1-2. Bua tshinyi mbimpe tuetu kulonga bualu bua Shimishona?

 PATUBU batela Shimishona ntshinyi tshitu tshikuluila mu mutu? Pamuapa udi wela meji a muvuaye ne bukole bua bungi. Bidi nanku. Kadi Shimishona wakenza tshilema tshiakamukebela lutatu lukole. Nansha nanku, Yehowa wakimanyina pa malu mimpe avuaye muenze. Mmufundishe bualu buende mu Bible bua butulongeshe.

² Yehowa wakatuma Shimishona bua kuenzela bantu bende bena Isalele malu a kukema bua kubambuluisha. Bidimu bia bungi Shimishona mumane kufua, mupostolo Paulo wakafunda dîna diende ku bukole bua nyuma mu mêna a bantu bavua ne ditabuja dikole. (Eb. 11:32-34) Tshilejilu tshia Shimishona tshidi mua kutukankamija. Wakeyemena Yehowa nansha pavuaye mu ntatu mikole. Mu tshiena-bualu etshi, netumone tshidi tshilejilu tshiende tshitulongesha ne muditshi mua kutukankamija.

3. Mmudimu kayi uvua Nzambi mupeshe Shimishona?

³ Pavuabu balele Shimishona, bena Peleshete bavua bakuate bena Isalele ku bupika. (Bal. 13:1) Nkokeshilu wabu wa tshikisu uvua mukebele bena Isalele ntatu ya bungi. Yehowa wakasungula Shimishona bua ikale “kumpala mu dipandisha Isalele mu tshianza tshia bena Peleshete.” (Bal. 13:5) Tshivua mudimu mukole! Kadi bua Shimishona kuwukumbaja, bivua bikengela eyemene Yehowa.

4. Ntshinyi tshivua Yehowa muenze bua mionji ivua bena Peleshete basuike Shimishona ikopoke? (Balumbuluishi 15:14-16)

 ⁴ Tukonkononayi tshilejilu tshia muvua Shimishona mueyemene Yehowa ne muvua Yehowa mumuambuluishe. Basalayi bena Peleshete bavua balue bua kukuata Shimishona umue musangu ku Lehi, uvua pamuapa mu Yudaya. Bu muvua bena Yuda ne buôwa, bakafila Shimishona mu tshianza tshia bena lukuna babu. Bena Isalele nkayabu bakamusuika bimpe menemene ne mionji ibidi mipiamipia kumufilabu kudi bena Peleshete. (Bal. 15:9-13) Kadi “nyuma wa Yehowa wakamupesha bukole,” mionji ivuabu bamusuike kukutulukayi. Pashishe yeye “kupeta mufuba mubishi wa ku lubanga lua mpunda mulume,” kuwambulaye, kushipaye nawu bena Peleshete 1 000!—Bala Balumbuluishi 15:14-16.

5. Ntshinyi tshiakenza Shimishona bua kuleja ne: uvua mueyemene Yehowa?

⁵ Bua tshinyi Shimishona uvua mubashipe ne mufuba wa ku lubanga lua mpunda mulume? Tshivua tshintu tshivua bantu kabayi mua kuluangana natshi to. Kakuyi mpata, Shimishona uvua mumanye ne: Yehowa uvua mua kuenza bua abashipe nansha yeye ne tshia mvita tshia mushindu kayi. Muntu wa lulamatu eu wakakumbaja disua dia Yehowa anu ne mufuba au. Shimishona wakashipa bantu bonso abu bualu uvua mueyemene Yehowa.

6. Ndimue dilongesha kayi didi bualu bua Shimishona butupetesha?

⁶ Yehowa udi mua kutupesha bukole bua kukumbaja midimu idiye mutupeshe, too ne idi imueneka mitupite bukole. Udi mua kutuambuluisha mu mushindu wa dikema. Kumanya ne: Yehowa ke uvua mupeshe Shimishona bukole nekutuambuluishe bua kuenza disua diende tuetu bashale anu bamueyemene.—Nsu. 16:3.

