TSHIENA-BUALU TSHIA KULONGA 39
Paudi ne bupole udi ne bukole
“Mupika wa Mukalenge kena ne bua kuluangana to, kadi udi ne bua kuikala muena bupole kudi bantu bonso.”—2 TIM. 2:24.
MUSAMBU WA 120 Idikija bupole bua Kristo
KADIOSHA a
1. Nnkonko kayi idibu mua kutuela mu kalasa anyi ku mudimu?
MMUNYI muutu umvua patu muena mudimu nebe anyi mulongi wenu ukuela nkonko ya malu a mu Bible? Utu umvua buôwa anyi? Ba bungi ba kutudi batu babumvua. Nkonko ya nanku idi mua kukuambuluisha bua kumanya tshidi mu meji a udi ukuelaye ne kukupepejila malu bua kumuyisha. Kadi kudi misangu idi muntu mua kukuela nkonko ayi anu bua nukokangane nende. Kabitukemeshi to. Mu bulelela, mbambile bamue bantu malu a mafi adi atangila malongesha etu. (Bien. 28:22) Kupita apu, tudi mu “matuku a ku nshikidilu” adi bantu ba bungi “kabayi ne lungenyi lua kumvuangana” ne bikale mene “bena luonji.”—2 Tim. 3:1, 3.
2. Bua tshinyi mbimpe tuetu bonso tuikale bena bupole?
2 Udi mua kudiebeja ne: ‘Mmunyi mundi mua kushala muena malu malenga padi muntu ungela nkonko ya malu a mu Bible ne meji a tukokangane nende?’ Bupole ke buakuambuluisha. Muena bupole utu ushala mutukije padibu bamubunda anyi padiye kayi ne diandamuna dia kufila. (Nsu. 16:32) Kadi udi mua kudiambila ne: ‘Kuamba nkupepele’s, kadi kuenza nkukole.’ Mmunyi muudi mua kuikala muena bupole? Mmunyi muudi mua kuandamuna ne bupole padi muntu usendeka malongesha a mu Bible? Biwikala muledi, mmunyi muudi mua kuambuluisha bana bebe bua bikale ne bupole padibu bakuila ditabuja diabu? Tumonayi.
MUA KUIKALA MUENA BUPOLE
3. Bua tshinyi tudi tuamba ne: kuikala muena bupole ki nkutebelela? (2 Timote 2:24, 25)
3 Bupole ki nditebelela to, kadi mbukole. Bitu bikengela kuikala ne bukole bua kushisha kutukija kumpala kua lutatu. Bupole ntshibadi tshia “dimuma dia nyuma.” (Gal. 5:22, 23) Kuvua misangu ivuabu batela muaku wa mu tshiena Greke udibu bakudimune ne: “bupole” bua kuleja kabalu ka luonji kadibu bibidije bua kusomba ne bantu. Nansha mukadiku kasomba bimpe ne bantu kadi anu ne bukole. Nanku mmunyi mutudi mua kuikala bena bupole kadi bikale anu ne bukole? Kabiakuenzeka ku bukole buetu to. Tudi ne bua kulomba Nzambi nyuma muimpe bua tuikale bena bupole. Kudi bantu ba bungi badi balue bena bupole pavuabu basambile. Tshilejilu, bana betu ba bungi mbenze malu ne bupole pavua baluishi betu babayobole, bienze bua bakuabu bamone Bantemu mu mushindu muimpe. (Bala 2 Timote 2:24, 25 dim.) Mmunyi muudi mua kuleja bukole bua dienza malu ne bupole?
4. Mushindu uvua Izaka muenze malu ne bupole udi utulongesha tshinyi?
4 Bible udi uleja mushinga wa kuikala bena bupole. Tuakulabi bua Izaka. Pavuaye musombele mu Gelâ mu buloba bua bena Peleshete, benamu bavua bamumvuila mukawu bakajibikila bina bia mâyi bivua bena mudimu ba tatuende bumbule. Kadi kakakokangana nabu to, wakamuangala ne dîku diende kuyaye muaba wa kule wakayaye kumbula bîna bikuabu bia mâyi. (Gen. 26:12-18) Kadi bena Peleshete kutuadija kuamba ne: bina bia mâyi bivua muaba au bivua kabidi biabu. Izaka wakumbukaku kabidi bua kulama ditalala. (Gen. 26:19-25) Ntshinyi tshivua tshienze bua enze malu ne bupole nansha muvua bantu abu badisuike anu bua kumukeba bilumbu? Pamuapa uvua mumone muvua tatuende Abalahama ukeba ditalala ne bakuabu ne muvua mamuende Sala ne “meji a ditalala ne mapole.”—1 Pet. 3:4-6; Gen. 21:22-34.
