1. Mmudimu kayi uvua Yehowa mupeshe Petelo pakavuaye pa kufua?

 MUPOSTOLO Petelo uvua mushale ne lulamatu kudi Yehowa munkatshi mua bidimu bia bungi. Mu bidimu bionso abi, uvua mufile Yezu mu mudimu wa diyisha. Yeye ke wa kumpala wakatuadija kuyisha bantu ba bisamba bikuabu, ne wakalua wa mu kasumbu kaludiki. Pakavuaye pa kufua, Yehowa wakamupesha mudimu mukuabu munene wa kufunda 1 Petelo ne 2 Petelo, bu mu 62-64 P.Y. Uvua mutekemene ne: mikanda ayi ivua mua kulongesha bena Kristo nende panyima pa lufu luende.—2 Pet. 1:12-15.

2. Bua tshinyi mikanda ya Petelo idi ne mushinga wa bungi?

² Petelo uvua mufunde mikanda ayi mu tshikondo tshivua bena Kristo nende batuilangana ne “mateta mashilashilangane.” (1 Pet. 1:6) Batontolodi bavua bajinga kubueja malongesha a dishima ne bikadilu bibi mu tshisumbu. (2 Pet. 2:1, 2, 14) “Nshikidilu wa malu onso” ukavua pa kukuata bena Kristo bavua mu Yelushalema, tuambe ne: biluilu bia bena Lomo bikavua pa kubutula tshimenga atshi ne ndongoluelu wa malu wa bena Yuda uvuamu. (1 Pet. 4:7) Kakuyi mpata, mikanda ya Petelo ayi ivua miambuluishe bena Kristo bua bananukile mu ntatu ne bua badilongolole ku itshivua mibindile. b

3. Bua tshinyi mbimpe tukonkonone mikanda ya Petelo?

³ Nansha muvua Petelo mufundile bena Kristo abu mikanda  ayi, Yehowa mmuyele mu Dîyi diende. Idi itulongesha petu lelu. (Lomo 15:4) Anu bu bena Kristo abu, tudi banyunguluka kudi bantu badi ne bikadilu bibi bidi mua kutupangisha bua kuenzela Yehowa mudimu. Kupita apu, tukadi pa kutuilangana ne dikenga didi dinene kupita nshikidilu wa ndongoluelu wa malu wa bena Yuda. Mikanda ya Petelo idi ne malongesha a mushinga. Idi ituambuluisha bua tutungunuke ne kuindila dituku dia Yehowa, tulekele kutshina bantu, ne tunangangane bikole. Idi kabidi ileja bakulu mua kuambuluisha bena Kristo nabu bua bashale bakole mu ditabuja.

4. Bilondeshile 2 Petelo 3:3, 4, ntshinyi tshidi tshifuane kutekesha ditabuja dietu?

⁴ Lelu, bantu ba bungi kabatu bitabuja tshidi Bible wamba bua matuku atshilualua to. Baluishi betu badi mua kutuseka bualu kukadi bidimu bia bungi bitudi bambe ne: nshikidilu ukadi pa kulua. Kudi badi bamba ne: nshikidilu kakulua to. (Bala 2 Petelo 3:3, 4.) Muntu utudi tuyisha, muena mudimu netu, anyi mulela wetu yeye mutuambile nanku, ditabuja dietu didi mua kuteketa. Petelo mmuleje tshidi mua kudikolesha.

5. Ntshinyi tshidi mua kutuambuluisha bua kushala bindile nshikidilu wa ndongoluelu wa malu eu ne lutulu? (2 Petelo 3:8, 9)

⁵ Bamue bantu badi bela meji ne: Yehowa udi ne lujoko bua kubutula ndongoluelu wa malu eu. Kadi mikanda ya Petelo idi ituvuluija ne: Yehowa kena ubala matuku mutudi tuetu tuabala to. (Bala 2 Petelo 3:8, 9) Kudiye, bidimu tshinunu bidi anu bu dituku dimue. Udi ne lutulu ne ki mmusue bua muntu nansha umue abutudibue to. Kadi pakumbana dituku diende, neabutule ndongoluelu wa malu eu. Nanku tudi ne diakalenga dia kuyisha bantu ba bisamba bionso mu tshikondo tshidi tshitushadile etshi.

