. 11:4-8; Dan. 1:8, 11-13) Danyele uvua kabidi mumanye tshivua tshifikile bantu ba Nzambi pavuabu batumikile mikenji yende ne pavuabu kabayi bayitumikile. (Dan. 9:10, 11) Malu avua mamufikile avua menze bua ikale mutuishibue ne: nansha bualu kayi mua kumutulukila, Yehowa ne banjelu bende ba bukole bavua ne bua kumuambuluisha.​—Dan. 2:19-24; 10:12, 18, 19.

7. Ntshintu kayi tshikuabu tshivua tshiambluishe Danyele bua kupeta dikima? (Tangila kabidi tshimfuanyi.)

⁷ Danyele wakalonga mêyi a buprofete a Nzambi, too ne avua Yelemiya mufunde. Nanku wakalua kujingulula ne: bidimu bia bungi bivua bena Yuda ne bua kuenza mu bupika mu Babilona bikavua ku ndekelu. (Dan. 9:2) Dikumbana dia mêyi a buprofete a Yehowa diakambuluisha Danyele bua kumueyemena bikole. Didi diambuluisha kabidi bantu badi beyemena Nzambi bikole lelu bua bikale ne dikima dia bungi. (Fuanyikija ne Lomo 8:31, 32, 37-39.) Bualu bua mushinga budi ne: Danyele uvua usambila pa tshibidilu. (Dan. 6:10) Uvua utondela Yehowa mpekatu yende, umuambila muvuaye umvua ne umulomba diambuluisha. (Dan. 9:4, 5, 19) Danyele uvua muntu anu bu tuetu bonso, kavua muledibue ne dikima to. Kadi wakapeta ngikadilu au bua muvuaye usambila, udilongela, ne weyemena Yehowa.

8. Ntshinyi tshitudi ne bua kuenza bua kupeta dikima?

⁸ Ntshinyi tshitudi ne bua kuenza bua kupeta dikima? Pamuapa baledi betu batu batukankamija bua kuikala ne dikima. Kadi nansha bobu nadi, kabena mua kutusambulujiladi to. Kupeta dikima kudi anu bu kulonga mudimu. Umue mushindu wa kuwumanya ngua kujoja muntu udi muwupepeje padiye uwenza ne kumuidikija. Tuetu petu tudi tupeta dikima patudi tujoja bantu badi nadi ne tubidikija. Tshilejilu tshia Danyele etshi tshidi tshitulongesha ne: tudi petu ne bua kumanya Dîyi dia Nzambi bimpe. Tudi ne bua kuikala tuambila Yehowa malu etu bua kukolesha bulunda buetu nende. Tudi kabidi ne bua kumueyemena batuishibue ne: neatuambuluishe. Dîba adi, netuikale ne dikima kumpala kua lutatu kayi luonso.

9. Mmasanka kayi atuapeta tuetu ne dikima?

⁹ Tuetu ne dikima netupete masanka a bungi. Tuakulayi bua tshivua tshifikile Ben. Bantu bonso ba mu tshilongelu tshiabu tshia mu Allemagne bavua bitaba dilongesha dia bintu bidienzekele ne bamba mudi dilongesha dia mu Bible dia ne: kudi muntu udi mufuke bintu bionso dikale dia dishima. Dimue edi, bakambila Ben bua apite kumpala kua balongi ne umvuije bua tshinyi udi witaba ne: bintu bidiku ebi mbifukibue. Wakabumvuija malu onso ne dikima. Tshiakenzeka ntshinyi? Ben udi wamba ne: “Mulongeshi wetu uvua munteleje bimpe, yeye kuangata dibeji dimvua mufundile ngenyi imvua ngenda ngumvuija ayi, kuapatuishaye a bungi ku biamu ne kuabanyina mulongi yonso.” Ntshinyi tshiakenza balongi babu? Udi wamba ne: “Ba bungi ba kudibu bakanteleja ne ntema, kungambilabu ne: bavua banganyisha bikole.” Tshivua tshifikile Ben etshi tshidi tshileja ne: tuetu ne dikima, bantu nebikale batunemeka. Tudi mene mua kufikisha bamue ba kudibu ku dimanya Yehowa. Bushuwa, tudi ne malu a bungi adi atusaka bua kuikala ne dikima.

10. Lulamatu ludi lumvuija tshinyi?

¹⁰ Bible utu upita kuakula bua lulamatu anyi bua dinanga dia lulamatu didi nadi Nzambi bua batendeledi bende. Utu kabidi wakula bua lulamatu ludi batendeledi bende nalu kudi umue ne mukuabu. (2 Sam. 9:6, 7) Lulamatu luetu ludi mua kukola mu kupita kua matuku. Tumonayi muvua Danyele mukoleshe lulamatu luende.