5. Mbualu kayi budi buleja ne: baledi badi mua kulongesha bana babu bua bikale bena bupole?
5 Nuenu baledi, ikalayi bamanye ne: nudi penu mua kuambuluisha bana benu bua bikale bena bupole. Tuakulabi bua Maxence udi ne bidimu 17. Uvua utuilangana ne bantu ba tshiji mu kalasa ne mu buambi. Baledi bende bavua nende lutulu, bamulongesha bua ikale muena bupole. Badi bamba ne: “Maxence mmufike ku dijingulula ne: muntu udi ne bukole udi udikanda kayi wenza malu ne tshiji anyi ne tshikisu padibu bamuyobole to.” Bia diakalenga, Maxence mmulue muena bupole.
6. Mmunyi mudi disambila mua kutuambuluisha bua tuikale bena bupole?
6 Kadi ntshinyi tshitudi ne bua kuenza padi muntu upenda Yehowa anyi usendeka Bible? Mbimpe tulombe Yehowa nyuma wende bua tupete meji a kumuandamuna ne bupole. Kadi tshia kuenza ntshinyi tuetu balue kumona ne: katuvua bamuandamune muvuabi bikengela? Mbimpe tusambile kabidi bua bualu abu ne tuelangane meji a mutudi mua kuandamuna muntu bimpe musangu walonda. Dîba adi, Yehowa neatupeshe nyuma muimpe bua tuikale tudikanda ne tuenza malu ne bupole.
7. Bua tshinyi kukuata mvese ku muoyo kudi kutuambuluisha bua kudikanda mu nsombelu mikole? (Nsumuinu 15:1, 18)
7 Kudi mvese ya bungi idi mua kutuambuluisha padibi bikole bua kuandamunangana ne bupole. Nyuma wa Nzambi udi mua kutuvuluijayi. (Yone 14:26) Tshilejilu, mêyi manene adi mu mukanda wa Nsumuinu adi mua kutuambuluisha bua tuikale bena bupole. (Bala Nsumuinu 15:1, 18.) Mukanda wa Nsumuinu au udi kabidi uleja mudibi bimpe bua kudikanda padibu batubunda.—Nsu. 10:19; 17:27; 21:23; 25:15.
BUSUNGULUJI BUDI BUTUVUIJA BENA BUPOLE
8. Bua tshinyi mbimpe tuetu kumanya tshidi tshisake muntu ku disendeka malongesha etu?
8 Busunguluji budi pabu butuambuluisha. (Nsu. 19:11) Muntu udi ne busunguluji udi udikanda padibu basendeka malongesha a mu Bible. Misangu ya bungi itu bantu batuela nkonko, kabatu batuambila tshidibu batuelelayi to. Nanku kumpala kua kubandamuna, katupu muoyo ne: katuena bamanye tshidi tshibasake bua kutuelayi to.—Nsu. 16:23.
9. Mmunyi muvua Gideona muenze malu ne busunguluji ne bupole pavua bena Efelayima bamutandisha?
9 Tumonayi muvua Gideona muandamune bena Efelayima. Bakamutandisha ne tshiji bua muvuaye kayi mubabikile pavuaye muye kuluangana ne baluisha babu. Kadi bua tshinyi bavua bumvue tshiji nanku? Bavua pamuapa badimone bedibue mâyi ku makasa anyi? Nansha biobi nanku anyi kabiyi nanku, Gideona wakenza malu ne busunguluji, kudienzejaye bua kujingulula bua tshinyi bivua bibatonde nanku ne kubandamunaye ne bupole. Bible udi wamba ne: pakakulaye mushindu au, “bakatukija.”—Bal. 8:1-3.
10. Mmunyi mutudi mua kumanya mua kuandamuna bantu badi bakula bibi bua malongesha etu? (1 Petelo 3:15)
10 Muena mudimu netu anyi mulongi wetu udi mua kutuebeja bua tshinyi tudi tutumikila mikenji ya mu Bible. Mbimpe tumumvuije bua tshinyi tudi tuitaba ne: kuyitumikila kudi ne mushinga wa bungi, tunemeka kabidi mmuenenu wende. (Bala 1 Petelo 3:15.) Katuedi meji ne: mmutuele lukonko alu bua kutusendeka to, kadi tulumone bu mpunga wa kumulongesha. Nansha yeye mutuelalu ne meji kayi, tumuandamune anu ne bupole. Bidi mua kuenza bua akajilule mmuenenu wende. Nansha yeye mutuelalu kayi ne bukalanga, tumuandamune anu ne bupole.—Lomo 12:17.