6. Mmunyi mutudi mua kulama “dikutu dia Yehowa mu meji bimpe”? (2 Petelo 3:11, 12)

⁶ Petelo udi utulomba bua ‘kulama dituku dia Yehowa mu meji bimpe.’ (Bala 2 Petelo 3:11, 12.) Tudi tudilama nanku patudi tuelangana meji a masanka atuapeta mu bulongolodi bupiabupia. Difuanyikijila weyela kapepe kakayi kanyanga, udia biakudia bidi bidisha mubidi, wakidila bantu baudi mufuishe padibu bababisha ku lufu, ne uleja bantu ba bikondo bia kale mêyi a buprofete a mu Bible akadi makumbane. Dielangana meji dia nanku nedienze bua ushale anu muindile tshikondo atshi, mutuishibue ne: nshikidilu ukadi pabuipi. Bu mutudi “badianjile kuikala ne dimanya” dia matuku atshilualua edi, balongeshi ba dishima ‘kabakutupambuisha to.’—2 Pet. 3:17.

7. Ntshinyi tshidi ditshina dia bantu mua kutuenzela?

⁷ Tudi tuambila bakuabu lumu luimpe bualu tudi balame dituku dia Yehowa mu meji bimpe. Kadi kudi misangu itudi mua kutshina bantu, tupanga kubambilalu. Ke tshiakenzekela Petelo. Butuku buvuabu bakuate Yezu, Petelo wakumvua buôwa bua kudimanyisha ne: uvua muyidi wende, ne wakamuvila misangu isatu. (Mat. 26:69-75) Kadi Petelo wakalua kulekela ditshina dia bantu, kuambaye ne dishindika ne: “Kanutshinyi tshidibu batshina, ne kanupampakanyi to.” (1 Pet. 3:14) Mêyi ende aa adi atuleja ne: tudi mua kulekela kutshina bantu.

8. Mmunyi mutudi mua kulekela kutshina bantu? (1 Petelo 3:15)

⁸ Ntshinyi tshidi mua kutuambuluisha bua tulekela kutshina bantu? Petelo udi wamba  ne: “Nujidile Kristo bu Mukalenge mu mioyo yenu.” (Bala 1 Petelo 3:15.) Mbimpe tuvuluke ne: Yezu Kristo ukadi Mukalenge ne udi ne bukole bua bungi. Ela meji a Mukalenge wetu musangu wonso uudi umvua buôwa bua kuambila muntu lumu luimpe. Mumona mu lungenyi luebe wenda ukokesha mu diulu, munyunguluka kudi banjelu bungi tshianana. Uvuluke ne: udi ne “bukokeshi buonso mu diulu ne pa buloba” ne neikale nebe “matuku onso too ne ku nshikidilu kua ndongoluelu wa malu eu.” (Mat. 28:18-20) Petelo udi utulomba bua tuikale anu badiakaje bua kuakuila ditabuja dietu. Kuenaku mua kuyisha ku mudimu, mu kalasa, nansha muaba mukuabu anyi? Dianjila kuela meji a tshikondo tshiudi mua kuyisha muntu ne ulongolole tshia kumuambila. Lomba Yehowa dikima mutuishibue ne: neakupeshe bukole bua kulekela kutshina bantu.—Bien. 4:29.

9. Mmunyi muakapanga Petelo kunanga bakuabu umue musangu? (Tangila kabidi tshimfuanyi.)

⁹ Petelo wakafika ku dinanga bakuabu. Uvua mumvue Yezu wamba ne: “Ndi nnupesha mukenji mupiamupia ne: nunangangane; anu bu mundi mununange, nuenu penu nunangangane.” (Yone 13:34) Nansha nanku, Petelo wakatshina bantu, kubengaye bua kudia ne bena Kristo nende ba bisamba bikuabu. Mupostolo Paulo wakamuamba ne:  uvua muena lubombo bua tshivuaye muenze atshi. (Gal. 2:11-14) Petelo wakatumikila mubelu uvua Paulo mumupeshe tshikondo atshi. Mmuleje mu mikanda yonso ibidi eyi ne: katuena ne bua kunanga bena Kristo netu anu mu mêyi patupu to, tubanange kabidi mu bienzedi.