11. Mmunyi muakashala Danyele ne lulamatu kudi Yehowa pakavuaye mununu? (Tangila tshimfuanyi tshia pa tshizubu.)

¹¹ Danyele uvua mutuilangane ne ntatu ya bungi ivua mimulombe bua adienzeje bikole bua kushala ne lulamatu kudi Yehowa. Lumue lutatu lukole menemene luakamukuata pavuaye ne bidimu bipite pa 90. Tshikondo atshi, Babilona uvua ku bupika bua bena Madayi ne bena Pelasa bavua mukalenge Dayawesha ukokesha. Bantu bakuabu bavua ne bukokeshi mu bukalenge bua Dayawesha kabavua banange Danyele ne kabavua banemeka Nzambi wende to. Bakela tshifufu bua kushipa Danyele. Bakasaka mukalenge bua atue tshiala pa mukenji uvua ulomba Danyele bua kuleja ni uvua mua kushala ne lulamatu kudi Nzambi anyi kudi mukalenge. Tshionso tshivua Danyele ne bua kuenza bua kuleja ne: uvua ne lulamatu kudi mukalenge bu bantu bonso tshivua tshia kulekela kusambila munkatshi mua matuku 30. Kadi wakabenga kutumikila mukenji au. Ke kumuelabu mu buina bua ntambue. Yehowa wakamufuta bua lulamatu luende pakakangaye mukana mua ntambue bua kayimudi. (Dan. 6:12-15, 20-22) Mmunyi mutudi petu bua kushala ne lulamatu lukole kudi Yehowa anu bu Danyele?

12. Ntshinyi tshivua Danyele muenze bua kukolesha lulamatu luende kudi Yehowa?

¹² Anu mutukadi baleje, tuetu basue kushala ne lulamatu kudi Yehowa, tudi ne bua kumunanga bikole. Danyele uvua mulamate Yehowa bikole bualu uvua mumunange bikole. Kakuyi mpata, Danyele uvua munange Yehowa bualu uvua upitshisha dîba welangana meji a ngikadilu yende ne a muvuaye uyileja. (Dan. 9:4) Wakelangana kabidi meji a malu onso mimpe avuaye mumuenzele yeye ne batendeledi bende bakuabu ne uvua ne dianyisha bua malu au.​—Dan. 2:20-23; 9:15, 16.

13. a) Nntatu kayi idi bansonga betu batuilangana nayi idi ibalomba bua bashale ne lulamatu kudi Yehowa? Fila tshilejilu. (Tangila kabidi tshimfuanyi.) b) Anu mudibi bileja mu filme, mmunyi muudi mua kuandamuna muntu yeye mukuebeje bikala Bantemu ba Yehowa baditua ku tshia bantu badi balala ne bantu ba mubidi umue nabu?

 ¹³ Bansonga betu lelu mbanyunguluka kudi bantu badi kabayi banemeka Yehowa ne kabayi batumikila mikenji yende anu bu muvuabi bua Danyele. Pamuapa bantu abu mbakine muntu yonso udi witabuja malongesha adi mashilangane ne abu. Bamue ba kudibu badi mene batatshisha bansonga betu bua kabashadi ne lulamatu kudi Yehowa to. Mona tshivua tshienzekele Graeme, nsonga mulume wa mu Australie. Wakatuilangana ne lutatu pavuaye mu tulasa tua bikadilu. Mulongeshi wabu wakebeja balongi tshivuabu mua kuenza, mulunda wabu yeye mubambile ne: utu ulala ne bantu ba mubidi umue nende. Mulongeshi au kuamba ne: balongi bonso bavua mua kuditua ku tshia mulunda wabu au bapite ku luseke lumue, bavua kabayi mua kuditua ku tshiende bapite ku lukuabu. Graeme udi wamba ne: “Kalasa kajima kakapita ku luseke lumue, anu meme ne muena Kristo nanyi mukuabu tuakaya ku luseke lukuabu.” Tshiakalua kuenzeka pashishe ke tshiakalomba Graeme bua kuleja ni uvua mua kushala ne lulamatu kudi Yehowa. Udi wamba ne: “Mu dîba dijima diakenza dilongesha adi, balongi betu too ne mulongeshi wetu bavua batupenda. Ngakadienzeja bua kubumvuija bulelela ne dîyi dimpe kadi kabakanteleja to.” Mmunyi muakumvua Graeme? Udi wamba ne: “Tshivua munange muvua balongi betu bampenda amu to, kadi mvua ne disanka dia bungi bualu mvua mushale ne lulamatu kudi Yehowa ne muakuile bulelela.” c