Wewe muanji kuela meji a tshidi tshisake muntu bua kukubikila mu difesto dia diledibua, neumuandamune bimpe (Tangila tshikoso 11-12)
11-12. a) Tshia kuenza ntshinyi kumpala kua kuandamuna lukonko lukole? (Tangila kabidi tshimfuanyi.) b) Leja mudi lukonko ludi muntu mutuele mua kutufikisha ku diyukila nende bimpe?
11 Tshilejilu, muena mudimu netu yeye mutuebeje bua tshinyi katutu tusekela matuku a diledibua, tudiebeje ne: Udi mua kuikala udiambila ni ki mbatuanyishile bua kuikala ne bikondo bia kusanka anyi? Peshi udi umona ne: patudi katuyi tusekelela mifikilu eyi tudi tubapangisha bua kuyisekelela badilekelele? Tudi mua kumuambuluisha bua kapitshi kusamishila bualu abu mutu tuetu bamuleje ne: tudi ne dianyisha dia bungi bua mudiye uditatshisha bua bena mudimu nende bakuabu, ne bamujadikile ne: tutu petu basue kupitshisha bikondo bia disanka ku mudimu. Kuenza nanku nekutufikishe ku diyukila nende badilekele bua tshidi Bible uleja bua disekelela matuku a diledibua.
12 Ke tshitudi kabidi mua kuenza padibu batuela nkonko mikuabu mikole. Mulongi wetu udi mua kuamba ne: Bantemu ba Yehowa badi ne bua kuakaja tshidibu bamba bua bantu badi balala ne bantu ba mubidi umue nabu. Udiku wamba nanku bualu ki mmumanye menemene tshidi Bantemu ba Yehowa bamba bua bualu abu anyi? Peshi bualu mulela anyi mulunda wende utu ulala ne bantu ba mubidi umue nende? Udiku wela meji ne: tudi bakine bantu abu anyi? Mbimpe tumujadikile ne: tudi banange bantu bonso ne tutu tunemeka dipangadika dia muntu yonso. b (1 Pet. 2:17) Dîba adi, tudi mua kumuleja tshidi Bible wamba ne mudi kutshitumikila kutuambuluisha bonso.
13. Mmunyi muudi mua kulongesha muntu udi wakula bibi bua badi bitaba ne: Nzambi utuku?
13 Muntu yeye mubenge bionso bitudi tuamba, katuambi diakamue ne: tudi bamanye tshidi mu meji ende to. (Tito 3:2) Tshilejilu, mulongi wenu udi mua kuamba mudi kuitaba ne: Nzambi utuku kuikale kubula kua meji. Mbikumbane bua kuamba ne: utu witaba dilongesha dia bintu bidienze ne mmudimanye bimpe anyi? Udi mua kuikala anu wambulula patupu malu adibu bamuambile pende. Pamutu pa kutuadija kukokangana nende bua dilongesha adi, udi mua kumutumina lien wa tshiena-bualu tshidi tshiakula bua bufuki tshidi mu jw.org. Pamuapa nealue kuitaba bua nuakuile tshiena-bualu anyi filme udimu. Wewe mumuleje kanemu mu mushindu au, pamuapa neapete dijinga dia kulonga malu a bungi a tshidi Bible wamba.
14. Mmunyi muvua Niall muambuluishe mulongi wabu ne site wetu bua amanye ne: malu adibu bamba bua Bantemu ba Yehowa nga dishima?
14 Niall utshidi nsonga utu utuma bantu mu site wetu bua kubaleja ne: bidi bamue bantu bamba bua Bantemu ba Yehowa ki mbilelela to. Udi wamba ne: “Mulongi wetu mukuabu utu upita kungamba mundi tshiyi ngitaba malu a sianse bualu ntu ngitaba malu a mu Bible mukanda wa mianu.” Bu muvuaye kayi muanyishile Niall bua amumvuije malu a mu Bible, Niall wakamutuma mu site wa jw.org mu tshitupa tshia “Malu a sianse ne Bible.” Niall wakalua kumona ne: mulongi wabu au uvua mubale malu adimu, ke yeye kupeta mushindu wa kumuleja muakafukibua bintu bionso. Udi pebe mua kupeta bipeta bia muomumue.
NUDILONGOLOLE MU DÎKU
15. Mmunyi mudi baledi mua kulongesha bana babu bua bikale ne bupole padibu bandamuna balongi babu badi basendeka malongesha etu?
