TSHIENA-BUALU TSHIA KULONGA 31
MUSAMBU WA 12 Yehowa nNzambi Munene
Tshidi Yehowa muenze bua kusungila bena mpekatu
“Bualu Nzambi uvua munange ba pa buloba bikole menemene, kufikaye ne ku difila Muanende mulela umuepele.”—YONE 3:16.
LUNGENYI LUNENE
Tshivua Yehowa muenze bua tupete mushindu wa kuluisha mpekatu ne wa kupeta muoyo wa tshiendelele, katuyi kabidi bantu bena mpekatu to.
1-2. a) Mpekatu udi umvuija tshinyi? Mmunyi mutudi mua kumuluisha? (Tangila kabidi “Diumvuija.”) b) Ntshinyi tshituamona mu tshiena-bualu etshi ne mu biena-bualu bikuabu bidi mu Tshibumba tshia Nsentedi etshi? (Tangila kabidi “Dimanyisha kudi babadi” mu Tshibumba tshia Nsentedi etshi.)
UDI musue kumanya mudi Yehowa Nzambi mukunange bikole anyi? Kulonga malu adi Yehowa muenze bua kukusungila ku mpekatu ne ku lufu ke mushindu muimpe udi mua kukupetesha diandamuna dia lukonko elu. Mpekatu a mmuluishi mubi menemene uudi kuyi mua kuditshimuina nkayebe to. Tuetu bonso tutu tuenza mpekatu matuku onso aa, ne tutu tufua bualu tudi bena mibi. (Lomo 5:12) Kadi lumu luimpe ludi ne: Yehowa udi utuambuluisha bua kutshimuna mpekatu. Ki mbualu bua kuelesha mpata to!
2 Kukadi bidimu bitue ku 6 000 bidi Yehowa wambuluisha bantu bua kuluisha mpekatu. Bua tshinyi? Bualu mmutunange. Mmunange bantu katshia wabafuka, ke bualu kayi mmuenze malu a bungi adi atuambuluisha bua kuluisha mpekatu. Nzambi mmumanye ne: mpekatu udi ulela lufu. Nunku ki mmusue bua tufue to. Mmusue bua tushale ne muoyo kashidi. (Lomo 6:23) Ke tshidiye musue buebe wewe atshi. Mu tshiena-bualu etshi, netuakule bua malu asatu aa: 1) Muvua Yehowa mupeshe bena mpekatu ditekemena. 2) Tshivua bantu bena mpekatu ba tshikondo tshia kale benze bua Nzambi kubanyishaye. 3) Mudi Yezu musungile bena mpekatu.
MUVUA YEHOWA MUPESHE BENA MPEKATU DITEKEMENA
3. Mmunyi muvua baledi betu ba kumpala bafike ku dilua bena mpekatu?
3 Pavua Yehowa mufuke muntu mulume ne muntu mukaji ba kumpala, uvua musue bua bikale ne disanka. Wakabapesha muaba mulenga wa kusombela, kubabuejaye mu dibaka ne kubapeshaye mudimu muimpe. Uvua mudimu wa kuwuja buloba ne ndelanganyi yabu ne kubuvuija buonso mparadizu anu muvua budimi bua Edene abu. Wakabelela mukenji umue mupepele. Wakabadimuija ne: bobu bawushipe, bamutumbokele ku bukole, mpekatu wabu uvua ubalelela lufu. Tudi bamanye tshiakenzeka. Muanjelu mubi uvua kayi munange Nzambi anyi kayi mubanange pabu, wakabasaka bua kubenga kutumikila Nzambi. Adama ne Eva bakakuluka mu buteyi buende abu. Bakapanga kueyemena Tatu wabu uvua mubanange, kuenzabu mpekatu. Tshivua Yehowa muambe tshiakabenzekela. Katshia anu ku dituku adi, bakatuadija kukulakaja ne ndekelu wa bionso kufuabu.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Bua tshinyi Yehowa mmukine mpekatu? Bua tshinyi udi utuambuluisha tuetu ndelanganyi ya Adama bua kuluisha mpekatu? (Lomo 8:20, 21)
4 Yehowa wakafundisha malu au mu Bible bua tumanye bualu kampanda bua mushinga. Adi atuambuluisha bua kumanya tshidiye mukinyine mpekatu bikole menemene. Mpekatu udi ututapulula ne Tatu wetu, utulelela ne lufu. (Yesh. 59:2) Ke bualu kayi Satana, muanjelu mubi, udi mukebeshe bionso ebi mmunange mpekatu ne udi usaka bantu bua kuyenza. Nunku pavua Adama ne Eva benze mpekatu, pamuapa uvua muele meji ne: mmutshimune. Kadi kavua mumanye ne: Yehowa mmutunange to. Nzambi kakashintulula tshivuaye mulongoluele ndelanganayi ya Adama ne Eva to. Uvua munange bantu, ke bualu kayi kakajanguluka bua kubapesha ditekemena to. (Bala Lomo 8:20, 21.) Yehowa uvua mumanye ne: imue ya ku ndelanganyi yabu ivua ne bua kumunanga ne kumulomba diambuluisha bua kutshimuna mpekatu. Bu mudiye Tatu wabu ne Mufuki wabu, uvua ne bua kubapetesha mushindu wa kupikudibua ku mpekatu ne kusemena pabuipi nende. Ntshinyi tshivua Yehowa mua kuenza bua bionso abi kukumbanabi?