7. Leja mudibi ne mushinga bua kukeba buludiki bua Yehowa.

⁷ Bena Kristo netu ba bungi badi mu midimu ya luibaku lelu mbaleje mudibu beyemene Yehowa. Ku kale, bana betu bavua benza plan ya Nzubu ya Bukalenge ya bungi ne  ya nzubu yetu mikuabu, pashishe bayibaka. Kadi bu muvua bungi bua bantu bavua babatijibua buenda anu buvula, bulongolodi buetu buakamona ne: bivua bikengela kuakaja malu. Bana betu bavua balombola mudimu bakalomba Yehowa buludiki, kutetabu mishindu mikuabu bu mudi kusumba Nzubu mimana kuibaka bua kuyakajilula. Robert udi muenze midimu yetu ya bungi ya luibaku pa buloba bujima mu bidimu bidi panshi ebi udi wamba ne: “Kumpala, bivua bikolele ba bungi ba kutudi bua kuenza mudimu mu mushindu mupiamupia eu. Uvua mushilangane bikole ne mutuvua tuwenza konso eku. Kadi bana betu bavua badiakaje bua kuibidilangana nawu, kumuenekabi ne: Yehowa udi wenda ubenesha malu atudi bashintulule aa.” Etshi ntshilejilu tshimue patupu tshia mudi Yehowa ulombola bantu bende bua kukumbaja disua diende. Mbimpe yonso wa kutudi ikale udiebeja ne: ‘Ntuku nkeba buludiki bua Yehowa ne mudiakaje bua kuakaja malu bua kumuenzela mudimu mudibi bikengela anyi?’

8. Ntshinyi tshiakenza Shimishona umue musangu uvuaye mumvua nyota mikole?

⁸ Pamuapa udi mubale malu makuabu a dikema avua Shimishona muenze. Tshilejilu, wakashipa ntambue, kuluaye kushipa bena Peleshete 30 mu Ashekelona. (Bal. 14:5, 6, 19) Shimishona uvua mumanye ne: kavua mua kudienzela malu au bu Yehowa kayi mumuambuluishe to. Ke tshiakenzeka umue musangu pavuaye mumvue nyota mikole, yeye mumane kushipa bena Peleshete 1 000. Tshiakenzaye ntshinyi? Kakadikebela mâyi a kunua to, kadi wakaalomba Yehowa.—Bal. 15:18.

9. Ntshinyi tshiakenza Yehowa pavua Shimishona musambile? (Balumbuluishi 15:19 ne dimanyisha)

⁹ Yehowa wakandamuna disambila dia Shimishona, kuenzaye tshishima, mâyi kupatukawu. Pakaanuaye, “bukole buende buakapingana yeye kusanguluka.” (Bala Balumbuluishi 15:19 ne dimanyisha.) Bidi bimueneka ne: musulu wa mâyi au wakashala bidimu bia bungi, too ne dîba diakafunda muprofete Samuele mukanda wa Balumbuluishi ku bukole bua nyuma muimpe. Pavua bena Isalele bamone musulu wa mâyi au, bavua mua kuikala bapete dilongesha dia ne: bobu beyemene Yehowa, neabambuluishe mu bikondo bia ntatu.

10. Mmalu kayi atudi ne bua kuenza bua Yehowa kutuambuluisha? (Tangila kabidi tshimfuanyi.)

¹⁰ Mbimpe tuetu petu tueyemene Yehowa katuyi tutangila mamanya etu anyi malu atukadi bakumbaje mu mudimu wende to. Tudi ne bua kudipuekesha ne kuitaba ne: tudi mua kuenza tshionso tshidi Yehowa utulomba anu tuetu bamueyemene. Anu bu muvua Shimishona mupetulule bukole pavuaye munue mâyi avua Yehowa mumupatuile, netushale petu ne lulamatu kudi Yehowa anu tuetu bitabe diambuluisha diende.—Mat. 11:28.