15 Baledi badi mua kulongesha bana babu bimpe bua bikale ne bupole padibu bandamuna muntu udi usendeka malongesha a mu Bible. (Yak. 3:13) Bamue baledi batu benza manaya a mua kuandamunangana nanku mu ntendelelu wa mu dîku. Batu bakula nabu bua malu adibu mua kutuilangana nawu mu kalasa, babaleja mua kuandamuna, ne babalongesha mua kuakula ne bupole.—Tangila kazubu ka “ Kudilongolola nekuambuluishe dîku dienu.”
16-17. Ntshinyi tshidi kudilongolola mu dîku mua kuenzela bansonga?
16 Kudilongolola nekuambuluishe bansonga bua bikale batuishibue ne malongesha adibu bitabuja ne bumvuije bakuabu tshidibu baitabila. Mu tshitupa tshia “Nkonko idi bansonga badiela” tshidi mu jw.org mudi “Fishi ya kuelangana meji bua bansonga.” Tshitupa atshi ntshienza bua bakoleshe dishindika diabu ne balongolole tshia kuamba mu abu mêyi. Nuenu nukonkonona malu adimu mu dîku, nenumanye mua kuakuila ditabuja dienu ne bupole buonso.
17 Matthieu utshidi nsonga udi umvuija mudi kudilongolola mu dîku kumuambuluishe. Patubu benza ntendelelu wa mu dîku, yeye ne baledi bende batu benza makebulula a malu atuye utuilangana nawu mu kalasa. Udi wamba ne: “Tutu tukeba mandamuna a nkonko idibu mua kungela ne tuenza manaya a mua kuyandamuna bilondeshile makebulula atuvua benze. Pantu ngumvua dilongesha kampanda dia mu Bible bimpe, ntu ndimona mukumbane bua kuandamuna nkonko yonso idibu mua kungela, nyandamuna ne bupole.”
18. Kolosayi 4:6 udi uleja mushinga udi nawu tshinyi?
18 Nansha tuetu bumvuije bantu malu mu mushindu udi ubitabijija, ki mmuntu yonso witaba bitudi tuamba to. Kadi tuetu ne bukalanga ne bupole, badi mua kuitaba. (Bala Kolosayi 4:6.) Kuleja muntu malongesha a mu Bible kudi anu bu kumukupila ndundu. Tudi mua kumukupilayi bimpe anyi kumuasayi. Tuetu bamukupilayi bimpe, udi mua kumuakidila ne kutungunuka ne dinaya. Bia muomumue, tuetu tuakula ne bantu ne bukalanga ne bupole, badi mua kututeleja ne kuitaba bua tutungunuke ne muyuki. Kadi muntu yeye ujinga kukokangana netu anyi kusendeka bitudi tuamba, mbimpe tuimanyike muyuki. (Nsu. 26:4) Mu bulelela, ki mbantu bonso benza nanku to, ba bungi nebatuteleje.
19. Ntshinyi tshidi ne bua kutusaka bua kuikala bena bupole patudi tuakuila ditabuja dietu?
19 Mbimueneke patoke ne: tuetu tudienzeja bua kuikala ne bupole, nebituambuluishe bikole. Nanku sambila bua Yehowa akupeshe bukole bua wikale anu muena bupole paudi wandamuna nkonko mikole peshi paudi uleja muntu ne: bidiye mumvue bua Bantemu ba Yehowa mbia dishima. Vuluka ne: muena bupole kena mua kukokangana ne muntu udi ne mmuenenu mushilangane ne wende to. Kuandamunangana ne kanemu ne bupole nekusake bamue badi bakuteleja bua batuadije kutumona mu mushindu muimpe ne kuitaba malongesha adi mu Bible. Ikala ‘mudiakaje misangu yonso’ bua kuakuila malongesha adi mu Bible, kadi ‘wenza nanku ne bupole ne kanemu kakole.’ (1 Pet. 3:15) Eyowa, enza bua bupole buikale bukole buebe!
MUSAMBU WA 88 Mmanyisha njila yebe
a Mu tshiena-bualu etshi mudi ngenyi ya mua kuakuila ditabuja dietu ne bupole padi bantu batuela nkonko anyi basendeka malongesha a mu Bible.
b Bua kumanya tshia kuamba, tangila tshiena-bualu tshia “Que dit la Bible au sujet de l’homosexualité?” tshidi mu Tabalayi wa No. 4/2016.
c Udi mua kupeta ngenyi ya mushinga mu jw.org mu tshitupa tshia “Nkonko idi bansonga badiela” ne tshia “Nkonko itu bantu batamba kuela bua Bantemu ba Yehowa.”