14. Mbumue bualu kayi butudi mua kuenza bua kushala ne lulamatu lukole kudi Yehowa?

¹⁴ Tuetu banange Yehowa bikole, netushale bamulamate ne muoyo mujima anu bu Danyele. Tuetu tulonga ngikadilu ya Yehowa, netumunange bikole. Tudi mua kuyilongela ku bintu bidiye mufuke. Wewe musue kunanga Yehowa bikole ne kumunemeka, udi mua kubala biena-bualu bîpi bidi mu tshitupa tshia “Mbidienzekele anyi mbifuka?” tshidi mu jw.org anyi kutangila filme idimu. Udi kabidi mua kubala broshire wa La vie a-t-elle été créée ne wa Cinq questions à se poser sur l’origine de la vie. Esther, nsonga wa mu Danemark, udi wamba bua broshire eyi ne: “Malu adimu mmamba mu mushindu muimpe. Broshire ayi kayena yambila muntu malu a kuitaba to. Idi yamba anu malu patupu bua wewe udisunguile tshia kuitaba.” Ben utukadi batele udi wamba ne: “Malu adi mu broshire ayi mmakoleshe ditabuja dianyi. Mmajadikile ne: Nzambi ke udi mufuke bintu bionso bidi ne muoyo.” Wewe mulonge malu adimu, pamuapa newitabe tshidi Bible wamba tshia ne: “Wewe, Yehowa Nzambi wetu, udi mukumbane bua kuangata butumbi ne bunême ne bukole, bualu wakafuka bintu bionso.”​—Buakabuluibua 4:11. d

15. Mbualu kayi bukuabu butudi ne bua kuenza bua kudia bulunda bukole ne Yehowa?

¹⁵ Tuetu basue kunanga kabidi Yehowa bikole, mbimpe tulonge malu avua Yezu muenze. Ke tshivua Samira, muanetu wa bakaji nsonga wa mu Allemagne muenze. Udi wamba ne: “Ndi mufike ku dimanya Yehowa bimpe ku diambuluisha dia Yezu.” Patshivuaye muana, uvua ne lutatu lua kumanya bikala Yehowa mua kutunanga. Kadi uvua mumanye muvua  Yezu umvua. Udi wamba kabidi ne: “Mvua munange Yezu bualu uvua mulunda wa bantu ne uvua munange bana.” Pavuaye wenda umanya Yezu bimpe, uvua wenda umanya kabidi Yehowa ne umunanga bikole. Bidi nanku bualu udi wamba ne: “Mvua mufike ku dimanya ku kakese ku kakese ne: Yezu udi widikija Tatuende bimpe menemene; mbafuanangane bikole. Ngakajingulula ne: buvua bumue bua ku malu avua Yehowa mumutumine pa buloba: bua ambuluishe bantu bamanye Yehowa bimpe.” (Yone 14:9) Wewe musue kudia bulunda bukole ne Yehowa, mbimpe udienzeje bua kumanya malu a Yezu. Wewe muamanye, neunange Yehowa bikole ne neushale mumulamate ne muoyo mujima.

16. Bua tshinyi mbimpe tuikale bantu ba lulamatu? (Misambu 18:25; Mika 6:8)

¹⁶ Tuetu balamate bantu bakuabu bikole, netudie nabu bulunda bukole ne nebatulamate pabu. (Luta 1:14-17) Kupita apu, tuetu balamateYehowa netupete ditalala dia mu muoyo. Bidi nanku bualu Yehowa mmulaye bua kuikala ne lulamatu kudi badi bamulamate. (Bala Misambu 18:25; Mika 6:8.) Anji elabi meji: nansha mutudi bu tuntu tukese kumpala kua Mufuki wa bukole buonso, udi utulaya bua kutunanga. Yeye mutunange, kakuakuikala tshintu tshidi mua kutupandulula nende, ni ndutatu, ni mbuluishi, anyi lufu. (Dan. 12:13; Luka 20:37, 38; Lomo 8:38, 39) Nanku mbia mushinga bua tuetu kushala ne lulamatu kudi Yehowa anu bu Danyele.

17-18. Mmalu kayi makuabu a Danyele atudi ne bua kulonga?

¹⁷ Mu tshiena-bualu etshi, tudi bakonkonone ngikadilu ibidi patupu ya Danyele. Kadi kudi malu ende makuabu a bungi atudi mua kulonga. Tshilejilu, Yehowa uvua mumuloteshe bilota bia bungi ne mumuleje bikena kumona. Uvua mumupeshe kabidi bukole bua kumvuija mêyi a buprofete. A bungi a kudiwu akadi makumbane. Makuabu adi ne malu a bungi alenga yonso wa kutudi kumpala eku.

¹⁸ Mu tshiena-bualu tshialonda, netukonkonone mêyi abidi a buprofete avua Danyele mufunde. Kumanya diumvuija diawu nekutuambuluishe bonso, bana ne bakole, bua kuangata mapangadika mimpe. Nekutuambuluishe kabidi bua kukolesha dikima dietu ne lulamatu luetu, bua tumone mua kutuilangana ne ntatu idi mituindile kumpala eku.