Mupostolo Paulo wakafundila bena Kristo ba mu Tesalonike, wamba ne: “Bikala muntu kayi utumikila dîyi dietu didi mu mukanda eu, numutue tshimanyinu.” (2 Tes. 3:14) Kumpala tuvua tuamba ne: mvese eu uvua ulomba bakulu bua kutua muntu tshimanyinu. Pavua muntu kayi utumikila mêyi manene a mu Bible pabi bakulu bamupeshe mibelu njila ne njila, bavua benza muyuki wa didimuija nawu tshisumbu. Pashishe bamanyishi bakuabu kabavua mua kusomba kabidi nende to.

Kadi bidi bikengela kushintulula malu. Bidi bimueneka ne: mubelu wa Paulo udi utangila tshidi muena Kristo yonso ne bua kuenza mu imue nsombelu. Nunku kakuena bualu bua bakulu kuenza muyuki wa didimuija nawu tshisumbu to. Bua tshinyi malu mmashintuluke? Tumonayi tshivua Paulo wakuila pavuaye mufile mubelu au.

Paulo wakamba ne: bamue bantu ba mu tshisumbu tshia Tesalonike kabavua “benda mu bulongame” to. Bavua babenga kutumikila mubelu uvuabu babapeshe ku bukole bua nyuma. Musangu wa kumpala uvua Paulo mubakumbule, wakabambila ne: “Bikala muntu kayi musue kuenza mudimu, nansha kudia, kadi to.” Kadi nansha muvua bamue ne mushindu wa kuenza mudimu bua kudiambuluisha, bavua babenga kuwenza. Bavua kabidi babuelakana mu malu avua kaayi abatangila. Mmunyi muvua bena Kristo bakuabu ne bua kubamona?—2 Tes. 3:​6, 10-12.

Paulo wakamba ne: “Numutue tshimanyinu.” Muaku wa mu tshiena Greke udibu bakudimune ne: “Numutue tshimanyinu,” udi ne lungenyi lua kutandula muntu ne kumudimukila. Paulo uvua mupeshe tshisumbu tshijima mubelu au, kavua muwupeshe anu bakulu to. (2 Tes. 1:1; 3:6) Nunku pavua muena Kristo umona muena Kristo nende mukuabu kayi utumikila mubelu mufundisha ku bukole bua nyuma, yeye ke uvua mua kupangadija bua ‘kulekela kusomba ne’ muntu uvua kayi wenda mu bulongame au.

Bualu ebu budi bumvuija ne: bavua bamumona bu muntu mumbushibue mu tshisumbu anyi? Tòo, bualu Paulo wakamba kabidi ne: “Tungunukayi ne kumubela bu muanenu.” Nunku bena Kristo bavua anu mua kubuela nende mu bisangilu ne kuyisha nende, kadi bavua mua kusungula bua kubenga kusomba nende, bapita kapepe. Bua tshinyi? Paulo udi wakamba ne: “Bua afuishibue bundu.” Dîba adi, uvua mua kumvua bundu bua bivuaye wenza, yeye kushintuluka.—2 Tes. 3:​14, 15.

Mmushindu kayi udi bena Kristo mua kutumikila mubelu au lelu? Tshia kumpala, mbimpe tuikale batuishibue ne: malu adi muntu wenza adi aleja mudiye ‘mupange bulongame’ anu muvua Paulo muleje. Paulo kavua wakula bua bantu badi bashilangane netu ku malu adibu basue anyi basungula bua kuenza bilondeshile kondo kabu ka muoyo to. Kavua nansha wakula bua bantu bavua batunyingalaje to. Kadi uvua wakula bua bantu bavua babenga kutumikila mibelu ya Nzambi ku bukole.

Lelu, tuetu bamone ne: muena Kristo kena anu utumikila mibelu ya Nzambi, a tuetu ke badi mua kuangata dipangadika dia kubenga kusomba nende imue misangu anyi dia kubenga kupita nende kapepe. Bu mudibi ne: ndipangadika dia muntu nkayende, tudi mua kuakula bualu bua muntu au anu ne ba mu dîku dietu, katubuakudi ne bantu bakuabu to. Tudi mua kubuela nende mu bisangilu ne kuyisha nende. Yeye mushintuluke, tudi mua kutuadija kusomba kabidi nende.