5. Ndîba kayi divua Yehowa mupeshe bantu bena mpekatu ditekemena bua musangu wa kumpala? Umvuija. (Genese 3:15)
5 Bala Genese 3:15. Yehowa wakapesha bantu ditekemena bua musangu wa kumpala pavuaye muambe ne: uvua ne bua kubutula Satana. Nzambi uvua mulaye ne: “Muana” kampanda uvua ne bua kulua kupandisha bukua bantu. Ndekelu wa bionso, muana au uvua ne bua kuzaza Satana ne kujikija malu mabi onso avuaye mukebeshe mu budimi bua Edene. (1 Yone 3:8) Kadi Satana uvua ne bua kuanji kukengesha muana au, tuambe ne: umutapa, umufikisha ku difua. Bivua ne bua kusama Yehowa ku muoyo bikole menemene. Kadi Yehowa uvua ne bua kuitaba bua bimusame nanku bualu ke mushindu uvuaye upikula bantu ku mpekatu ne ku lufu.
TSHIVUA BANTU BENA MPEKATU BA TSHIKONDO TSHIA KALE BENZE BUA NZAMBI KUBANYISHAYE
6. Ntshinyi tshivua bantu bavua ne ditabuja bu mudi Abele ne Noa, benze bua kusemena pabuipi ne Yehowa?
6 Mu bidimu nkama biakalonda, Yehowa wakaleja ku kakese ku kakese tshivua bena mibi ne bua kuenza bua kusemena pabuipi nende. Abele, muana muibidi wa Adama ne Eva ke muntu wa kumpala wakitabuja Yehowa panyima pa buntomboji bua mu budimi bua Edene. Wakalambula Yehowa mulambu bualu uvua mumunange, musue kumusankisha ne musue kusemena pabuipi nende. Bu muvuaye mulami wa mikoko, wakangata bamue ba ku bana ba mikoko, kubashipa, kubalambula Yehowa. Ntshinyi tshiakenza Yehowa? “Wakanyisha Abele ne mulambu wende.” (Gen. 4:4) Yehowa wakanyisha kabidi milambu ya muomumue ivua bantu bende bavua bamunange ne bamueyemene bamulambule. Mu bantu abu mudi Noa. (Gen. 8:20, 21) Pavua Yehowa muitabe milambu ayi, bidi bileja ne: uvua wanyisha bantu bena mpekatu ne bobu pabu bavua mua kusemena pabuipi nende. b
7. Pavua Abalahama muitabe bua kulambula muanende, bidi bitulongesha tshinyi?
7 Abalahama uvua muntu wa ditabuja dia dikema. Yehowa wakamulomba bua kumulambula muanende Izaka. Kabivua bipepele bua kuenzaye nanku to. Bushuwa, buvua bualu buvua mua kumukebela kanyinganyinga kakole. Nansha nanku, wakenza tshivua Yehowa mumulombe. Kadi pakavuaye anu ukeba kushipa Izaka, Nzambi wakamukandika. Bualu bua Abalahama ebu butshidi bulongesha bantu bonso badi ne ditabuja bualu bua mushinga mukole. Yehowa uvua ne dijinga dia kufila Muanende munanga bu mulambu. Mmunange bantu bikole menemene.—Gen. 22:1-18.