10. Mmunyi mutudi mua kufika ku dinanga bana betu kakuyi lubombo? (1 Petelo 1:22)

¹⁰ Petelo mmuambe ne: tudi ne bua kunanga bena Kristo netu “kakuyi lubombo.” (Bala 1 Petelo 1:22.) Netubanange nanku tuetu tutumikila malu onso atudi balonge mu “bulelela.” Mu malu au mudi dilongesha dia ne: “Nzambi kena ne kansungansunga to.” (Bien. 10:34, 35) Tuetu banange anu bamue bena Kristo netu katuyi banange bakuabu, katuena tutumikila mukenji wa Yezu wa kunangangana to. Anu bu Yezu, kudi bena Kristo batudi mua kulamata bikole kupita bakuabu. (Yone 13:23; 20:2) Kadi Petelo udi utukankamija bua tunange bena Kristo netu bualu buonso buabu mbena mu dîku dietu.—1 Pet. 2:17.

11. Kunanga bana betu “bikole ne muoyo umue” kudi kumvuija tshinyi?

¹¹ Petelo mmutulombe bua ‘tunangangane bikole ne muoyo umue.’ Muaba eu, kunangangana “bikole” kudi kumvuija kunanga muntu nansha padibi bikole bua kumunanga. Tshilejilu, muena Kristo netu udi mua kutuenzela tshilema. Meji adi mua kutuluila diakamue nga kumualujila bubi ku bubi pamutu pa kumunanga. Kadi Yezu mmulongeshe Petelo ne: kualujilangana bubi ku bubi kakuena kusankisha Nzambi to. (Yone 18:10, 11) Ke bualu kayi Petelo wakafunda ne: “Kanupingaji bubi ku bubi anyi tshipendu ku tshipendu. Kadi nupingaje dibenesha.” (1 Pet. 3:9) Tuetu banangangane bikole, netuikale bena malu malenga too ne kudi badi batuenzela bilema.

12. a) Kunanga bana betu bikole nekutusake bua kubenzela tshinyi tshikuabu? b) Anu mutudi bamone mu filme wa Lama buobumue buetu bua mushinga mukole, udi pebe mudisuike bua kuenza tshinyi?

¹² Petelo uvua mufunde mu mukanda wa kumpala tshiambilu tshia “nunangangane bikole.” Tuetu banange bana betu nanku, netubabuikidile “mpekatu mipite bungi.” (1 Pet. 4:8) Pamuapa Petelo uvua muvuluke dilongesha dia kufuilangana luse dikavua Yezu mumulongeshe bidimu bia bungi kumpala. Tshikondo atshi, Petelo uvua mua kuikala udimona muntu muimpe pavuaye muambe ne: uvua mua kufuila muanabu luse “too ne ku misangu muanda mutekete.” Kadi Yezu mmutulongeshe bonso nende bua kufuilangana luse “too ne ku misangu 77,” biumvuija ne: kakuena ndekelu ku difuila muntu luse to. (Mat. 18:21, 22) Biobi bikukolele bua kutumikila mubelu au, kuteketshi to. Kudi misangu itubi bikolela batendeledi bonso ba Yehowa bua kufuilangana luse. Tshia mushinga tshiudi mua kuenza nkudienzeja bua kufuila muanenu luse ne kuikala nende mu ditalala. c

13. Bua tshinyi ki mbipepele bua bakulu kukankamija bena Kristo nabu?

¹³ Kakuyi mpata, Petelo kavua mupue tshivua Yezu mumuambile muoyo pakavuaye mubishibue ku lufu to. Yezu uvua mumuambile ne: “Ulame mikoko yanyi mikese.” (Yone 21:16) Biwikala mukulu, udi mumanye ne: bualu abu budi bukutangila pebe. Kadi bidi mua kukolela bakulu bua kupeta dîba dia kuenza mudimu wa mushinga au bualu badi  ne bua kuanji kudiisha bena mu mêku abu, kuenza bua badiumvue banangibue ne bikale mu malanda makole ne Yehowa. Badi kabidi ne bua kuyisha ne tshisumbu, kulongolola midimu ya kuenza mu mpuilu ne mu mpungilu. Bakulu bakuabu badi mu Komite ya diumvuangana ne mpitadi anyi mu luibaku lua LDC. Bushuwa, bakulu badi ne bia bungi bia kuenza!