11. Mmunyi mutudi mua kueyemena Yehowa bua atuambuluishe? Fila tshilejilu.

¹¹ Tuakulayi bua Aleksey, muanetu wa mu Russie udibu bakengesha bikole menemene. Mmushale anu ne lulamatu bua tshinyi? Yeye ne mukajende bavua badilongela Bible pa tshibidilu ne batendelela Yehowa. Aleksey udi wamba ne: “Ndi ndienzeja bua kudilongela pa tshibidilu ne kubala Bible dituku dionso. Meme ne mukajanyi tutu tukonkonona mvese wa ku dituku ne tusambila pamue mu dinda dionso.” Bualu ebu budi butulongesha ne: mbimpe tueyemene Yehowa pamutu pa kudieyemena. Tudi tumueyemena patudi tuenza  malu adi akolesha ditabuja dietu pa tshibidilu bu mudi kudilongela Bible, kusambila, kubuela mu bisangilu, ne kuyisha. Dîba adi, Yehowa neatupeshe bukole bua tutungunuke ne kumuenzela mudimu. Wakabupesha Shimishona, neatupeshabu petu.

12. Bua tshinyi Shimishona uvua muenze tshilema pavuaye mubanjije Delila?

¹² Kuvua misangu ivua Shimishona muenze bilema bualu uvua mupange bupuangane anu bu tuetu. Tshimue tshia kudibi tshiakamukebela ntatu ya bungi. Yeye mumane kuenza mudimu bu mulumbuluishi mu Isalele munkatshi mua bidimu ndambu, “wakalua kunanga mukaji kampanda wa mu Tshibandabanda tshia Soleka,” dîna diende divua Delila. (Bal. 16:4) Kumpala, Shimishona wakasela mukaji muena Peleshete, kadi ‘bualu abu buvua bufumina kudi Yehowa uvua ukeba pa kubuelela bua kuluisha bena Peleshete.’ Pashishe wakatudila kua mukaji wa ndumba mu tshimenga tshia bena Peleshete tshia Gaza. Musangu au, Nzambi wakepesha Shimishona bukole bua kutula biibi bia tshimenga atshi, kushalatshi katshiyi mu bukubi to. (Bal. 14:1-4; 16:1-3) Kadi Nzambi kavua mumuambile bua kunanga Delila uvua pamuapa muena Isalele to, bualu dimunanga kadivua mua kumupetesha mpunga wa kuluisha bena Peleshete to.

13. Delila wakenzela Shimishona tshinyi?

¹³ Delila wakangata makuta a bungi avua bena Peleshete bamupeshe bua kutungila Shimishona tshitungu. Pamuapa bu muvua Shimishona mumunange bikole, kavua mujingulule menemene tshivuaye ujinga kumuenzela to. Nansha biobi nanku anyi kabiyi nanku, Delila wakatungunuka ne kuela Shimishona mutoyi bua amuambile anu kuvua bukole  buende bufumina. Ndekelu wa bionso, Shimishona wakamuambila. Bia dibungama, Shimishona wakadikebela lutatu luakamufikisha ku dijimija bukole ne dianyishibua kudi Yehowa bua tshikondo kampanda.—Bal. 16:16-20.

14. Nntatu kayi yakapeta Shimishona bua muvuaye mueyemene Delila?

¹⁴ Shimishona wakakenga bikole bua muvuaye mueyemene Delila pamutu pa kueyemena Yehowa. Bena Peleshete bakamukuata, kumutonkonabu mêsu. Bakamuela mu buloko mu tshimenga tshia Gaza, tshivuaye mutule biibi biatshi, kumuvuijabu mupedi wa ntete. Pashishe bena Peleshete bakalua nende mu difesto divuabu benza. Bakalambula nzambi wa dishima Dagona mulambu munene, bamba ne: uvua mufile Shimishona mu bianza biabu. Bavua baluamu nende bua kumuseka.—Bal. 16:21-25.

15. Ntshinyi tshivua tshileje ne: Shimishona uvua mulue kueyemena kabidi Yehowa? (Balumbuluishi 16:28-30) (Tangila tshimfuanyi tshia pa tshizubu.)