8. Milambu ya bungi ivuabu bambile bena Isalele bua kufila ivua ileja tshinyi? (Lewitiki 4:27-29; 17:11)
8 Bidimu nkama pashishe, Yehowa wakelela bena Isalele mukenji wa kumulambula nyama bua kubabuikidila mibi yabu. (Bala Lewitiki 4:27-29; 17:11.) Milambu ayi ivua ileja mulambu munene uvua mua kulua kujimija mibi ya bantu bua kashidi. Baprofete ba Nzambi bakumvuija ku bukole bua nyuma ne: bavua ne bua kukengesha muana mulaya ne kumushipa. Ke Muana wa pa buende wa Nzambi. Bavua ne bua kumushipa, kumulambula bu mukoko. (Yesh. 53:1-12) Anji elabi meji, Yehowa witaba bua kufila Muanende umuepele munanga bu mulambu bua kusungila bukua bantu, ne wewe pebe, ku mpekatu ne ku lufu!
MUVUA YEZU MUSUNGILE BENA MPEKATU
9. Ntshinyi tshivua Yone Mubatiji muambe bua Yezu? (Ebelu 9:22; 10:1-4, 12)
9 Mu 29, Yone Mubatiji wakamona Yezu, kuambilaye bantu ne: “Monayi, Muana wa mukoko wa Nzambi udi umbusha mpekatu wa ba pa buloba!” (Yone 1:29) Mêyi mamba ku bukole bua nyuma aa akajadika muvua Yezu muana uvua Nzambi mulaye. Yeye ke uvua ne bua kufila muoyo wende bu mulambu bua kutshimuina mpindieu bantu mpekatu ne lufu bua kashidi.—Bala Ebelu 9:22; 10:1-4, 12.
10. Mmunyi muvua Yezu muleje ne: uvua mulue bua “kubikila” benji ba mpekatu?
10 Yezu uvua wambuluisha nangananga bantu bavua bumvua bibi bua mpekatu yabu, ubalomba bua balue bayidi bende. Mpekatu ke uvua mufikishe bantu ku dikenga. Ke bualu kayi uvua wambuluisha nangananga bantu bavua batata bua mpekatu ivuabu benze. Wakafila tshilejilu, wamba ne: “Bantu badi ne makanda a mubidi kabatu dijinga ne munganga to, kadi badi basama ke batu nende dijinga.” Wakamba kabidi ne: “Tshivua mulue bua kubikila bantu bakane, kadi mbua kubikila benji ba mpekatu.” (Mat. 9:12, 13) Wakakumbaja mêyi ende aa. Pavua mukaji kampanda mulue kubolesha makasa ende ne binsonji, wakayukila nende ne dîyi dimpe, kumubuikidilaye mpekatu yende. (Luka 7:37-50) Wakalongesha mukaji muena Samalea uvua ku tshina tshia mâyi malongesha a mushinga mukole, nansha muvuaye mumanye ne: uvua mukaji mudisombele. (Yone 4:7, 17-19, 25, 26) Nzambi wakapesha Yezu bukole bua kutshimuna lufu. Tshilejilu, wakabisha bantu balume ne bantu bakaji, bana ne bakole ku lufu.—Mat. 11:5.
11. Bua tshinyi benji ba mpekatu bavua banange Yezu?
11 Kabiena bitukemesha bua muvuabu banange Yezu kudi benji ba mpekatu to. Uvua ubumvuila luse ne uditeka pa muaba wabu. Bavua basue anu kuikala padi Yezu. (Luka 15:1, 2) Yezu uvua wela bantu ba mushindu eu kalumbandi ne ubenzela malu mimpe bua muvuabu bamuitabuja. (Luka 19:1-10) Yezu uvua umvuila bantu luse anu bu Tatuende. (Yone 14:9) Wakaleja ku mêyi ne ku bienzedi mudi Tatuende ne luse, munange bantu ne musue kubambuluisha bua kutshimuna mpekatu. Yezu wakambuluisha bantu bena mpekatu bua kushintulula bienzedi biabu ne kumulonda.—Luka 5:27, 28.