14. Ntshinyi tshidi mua kusaka bakulu bua kulama mikoko? (1 Petelo 5:1-4)

¹⁴ Petelo mmufundile bakulu nende ne: “Nulame tshisumbu tshia mikoko ya Nzambi.” (Bala 1 Petelo 5:1-4.) Biwikala mukulu, tudi bamanye ne: udi munange bena Kristo nebe ne udi musue kubalama. Kadi kudi misangu iudi mua kumona ne: kuena mua kukumbaja mudimu eu bualu udi ne bia bungi bia dienza anyi bualu udi mutshioke. Tshiudi mua kuenza dîba adi ntshinyi? Ambila Yehowa muudi udiumvua. Petelo wakafunda ne: “Bikala muntu ukuatshilangana mudimu, enze nunku bu udi weyemena bukole budi Nzambi ufila.” (1 Pet. 4:11) Bena Kristo nebe badi mua kuikala batuilangana ne ntatu idi kayiyi mua kujika mu ndongoluelu wa malu eu to. Kadi uvuluke ne: Yezu Kristo “mulami munene wa mikoko” udi mua kubambuluisha bikole kukupita wewe. Udi mua kubambuluisha lelu too ne mu bulongolodi bupiabupia. Tshionso tshidi Yehowa ulomba bakulu ntshia kunanga bena Kristo nabu, kubalama, ne kuikala ‘bilejilu kudi mikoko.’

15. William utu ukankamija mikoko mushindu kayi? (Tangila kabidi tshimfuanyi.)

¹⁵ William, ukadi ne bidimu bia bungi mu mudimu wa bukulu, mmumanye mudi kulama mikoko kuikala ne mushinga. Pakatuadija tshipupu tshia korona, yeye ne bakulu nende bakuabu bavua bayukila ne muntu yonso wa mu tusumbu tuabu tua buambi lumingu luonso. Udi wamba tshivua tshibasaka bua kuenza nanku ne: “Bu muvua bena Kristo netu ba bungi nkayabu kumbelu, bivua bipepele bua kuteketabu mu mikolu.” Patu muena Kristo ukuatshila William ntatu yende, utu umuteleja ne ntema bua kumanya tshidi tshimutatshisha ne tshidiye natshi dijinga. Pashishe utu ukeba mikanda anyi filme ya mu site wetu idi mua kukankamija muena Kristo au. William udi wamba ne: “Mpindieu ke dîba didi bakulu ne bua kuenza makumbula a bulami  kupita ne kumpala. Tutu tudienzeja bikole bua kulongesha bantu malu a Yehowa. Mbimpe tudienzeje kabidi bua kulama tshisumbu tshia mikoko ya Nzambi bua ishale anu mu bulelela.”

16. Leja mutudi mua kutumikila malongesha adi mu mikanda ya Petelo.

¹⁶ Tudi bakule anu bua malongesha makese adi mu mikanda ya Petelo. Pamuapa udi mumone amue malu audi ne bua kuakaja. Tshilejilu, kuenaku mua kuikala welangana meji a masanka atuapeta mu bulongolodi bupiabupia anyi? Udiku mudisuike bua kuyisha ku mudimu, mu kalasa, anyi miaba mikuabu anyi? Udiku ukeba tshia kuenza bua kunanga bena Kristo netu bikole menemene anyi? Nuenu bakulu, nudiku badisuike bua kulama mikoko ya Nzambi ku budisuile ne muoyo mujima anyi? Wewe mudiele nkonko eyi ne meji onso ne mumone miaba iudi mua kuakaja, kuteketshi to. “Mukalenge mmuimpe,” ne neakuambuluishe bua wakaje miaba ayi. (1 Pet. 2:3) Petelo udi utujadikila ne: “Nzambi . . . yeye muine neashikije dilongesha dienu. Neanushindamije, neanukoleshe, neanujalamije panshi bikole.”—1 Pet. 5:10.

17. Ntshinyi tshituapeta tuetu bashale ne lulamatu ne balekele Yehowa utulongesha?

¹⁷ Petelo uvua muanji kudimona kayi mukumbane bua kuikala pamue ne muana wa Nzambi. (Luka 5:8) Kadi wakashala muyidi wa lulamatu wa Kristo bualu Yehowa ne Yezu bavua bamuambuluishe. Ke bualu kayi Nzambi wakamuanyishila bua “kubuela mu Bukalenge bua tshiendelele bua Mukalenge ne Mupandishi wetu Yezu Kristo.” (2 Pet. 1:11) Mmupete difutu dimpe dia dikema! Wewe munanukile pebe anu bu Petelo ne mulekele Yehowa ukulongesha, neupete muoyo wa tshiendelele. “Neufike ku tshipatshila tshia ditabuja diebe, lupandu luebe.”—1 Pet. 1:9.