¹⁵ Nansha muvua Shimishona muenze tshilema tshinene, wakatungunuka anu ne kuenza disua dia Yehowa. Wakakeba mpunga wa kukumbaja disua dia Yehowa dia kuluangana ne bena Peleshete. (Bala Balumbuluishi 16:28-30.) Shimishona wakasengelela Yehowa ne: “Enza bua ndisombuele kudi bena Peleshete.” Nzambi mulelela wakamuteleja, kumupeshilulaye bukole. Musangu eu, Shimishona wakashipa bena Peleshete bungi bupite bua bonso bakavuaye mushipe.

16. Tshilema tshia Shimishona tshidi tshitulongesha tshinyi?

¹⁶ Nansha muvua Shimishona mukenge bua tshilema tshiende, uvua anu udienzeja bua kuenza disua dia Yehowa. Dilongesha didi ne: bobu batubele patoke, anyi batumbushe mu midimu ituvua tuenza mu tshisumbu bua tshilema tshitudi benze, katulekedi kuenza disua dia Yehowa to. Tuvuluke ne: Yehowa utu anu musue kutufuila luse. (Mis. 103:8-10) Nansha tuetu benze bilema, Yehowa udi mua kutupesha bukole bua kuenza disua diende anu bu muvuaye mubupeshe Shimishona.

17-18. Nku tshinyi kudi tshilejilu tshia Michael tshitukankamija? (Tangila kabidi tshimfuanyi.)

¹⁷ Tuakule bua Michael utshidi nsonga. Uvua musadidi wa mudimu ne mpanda-njila wa pa tshibidilu. Bia dibungama, wakenza tshilema, kumumbushabu mu midimu ayi. Udi wamba ne: “Mvua ngenzela Yehowa  mudimu wa bungi too ne dîba diakangumbushabu mu midimu ayi. Kadi diakamue ngakumvua bu ne: kakutshivua tshimvua mua kuenza mu mudimu wa Yehowa to. Tshivuaku muele meji ne: Yehowa uvua mua kundekela to, kadi nkavua ndiebeja ni mvua mua kudia kabidi nende bulunda bu kumpala anyi kupetulula midimu imvua nayi.”

¹⁸ Bia diakalenga, Michael kakateketa mu mikolo to. Udi wamba kabidi ne: “Mvua nsambila bikole, ndilongela, ne ngelengana meji a bimvua ndonga bua kuakaja malanda anyi ne Yehowa.” Pakapita matuku, bakamuteka kabidi mu midimu yende ayi. Lelu udi mukulu ne mpanda-njila wa pa tshibidilu. Udi wamba ne: “Dikankamija ndidi mupete nangananga kudi bakulu diakenza bua mmone ne: Yehowa utshidi munnange. Nkadi mmuenzela kabidi mudimu ne kondo ka muoyo katoke. Bualu buvua bumfikile ebu mbundongeshe ne: Yehowa neafuile muntu yonso udi unyingalala ne muoyo mujima bua mpekatu yende luse.” Tuikale batuishibue ne: tuetu balekele kuenza bilema ne batungunuke ne kueyemena Yehowa, neenze netu mudimu ne neatubeneshe.—Mis. 86:5; Nsu. 28:13.

19. Leja mudi tshilejilu tshia Shimishona tshikukankamije.

¹⁹ Mu tshiena-bualu etshi, tudi bamone anu malu makese a dikema a mu nsombelu wa Shimishona. Uvua muntu mupange bupuangane, kadi uvua udienzeja bua kuenza disua dia Yehowa, nansha panyima pa tshilema tshivuaye muenze tshia kuambila Delila kuvua bukole buende bufumina. Yehowa pende kakamulekela to. Wakalua kabidi kuenza nende malu a dikema. Yehowa uvua anu umumona bu muntu wa ditabuja dikole, ke kufundishaye dîna diende mu mêna a bantu ba ditabuja badi mu Ebelu nshapita wa 11. Bidi bitukankamija bua mutudi tuenzela Tatuetu wa mu diulu mudimu, udi ne dijinga dikole dia kutuambuluisha nangananga patudi mu ntatu. Nanku yonso wa kutudi asengelele pende Yehowa anu bu Shimishona ne: “Mvuluka koku ne mpesha koku bukole.”—Bal. 16:28.