12. Ntshinyi tshivua Yezu mulongeshe bua lufu luende?
12 Yezu uvua mumanye tshivua tshimuindile. Wakambila bayidi bende ne: bavua ne bua kumutungila ne kumushipa pa mutshi. Kavua mubambile nanku musangu umue au to. (Mat. 17:22; 20:18, 19) Uvua mumanye ne: mulambu wende uvua ne bua kupikula bantu ku mpekatu anu mukavua Yone ne baprofete bambe. Yezu wakalongesha kabidi ne: panyima pa lufu luende, uvua ne bua ‘kukoka bantu ba mishindu yonso kudiye.’ (Yone 12:32) Bantu bena mibi bavua mua kusankisha Nzambi bobu bitabuja Yezu bu Mukalenge wabu ne bamutumikila. Pavuabu benza nanku, bavua mpindieu ‘bapikudibua ku mpekatu.’ (Lomo 6:14, 18, 22; Yone 8:32) Dikima divua nadi Yezu diakamusaka bua kuitaba bua kufua lufu lubi bua kusungila bantu.—Yone 10:17, 18.
13. Yezu wakafua mushindu kayi? Lufu luende ludi lutulongesha tshinyi bua Yehowa Nzambi? (Tangila kabidi tshimfuanyi.)
13 Bakatungila Yezu, bobu kumukuata, kumupendabu, kumushiminyina malu, kumukoselabu tshibawu tshia lufu, ne kumukengeshabu bikole. Basalayi bakaya nende muaba wa kumushipela, bobu kumupopela ku mutshi. Pavua Yezu ukenga apu, nansha muvuaye ne lulamatu, biakasama Yehowa ku muoyo bibi menemene. Nansha muvua Yehowa ne bukole bua kupatula Muanende mu dikenga adi, kakenza nanku to. Bua tshinyi? Bualu uvua munange bantu. Yezu wakamba ne: “Nzambi uvua munange ba pa buloba bikole menemene, kufikaye ne ku difila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.”—Yone 3:16.
Pavua Yehowa mulekele bashipa Muanende, biakamusama ku muoyo bikole menemene; kadi uvua mulekele nanku bua kutupikula ku mpekatu ne ku lufu. (Tangila tshikoso 13)
14. Mulambu wa Yezu udi ukulongesha tshinyi?
14 Mulambu wa Yezu ntshijadiki tshinene tshidi tshileja mudi Yehowa munange ndelanganyi ya Adama ne Eva. Udi ujadika ne: Yehowa mmukunange wewe bikole. Wakenza muende muonso, kuitabaye bua kudikengesha mu mushindu utudi katuyi mua kudifuanyikijila anu bua ne: akusungile wewe ku mpekatu ne ku lufu. (1 Yone 4:9, 10) Mmusue kuambuluisha yonso wa kutudi bua kuluisha mpekatu ne kumutshimuna!
15. Bua mulambu wa Yezu wa tshia kupikulangana natshi udi Nzambi mufile kutuambuluisha, ntshinyi tshitudi ne bua kuenza?
15 Nzambi udi utubuikidila mibi yetu ku diambuluisha dia mulambu wa tshia kupikulangana natshi wa Muanende mulela umuepele. Kadi bua yeye kutubuikidila, tudi ne bua kuenza bualu kampanda. Mbualu kayi abu? Bakabuleja kudi Yone Mubatiji ne Yezu pakambabu ne: “Nyingalalayi bua mpekatu yenu, bualu Bukalenge bua mu diulu mbusemene pabuipi.” (Mat. 3:1, 2; 4:17) Bu mutudi bena mibi, tudi ne bua kunyingalala bua mpekatu yetu bua tutungunuke ne kuenzela Yehowa mudimu ne kusemena pabuipi nende. Kunyingalala bua mpekatu kudi kumvuija tshinyi? Mmunyi mudiku kutuambuluisha bua kusankisha Yehowa nansha mutudi bena mibi? Netuandamune nkonko eyi mu tshiena-bualu tshialonda.
MUSAMBU WA 18 Dianyisha bua tshia kutupikula natshi
a DIUMVUIJA: Muaku “mpekatu” udi mu Bible udi mua kumvuija malu mabi, dipanga kuenza malu bilondeshile mikenji ya Yehowa. Udi mua kumvuija kabidi dipanga bupuangane ditudi bapiane kudi Adama. Mpekatu utudi bapiane kudi Adama au ke udi utulelela tuetu bonso lufu.
